1 Na-mɩnɛ 21 - A SƐB-SÕW

A nãà Akab nɩ Nabɔtɩ divɛ̃ tɩɩr púo yele

¹ A yele á ŋá pùorí a, yel ŋa n'ʋ tɩ ɩ: Nabɔtɩ na yi Izireyɛl a, tɩ tɛr'ɩ divɛ̃ tɩɩr púo, ʋ pɩɛlɩ a Samaari tẽw nãà Akab yir.

² Bibir kãw, a Akab tɩ yel'ɩ a Nabɔtɩ: «Kʋ̀ m a fʋ divɛ̃ tɩɩr púo, ɩ̃ kʋɔr zɛ-vaar, ʋ na pɩɛlɩ a ɩ̃ yir yɩ̃ɛlɛ a ƴãw. Ɩ̃ na kʋ̀ b'ɩ divɛ̃ tɩɩr púo na vɩɛl zuo a lɩɛr'ɩ, bɩɩ fʋ̃ wa bɔbr a, ɩ̃ na ya b'ɩ a ʋ daarʋ.»

³ Ɛcɛ a Nabɔtɩ tɩ yel'ɩ a Akab: «A Sore ta sàw ɩ̃ de a ɩ̃ sãàkʋm-kore tẽsɔw kʋ̀ b ɛ!»

⁴ A Akab tɩ lɛb'a kul a ʋ yir, a ʋ pʋɔ sãw, ɛ́ suur ɩrɛ ʋ, a sɔwfʋ ŋa a Nabɔtɩ na tɩ sɔw ʋ a ƴãw: «Ɩ̃ bɛ kʋ̀rɛ fʋ a ɩ̃ sãàkʋm-kore tẽsɔw ɛ.» Ʋ tɩ gã nɩ a ʋ gado zu, lɩɛbɩ a niwn cɔw a dacin, ɛ́ bɛ sàw na dɩ ɛ.

⁵ A ʋ pɔw Zezabɛl tɩ wa na wa páw ʋ, sowr'ʋ: «Bʋ̃ʋ n'ʋ so fʋ tɛr pʋ-sãwna ɛ́ bɛ sàw na dɩ?»

⁶ A Akab sɔw: «Ɩ̃ ƴɛ̀r'ɩ a Nabɔtɩ na yi Izireyɛl a zie, yel ʋ à ŋá: “Kʋ̀ m a fʋ divɛ̃ tɩɩr púo libir ƴãw, bɩɩ fʋ̃ʋ wa bɔbr a, ɩ̃ na kʋ̀ b'ɩ divɛ̃ tɩɩr po-yũo lɩɛr'ɩ.” Ɛcɛ ʋ yel mɛ̃ na: “Ɩ̃ bɛ kʋ̀rɛ fʋ a ɩ̃ divɛ̃ tɩɩr púo ɩ.”»

⁷ Lɛ n'a a Zezabɛl tɩ yel ʋ: «Fʋ̃ʋ bɛ n'ʋ dɩrɛ a naalʋ a Ɩsɩrayɛl zu ɛ? Ìr dɩ, ɛ́ lɛb tɛr pʋ-pɩɛlʋ. Mãa na kʋ̀ b'ɩ a Nabɔtɩ na yi a Izireyɛl a divɛ̃ tɩɩr púo.»

⁸ Ʋ tɩ sɛb'ɩ sɛb-tʋɔlɩ a Akab yúor ƴãw, nɛ̃ a nãà ŋmaarʋ-bʋ̃-ƴãwna ƴãw a, ɛ́ tɩr kʋ̀ a tẽ-kpɛ̃ɛ ʋl a Nabɔtɩ na kpɩɛr a nɩ-kore nɩ a nɩ-yée.

⁹ À ŋá n'a ʋ tɩ sɛb a sɛb-tʋɔlɩ al pʋɔ: «Nyɩ bʋɔlɩ a tẽw nɩbɛ ɓã taa, mʋta-tuo tɛrʋ tub ƴãw, ɛ́ ƴãw Nabɔtɩ zɩ̃ a nɩbɛ nisɔw.

