2 Na-mɩnɛ 18 - A SƐB-SÕW

A ZUDA NAALƲ-TẼW NA-MƖNƐ 18—25 A Zuda tẽw nãà Ezekɩasɩ

¹ A Ɩsɩrayɛl tẽw nãà, Ela bidɛb, Oze, naalʋ-dɩb yome ata sob'a a Akaazɩ bidɛb, Ezekɩasɩ, tɩ lɩɛbɩ a Zuda tẽw nãà.

² Ʋ tɩ tɛr'ɩ yome lɩzɛr'ɩ anũu, ɛ́ dɩ a naalʋ yome lɩzɛr'ɩ piwaɩ a Zerizalɛm. A mã tɩ dɩ na kɛ́ Avi, ɛ́ ɩ Zekarɩa pɔwyaa.

³ A Ezekɩasɩ tɩ ɩ n a lɛ na vɩɛl a, a Sore zie, mɛ̃ a lɛ tɔr za a ʋ sãàkʋm-kʋra Daviir na tɩ ɩ a.

⁴ Ʋlɛ n'ʋ tɩ diw a maalʋ-ziir bɛr, ŋmɛr a kʋsɛ-teli bɛr, ɛ́ cɛ̀ a dà-barɩ ŋma. Ʋ mɩ̀ tɩ ƴãw na bɛ ŋmɛr a kur-zɩɛ waab a Moyiir na tɩ maalɩ a bɛr. Bʋ̃ʋ n'ʋ vɛ̃, wa tɩ tɔ a lɛn daar a, a Ɩsɩrayɛl nɩbɛ tɩ nyɩwr'ɩ tɩ-suur-zɔ̃-na-nyùur-vla-vla-a, a waab ŋa bɛ na tɩ bʋɔlɛ kɛ́ Nehusɩtan a ƴãwfʋ ƴãw.

⁵ A Ezekɩasɩ tɩ ƴãw nɩ a ʋ tɩɛrʋ a Sore, a Ɩsɩrayɛl Naaŋmɩn ƴãw, zuo a Zuda tẽw na-mɩnɛ bɛl za na de ʋ niwn dɩ a naalʋ a, bɩɩ na dɩ a naalʋ a ʋ pùorí a.

⁶ Ʋlɛ nɩ a Sore tɩ nɛbɛ kʋralɛ, ʋ bɛ zawrɩ ʋ bɛr ɛ. Ʋ tɩ sàw nɩ a nɛ-ƴãwnɩ a Sore na kʋ̀ a Moyiir a.

⁷ A Sore tɩ be n a Ezekɩasɩ zie, kɛ̀ bom za ʋ na ɩrɛ a tuur ʋ. A Ezekɩasɩ bɛ tɩ cãà sàw a Asiiri tẽw nãà nɩ-kpɛ̃ɛnʋ a ʋ zu ɛ, bɛ cãà sàw ʋ so ʋ ɛ.

⁸ Lɛb waar, ʋ tɩ zɛb'a tʋ̃ɔ́ a Filisɩtɛ̃ mɩnɛ, diw bɛ tɩ sãá nɩ Gaza vuo pʋɔ, ɛ́ zɛb de tẽw piwru zi-kɛrɩ nɩ tẽ-bɛrɛ bɛ na cɔbrɩ a kpɛmɛ a zɛbr ƴãw a.

A Samaari tẽw zɛb-deb yúor na lɛb por a

⁹ A Ezekɩasɩ naalʋ-dɩb yome anaar sob, na tɩ ɩ a Ɩsɩrayɛl tẽw nãà, Ela bidɛb, Oze, naalʋ-dɩb yome ayopõi sob a, a Asiiri tẽw nãà, Salmanasaar, tɩ wa na wa piw a Samaari tẽw.

¹⁰ A tɩ maal'ɩ yome ata, ʋʋ zɛb de a tẽw. A Zuda tẽw nãà, Ezekɩasɩ, naalʋ-dɩb yome ayʋɔb sob, nɩ a Ɩsɩrayɛl tẽw nãà, Oze, naalʋ-dɩb yome piwaɩ sob tɩ n'a.

¹¹ A Asiiri tẽw nãà tɩ diw nɩ a Ɩsɩrayɛl naalʋ-tẽw nɩbɛ cen nɩ a Asiiri, tɩ ƴãw bɛ zɩ̃ Hala vuo pʋɔ, nɩ Gozan vuo pʋɔ a Habɔɔr man na tɔlɛ a, nɩ a Medi tẽ-bɛrɛ pʋɔ.

