အွန်လိုင်း သမ္မာကျမ်းစာ

1 Na-mɩnɛ 5 - A SƐB-SÕW

¹ A naalʋ tẽli za na yi a Efaratɩ man-kpɛ̃ɛ ɛ́ cen tɩ tɔ a Filisɩtɛ̃ mɩnɛ tẽw, ɛ́ cãà lɛb tɩ tɔ a Eziptɩ tẽw tʋr-bɔw a, a Salomɔ̃ tɩ dɩrɛ nɩ naalʋ a za zu. Ʋlɛ n'ʋ tɩ so a naalʋ ten á ŋá na-mɩnɛ za, bɛ yarɛ a zuru-yar kʋ̀rɛ ʋ a ʋ nyɔ-vʋʋrʋ daar za.

² A Salomɔ̃ nɩ a ʋ nɩbɛ bibi-vɩɛrɩ za dɩb mɩ́ tɩ ɩ n: zɔ̃-giera tɔn piwaɩ, zɔ̃-bàalʋ tɔn pie nɩ ani,

³ nĩi pie bɛ na pàw ɛ́ ƴãw bʋ̃-dɩrɩ a dɩ 'wɔr a, nĩi lɩzɛr na dɛnɛ 'wɔbr a mʋ̃ɔ a, nɩ píir kʋba (100). Dʋn á ŋá mɩ̀ mɩ́ tɩ be n be: wal-daar, muli, ire nɩ biyo bʋʋrɛ kãw bɛ na mɩ́ ƴãw a bʋ̃-dɩrɩ a dɩ kpɛ kãá a.

⁴ A Salomɔ̃ tɩ dɩ n naalʋ a vuo ʋl za na be a Efaratɩ mʋ̃tɔ̃w-kpɛb-lowr a zu, ʋ na yi a Tifɩsa ɛ́ tɩ ta Gaza a. Ƴã-ɓaarʋ tɩ be n ʋlɛ nɩ a ten na jil koli ʋ a cara pʋɔ.

⁵ A Zuda nɩ a Ɩsɩrayɛl nɩbɛ tɩ tɛr'ɩ ƴã-ɓaarʋ, a Dan tɩ tɔ a Bɛɛr-Seva. Ŋa za mɩ́ tɩ ɓãá nɩ ƴãw kʋɔr ʋ divɛ̃ tɩɩr púo, nɩ ʋ kãkã-tɩɩr púo, a Salomɔ̃ cãafʋ daar za.

⁶ A Salomɔ̃ mɩ̀ tɩ tɛr'ɩ wie tùr-pie nɩ ayi (12 000), nɩ wie zawr na na tʋ̃ɔ́ ƴãw wie tùr-lɩz'a ayi (40 000) a ʋ zɛbr-torkori ƴãw a.

⁷ A nãà-lɩɛrbɛ pie nɩ ayi a Salomɔ̃ na tɩ kaa ír a tɩ kʋ̀rɛ ʋ nɩ a bʋ̃-dɩrɩ, ʋlɛ nɩ a bɛlɩ dem na lãw dɩrɛ nɩ ʋ a. Ŋa za mɩ́ tɩ tõ n a ton ŋa cuw-been a yũon pʋɔ. Bɛ bɛ mɩ́ tɩ sàw a nãà nɩ a ʋ nɩbɛ bɔ bom gù ɛ.

⁸ A nãà-lɩɛrbɛ mɩ̀ mɩ́ tɩ ƴãw na bɛ cen nɩ a ɔɔzʋ nɩ a mʋ̃ɔ a wi-zɔmnbɛ wie ƴãw, nɩ a dʋn al na tawr a tuor a ƴãw, a ʋlɩ zie nɛ a nãà na be a. Ŋa za mɩ́ tɩ tu n a lɛ bɛ na yel kʋ̀ ʋ a.

A Salomɔ̃ yã-bãwfʋ yúor na yi a

⁹ A Naaŋmɩn tɩ kʋ̀ n a Salomɔ̃ yã-bãwfʋ nɩ yã na bɛrmɛ bɛ dɩ vuo a. A yele al ƴãw a ʋ tɩɛrʋ na mɩ́ tɩ be a tɩ yãwmɛ na mɛ̃ a kʋ̃ɔ-kpɛ̃ɛ nʋɔr biire a.

¹⁰ A Salomɔ̃ yã-bãwfʋ tɩ zuo nɩ a Arabi nɩ a Eziptɩ ten yã-bãwnbɛ za dem.

¹¹ Ʋlɛ tɩ n'ɩ a yã-bãwnɛ a nɩsaalbɛ za pʋɔ, ɩ yã-bãwnɛ zuo a Ezɩrahitɩ dɔɔ Etan, nɩ Heman, nɩ Kalkɔl nɩ Darda na ɩ Mahɔl bidɛbr a. A ʋ yúor tɩ yi n a nɩ-bʋʋrɛ bɛl za na kpɩɛr pɩɛl'a pʋɔ.

