1 Na-mɩnɛ 17 - A SƐB-SÕW

A naaŋmɩn-ƴɛ̀r-manɛ Eli yel'a kɛ́ wɛr na nyɔw na cɛlɩ

¹ Eli na yi Galaadɩ tẽw tẽle kãw na dɩ Tisibe a, tɩ yel'ɩ a nãà Akab: «A Sore na vʋʋrɛ a ƴãw, a Ɩsɩrayɛl Naaŋmɩn ɩ̃ na tone a ƴãw, ɩ̃ yere nɩ à ŋá: “A yome á ŋá na waar a, ɓɩɛlʋ kʋ̃ lo ɩ, sa-bir kʋ̃ lo ɩ, mãa bɛ wa n'ʋ yel a.”»

A Eli na be a Keritɩ bà-fʋɔla nʋɔr a

² A Sore tɩ ƴɛ̀r'ɩ a Eli zie à ŋá:

³ «Yi a ka cen a saa-pɛrɩ́ lowr, tɩ sɔwlɩ a Keritɩ bà-fʋɔla na be a Zurdɛ̃ saa-pɛrɩ́-dʋrʋ-lowr a nʋɔr.

⁴ Fʋ na tɩ nyúur'ɩ a bà-fʋɔla kʋ̃ɔ, ɩ̃ɩ ƴãw nɩ nʋɔr kʋ̀ a gbagbarɩ k'aa mɩ́ wa n a dɩb wa kʋ̀ b.»

⁵ A Eli tɩ ɩ n a lɛ a Sore na yel kʋ̀ ʋ a. Ʋ tɩ cen na tɩ kpɩɛr a Keritɩ bà-fʋɔla nʋɔr.

⁶ A gbagbarɩ mɩ́ tɩ wa n nɩ dipɛ̃ nɩ nɛn, biɓaara nɩ zaanʋɔra, wa kʋ̀ ʋ, ʋʋ nyúur a bà-fʋɔla kʋ̃ɔ.

A Eli na be a Sarɛpta tẽw pɔw-kʋɔr zie a

⁷ A na wa cen ta tab kãw a, a bà-fʋɔla tɩ ko na, a saa na bɛ tɩ wa a tẽw pʋɔ a ƴãw.

⁸ A lɛ n'a a Sore tɩ ƴɛ̀r a Eli zie, yel ʋ à ŋá:

⁹ «Ìr cen Sarɛpta, na pɩɛlɩ Sɩdɔ̃ a, tɩ kpɩɛr a be. Ɩ̃ yel'ɩ pɔw-kʋɔr kãw a be, k'ʋʋ kʋ̀rɛ fʋ a bʋ̃-dɩrɩ.»

¹⁰ Lɛ n'a a Eli tɩ ìr lo a Sarɛpta sɔ́r. Ʋ na tɩ tarɛ a tẽ-kpɛ̃ɛ dɩ̃dɔrɩ́ a, ʋ nyɛ̃ nɩ pɔw-kʋɔr ʋ bɔbr dali. Ʋ tɩ bʋɔl'ʋ yel à ŋá: «Ɩ̃ zɛlɛ fʋ na, cen tɩ ɩ kʋ̃ɔ blã ƴãw bom pʋɔ wa kʋ̀ m ɩ̃ nyũ.»

¹¹ A pɔw na tɩ cere a kʋ̃ɔ ɩb a, a Eli lɛb'a bʋɔl'ʋ yel ʋ à ŋá: «Ɩ̃ zɛlɛ fʋ na, mɩ̀ ƴãw dipɛ̃-ŋmale nũú wa kʋ̀ m.»

¹² A pɔw tɩ yel ʋ na: «A fʋ Naaŋmɩn, a Sore na vʋʋrɛ a n'ʋ ɩ̃ pɔrɛ nɩ, ɩ̃ bɛ tɛr dipɛ̃ ɩ. Nũ-kur zɔ̃ n'a cɛ m ziduwle pʋɔ, nɩ kãá blã laa pʋɔ. Ɩ̃ wa na k'ɩ̃ɩ wa tuuri dali-bie ayi kpɛ n tɩ maal'ɩ a al na cɛ a, mãa nɩ a ɩ̃ bidɛb ƴãw, tɩ dɩ ɛ́ kpi.»

