Yohana 9 - Dadiya NT

Yesu A Gung Balɨ Nɨ Ja Bʌ Gǝn N Kulii

¹ Yesu shu lɛɨ, nǝngɔ a kuwo kaa balɨ nɨ ja bʌ gǝn n kulii.

² Nǝngɔ bɛtɔ mɛlalɨ gǝnɔ a bʌ gǝn gɔ, “Feyi, n bwɨlangkɛl woi a dǝg ja bʌ balɨ nɨ n kulii? N bwɨlangkɛl gǝn ka? Na a tɛtǝlam gǝnɨ ka?”

³ Nǝngɔ Yesu a jǝla ji gɔ, “Ke bɔ bwɨlangkɛl balɨ nɨɨ. Ke bɔ bwɨlangkɛl tɛtǝlam gǝnɨ. Ja bʌ gǝn n kuli sǝ ja nʊng kwaan Kwaamaɨ a dul gǝn.

⁴ A yǝlam nyɔ, bǝ ja ja kǝga nǝn maajɨ nʊ nɨ a twam ɨ, nǝn tangǝn kɔkɔ gǝn. Kumɔ bɛ lɛ wo, a kwama gɔ mɨ nʊ nɨ dwal maatǝm maajɨ lɛɨ.

⁵ Kwama mǝ fɔ a yooli nɨɨ, nǝmǝ mǝ nyalǝm yooligɨɨ.”

⁶ A sʊwa ji nyɨɨ, nǝngɔ a tɛɛ tuumɔ a tǝmɨ, a lwa tǝmɔ nǝnɨ, nǝngɔ a wɔɔ tǝm nɨ ga lwaɨ, a waa nu balɨ nɨ gǝmɨ.

⁷ Nǝngɔ a sʊwa balɨ nɨ gɔ, “Yɔ ya fʌl nu mʊnɔ a mwɛ gʌto Siluwam.” (Kɛl nɨ gǝ nʊng, “Twama.”) Nǝngɔ nʊ nɨ a yɔ ya fʌl nu gǝnɨ, a yǝla bɛɨ, nu gǝnɔ kuwo daagɔ lɛɨ.

⁸ Nǝb nɨ jǝ daam dakinii jǝbɔ nǝb nɨ kwangkwang a kuwo gǝn kel keli lɛɨ, nǝngɔ jǝ sʊwa gɔ, “Balɨ nɨ nǝn gɔ gǝ yɨ lɛ fɔ ya kel keli lɛɨ, mɨ nyɔ ka?”

⁹ Kaamɨ gɔ, “Nǝn gɔ.” Kaamɨ gɔ, “Ɔ ɔ, a jelka jelka nǝn kwan.” Nǝngɔ balɨ nɨ nǝn kang gǝn a sʊwa gɔ, “Nǝmǝ.”

¹⁰ Nǝngɔ ja bʌ gǝn gɔ, “A laa maa nyǝn nu mʊnɔ a wumoi?”

¹¹ Nǝngɔ a jǝla ji gɔ, “Nʊ nɨ jǝ jo lɛ gɔ Yesui, nǝngɔ a lwa tǝmɔ a waa mɨ a nui, a sʊwa ɨ gɔ n yɔ ya n fʌl nu mǝndɨ a mʊgɔ mwɛ Siluwamɨ. Nǝngɔ mǝ yɔ ya mǝ fʌli. Nǝngɔ mǝ kuwo daagɔ lɛɨ.”

¹² Nǝngɔ ja bʌ gǝn gɔ, “Nʊ gɔ gǝ na a fee?” Nǝngɔ a sʊwa ji gɔ, “Mǝ nyǝm bɔ.”

Nǝbɔ Farisaɨ A Maa Fɨɨtǝm A Gungtǝm Kuli Nɨ

¹³ Nǝngɔ nǝbɔ a yɔ nǝbɔ Farisaɨ gǝm nǝn balɨ nɨ n kulii galɨgǝnɨ.

¹⁴ N Kum Fǝbtǝm Yahudawagɨɨ Yesu a lwa tǝmɔ a wum nu balɨ nɨ nǝnɨ.