¹² Ʋ tɩ lɔb'ɩ zʋkpaɩ túr-ata (3 000), ɛ́ maalɩ yielu túr'ɩ anũu (1 005).

¹³ Ʋ ƴɛ̀r'ɩ tɩ-bʋʋrɛ bʋʋrɛ za ƴɛ̀rʋ, a Libã tẽw sɛɛdɩr tɩɛ tɩ tɔ a ɩzɔpɩ váar na mɩ́ bul dacĩ-sɩɛ ƴãw a. Ʋ mɩ̀ ƴɛ̀r'ɩ dʋn ƴɛ̀rʋ, lili, bʋ̃-vuri nɩ zʋ́mɛ́ ƴɛ̀rʋ.

¹⁴ Nɩbɛ tɩ yire nɩ ziir za waar, kɛ́ bɛ wa bɛr wõ a Salomɔ̃ yã-bãwfʋ ƴɛ̀rʋ ʋ na ƴɛ̀rɛ a. A tẽw zu na-mɩnɛ za na tɩ wõ a yã-bãwfʋ ŋa yele a, bɛlɛ nɛbɛ mɩ́ tɩ tõ bɛ.

A Salomɔ̃ cɔbrɛ nɩ a Ŋmɩn-yir-kpɛ̃ɛ ŋmãafʋ
( 2Bi-yel 2:2-15 )

¹⁵ A Tɩ́ɩ̀r tẽw nãà, Hiram, tɩ dãw na ɩ a Daviir bá. Ʋ na tɩ wõ k'aa Salomɔ̃ n'ʋ bɛ ka a nũu ƴãw k'ʋ ɩ a nãà lɩɛrɩ a ʋ sãà Daviir a, ʋ tõ n nɩbɛ bɛ tɩ puor'ʋ.

¹⁶ A Salomɔ̃ mɩ̀ tɩ àr'ɩ be ɛ́ tõ bɛ tɩ yel ʋ à ŋá:

¹⁷ «Fʋ bãwnɩ a na a ɩ̃ sãà Daviir na bɛ tʋ̃ɔ́ ŋmãa a Sore yir-kpɛ̃ɛ, a ʋ dɔ̃ dem na tɩ ŋmaarɛ nɩ ʋ zɛbr kʋralɛ a lõbowe za a ƴãw. Ɛcɛ a Sore wa ɩ na ʋ tʋ̃ɔ́ bɛ.

¹⁸ Ɛcɛ ƴɛrɛŋa a, a Sore ɩ̃ Naaŋmɩn ɩ na k'ɩ̃ tɛr ƴã-ɓaarʋ a tʋr-bɔwrɩ za ƴãw. Dɔ̃ sob nɩ kpɩɛrʋ bɛ cãà jɩɛrɛ mɛ̃ ɩ.

¹⁹ A lɛ pʋɔ a, ɩ̃ yel'a k'ɩ̃ɩ na ŋmãa nɩ Ŋmɩn-yir-kpɛ̃ɛ a Sore ɩ̃ Naaŋmɩn ƴãw. Bʋ̃ʋ n'ʋ vɛ̃, a Sore tɩ yel'ɩ à ŋá a ɩ̃ sãà Daviir zie: “A fʋ bidɛb, ɩ̃ na na ƴãw ʋ lɩɛrɩ fʋ zɩ̃ a naalʋ-dà-kɔw zu a, ʋlɛ n'ʋ na ŋmãa a Ŋmɩn-yir-kpɛ̃ɛ kʋ̀ m.”

²⁰ A na ɩ à ŋá a, ƴãw bɛ cɛ Libã sɛɛdɩr tɩɩr. A ɩ̃ tõ-tõ-biir nɩ a fʋ tõ-tõ-biir na lãw na tone, ɩ̃ɩ na kʋ̀ b'ɩ a fʋ tõ-tõ-biir sã-ya mɛ̃ a lɛ fʋ na na yel kʋ̀ m a. Bʋ̃ʋ n'ʋ vɛ̃, fʋ bãwnɩ a na, a tɩ ka a, nɩr bɛ be be bãw a tɩɩr cɛb mɛ̃ a Sɩdɔ̃ tẽw dem a ɩ.»

²¹ A Hiram na tɩ wõ a Salomɔ̃ ƴɛ̀rʋ a, nʋ̃ɔ̀ tɩ kpɛ ʋ nɩ yaga, ʋ yel à ŋá: «Ɩ̃ puore nɩ a Sore yãanɩ a dɩ̃a bibir, ʋ na kʋ̀ a Daviir bidɛb, na ɩ yã-bãwfʋ tɛwr, k'ʋʋ dɩrɛ naalʋ a Ɩsɩrayɛl nɩ-bʋʋr-yaga bɛ ŋa zu a.»

