1 Na-mɩnɛ 13 - A SƐB-SÕW

¹ Zɩ̃ k'aa Sore na yel a zũú a, Naaŋmɩn nɩr kãw tɩ yi n a Zuda tẽw wa ta a Betɛl, a lɛn daar a Zerobowam na tɩ nyɩwr bàwr-maal-bom, a bàwr-maal-kuur zu a.

² A Sore ƴɛ̀rʋ zũú, ʋ tɩ cɩɩr'a yel a bàwr-maal-kuur: «Bàwr-maal-kuur i! Bàwr-maal-kuur i! Bɛrɛ wone a lɛ a Sore na yere a! Dɛble na dɔw nɩ a Daviir yir pʋɔ. Ʋ na dɩ na kɛ́ Zozɩasɩ. Bàwr-maal-kuur i, ʋ na kʋ n a maalʋ-ziir bàwr-maalbɛ maal'ɩ a bàwr a fʋ zu, a be bɛ na tɩ nyɩwr a bàwr-maal-bome a koro za a. Bɛ na nyɩw nɩ nɩsaalbɛ kɔbɛ tɛɛ za a fʋ zu!»

³ A Naaŋmɩn nɩr tɩ cãà na lɛb yel à ŋá a ʋlɩ bibir nɛ: «A bàwr-maal-kuur na ŋmɛr'a, ɛ́ a tãpɛl-kãá na be a ʋ zu a siw gã tẽw. A na ɩ n a bãwfʋ k'aa Sore n'ʋ sɩrɩ ƴɛ̀r.»

⁴ A nãà Zerobowam na wa wõ a ƴɛ̀rʋ a Naaŋmɩn nɩr na ƴɛ̀r a Betɛl bàwr-maal-kuur ƴãw a, ʋ dɔl'ɩ a kpãkpãw a bàwr-maal-kuur zu-sɔw ɛ́ tanɩ: «Nyɩ nyɔw ʋ!» Ɛcɛ a kpãkpãw ʋ na tɩ dɔl cɔw a Naaŋmɩn nɩr a, tɩ kpi na, ʋ kʋ̃ lɛb tʋ̃ɔ́ gùr ʋ wa n a ʋ zie ɩ.

⁵ A bàwr-maal-kuur tɩ ŋmɛr'ɩ a pɛr nɛ pʋɔ, a tãpɛl-kãá na be a ʋ zu a siw gã tẽw, mɛ̃ a lɛ a Sore na tɩ ƴãw a Naaŋmɩn nɩr yel a.

⁶ Lɛ n'a a nãà tɩ yel a Naaŋmɩn nɩr: «Ɩ̃ zɛlɛ fʋ nɩ yãayãa, ɓaalɩ a Sore fʋ Naaŋmɩn kʋ̀ m. Zɛlɩ ʋ a ɩ̃ ƴãw, a ɩ̃ kpãkpãw tʋ̃ɔ́ sanɩ.» A Naaŋmɩn nɩr tɩ zɛlɩ nɩ a Sore, a nãà tʋ̃ɔ́ lɛb gùr a ʋ kpãkpãw wa n a ʋ zie. A kpãkpãw tɩ lɛb'a ɩ mɛ̃ a dãwdãw a.

⁷ A nãà tɩ yel'ɩ a Naaŋmɩn nɩr: «Wa tɩ kul a yir, fʋ tɩ dɩ lɛb páw fãw, ɩ̃ɩ kʋ̀ b bʋ̃-kãw.»

⁸ Ɛcɛ a Naaŋmɩn nɩr tɩ sɔw nɩ a nãà: «Fʋ̃ʋ mɩ̀ saa na kʋ̀ m a fʋ bʋ̃-tɛrɩ põ-zɛ̃-taa zie a, ɩ̃ bɛ kpɩɛr a fʋ yir ɛ, ɩ̃ bɛ 'wɔbr dipɛ̃, bɛ nyuur kʋ̃ɔ a ka ɩ.

⁹ Bʋ̃ʋ n'ʋ vɛ̃, nʋɔr ŋa n'ʋ a Sore ƴãw kʋ̀ m: “Fʋ bɛ 'wɔbr dipɛ̃, bɛ nyuur kʋ̃ɔ ɩ, ɛ́ fʋ bɛ tuur a sɔ́r ʋl fʋ na tu wa a, lɛbr kule ɩ.”»

¹⁰ Lɛ n'a ʋ tɩ lɛb de sɔr-yũo, ʋ bɛ tɩ lɛb de a sɔ́r ʋl ʋ na tu wa a Betɛl a ɩ.

