Yohana 7 - Dadiya NT

Kɛtǝlam Yesui A Nǝ Bɔ Bɨlǝngkɛl A Daa Gǝ Woi

¹ A gulɔ gǝm Yesu a kɛla a mʊgɔ tǝm Galili. A swɨ bɔ a dɔ a mʊgɔ tǝm Yahudiya, jʊ a bwɨɨ Yahudawa nɨ fʌleni saa lɛ a jʌ gǝn.

² Dikulom gushitɨn Yahudawagɨɨ a dwama.

³ Nǝngɔ kɛtǝlam Yesui a sʊwa gǝn gɔ, “A bʊm nyɔ ń gun fɔ ń shu a Yahudiya, sǝ bɛtɔ mɛlalɨ mʊnɔ a kuwo jǝ laatǝm kang nɨ mʊ maa lɛɨ.

⁴ Pʌd nʊ nɨ swɨ lɛ ja nyǝm gǝnɨ, mɨ gǝ yʊ jʊ nɨ lɛ gǝ maa lɛɨ. Kanjǝl nɨ mɔ maa lɛɨ, bɛ nʊng dul mʊnɔ sǝ yooligɔ a nyǝm ń.”

⁵ Kɛtǝlam Yesui ja nǝ bɔ bɨlǝngkɛl a daa gǝ woi.

⁶ Nǝngɔ Yesu a sʊwa ji gɔ, “Kwama mǝndɨ a lǝga bɔ a la dɨn. A daa jen woi, kwamagɔ pʌd dǝngdǝng.

⁷ A jenɔ yooligɔ mɨsɔ kɔ jen nɛ. A mǝndɨ a kɔ ɨ, jʊ a bwɨɨ n sʊwala gǝn bwɨlang kanjǝl nɨ gǝ maa lɛɨ.

⁸ Jǝ́ yɔ dikulomɔ. Mɨsɔ mǝ shu dikulomɔ lɛ kǝngkɔ, jʊ a bwɨɨ kwama mǝndɨ a lǝga bɔ a la dɨn.”

⁹ Yesu a sʊwa ji kɛl nɨɨ, nǝngɔ a tɨ dǝm a Galilii.

¹⁰ Nǝn kwama kɛtǝlam gǝnɔ a shum dikulomi, nǝngɔ Yesu a shu tǝgǝnɨ. A waam waam, a jel bɔ a talɨ.

¹¹ Yahudawagɔ a tɨtǝn saa gǝn nɛ a daa dikulomɔ gǝm. Jǝ bʌbko lɛ jǝ sʊwa lɛ gɔ, “Nʊ nɨ gǝ na a fee?”

¹² A mʊgɔ mʊrkatǝm nɨɨ, nǝbɔ sʊwaka kɛltɨn nɛ a kʊm jin a dul Yesui. Kaamɨ sʊwa lɛ daddad gɔ, “Nǝfili nyan.” Kaamɨ tag sʊwa lɛ gɔ, “Swagtǝm maa nǝbɔ gǝm lɛɨ.”

¹³ Mɨ nʊ nɨ wo a nya kwaan sʊwatǝm kɛl a dul Yesui a talɨɨ, jʊ a bwɨɨ jǝ nyʊwa taal nǝb dʊʊm Yahudawagɨɨ lɛ.

Yesu A Maa Mɛlalɨ A Dikulom Gushitɨn

¹⁴ Kwama ja lam tɨbǝl dikulomi, nǝngɔ Yesu a dɔ mʊgɔ Kan Kwaamanɔ a tǝl mɛlatǝmɨ.

¹⁵ Nǝngɔ dʊʊm Yahudawagɔ a ta kang a nyiyo jǝ sʊwa lɛ gɔ, “Nʊ nɨ a maa bɔ gǝlalantal wo sǝ a nya kiyotǝm. A la maa nyǝn a yǝlam nǝ nyǝmtǝm nyɨɨ?”

¹⁶ Nǝngɔ Yesu a jǝla ji gɔ, “Kanjǝl nɨ mǝ maa mɛlalɨ gǝnɔ lɛɨ, ke bɔ a mɨ, na nʊ nɨ a twam ɨɨ.

¹⁷ Nʊ nɨ a jǝgǝm jʊ nɨ Kwaama swɨ lɛɨ, nyǝm nyǝm gɔ mɛlalɨ mǝndɨ a jel a daagɔ Kwaama woi, ke bɔ a daagɔ mǝ woi.

¹⁸ Nʊ nɨ mɛla kanjǝl nɨ lɛ a yʊlan gǝnɨ, gǝ saa dul gǝnɔ gǝm dʊʊlǝn. Nʊ nɨ swɨ lɛ a saa nʊ nɨ a twam gǝnɨ gǝm dʊʊlǝnɨ, n nǝ bɨlǝngkɛl, mɨ nǝn bwɨlangkɛl a mʊgɔ gǝn.

¹⁹ Ke bɔ Musa a nǝ jen diili ka? N wɛ a bwɨ mɨ nʊ nɨ wo bwangtǝn diilɔ lɛ a kʊm jeni? N wɛ bwɨ jǝ́ swɨ lɛ jǝ́ jʌ i?”