¹² À á ŋá za tɩ ɩ na, a Ɩsɩrayɛl nɩbɛ na bɛ tɩ bɛr wõ a lɛ a Sore bɛ Naaŋmɩn na yel a ƴãw, nɩ bɛ na bɛ tɩ tu a ʋ wõ-taa pùor a ƴãw. Bɛ bɛ tɩ bɛr wõ ɛ́ tu a nɛ-ƴãwnɩ a Sore tõ-tõ-bie Moyiir na tɩ tɩr a ɩ.

A Asiiri tẽw nãà, Senakerib, wa na k'ʋʋ wa zɛb'ɩ a Zuda naalʋ-tẽw

¹³ A Ezekɩasɩ naalʋ-dɩb yome pie nɩ anaar sob, a Asiiri tẽw nãà, Senakerib, tɩ wa na wa zɛb'ɩ a Zuda naalʋ-tẽw tẽ-bɛrɛ bɛ na cɔbrɩ a kpɛmɛ a zɛbr ƴãw a, zɛb de a.

¹⁴ Lɛ n'a a Zuda tẽw nãà, Ezekɩasɩ, tɩ tõ bɛ tɩ yel a Asiiri tẽw nãà na tɩ be Lakisɩ a: «Ɩ̃ sãw na! Ta zɛb'ɩ mɛ̃ ɩ. Ɩ̃ na ya n a san fʋ na na ŋmãa kʋ̀ m a.» A Asiiri tẽw nãà tɩ ŋmãa nɩ salm-pla kilo tùr-piwaɩ (9 000) nɩ salm-zɩɛ kilo kɔbr awaɩ (900) san kʋ̀ a Ezekɩasɩ.

¹⁵ A Ezekɩasɩ tɩ tɩr'ɩ a libie za na tɩ be a Sore Ŋmɩn-yir-kpɛ̃ɛ pʋɔ a, nɩ a al na tɩ be a nãà yir na-bome dĩó a.

¹⁶ A mɔ̃ mɩ̀ tɩ fɛr'a ʋ 'lawrɩ a salm-zɩɛ, ʋ na tɩ ƴãw bɛ nyɩl pàw a Ŋmɩn-yir-kpɛ̃ɛ pamɛ nɩ a dɩ̃dɛɛ dàar a, ʋ tɩr kʋ̀ a Asiiri tẽw nãà.

A Senakerib sojarɩ nɩ-kpɛ̃ɛ ƴɛ̀rʋ

¹⁷ A Asiiri tẽw nãà tɩ be n a Lakisɩ, ɛ́ tõ a sojarɩ nɩ-kpɛ̃ɛ kpɛ̃ɛ za, a sojarɩ nɩ-bɛrɛ lãw nɩ-kpɛ̃ɛ, nɩ a sojarɩ nɩ-kpɛ̃ɛ ʋl na mɩ́ be a nãà zie a, a nãà Ezekɩasɩ zie a Zerizalɛm. Ʋ tɩ tõ bɛ na lãwnɩ zɛbr-nɩbɛ na yãwmɛ a. Bɛ na tɩ ta a Zerizalɛm a, bɛ àr'a pɩɛlɩ a bɔw-wɛra kʋ̃ɔ ƴãwfʋ zie ʋl na be a saa-zu a, a sɔ́r na cere a Fɔbr-pɛwrbɛ pu-pʋɔ a zu.

¹⁸ Bɛ tɩ yel'a kɛ́ bɛ bɔbr'a kɛ́ bɛ ƴɛ̀r a nãà zie. Ɛcɛ Hɩlkɩahu bidɛb, Elɩakɩm, na ɩ a nãà yir nɩ-kpɛ̃ɛ a n'ʋ tɩ yi tuori bɛ, ʋlɛ nɩ a sɛ-sɛbrɛ Sevina nɩ Asafʋ bidɛb, Yoa, na mɩ́ ƴɛ̀rɛ a nãà yúor ƴãw a.

¹⁹ A Asiiri tẽw dem sojarɩ nɩ-kpɛ̃ɛ, na mɩ́ be a nãà zie a, tɩ yel bɛ na: «Nyɩ cen tɩ ƴɛ̀r a Na-kpɛ̃ɛ, a Asiiri tẽw nãà, ƴɛ̀rʋ ŋa kʋ̀ a Ezekɩasɩ: “Bʋnʋ ƴãw n'a fʋ ƴãw a fʋ tɩɛrʋ?