¹³ A Eli tɩ yel ʋ na: «Ta zɔrɛ dɛ̃bɩ̃ɛ ɩ! Kpɛ tɩ ɩ a lɛ fʋ na yel a. Ɛcɛ de niwn maalɩ dipɛ̃-ŋmale nɩ a al na cɛ b a, wa kʋ̀ m. Al pùorí fʋ maalɩ fʋ̃ʋ nɩ a fʋ bidɛb ƴãw.

¹⁴ Bʋ̃ʋ n'ʋ vɛ̃, à ŋá n'a a Sore, a Ɩsɩrayɛl Naaŋmɩn, yere: “A zɔ̃ ziduwle bɛ cɩɛr ɛ, a kãá laa bɛ báarɛ ɛ, ɛ́ gù a Sore tɩ ɩ a saa wa a tẽw zu.”»

¹⁵ A pɔw tɩ cen na tɩ ɩ a lɛ a Eli na yel kʋ̀ ʋ a. Bɛ tɩ tɛr a na dɩrɛ a tɩ cɛlɩ, ʋlɛ nɩ a ʋ bidɛb nɩ a Eli.

¹⁶ A zɔ̃ ziduwle bɛ tɩ cɛ ɩ, a kãá laa bɛ tɩ baarɩ ɛ, a tu a lɛ a Sore na tɩ ƴãw a Eli yel a.

A Eli na ɩ a pɔw-kʋɔr bidɛb ʋ lɛb vʋʋrɛ a

¹⁷ A tɩ cɛlɩ nɩ blã, ɛ́ a pɔw-kʋɔr ʋl yir a Eli na kpɩɛr a, bidɛb ɩ bàal. A bàalʋ tɩ kpɛmɛ nɩ yaga, ʋ kpi.

¹⁸ A ʋ mã tɩ yel'ɩ a Eli à ŋá: «Mãa nɩ fʋ̃ʋ mɩ̀ bʋnʋ, Naaŋmɩn nɩr i? Fʋ wa n a ɩ̃ zie, kɛ́ fʋ wa lɛb sɩ̃w a ɩ̃ sãwna tɩɛrʋ a Naaŋmɩn zie, ɛ́ ɩ a ɩ̃ bidɛb ʋ kpi bɩɩ?»

¹⁹ A Eli tɩ sɔw ʋ na: «Kʋ̀ m a fʋ bidɛb!» A mã tɩ tɛr'ɩ a bie a ʋ nuru pʋɔ. A Eli tɩ de ʋ na do n a bɔwpɩɛ pʋɔ ʋ na ganɛ a, tɩ gaalɩ ʋ a ʋ gado zu.

²⁰ Al pùorí ʋ puori a Sore yel à ŋá: «Sore ɩ̃ Naaŋmɩn i, a pɔw-kʋɔr ŋa zie ɩ̃ na wa kpɩɛr a, fʋ sɩrɩ na bɔbr kɛ́ fʋ ɩ a kpɛ ʋ, ƴãw a ʋ bidɛb ʋ kpi ɩ?»

²¹ Al pùorí, a Eli tɩ gã nɩ a bie zu gb'a ata, puore nɩ a Sore à ŋá: «Sore ɩ̃ Naaŋmɩn i, ɩ̃ zɛlɛ fʋ nɩ yãayãa, ɩ a bie ŋa ʋ lɛb vʋʋrɛ.»

²² A Sore tɩ wõ n a Eli puoru: a bie vʋʋrʋ tɩ lɛb'a wa, ʋ vʋʋrɛ.

²³ A Eli tɩ de nɩ a bie yi n a bɔwpɩɛ pʋɔ siw nɩ a dĩó, tɩ kʋ̀ a mã ɛ́ yel: «Jɩ́r nyɛ̃, a fʋ bidɛb vʋʋrɛ na!»

²⁴ A pɔw tɩ yel ʋ na: «Ƴɛrɛŋa a, ɩ̃ bãw na kɛ́ fʋ ɩ n Naaŋmɩn nɩr. A Sore ƴɛ̀rʋ sɩrɩ na be a fʋ nʋɔrɩ́.»