²⁰ Nǝngɔ nǝbɔ a jǝla gǝn gɔ, “Mʊ nǝngǝn nǝn yʊwa bwɨla a bʊtɔ mʊn. Na bǝ wo swɨ lɛ a jʌ ńi?”

²¹ Nǝngɔ Yesu a jǝla ji gɔ, “N maa jǝ laatǝm kang win. Jǝ́ ta kang a nyiyo pʌd gwam jenɔ a dul jʊ nɨ.

²² Musa a nǝ jen diil biyotǝm mwɛnɔ (ke bɔ gɔ a tǝlɨ, n tʊgalam jenɔ a tǝlɨ). Jǝ́ biyo biyo bwɛsǝn gǝm mwɛn nǝn Kum Fǝbtǝm.

²³ Na jǝ́ biyo biyo bwɛsǝn gǝm mwɛn nǝn di Kum Fǝbtǝmɨ sǝ jǝ́ bwangtǝn diil Musaɨ, n wɛ a bwɨ jǝ́ maa nabwɨl lɛ jǝbɔ mǝ, mǝ gung bʊtɔ nǝlɨ gwam nǝn di Kum Fǝbtǝmɨ?

²⁴ Ka jǝ́ maa lɛ borang a dul kanjǝl kuwotǝm nu. Bɛ jǝ́ maa borang nǝn jʊ nɨ n dǝngdǝngɨ.”

Yesu Nǝn Kiristi Ka?

²⁵ Nǝngɔ kaam nǝbɔ Urushalimaɨ a sʊwa gɔ, “Ke bɔ nʊ nɨ jǝ saa lɛ ja jʌi ka?

²⁶ N wɔ sʊwa kɛlɔ lɛ a talɨ. Ja maa gǝm bɔ kaa jǝl. Jǝ́ kuwo lɛ nǝb dʊʊmɔ a nyǝm dangǝn gɔ nǝn gɔ nǝn Kiristi ka?

²⁷ N wɔ bǝ nyǝm daagɔ nʊ nɨ a jelʌmi. Na nǝn Kiristi bɨlǝngǝn a bɛɨ, mɨ nʊ nɨ wo nyǝm daa nɨ lɛ ga jelʌm woi.”

²⁸ Yesu maa mɛlalɨgɔ lɛ a Kan Kwaaman, nǝngɔ a gung diilɔ a sʊwa gɔ, “Jen jǝ́ nyǝm ɨ, jǝ́ nyǝm daagɔ mǝ jelʌm woi. Mǝ bɛ bɔ nǝn fɔlɔn dul mɨ. Nʊ nɨ a twam ɨɨ n nǝ bɨlǝngkɛl, jǝ́ nyǝm gǝn bɔ.

²⁹ Mǝ, n nyǝm gǝn, jʊ a bwɨɨ mǝ bɛ a daa gɔ woi, nǝn gɔ a twam ɨ.”

³⁰ Yesu a sʊwa kɛl nɨɨ, nǝngɔ nǝbɔ saa lɛ sǝ jǝ ta gǝnɨ. Mɨ nʊ nɨ wo a ke gǝnɨ, jʊ a bwɨɨ kwama gǝnɔ a lǝga bɔ a la.

³¹ Nǝbɔ a lada tag a kʊm nǝbɨɨ a nǝ bɨlǝngkɛl nǝn Yesu, jǝ sʊwa lɛ gɔ, “Nǝn kwama Kiristi bɛm lɛɨ, maa maa kanjǝl laatǝm kang nɨ shu shui a wʊnɨ nʊ nɨ a maaɨ ka?”

Nǝb Dʊʊm Yahudawagɔ A Saa Tatǝm Yesui

³² Nǝbɔ Farisaɨ a nyʊwa nǝbɔ sʊwa kɛl lɛ daddad a kʊm jin a dul Yesui, nǝngɔ dʊʊm nǝbkǝlamɔ jǝbɔ nǝbɔ Farisaɨ ja twam nǝb tɔɔtǝm Kan Kwaamanɔ gɔ ja ta gǝn.

³³ Nǝngɔ Yesu a jǝla gɔ, “Kwama mǝ yɨ lɛ nǝbɔ jeni a taam nǝn dǝm nyɔ, sǝ n yǝla n shu a daagɔ nʊ nɨ a twam ɨɨ.

³⁴ Jǝ́ saa ɨ saa ɨ, mɨsɔ jǝ́ nya ɨ lɛ. Daagɔ mǝ woi, mɨsɔ jǝ́ dwal lɛ jǝ́ yɔ wo.”

³⁵ Nǝngɔ Yahudawagɔ a sʊwaka a kang bʊtɔ jin gɔ, “Gǝ yi a fee, mɨsɔ bǝ nya gǝn nɛɨ? Kɛna yi a daagɔ Yahudawa nɨ a kwɨya tǝmɔ nǝn kwan jǝ yǝm jǝbɔ nǝbɔ Girikaɨ, sǝ ya mɛla nǝbɔ Girikaɨ gǝm lɛ fʌleni?