²⁰ Fʋ tɩɛrɛ kɛ́ ƴɛ̀rʋ tɛwr na tʋ̃ɔ́ na ɩ zɛbr pɔ̀lɛ́ nɩ kanyir, a zɛbr ƴãw bɩɩ? Anʋ ƴãw n'a fʋ ƴãw a fʋ tɩɛrʋ sʋ̃ɔmɩ bɛ cãà sàwr a ɩ̃ nɩ-kpɛ̃ɛnʋ a fʋ zu?

²¹ A Eziptɩ tẽw ƴãw n'a fʋ ƴãw a fʋ tɩɛrʋ, a bàa-kɛkɛr-kaba ŋa na mɩ́ nyɩ̀r sob nɛ za, na mɩ́ yel k'ʋʋ nyɔw ʋ kɛ́ àr a, nũú a. À ŋá n'a a Eziptɩ tẽw nãà, Faarawɔ̃, ŋmɛ̃ a bɛlɩ dem za na mɩ́ ƴãw a bɛ tɩɛrʋ a ʋ ƴãw a zie!

²² Ɛcɛ mɛ̃ nyɩ taa na yel mɛ̃ k'aa Sore nyɩ Naaŋmɩn ƴãw n'a nyɩ ƴãw a nyɩ tɩɛrʋ. Ɛcɛ a fʋ̃ʋ Ezekɩasɩ tɔr za n'ʋ ír a ʋ maalʋ-ziir, nɩ a ʋ bàwr-maal-kube bɛr, ɛ́ yel a Zerizalɛm nɩ a Zuda tẽw dem, k'aa Zerizalɛm bàwr-maal-kuur ŋa yõ niŋé n'a bɛ na puore a Sore.

²³ Ƴɛrɛŋa a, ɩ fʋ̃ʋ nɩ a ɩ̃ nɩ-kpɛ̃ɛ, a Asiiri tẽw nãà, nyɩ pɔ cier taa: ɩ̃ na kʋ̀ b'ɩ wie túr-ayi (2 000), fʋ̃ʋ na na tʋ̃ɔ́ nyɛ̃ wi-zɔmnbɛ bɛ zɔm a a.

²⁴ Fʋ̃ʋ n'ɩ ŋan kʋ̃ tʋ̃ɔ́ ɩ a ɩ̃ nɩ-kpɛ̃ɛ tõ-tõ-bi-pʋrɩ woro kãw ʋ lɩɛb zɔ ɩ! Ɛ́ fʋ ƴãw a fʋ tɩɛrʋ Eziptɩ tẽw ƴãw, kɛ́ fʋ tʋ̃ɔ́ páw zɛbr-torkori nɩ wie!

²⁵ Ɛ́ lɛb waar, a ɩ̃ nɩ-kpɛ̃ɛ wa na k'ʋʋ wa zɛb'ɩ a tẽw ŋa ɛ́ sãw ʋ bɛr, ɛ́ a bɛ ɩ a Sore n'ʋ bɔbr a lɛ bɩɩ? A Sore mɩŋa n'ʋ ƴãw a nʋɔr kʋ̀ ʋ.”»

²⁶ Lɛ n'a a Hɩlkɩahu bidɛb, Elɩakɩm, a Sevina nɩ a Yoa tɩ yel a Asiiri tẽw dem sojarɩ nɩ-kpɛ̃ɛ, na mɩ́ be a nãà zie a: «Tɩ zɛlɛ fʋ na, ƴɛ̀rɛ nɩ tɩ arameyɛ̃, tɩ wone a na. Ɛcɛ ta ƴɛ̀rɛ nɩ tɩ ebre ɩ, a nɩbɛ na be a dacin zu na bɛrɛ wone a tɩ ƴɛ̀rʋ a ƴãw.»

²⁷ Ɛcɛ a sojarɩ nɩ-kpɛ̃ɛ, na mɩ́ be a nãà zie a, tɩ sɔw bɛ na: «Nyɩ tɩɛrɛ k'aa nyɩ nɩ-kpɛ̃ɛ nɩ a nyɩɩm tɛwr so a ɩ̃ nɩ-kpɛ̃ɛ ƴɛ̀rʋ bɩɩ? A nɩbɛ bɛ ŋa za na be a dacin zu, ɛ́ kʋ̃ yaa kɛ́ dɩrɛ a bɛ bine, nyúur'ɩ a bɛ dʋ́rʋ, mɛ̃ a nyɩɩm a, bɛlɛ mɩ̀ so a ƴɛ̀rʋ!»