A Naaŋmɩn nɩr zawr'ɩ a nʋɔr

¹¹ Naaŋmɩn-ƴɛ̀r-manɛ kãw, na kor a, tɩ be n a Betɛl be. A ʋ bidɛbr tɩ wa na wa manɩ a alɩ bome nɛ za a Naaŋmɩn nɩr na ɩ a Betɛl a ʋlɩ bibir nɛ a, kʋ̀ ʋ, nɩ a ʋlɩ bom nɛ ʋ na tɩ yel kʋ̀ a nãà a.

¹² A bɛ sãà tɩ sowri bɛ na: «Sɔ́r buor'ʋ ʋ tu lɛb cen?» A bidɛbr tɩ sowr'a bãw a sɔ́r ʋl a Naaŋmɩn nɩr na tu lɛb kule a Zuda tẽw a.

¹³ Al pùorí a bɛ sãà yel bɛ: «Nyɩ ƴãw a bõw a kɔw kʋ̀ m!» A bidɛbr ƴãw a bõw a kɔw, ʋ do zɔm.

¹⁴ Ʋ tɩ diw na bɩɛrɩ a Naaŋmɩn nɩr tɩ páw ʋ, ʋ zɩ̃ tɩ-kpɛ̃ɛ kãw ɓaarʋ́, ʋ sowr'ʋ: «Fʋ̃ʋ n'ɩ a Naaŋmɩn nɩr na yi a Zuda tẽw wa a?» Ʋ sɔw: «Mãa n'ʋ.»

¹⁵ A naaŋmɩn-ƴɛ̀r-manɛ tɩ yel ʋ na: «Wa a ɩ̃ yir, wa dɩ bʋ̃-kãw.»

¹⁶ Ɛcɛ a Naaŋmɩn nɩr tɩ sɔw ʋ na: «Ɩ̃ kʋ̃ tʋ̃ɔ́ lɛb pùor páw fʋ kul ɛ, ɩ̃ bɛ tɛr sɔ́r na dɩ bom bɩɩ nyũ bom a Betɛl ɛ.

¹⁷ Bʋ̃ʋ n'ʋ vɛ̃, a Sore yel mɛ̃ na: “Fʋ bɛ 'wɔbr dipɛ̃, bɛ nyuur kʋ̃ɔ a be ɩ, ɛ́ fʋ bɛ lɛb dier a sɔ́r ʋl fʋ na tu wa a, kule ɩ.”»

¹⁸ Ɛcɛ a naaŋmɩn-ƴɛ̀r-manɛ tɩ yel ʋ na: «A mãa mɩ̀ a, naaŋmɩn-ƴɛ̀r-manɛ nɛ m, mɛ̃ a fʋ̃ʋ a. Ɛcɛ malkɩ kãw ƴɛ̀r'ɩ a Sore yúor ƴãw, yel k'ɩ̃ɩ tɛr fʋ lɛb wa n a ɩ̃ yir, fʋ wa dɩ kɛ́ nyũ.» Ziri n'a ʋ tɩ ŋmãa kʋ̀ ʋ.

¹⁹ A Naaŋmɩn nɩr tɩ páw ʋ na lɛb kul a ʋ yir, tɩ dɩ kɛ́ nyũ.

Gbẽw kʋ n a Naaŋmɩn nɩr

²⁰ Bɛ na tɩ lãw zɩ̃ dɩrɛ a, a Sore tɩ ƴɛ̀r'ɩ a Betɛl naaŋmɩn-ƴɛ̀r-manɛ na tɩ tɛr a Naaŋmɩn nɩr lɛb wa n a ʋ yir a zie.

²¹ Lɛ n'a a naaŋmɩn-ƴɛ̀r-manɛ na kor a tɩ yel a Naaŋmɩn nɩr na yi a Zuda tẽw wa a: «À ŋá n'a a Sore ƴɛ̀rɛ: “Fʋ zawr'ɩ a Sore nʋɔr, fʋ bɛ tu a lɛ a Sore fʋ Naaŋmɩn na tɩ ƴãw a nʋɔr kʋ̀ b a ɩ.

²² Fʋ lɛb'a wa a Betɛl, wa dɩ kɛ́ nyũ. Ɛcɛ a Sore tɩ diw fʋ na bɛr kɛ́ fʋ taa ɩrɛ a lɛ ɩ. Alɛ n'a so fʋ na kpi, ɛ́ bɛ kʋ̃ ũù fʋ a fʋ sãàkʋm-kore yaa pʋɔ ɩ.”»

