1 Na-mɩnɛ 18 - A SƐB-SÕW

A Eli nɩ a Ovadɩa na tuori taa a

¹ A tɩ cɛlɩ na, ɛ́ a Sore wa ƴɛ̀r a Eli zie, a wɛr na nyɔw a yome ata sob daar. Ʋ tɩ yel ʋ na: «Cen a nãà Akab tɩ nyɛ̃ b, bʋ̃ʋ n'ʋ vɛ̃, ɩ̃ na ɩ na a saa wa a tẽw zu.»

² A Eli tɩ cen na k'aa Akab tɩ nyɛ̃ ʋ. A kɔ̃ tɩ lo n faa faa a Samaari, a vuo ʋl pʋɔ.

³ A Akab tɩ bʋɔl'ɩ a ʋ nãà yir tõ-tõ-nɩ-kpɛ̃ɛ Ovadɩa. A Ovadɩa ŋa tɩ ƴãwnɛ nɩ a Sore yaga za:

⁴ a lɛn daar a Zezabɛl na tɩ ƴãw bɛ kʋ a Sore ƴɛ̀r-manbɛ a, a Ovadɩa tɩ sɔwl'ɩ nɩbɛ kʋba (100) a bɛ pʋɔ. Ʋ tɩ bʋ́r bɛ nɩ lɩz'a ayiri nɩ piir, ƴãw tãw bɔwrɩ pʋɔ, ɛ́ ƴãw bɛ kʋ̀rɛ bɛ a bʋ̃-dɩrɩ nɩ a kʋ̃ɔ.

⁵ A Akab tɩ yel'ɩ a Ovadɩa à ŋá: «Wa tɩ cɔlɩ a tẽw, bɛl a bul-nɛ́ɛ ƴãw nɩ a fʋɔlɩ pʋɔ nyɛ̃, kapaw tɩ na nyɛ̃ nɩ mʋ̃ɔ guol'ɩ a wie nɩ a mílɛ̀, ɛ́ à ŋá n'a a kʋ̃ fɛr tɩ kʋ a dʋn a mɩnɛ ɩ.»

⁶ Bɛ tɩ põ nɩ a ziir bɛ na na cɔlɩ a. A lɛ n'a a Akab tɩ tu ka lowr, ɛ́ a Ovadɩa mɩ̀ tu ka lowr.

⁷ A Ovadɩa tɩ lo n a sɔ́r cere, wa bere ʋ tuori a Eli. Ʋ tɩ nyɛ̃ ʋ na bãw, gũu yaga za a ʋ niŋé ɛ́ sowri ʋ: «Ɩ̃ sore Eli i, fʋ̃ʋ sɩrɩ n'ʋ bɩɩ?»

⁸ A Eli sɔw: «Mãa mɩŋa n'ʋ! Cen tɩ yel a fʋ zu-sob Akab à ŋá: “A Eli waar'a!”»

⁹ A Ovadɩa sowri ʋ: «Bʋnʋ yel-bier'ʋ ɩ̃ maalɩ, fʋ nyɔwr mɛ̃ kʋ̀rɛ a Akab, k'ʋʋ kʋ m?

¹⁰ A fʋ Naaŋmɩn, a Sore na vʋʋrɛ a zũú, mãa n'ʋ yere kʋ̀rɛ fʋ k'aa ɩ zu-sob tõ n nɩbɛ a ten za nɩ a naalʋ-ten za pʋɔ, kɛ́ bɛ tɩ bɔ fʋ. A ten á ŋá kãw nɩbɛ na mɩ́ wa yel: “Ʋ bɛ be ka ɩ”, a mɩ́ cãà na fɛr bɛ pɔ yel kɛ́ nɩr bɛ nyɛ̃ b ɛ.

¹¹ Ɛ́ ƴɛrɛŋa fʋ wa yere k'ɩ̃ɩ cen tɩ yel a ɩ̃ zu-sob: “A Eli waar'a!”

¹² Ɛcɛ mãa dɛ wa bɛrɛ fʋ wa báarɛ a, a Sore Vʋʋrʋ na ɓáw fʋ na cen nɩ be ɩ̃ na bɛ bãw a. Mãa na cen na tɩ yel a yele kʋ̀ a Akab, ʋ kʋ̃ nyɛ̃ b ɛ, ɛ́ ƴãw bɛ kʋ m. Ɛcɛ a ɩ̃ pɔ̀lʋ daarɩ́ za n'a ɩ̃ ƴãwnɛ a Sore.

