2 Na-mɩnɛ 20 - A SƐB-SÕW

A Ezekɩasɩ bàalʋ nɩ a ʋ sanʋ

¹ A ʋlɩ daar nɛ, a nãà Ezekɩasɩ tɩ lo n a ʋ kũu-kʋra bàalʋ. A naaŋmɩn-ƴɛ̀r-manɛ Ɩzayi, Amɔtɩsɩ bidɛb, tɩ wa na wa nyɛ̃ ʋ yel ʋ: «À ŋá n'a a Sore yere: Cɔbrɩ a fʋ yele, bʋ̃ʋ n'ʋ vɛ̃, fʋ na kpi na, fʋ bɛ lɛbr ìre a fʋ bàalʋ ŋa pʋɔ ɩ.»

² Lɛ n'a a Ezekɩasɩ tɩ lɩɛbɩ a ʋ niwn bɛr a dacin lowr, ɛ́ puori a Sore à ŋá:

³ «'Woi! Sore e, ɩ̃ zɛlɛ fʋ na, bãwnɩ a a ɩ̃ ɩb za a fʋ zie na tɩ tori a. Ɩ̃ tɩ ɩ n a lɛ na vɩɛl a fʋ zie a, kʋralɛ!» A Ezekɩasɩ tɩ kõ na cir mʋta-kʋ̃ɔ yaga.

⁴ A Ɩzayi bɛ tɩ ta a nãà yir davʋra pʋɔ sɛr ɛ, ɛ́ a Sore yel ʋ

⁵ k'ʋʋ lɛb cen a Naaŋmɩn nɩ-bʋʋrɛ nɩ-kpɛ̃ɛ, Ezekɩasɩ zie, tɩ yel ʋ: «À ŋá n'a a Sore, a fʋ sãàkʋm-kʋra Daviir Naaŋmɩn, yere: “Ɩ̃ wõ n a fʋ puoru ɛ́ nyɛ̃ a fʋ mʋta-kʋ̃ɔ. Ɩ̃ na sanɩ fʋ na. Ka nɩ bibie ata a, fʋ na tʋ̃ɔ́ na mɩ́ lɛb cen a Sore Ŋmɩn-yir-kpɛ̃ɛ́.

⁶ Ɩ̃ na dɔwl'ɩ yome pie nɩ anũu a fʋ nyɔ-vʋʋrʋ zu. Ɩ̃ na faa nɩ fʋ̃ʋ nɩ a Zerizalɛm a Asiiri tẽw nãà nuru pʋɔ. Ɩ̃ na gù n a tẽ-kpɛ̃ɛ ŋa, ɩ̃ na ɩ Naaŋmɩn, ɛ́ tu a ɩ̃ tõ-tõ-bie Daviir a ƴãw.”»

⁷ A Ɩzayi tɩ ƴãw na bɛ ƴɛ̀r kãkamɛ bu. Bɛ tɩ ɩ na ƴãw a wʋlʋ ƴãw, k'aa nãà tʋ̃ɔ́ sanɩ.

⁸ A Ezekɩasɩ tɩ sowr'ɩ a Ɩzayi: «Bãwfʋ buor'ʋ na ɩ ɩ̃ bãw k'ɩ̃ɩ na sanɩ na, nɩ kɛ́ ka nɩ bibie ata, ɩ̃ na tʋ̃ɔ́ na mɩ́ lɛb cen a Sore Ŋmɩn-yir-kpɛ̃ɛ́?»

⁹ A Ɩzayi tɩ sɔw na: «A bãwfʋ n'ɩ ŋa na na ɩ fʋ bãw k'aa Sore na ɩ n a lɛ ʋ na yel a: a ɓaarʋ na lɩɛb'a pàw a Akaazɩ dɛr-mimie pie: fʋ bɔbr'a k'ʋʋ lɩɛbɩ tɔl nidaa bɩɩ ʋ tɩ̃wnɩ pùor?»

¹⁰ A Ezekɩasɩ tɩ sɔw na: «A ɓaarʋ na na lɩɛbɩ tɔl nidaa dɛr-mimie pie a, a ɩ n mɔlɛ, ʋ lɩɛbɩ tɩ̃wnɩ pùor.»

¹¹ Lɛ n'a a naaŋmɩn-ƴɛ̀r-manɛ Ɩzayi tɩ puori a Sore, ʋ ɩ a ɓaarʋ lɛb tɩ̃wnɩ pùor dɛr-mimie pie.