¹⁵ Gǝ na nyɔ, nǝbɔ Farisaɨ tʌji ja bʌ gǝn gɔ a maa nyǝn gǝ kuwo daagɔ lɛɨ. Nǝngɔ nʊ nɨ a sʊwa ji gɔ, “A lwa tǝmɔ, nǝngɔ a waa mɨ a nui. Nǝngɔ mǝ fʌl nu mǝndɨ, kǝngkɔ mǝ kuwo daagɔ lɛ.”

¹⁶ Kaam nǝbɔ Farisaɨ gɔ, “Nʊ nɨ a jel bɔ a daagɔ Kwaamaɨ woi, jʊ a bwɨɨ a kɨla bɔ Kum Fǝbtǝmɔ.” Kaamɨ a maa bʌtʌm gɔ, “La maa nyǝn nǝ bwɨlangkɛl dwal maa kanjǝl laatǝm kang nɨ lɛɨ?” Nǝngɔ bʊʊlalɨ jinɔ a beli.

¹⁷ Nǝngɔ ja yǝla jǝ bʌ balɨ nɨ gɔ, “N wɛ bʊʊlalɨ mʊnɔ a kuwo a dul nʊ nɨ gǝmɨ, nǝmɔ a wum mʊ nui?” Nǝngɔ balɨ nɨ a jǝla ji gɔ, “Nʊ nɨ n nǝkuwotǝmkǝga.”

¹⁸ Nǝb dʊʊm Yahudawagɔ a jǝla bɔ gɔ balɨ nɨ n kuli galɨgǝn, n kǝngkǝnɨ kuwo daagɔ lɛɨ, nǝngɔ ja twam gɔ ya ja jo tɛtǝlam gǝnɨ.

¹⁹ Nǝngɔ ja bʌ ji gɔ, “Wʊnɨ nǝn bʊla jen ka? Jǝ́ sʊwa jengɔ jǝ́ bʌ gǝn n kuli nɔɔ? A maa nyǝn la kuwo daagɔ lɛ kǝngkɨɨ?”

²⁰ Nǝngɔ tɛtǝlam gǝnɔ gar jim gɔ, “Nǝn nyǝm bwɛ nɨ nǝn bʊla nǝn, nǝn bʌ gǝn n kuli.

²¹ Nǝn nyǝm bɔ kanga ja maa kuwo daagɔ lɛ kǝngkɨɨ. Nǝ nyǝm bɔ nʊ nɨ a wum gǝm nui. Jǝ́ bʌ gǝn, n ke bɔ bwɛsǝn. Sʊwa sʊwa nǝn nyiyo gǝn.”

²² Tɛtǝlam gǝnɔ a sʊwa nyɔ, jʊ a bwɨɨ jǝ nyʊwa taal nǝb dʊʊm Yahudawagɨɨ lɛ. Yahudawagɔ a kwɛl a kiyo kiyoi gɔ pʌd nʊ nɨ a sʊwa gɔ Yesu nǝn Kiristii, jǝ kaa gǝn kaa a kan mɛlalɨ jin.

²³ N jʊ a bwɨ tɛtǝlam gǝnɔ a sʊwa ji gɔ, “N ke bɔ bwɛsǝn. Jǝ́ bʌ gǝn.”

²⁴ Nǝngɔ nǝbɔ Farisaɨ a yǝla a jo bwɛ nɨ kuli galɨgǝnɨ, ja sʊwa gǝn gɔ, “Sʊwa bɨlǝngkɛl sǝ ń dʊʊl Kwaamagɔ. Nǝn nǝ nyǝm balɨ nɨ a gung ńi n nǝ bwɨlangkɛl.”

²⁵ Nǝngɔ a jǝla ji gɔ, “Na n nǝ bwɨlangkɛlɨ, a mǝndɨ mǝ nyǝm bɔ. Jʊ win mǝ nyǝmɨ, galɨgǝn mǝ kuli, kǝngkɔ mǝ kuwo daagɔ lɛ.”

²⁶ Nǝngɔ ja bʌ gǝn gɔ, “N wɛ a maa mʊnɨ? A maa nyǝn a wum nu mʊnɨ?”