³⁶ N wɛ gǝ nʊng lɛ nǝn sʊwatǝmɔ gɔ, bǝ saa gǝn saa, mɨsɔ bǝ nya gǝn nɛɨ? N wɛ gǝ nʊng lɛ tag gɔ, daagɔ gǝ woi, mɨsɔ bǝ dwal lɛ bǝ yɔ woi?”

Laa Mwɛ Kʊlɨ

³⁷ Nǝn kum dɨltǝm dikulomɔ, wʊnɨ a yǝlam kɔkɔ dʊʊn dikulomi, nǝngɔ Yesu a gun a tɨɨ a gung diilɔ sʊwa lɛ gɔ, “Nʊ nɨ nyʊwa diil mwɛn nɛɨ, bɛ ga bɛ a daa mɨ woi sǝ ga nɔɔ.

³⁸ Nʊ nɨ a nǝ bɨlǝngkɛl a daa mǝ woi, ‘Laa mwɛ nɨ nǝ kʊlɨ lɛɨ, jel jel a nǝl gǝn,’ kanga mʊlalɨ kɛl Kwaamaɨ a sʊwaɨ.”

³⁹ Yesu gǝ sʊwa kɛlɔ a dul Yʊwa Kwaamaɨ, wʊnɨ nǝb nɨ a nǝ bɨlǝngkɛl a daa gɔ woi jǝ yo lɛɨ. A kwama gɔ lǝga bɔ ja nǝ ji Yʊwa Kwaamaɨ, jʊ a bwɨɨ lǝga bɔ ja do Yesu a dʌbʌl dɨn.

Nǝbɔ A Maa Gʊbkatǝm A Dul Yesui

⁴⁰ Nǝbɔ a nyʊwa kɛlɔ Yesu a sʊwaɨ, kaamɨ gɔ, “N bɨlǝngkɛl, nʊ nɨ n nǝkuwotǝmkǝga.”

⁴¹ Kaamɨ gɔ, “Nʊ nɨ nǝn Kiristi.” Tangǝnɔ gɔ, “Kiristi nɨ jel jel a mʊgɔ Galili ka?

⁴² Mʊlalɨ kɛl Kwaamaɨ a sʊwa gɔ, ‘Kiristi jel a dʊʊm Daudaɨ, ja bʌ gǝn a Baitalami, a bɛ tuulɔ nɨ Dauda a yɨmɨ, mɨ nyɔ ka?’ ”

⁴³ Nǝngɔ nyiyo nǝbɨɨ a bel a dul Yesui.

⁴⁴ Kaamɨ swɨ lɛ jǝ ta gǝn. Mɨ nǝn nʊ nɨ a ke gǝnɨ.

Nǝb Dʊʊm Yahudawa Nɨ Mɨ Nǝn Nǝtǝm Bɨlǝngkɛlɨ

⁴⁵ Nǝn kwama nǝb tɔɔtǝm Kan Kwaamanɔ a yǝlamɨ, nǝngɔ dʊʊm nǝbkǝlamɔ jǝbɔ nǝbɔ Farisaɨ ja bʌ ji gɔ, “N wɛ a bwɨ jǝ́ bɛ bɔ nǝn gɨɨ?”

⁴⁶ Nǝngɔ nǝb tɔɔtǝm Kan Kwaamanɔ a jǝla ji gɔ, “Mɨ kaa nǝl wo sʊwa kɛl lɛ na nʊ nɨɨ.”

⁴⁷ Nǝngɔ nǝbɔ Farisaɨ a sʊwa nǝb tɔɔtǝm Kan Kwaamanɔ gɔ, “Jen tʌjen, a swag jen ka?

⁴⁸ Kaa nǝl wo a kʊm nǝb dʊʊmɨ jǝbɔ nǝbɔ Farisaɨ a nǝ bɨlǝngkɛl a daa gɔ woi ka?

⁴⁹ Mʊrkatǝm nǝb nɨ a nyǝm bɔ kaa jǝl a dul diil Musaɨ, Kwaama a kwɛl a lag ji lagɨ.”

⁵⁰ Win a kʊm nǝbɔ Farisaɨ nɨ nǝn Nikodimu, wʊnɨ a saa kuwotǝm gǝnɔ galɨgǝnɨ, nǝngɔ a sʊwa tangǝn nǝbɨɨ gɔ,

⁵¹ “A diil bǝnɔ gǝmɨ, mɨ bǝ mwatɨ borang lɛ, na bǝ nyʊwa bɔ kɛl nɨ a jel a nyiyo gǝnɨ, bǝ dʌng jʊ ga maaɨ.”

⁵² Nǝngɔ ja jǝla gǝn gɔ, “Mɔ tǝmʊn mʊ bwɛ Galilii ka? Fɛ ń dʌng kɛl Kwaamaɨ sǝ ń kuwo, mɨ nǝkuwotǝmkǝga nɨ jel lɛ a mʊgɔ Galilii.”

⁵³ Nǝngɔ gwam ja shu a lɔɨ.