A Ezekɩasɩ de nɩ a Babɩlɔn tẽw nãà nɩbɛ sãanʋ

¹² A ʋlɩ daar nɛ a, a Babɩlɔn tẽw nãà, Baladan bidɛb, Merodakɩ-Baladan, tɩ wõ na k'aa Ezekɩasɩ tɩ lo n bàalʋ ɛ́ lɛb ír. Lɛ n'a ʋ tɩ tõ nɩbɛ a ʋ zie nɩ sɛb-tʋɔla nɩ bʋ̃-kʋ̀ra.

¹³ A bɛ waa tɩ ɩ n a Ezekɩasɩ nʋ̃ɔ̀, ʋ wul bɛ a ziir al za ʋ na ƴãw a ʋ bʋ̃-vɩɛlɩ vɩɛlɩ a, a salm-pla, a salm-zɩɛ, a tʋrali, nɩ a kãá-nyuure. Ʋ mɩ̀ tɩ wul bɛ nɩ a ziir al ʋ na bin a ʋ zɛbr bome a, nɩ a alɩ bome nɛ za na tɩ be a ʋ bʋ̃-bini binu ziir a. Bom bɛ tɩ cɛ a ʋ yir nɩ a ʋ naalʋ-tẽw za pʋɔ, ʋ bɛ wul bɛ ɩ.

¹⁴ A pùorí, a naaŋmɩn-ƴɛ̀r-manɛ Ɩzayi tɩ wa na wa páw a Ezekɩasɩ sowr'ʋ: «Bʋ̃ʋ n'ʋ a nɩbɛ bɛ ŋa yel kʋ̀ b? Nyɩnɛ n'a bɛ nɩ̃ɛ yi wa?» A Ezekɩasɩ tɩ sɔw na: «Tẽ-zãána n'a be yi wa, Babɩlɔn tẽw.»

¹⁵ A Ɩzayi lɛb yel: «Bʋ̃ʋ n'ʋ bɛ nyɛ̃ a fʋ yir pʋɔ?» A Ezekɩasɩ yel: «Bom za na be a yir pʋɔ a, bɛ nyɛ̃ ʋ na. Bom bɛ cɛ a ɩ̃ na-bome pʋɔ ɩ̃ bɛ wul bɛ ɩ.»

¹⁶ Lɛ n'a a Ɩzayi tɩ yel a Ezekɩasɩ: «Wone a lɛ a Sore na yere a:

¹⁷ “Bibir kãw, a bome al za na be a fʋ yir pʋɔ a, a bome a na-mɩnɛ na de fʋ niwn a na bɔ gbõ taa a, a za na cen nɩ a Babɩlɔn. Bom za bɛ cãà bere a ka ɩ, a Sore n'ʋ yere.

¹⁸ Bɛ na tɛr'ɩ a fʋ bʋ̃-dɔwrɩ bɛ mɩnɛ cen nɩ a be, bɛ tɩ ɩ dɛ-vaɩ a Babɩlɔn tẽw nãà yir pʋɔ.”»

¹⁹ A Ezekɩasɩ tɩ sɔw nɩ a Ɩzayi: «A Sore ƴɛ̀rʋ ŋa fʋ na ƴɛ̀rɛ kʋ̀rɛ mɛ̃ a ɩ n ƴɛ̀r-vla.» Bʋ̃ʋ n'ʋ vɛ̃, ʋ tɩ tɩɛrɛ nɩ ʋ pʋɔ à ŋá: «A ɩ̃ cãafʋ daar a, a na ɩ n ƴã-ɓaarʋ, nɩ zie na gã zoom a.»

²⁰ A Ezekɩasɩ yele al na cɛ a, a ʋ gãda-tome za, a alɩ bome nɛ ʋ na ɩ a, a kʋ̃ɔ ƴãwfʋ zie ʋ na mɛ a, nɩ a bɔw ʋ na wɛr k'ʋʋ tʋ̃ɔ́ taw a kʋ̃ɔ wa n a tẽ-kpɛ̃ɛ pʋɔ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

²¹ A Ezekɩasɩ na wa kpi cen tɩ páw a ʋ sãà mɩnɛ a, a ʋ bidɛb Manase n'ʋ lɩɛr'ʋ dɩ a naalʋ.