¹³ Ɩ̃ sore e, bɛ bɛ manɩ kʋ̀ b a lɛ ɩ̃ na ɩ, a lɛn daar a Zezabɛl na tɩ ƴãw bɛ kʋrɛ a Sore ƴɛ̀r-manbɛ a ɩ? A lɛ ɩ̃ na tɩ sɔwlɩ nɩbɛ kʋba (100) a bɛ pʋɔ, bʋ́r bɛ lɩz'a ayiri nɩ piir tãw bɔwrɩ pʋɔ ɛ́ kʋ̀rɛ bɛ a bʋ̃-dɩrɩ nɩ a kʋ̃ɔ a ɩ?

¹⁴ Ɛ́ ƴɛrɛŋa fʋ yel k'ɩ̃ɩ cen tɩ yel a ɩ̃ zu-sob: “A Eli waar'a!” Ʋ na kʋ m'a!»

¹⁵ Ɛcɛ a Eli tɩ sɔw nɩ a Ovadɩa: «A Sore na vʋʋrɛ a zũú, a kpɛnʋ-za-sob ɩ̃ na tone a zũú, ɩ̃ yere na kʋ̀rɛ fʋ k'aa dɩ̃a tɔr za a, ɩ̃ na ɩ na a Akab nyɛ̃ m.»

A Eli nɩ a Akab tuor'ɩ taa

¹⁶ A Ovadɩa tɩ cen na tɩ páw a Akab, manɩ a yele kʋ̀ ʋ. A Akab tɩ cen na k'ʋʋ tɩ tuori a Eli,

¹⁷ ʋʋ na wa nyɛrɛ ʋ wa báarɛ a, ʋ yel ʋ na: «Fʋ̃ʋ n'ɩ ŋan i, fʋ̃ʋ na n'ʋ so a Ɩsɩrayɛl nɩbɛ wʋ̀ʋr a?»

¹⁸ A Eli tɩ sɔw ʋ na: «Mãa bɛ n'ʋ so a Ɩsɩrayɛl nɩbɛ wʋ̀ʋr ɛ. Fʋ̃ʋ nɩ a fʋ yir dem nɛbɛ, nyɩ na zawrɩ a Sore nɛ-ƴãwnɩ bɛr, ɛ́ maalɩ Báàl mɩnɛ a.

¹⁹ Ɛcɛ ƴɛrɛŋa a, ƴãw bɛ bʋɔlɩ a Ɩsɩrayɛl nɩbɛ za ɓã taa a ɩ̃ zie a Karmɛl tãw zu, bɛlɛ nɩ a Báàl ƴɛ̀r-manbɛ kɔbr anaar dɔwlɩ lɩz'a ayi nɩ pie (450), nɩ a ŋmɩn-pɔw Asera ƴɛ̀r-manbɛ kɔbr anaar (400), a Zezabɛl na bɛ sàwr a bɛ ƴãw a.»

A pɔ́lʋ́ a Eli na pɔ́l a Karmɛl tãw zu a

²⁰ A Akab tɩ tõ na bɛ tɩ bʋɔlɩ a Ɩsɩrayɛl nɩbɛ za, ʋʋ ɓã a ƴɛ̀r-manbɛ za taa a Karmɛl tãw zu.

²¹ A Eli tɩ taw na ta a nɩbɛ za niŋé ɛ́ yel à ŋá: «Debor daar'a nyɩ na mɩ́ ƴaw gol gbɛ́r ŋa zu, ɛ́ lɛb ƴaw gol gbɛ́r ŋa zu tɩ ta? A Sore wa n'ɩ a Naaŋmɩn a, nyɩ puore ʋ! Báàl wa n'ɩ a Naaŋmɩn a, nyɩ puore ʋ!» Ɛcɛ a nɩbɛ pʋɔ a, nɩr za bɛ tɩ sɔw ʋ ɛ.

²² A Eli tɩ lɛb'a yel: «Ɩ̃ cɛ nɩ ɩ̃ yõ ɩ a Sore ƴɛ̀r-manɛ, ɛ́ a Báàl ƴɛ̀r-manbɛ ɩ kɔbr anaar dɔwlɩ lɩz'a ayi nɩ pie (450).

²³ Bɛ kʋ̀ tɩ nadɛɛ ayi: a Báàl ƴɛ̀r-manbɛ na kaa na ír a kãw, sɩ dɔwlɩ a dàar zu, ɛcɛ bɛ bɛ ƴãwnɛ a vũu ɛ. Ɩ̃ mɩ̀ na ɩ n a lɛ nɩ a nadɛr ʋl na cɛ a. Ɩ̃ na dɔwl'ʋ nɩ a dàar zu, ɛcɛ ɩ̃ mɩ̀ bɛ ƴãwnɛ a vũu ɛ.