²⁸ Al pùorí, a sojarɩ nɩ-kpɛ̃ɛ, na mɩ́ be a nãà zie a, tɩ ìr'a àr ɛ́ yel'ɩ kɔkɔ-kpɛ̃w nɩ a ebre: «Nyɩ bɛrɛ wone a Na-kpɛ̃ɛ, a Asiiri tẽw nãà, ƴɛ̀rʋ:

²⁹ “Nyɩ ta ɩ a Ezekɩasɩ bɛ̀lɛ nyɩ ɛ: ʋ kʋ̃ tʋ̃ɔ́ faa nyɩ a ɩ̃ nuru pʋɔ ɩ.

³⁰ Ʋ yel kɛ́ nyɩ ƴãw a nyɩ tɩɛrʋ a Sore ƴãw, k'aa bɛ tɛr à ŋá ɩ, ʋʋ na faa nyɩ na, k'aa tẽ-kpɛ̃ɛ ŋa bɛ lore a Asiiri tẽw nãà nuru pʋɔ ɩ. Nyɩ ta sàw ɛ.

³¹ Nyɩ ta bɛrɛ wone a Ezekɩasɩ ƴɛ̀rʋ ɛ, nyɩ nɩ̃ɛ bɛrɛ wone a lɛ a Asiiri tẽw nãà na yere kʋ̀rɛ nyɩ a: Nyɩ nyɔw nɩ mɛ̃ báalʋ, nyɩ bɛr nyɩ tʋɔra kʋ̀ m. Lɛ n'a a nyɩ kãw za na mɩ́ dɩrɛ a ʋ divɛ̃ tɩɛ nɩ a ʋ kãkã-tɩɛ wɔmɛ, ɛ́ nyúur a ʋ sa-bie-kʋ̃ɔ-bɔw kʋ̃ɔ,

³² gùre nɩ ɩ̃ wa lɛb wa tɛr nyɩ cen nɩ tẽw na ɩ mɛ̃ a nyɩ tẽw a. Tẽw na tɛr ble a dipɛ̃ ƴãw a, tẽw na tɛr divɛ̃ tɩɩr a divɛ̃ ƴãw a, tẽw na tɛr olivʋ tɩɩr a kãá ƴãw a, tẽw na tɛr sɩwr a. Lɛ n'a nyɩ kʋ̃ kpi a ka ɩ, ɛ́ tɩ vʋʋrɛ a be. A na ɩ à ŋá a, nyɩ ta bɛrɛ wone a Ezekɩasɩ ƴɛ̀rʋ ɛ, bʋ̃ʋ n'ʋ vɛ̃, ʋ bɛ̀lɛ nyɩ na, ʋ na mɩ́ yel k'aa Sore na faa nyɩ na a.

³³ A nɩ-bʋʋr-yoru ŋmɩmɛ piw mɛ̃ nɩ vuo a bɛ ten deb ƴãw bɩɩ?

³⁴ Bʋ̃ʋ n'ʋ a Hamatɩ nɩ a Arpadɩ ten ŋmɩmɛ ɩ? Ɛ́ a Sefarwayim, a Hena nɩ a Iwa ŋmɩmɛ, bʋ̃ʋ n'ʋ a ɩ? Nɩr piw mɛ̃ nɩ sɔ́r a Samaari deb ƴãw ɩ?

³⁵ A ten á ŋá ŋmɩmɛ za pʋɔ a, buor'ʋ faa a ʋ tẽw a ɩ̃ nuru pʋɔ, a Sore na wa piw mɛ̃ sɔ́r a Zerizalɛm deb ƴãw?”»

³⁶ A bɛlɩ dem za na tɩ be a be a tɩ ɩ n gbili, bɛ bɛ tɩ sɔw bom ɛ. Bʋ̃ʋ n'ʋ vɛ̃, lɛ n'a a nãà Ezekɩasɩ tɩ yel.

³⁷ Al pùorí, a Hɩlkɩahu bidɛb, Elɩakɩm, na ɩ a nãà yir nɩ-kpɛ̃ɛ a, a sɛ-sɛbrɛ Sevina nɩ a Asafʋ bidɛb, Yoa, na mɩ́ ƴɛ̀rɛ a nãà yúor ƴãw a, tɩ taw nɩ a bɛ kparɩ cɩɛrɩ. Ɛ́ lɛb wa a Ezekɩasɩ zie wa manɩ a lɛ a Asiiri tẽw dem sojarɩ nɩ-kpɛ̃ɛ, na mɩ́ be a nãà zie a, na yel a, kʋ̀ ʋ.