²⁷ Nǝngɔ a jǝla ji gɔ, “N kwɛl n sʊwa jen sʊwaɨ, jǝ́ nyʊwa ɨ bɔ. N wɛ a bwɨ jǝ́ swɨ lɛ jǝ́ yǝla jǝ́ nyʊwa tagɨ? Jen tʌjen jǝ́ swɨ lɛ jǝ́ yǝlam bɛtɔ mɛlalɨ gǝn ka?”

²⁸ Nǝngɔ jǝ tuwo balɨ nɨ gɔ, “Nǝmɔ mʊ bwɛ mɛlalɨ gǝnɨ, ke bɔ nǝn. A nǝnɔ nǝ bɛtɔ mɛlalɨ Musaɨ.

²⁹ Nǝn, nǝn nyǝm Kwaama a sʊwa kɛl jǝbɔ Musa. A balɨ nɨɨ, nǝ nyǝm bɔ daagɔ a jelʌmi.”

³⁰ Nǝngɔ balɨ nɨ a jǝla ji gɔ, “Jǝ laatǝm kanga n wo dwiyen! Jǝ́ nyǝm bɔ daagɔ a jelʌmi. N wo a wum mɨ nu!

³¹ Bǝ nyǝm Kwaama mɨ gǝ nyʊwa nǝb bwɨlangkɛlɔ lɛ. Gǝ nyʊwa nyʊwa nʊ nɨ gwam bǝlá gǝn nɛɨ, maa jʊ nɨ lɛ Kwaama swɨ lɛɨ.

³² A tǝltǝm yooli nɨ a bɛ nǝn a dwiyeni, bǝ nyʊwa bɔ kaa nǝl wo a wum nu nʊ nɨ ja bʌ gǝn n kulii.

³³ Na nʊ nɨ a jel bɔ a daagɔ Kwaama woi, na mɨsɔ dwal lɛ a maa kaa jǝl.”

³⁴ Nǝngɔ ja jǝla gǝn gɔ, “Mɔ nɨ ja bʌ ń a mʊgɔ bwɨlangkɛlɨ, n wɛ mʊ swɨ lɛ ń mɛla nǝmɨ?” Nǝngɔ ja kaa gǝn bɛtǝmɔ a kan mɛlalɨɨ.

Kultǝm A Bʊʊlalɨ

³⁵ Nǝn kwama Yesu a nyʊwa fulonɔ gɔ ja kaa balɨ nɨ bɛtǝmɔ a kan mɛlalɨɨ, nǝngɔ a nya gǝn a bʌ gǝn gɔ, “Ń nǝ bɨlǝngkɛl a daagɔ Bʊla Nǝlɨ woi ka?”

³⁶ Nǝngɔ balɨ nɨ a jǝla gǝn gɔ, “Nǝ dʊʊ, nuwo nyɨɨ? Sʊwa ɨ, sǝ n nǝ bɨlǝngkɛl a daa gɔ woi.”

³⁷ Yesu a jǝla gǝn gɔ, “Ń kuwo gǝn. Nǝn gɔ sʊwa kɛl lɛ jǝbɔ mʊɨ.”

³⁸ Nǝngɔ balɨ nɨ gɔ, “Tɛlalɔ, n nǝ bɨlǝngkɛl.” Nǝngɔ a bǝlá gǝnɨ.

³⁹ Nǝngɔ Yesu a sʊwa gɔ, “Mǝ dɔ yooli nɨ sǝ n maa borang, sǝ nǝb nɨ mɨ kuwo daa lɛɨ, ja nya kuwotǝm daa, sǝ nǝb nɨ kuwo daa lɛɨ, a yǝlam kululʌm.”

⁴⁰ Nǝbɔ Farisaɨ nɨ a kɔtʌgo a daa gǝ woi, ja nyʊwa nyɨɨ, nǝngɔ ja bʌ gǝn gɔ, “Mɔ sʊwa nǝn mɔʊ nǝn tǝnǝn nǝn kululʌm ka?”

⁴¹ Nǝngɔ Yesu a sʊwa ji gɔ, “Na na jǝ́ jǝla jǝ́ kululʌmi, na mɨ jen nǝn bwɨlangkɛl. A sʊwatǝm jenɔ jengɔ jǝ́ kuwo daagɔ lɛɨ, bwɨlangkɛl jenɔ a dul jen.”