¹⁰ Nyɩ ƴãw nɩbɛ ayi, nɩbɛ na bɛ tɛr bir a, àr a ʋ niŋé ɛ́ dɩ a ʋ sãwna dãsɩɛ à ŋá: “Fʋ tʋ n a Naaŋmɩn nɩ a nãà!” Al pùorí, nyɩ tɛr ʋ yi zaa nɩ a tẽw pʋɔ, tɩ lɔb'ɩ ʋ kʋsɛbɛ kʋ!»

¹¹ A tẽw nɩ-kore nɩ a nɩ-yée tɩ ɩ na mɛ̃ a lɛ a Zezabɛl na yel kʋ̀ bɛ a ʋ sɛb-tʋɔlɩ pʋɔ a.

¹² Bɛ tɩ bʋɔl'ɩ a nɩbɛ a mʋta-tuo tɛrʋ tub ƴãw, ɛ́ ƴãw a Nabɔtɩ a nisɔw.

¹³ A nɩ-bɛ-tɛr-bir mɩnɛ ayi tɩ wa na wa àr a Nabɔtɩ niŋé, ɛ́ yere a ʋ sãwna a nɩbɛ za niŋé à ŋá: «Nabɔtɩ tʋ n a Naaŋmɩn nɩ a nãà!» Lɛ n'a a nɩbɛ tɩ tɛr a Nabɔtɩ yi zaa nɩ a tẽw pʋɔ, tɩ lɔb'ɩ ʋ kʋsɛbɛ kʋ.

¹⁴ Al pùorí, a tẽw nɩ-bɛrɛ tɩ tõ na bɛ tɩ yel a Zezabɛl à ŋá: «Bɛ lɔb'ɩ a Nabɔtɩ nɩ kʋsɛbɛ kʋ.»

¹⁵ A Zezabɛl na tɩ wõ à à ŋá a, ʋ yel'ɩ a Akab: «Cen tɩ de a divɛ̃ tɩɩr púo a Nabɔtɩ, na yi a Izireyɛl a, na bɛ tɩ sàwr na kʋɔrɩ kʋ̀ b a, bʋ̃ʋ n'ʋ vɛ̃ a Nabɔtɩ bɛ cãà ɩ, ʋ kpi na.»

¹⁶ A Akab na wa wõ k'aa Nabɔtɩ kpi na a, ʋ cen nɩ a ʋ divɛ̃ tɩɩr púo pʋɔ k'ʋʋ tɩ de ʋ so ʋ.

Naaŋmɩn bɛ nɔ̃w a Akab nɩ a ʋ pɔw Zezabɛl ɩb ɛ

¹⁷ Lɛ n'a a Sore tɩ ƴɛ̀r Eli na yi Tisibe a zie yel à ŋá:

¹⁸ «Ìr cen tɩ páw a Akab, a Ɩsɩrayɛl nãà na kpɩɛr a Samaari a. Ʋ be n Nabɔtɩ divɛ̃ tɩɩr púo pʋɔ, ʋ cen nɩ a be k'ʋʋ tɩ de ʋ so ʋ.

¹⁹ Fʋ na tɩ ƴɛ̀r'ɩ a ʋ zie à ŋá: À ŋá n'a a Sore yere: “Fʋ kʋ n nɩr baarɩ, ɛ́ mɩ̀ lɛb bɔbr kɛ́ fʋ so a ʋ bom i?” Ɛ́ fʋ na yel a ƴãw pʋɔ: “A be tɔr za a baar na lɛnɩ a Nabɔtɩ zɩ̃ɩ a, be n'a a mɩ̀ na lɛnɩ a fʋ zɩ̃ɩ.”»