²⁴ Al pùorí, bɛ na puor'ɩ a bɛ naaŋmɩn, ɛ́ mãa puori a Sore. A Naaŋmɩn ʋl na na sɔw a puoru, ƴãw a vũu a, ʋlɛ n'ɩ a Naaŋmɩn.» A nɩbɛ za tɩ sɔw na yel: «Tɩ sàw na.»

²⁵ A lɛ n'a a Eli tɩ yel a Báàl ƴɛ̀r-manbɛ: «Nyɩ kaa ír a nadɛr kãw, ɛ́ de niwn cɔbrɩ, nyɩɩm na nɛbɛ yãwmɛ zuo a. Al pùorí, nyɩ puori a nyɩ naaŋmɩn, ɛcɛ nyɩ taa ƴãwnɛ a vũu ɛ.»

²⁶ Bɛ tɩ de nɩ a nadɛr a Eli na kʋ̀ bɛ a, cɔbrɩ, al pùorí bɛ puori a Báàl a biɓaara tɩ ta n a mʋ̃tɔ̃-tuo. Bɛ tɩ yere na: «Báàl i, sɔw tɩ!» Ɛ́ tɩ ƴawr viire kole a bàwr-maal-kuur bɛ na mɛ a. Ɛcɛ bɛ bɛ tɩ wõ sɔwfʋ kãw za ɩ.

²⁷ A na wa manɛ a mʋ̃tɔ̃-tuo a, a Eli tɩ ɩrɛ bɛ na laar, ɛ́ yere: «Nyɩ lɛb bãw cɩɩrɛ kpɛ̃w za! Naaŋmɩn na n'ʋ a, ʋ bɛ tɛr pɛ-zɩna ɩ, bɩɩ ʋ tɛr'ɩ yel-fɛra kãw na páwr a, bɩɩ ʋ yɔ na. Kapaw ʋ gùre na, ɛ́ a fɛr kɛ́ bɛ sɩ̃w ʋ.»

²⁸ Bɛ tɩ lɛb'a bãw cɩɩrɛ kpɛ̃w za. Ɛ́ mɛ̃ a lɛ a ɩb na ɩrɛ a bɛ zie a, bɛ tɩ wɛr wɛr'ɩ bɛ tʋɔra nɩ zɛbr-sɔ-bɛrɛ nɩ kafine, a ƴã-gamɛ tɩ cire zɩ̃ɩ.

²⁹ A mʋ̃tɔ̃w na wa gɔ̃w a, bɛ lɛb'a bãw bʋɔlɛ a Báàl ɩrɛ nɩ mɛ̃ kɔ̃tɔ̃-ìrbɛ a, tɩ ta n a zaanʋɔra bàwr tɛm. Ɛcɛ bɛ bɛ tɩ wõ sɔwfʋ kãw za ɩ: bɛ bɛ wõ ƴɛ̀r-bir, bɛ nyɛ̃ bãwfʋ ɛ.

³⁰ Lɛ n'a a Eli tɩ yel a nɩbɛ: «Nyɩ taw pɩɛlɩ mɛ̃!» A nɩbɛ za tɩ taw na pɩɛl'ʋ. Ʋ tɩ maal'ɩ a Sore bàwr-maal-kuur, bɛ na ŋmɛr bɛr a, ƴãw.

³¹ Ʋ tɩ de nɩ kʋsɛbɛ pie nɩ ayi na ɩ a Zakɔb bʋʋrɛ dɔwlʋ pie nɩ ayi nʋɔr a — a Zakɔb ŋa n'ʋ a Sore tɩ yel: «Dɩ̃a na ta a, fʋ na dɩ n Ɩsɩrayɛl.» —

³² A Eli tɩ lɛb'a mɛ a bàwr-maal-kuur a Sore ƴãw nɩ a kʋsɛbɛ á ŋá. Ʋ tɩ wɛ̀r'ɩ bɔw na na tʋ̃ɔ́ de ta litɩr lɩzɛr'ɩ pie kʋ̃ɔ a, viiri koli a bàwr-maal-kuur.

³³ Ʋ tɩ cɔbr'ɩ dàar dɔwlɩ a bàwr-maal-kuur zu, ɛ́ sɩ a nadɛr dɔwlɩ a dàar zu.

³⁴ Al pùorí ʋ yel a bɛlɩ dem na tɩ be a be a: «Nyɩ 'wɔ̃w kʋ̃ɔ paalɩ yee anaar cir ƴãw a nɛn nɩ a dàar zu.» Ɛ̀ bɛ ɩ a lɛ. A Eli lɛb yel: «Nyɩ lɛb ɩ a gb'a ayi sob!» Bɛ ɩ. Ʋ lɛb yel: «Nyɩ ɩ a gb'a ata sob!» Bɛ ɩ.