²² Al pùorí ʋ tõ bɛ tɩ sɔw a Salomɔ̃ à ŋá: «Ɩ̃ wõ n a zɛlʋ fʋ na zɛlɩ a ɩ̃ zie a. Ɩ̃ na tɩr'ɩ a sɛɛdɩr tɩɛ dàar nɩ a sɩpɩrɛ tɩɛ dàar za fʋ na bɔbr a.

²³ A ɩ̃ tõ-tõ-biir na tuo nɩ a dàar a Libã tan zu siw nɩ a kʋ̃ɔ-kpɛ̃ɛ nʋɔr. Bɛ na 'lẽ a na ɓɛrɩ taa, ɛ́ bɛr a a tu a kʋ̃ɔ-kpɛ̃ɛ kʋ̃ɔ cen a ʋlɩ zie nɛ fʋ na na wul mɛ̃ a. Bɛ na tɩ cɛr a na bin a be a fʋ tõ-tõ-biir wa tuo. A yar ƴãw a, fʋ na kʋ̀ m'ɩ a bʋ̃-dɩrɩ ɩ̃ na bɔbr a ɩ̃ nãà yir tõ-tõ-biir ƴãw a.»

²⁴ Lɛ n'a a Hiram tɩ tɩr a sɛɛdɩr dàar nɩ a sɩpɩrɛ dàar kʋ̀ a Salomɔ̃ sɛw lɛ za ʋ na bɔbr a.

²⁵ A Salomɔ̃ tɩ àr'ɩ be, ɛ́ yũon za, ʋ mɩ́ kʋ̀ a Hiram ble tɔn túr ayʋɔb (6 000) nɩ olivʋ tɩ-wɔmɛ kãá na vɩɛl vɩɛl a litɩr túr ani (8 000) a ʋ yir nɩbɛ guolu ƴãw.

²⁶ A Sore tɩ kʋ̀ n yã-bãwfʋ a Salomɔ̃, mɛ̃ a lɛ ʋ na tɩ yel kʋ̀ ʋ a. Lɛ n'a ʋlɛ nɩ a Hiram tɩ ƴɛ̀rɛ wone taa vla, ɛ́ maalɩ wõ-taa a bɛ cara pʋɔ.

A Salomɔ̃ ƴãw nɩ pɔ̃tɔrɩ tome
( 2Bi-yel 1:18 , 2:16-17 )

²⁷ A Salomɔ̃ tɩ ìr'ɩ nɩ pɔ̃tɔrɩ tome, ƴãw Ɩsɩrayɛl nɩbɛ tùr-lɩzɛr'ɩ pie (30 000) bɛ tone.

²⁸ Cuw za, ʋ mɩ́ tɩ ƴãw nɩ nɩbɛ tùr-pie (10 000) do a Libã tãw zu, tɩ tõ cuw-been a be, ɛ́ kul a bɛ yir tɩ maal'ɩ cuwr ayi. Adonɩram'ʋ tɩ ɩ a pɔ̃tɔrɩ tome á ŋá nɩ-kpɛ̃ɛ.

²⁹ A Salomɔ̃ mɩ̀ tɩ tɛr'ɩ tuor-tuorbɛ tùr-lɩz'a ata nɩ pie (70 000), nɩ kʋsɛ-pɛnbɛ tùr-lɩz'a anaar (80 000), bɛ tone a tãw zu a ʋ ƴãw.

³⁰ Ʋ mɩ̀ tɩ cãà na tɛr tõ-tõ-nɩ-bɛrɛ a nãà-lɩɛrbɛ na kaa ír kɛ́ bɛ jɩ́rɛ a tome a: nɩbɛ túr ata dɔwlɩ kɔbr ata (3 300) na jɩ́rɛ a tõ-tõ-bi-yaga yaga bɛ ŋa tome a.

³¹ A nãà tɩ ƴãw na bɛ mɩ́ tuw ír pɛnɩ kʋsɛ-vɩɛlɩ bɛrɛ a Ŋmɩn-yir-kpɛ̃ɛ pɛr sʋ̃ɔ́fʋ ƴãw.

³² Gebal tẽw dem mɩ́ tɩ sõw nɩ a Salomɔ̃ nɩ a Hiram tõ-tõ-biir bɛ baa pɛnɩ a kʋsɛbɛ. À à ŋá n'a bɛ tɩ cɔbrɩ a dàar nɩ a kʋsɛbɛ a Ŋmɩn-yir-kpɛ̃ɛ ŋmãafʋ ƴãw.

« အရင်

နောက်တစ်ခု »

Bible Society of Burkina Faso

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