²⁰ A Eli tɩ cen na, a Akab tɩ yel ʋ: «Ãw, fʋ bɛ lɛb nyɛ̃ m ɩ, fʋ̃ʋ ɩ̃ dɔ̃ sob i!» A Eli sɔw: «Ʋ̃ʋ, ɩ̃ lɛb'a nyɛ̃ b! Fʋ na tu a fʋ pʋ-tɩɛrʋ pùor, ɩ a ʋlɩ bom na bɛ pɛlɩ a Sore pʋɔ a ƴãw.

²¹ Alɛ n'a so a Sore yere kʋ̀rɛ fʋ: “Ɩ̃ na ɩ na a faa páw fʋ. Ɩ̃ na ɩ na a fʋ yir nɩbɛ baarɩ cɔ̃cɔ̃cɔ̃, mɛ̃ sagɛ bɛ na pɩɩrɩ wob yi n bɛr a. Ɩ̃ na kʋ n a fʋ yir dɛbr za, gbãgbaar bɩɩ nɩbɛ na so bɛ tʋɔra a Ɩsɩrayɛl tẽw pʋɔ a.

²² Ɩ̃ na ɩ n a fʋ yir, mɛ̃ a lɛ ɩ̃ na ɩ a Nevatɩ bidɛb Zerobowam yir a, nɩ a lɛ ɩ̃ na ɩ a Ahiya bidɛb Baesa yir a. Bʋ̃ʋ n'ʋ vɛ̃, fʋ sãw nɩ a ɩ̃ suur, ɛ́ ƴãw a Ɩsɩrayɛl nɩbɛ maalɩ yel-bier.”

²³ A Sore mɩ̀ tɩ yel'ɩ à ŋá a Zezabɛl ƴãw: “Baar na 'wɔb'ɩ a Zezabɛl a Izireyɛl dacĩ-kpɛ̃ɛ sɩɛmɩ́.”

²⁴ Lɛb waar mɩ̀, nãà Akab i, a fʋ yir nɩr za nãà wa kpi a tẽw pʋɔ a, baar na 'wɔb ʋ na, ɛ́ a fʋ yir nɩr za nãà wa kpi a wɩ̀ɛ pʋɔ a, dùme na dɩ ʋ na.»

²⁵ Bɛ bɛ dãw nyɛ̃ nɩr ʋ tu a ʋ pʋ-tɩɛrʋ maalʋ pùor, ɩ a lɛ na bɛ nʋmɛ a Sore zie mɛ̃ a Akab a ɩ. Bʋ̃ʋ n'ʋ vɛ̃, a ʋ pɔw Zezabɛl tɩ darɛ ʋ na ƴãwn.

²⁶ Ʋ tɩ ɩ n ɩb na bɛ maal'ɩ wob a, ʋ na tɩ tu a tɩbɛ pùor mɛ̃ a Amoritɩ mɩnɛ a, bɛl a Sore na tɩ diw ɛ́ bɛr vuo kʋ̀ a Ɩsɩrayɛl nɩbɛ a.

A Akab sàw nɩ a ʋ sãwna

²⁷ A Akab na tɩ wõ a ƴɛ̀rʋ á ŋá a, ʋ taw nɩ a ʋ kparɩ cɩɛrɩ, su vʋɔra kparʋ, ɛ́ mɩ́ tɛr mʋta-tuo. Ʋ mɩ́ tɩ su n a kparʋ ŋa gã nɩ, ɛ́ kʋɔlɛ.

²⁸ Lɛ n'a a Sore tɩ ƴɛ̀r a Eli, na yi Tisibe a zie, yel à ŋá:

²⁹ «Fʋ nyɛ̃ nɩ a lɛ a Akab na siwri ʋ tʋɔra a ɩ̃ niŋé sɛw a? Ʋ na siwri ʋ tʋɔra à à ŋá a ɩ̃ niŋé a, ɩ̃ bɛ ɩrɛ a faa páwr a ʋ yir, a ʋ cãafʋ daar ɛ. A ʋ bidɛb daar'a ɩ̃ na ɩ a faa páw a ʋ yir.»