³⁵ A kʋ̃ɔ tɩ cir'a viiri koli a bàwr-maal-kuur tɩ paalɩ a bɔw tɔr za.

³⁶ A zaanʋɔra bàwr maalʋ tɛm na wa ta a, a naaŋmɩn-ƴɛ̀r-manɛ Eli tɩ taw na ta a bàwr-maal-kuur pɛr, ɛ́ yel: «Sore e, Abraham, Ɩzaakɩ nɩ Ɩsɩrayɛl Naaŋmɩn i, wul a dɩ̃a kɛ́ fʋ̃ʋ n'ɩ a Ɩsɩrayɛl Naaŋmɩn, k'ɩ̃ɩ ɩ n a fʋ tõ-tone, kɛ́ fʋ̃ʋ n'ʋ ƴãw k'ɩ̃ ɩ à à ŋá za.

³⁷ Sɔw mɛ̃, Sore e, sɔw mɛ̃, a nɩbɛ bɛ ŋa bãw k'aa fʋ̃ʋ, a Sore, fʋ̃ʋ n'ɩ a Naaŋmɩn. Ɛ́ à à ŋá n'a fʋ na ɩ a bɛ tɩɛrʋ lɛb wa a fʋ zie.»

³⁸ Lɛ n'a a Sore tɩ ɩ vũu siw dɩ a bàwr nɛn, a dàar, a kʋsɛbɛ nɩ a tanɛ, ɛ́ ɩ a bɔw kʋ̃ɔ a sɩr.

³⁹ A Ɩsɩrayɛl nɩbɛ na tɩ nyɛ̃ a lɛ a, bɛ gũu na tɩ tɔ tẽw, ɛ́ yel: «A Sore n'ɩ a Naaŋmɩn! A Sore n'ɩ a Naaŋmɩn!»

⁴⁰ A Eli tɩ yel bɛ na: «Nyɩ nyɔw a Báàl ƴɛ̀r-manbɛ! Nyɩ ta sàw a bɛ been kãw za wa cɩ̃ɛ ɩ!» A nɩbɛ tɩ nyɔw nɩ bɛ za. A Eli tɩ ƴãw na bɛ tɛr bɛ siw nɩ a Kison bà-fʋɔla nʋɔr, ʋ tɩ ƴãw bɛ ŋmaarɩ bɛ kɔkɛɛ bɛ za.

A saa lɛb'a waar

⁴¹ Al pùorí, a Eli tɩ yel'ɩ a Akab à ŋá: «Do tɩ dɩ ɛ́ nyũ, bʋ̃ʋ n'ʋ vɛ̃, ɩ̃ wone nɩ a saa kon.»

⁴² A Akab tɩ do n a dɩb nɩ a nyub. A Eli ʋl tɩ do n a Karmɛl tãw nyʋɔrɩ́, tɩ gũu tɩ tɔ a tẽw, a zu be a dume cará.

⁴³ Al pùorí ʋ yel a ʋ tõ-tõ-bie: «Do tɩ jɩ́r a kʋ̃ɔ-kpɛ̃ɛ lowr nyɛ̃.» A tõ-tõ-bie do tɩ jɩ́r ɛ́ yel: «Bom za bɛ ka be ɩ.» A Eli tɩ yel ʋ nɩ gb'a ayopõi: «Lɛb cen!»

⁴⁴ A gb'a ayopõi sob a, a tõ-tõ-bie tɩ yel'a: «Zũzuw-cãpile n'ʋ yi a kʋ̃ɔ-kpɛ̃ɛ́ dúor. Ʋ bɛrmɛ na mɛ̃ nũ-kur a.» A Eli sɔw: «Do tɩ yel à ŋá kʋ̀ a Akab: “Ƴãw a fʋ wie a zɛbr-torko ƴãw siw nɩ, ɛ́ a saa wa bãw piw fʋ!”»

⁴⁵ A salom tɩ sɔbr'a pàwr, a zũzuge a sɛsɛb na tɩ fure diwr waar'ɩ a ƴãw. Sa-kpɛ̃ɛ tɩ tĩ na waar. A Akab tɩ kpɛ n a ʋ zɛbr-torko pʋɔ cere a Izireyɛl.

⁴⁶ A Sore tɩ kʋ̀ n a Eli fãw yaga za, ʋ sɛ a ʋ kpàwr a cenu ƴãw, ɛ́ de a Akab zɛbr-torko niwn, zɔ tɩ sãá a Izireyɛl.