²³ Bɛ na tɩ dɩ kɛ́ nyũ baar'a, a naaŋmɩn-ƴɛ̀r-manɛ na kor a, tɩ ƴãw nɩ a bõw a kɔw kʋ̀ a Naaŋmɩn nɩr ʋ na tɩ tɛr lɛb wa n a,

²⁴ ʋ cen nɩ. Gbẽw tɩ tuor'ʋ nɩ a sɔ́r zu kʋ ʋ. A ʋ kũu tɩ gã nɩ a sɔ́r zu, a bõw àr kɔw, a gbẽw mɩ̀ àr kɔw.

²⁵ Nɩbɛ na tɩ tɔlɛ a tɩ nyɛ̃ nɩ a kũu na gã a sɔ́r zu, ɛ́ a gbẽw àr kɔw a. Bɛ tɩ cen na tɩ manɩ a yel ŋa a tẽ-kpɛ̃ɛ ʋl pʋɔ a naaŋmɩn-ƴɛ̀r-manɛ na kor a na kpɩɛr a.

²⁶ Ʋlɛ n'ʋ tɩ ɩ a Naaŋmɩn nɩr ʋ lɛb wa a Betɛl. Ʋ na wa wõ a yel ŋa a, ʋ yel'a: «A Naaŋmɩn nɩr na zawrɩ a Sore nʋɔr a n'ʋ. A Sore bɛr ʋ na kʋ̀ a gbẽw, ʋ nyɔw ʋ kʋ, mɛ̃ a lɛ a Sore na tɩ yel a.»

²⁷ Al pùorí, ʋ yel a ʋ bidɛbr: «Nyɩ ƴãw a bõw a kɔw kʋ̀ m!» Bɛ tɩ ƴãw nɩ a bõw a kɔw kʋ̀ ʋ,

²⁸ ʋ tɔl cen nɩ. Ʋ tɩ nyɛ̃ nɩ a kũu ʋ gã a sɔ́r zu, ɛ́ a bõw nɩ a gbẽw àr kɔw. A gbẽw bɛ tɩ 'wɔb a kũu ɛ, ɛ́ mɩ̀ bɛ tɔ a bõw ɛ.

²⁹ A naaŋmɩn-ƴɛ̀r-manɛ na kor a tɩ ɓáw nɩ a kũu dɔwlɩ a bõw zu lɛb wa n a Betɛl, k'ʋʋ wa kõ ʋ ũù.

³⁰ Ʋ tɩ ƴãw ʋ nɩ a ʋl mɩŋa yaa pʋɔ, ɛ́ a nɩbɛ kone ʋ yere nɩ: «'Woi! A ɩ̃ yɛb kpi na wɛ!»

³¹ A kũu na wa ũù baar'a, a naaŋmɩn-ƴɛ̀r-manɛ na kor a tɩ yel'ɩ a ʋ bidɛbr: «Mãa wa kpi a, nyɩ ũù mɛ̃ a bɔw ʋl pʋɔ a Naaŋmɩn nɩr na ũù a. Nyɩ bin a ɩ̃ ƴã-gan kɔwlɩ a ʋ ƴã-gan.

³² Bʋ̃ʋ n'ʋ vɛ̃, a Sore yúor ƴãw sɩrɩ n'a ʋ ƴɛ̀r ƴãw a Betɛl bàwr-maal-kuur, nɩ a yie za na be a maalʋ-ziir a Samaari tẽ-bɛrɛ pʋɔ a: a lɛ ʋ na yel a na sɩrɩ na tu.»

³³ A na saa tɩ ɩ à à ŋá a, a Zerobowam bɛ tɩ lɩɛbɩ a ʋ ɩb na bɛ vɩɛl a ɩ. Ʋ tɩ cãà na kaarɛ íre bàwr-maalbɛ a nɩbɛ pʋɔ, a maalʋ-ziir ƴãw. Nɩr wa bɔbr k'ʋʋ ɩ bàwr-maalɛ a, bɛ mɩ́ cir'ɩ a kãá ƴãw ʋ a zũú, ʋ lɩɛbɩ a maalʋ-ziir bàwr-maalɛ.

³⁴ A ɩb ŋa n'ʋ tɩ ƴãw a Zerobowam yir za a yel-bier pʋɔ, ɛ́ alɛ n'a so a yir ŋa lo, ɛ́ a ʋ pɛr pàw a tẽw zu.