Yohana 6 - Dadiya NT

Jatǝm Nǝn Nǝbɔ Fʊlkʊblǝn Nʊ

¹ A gulɔ gǝm, nǝngɔ Yesu a yab wɨma Galiligɨɨ, wʊnɨ nǝn gɔ wɨma Tibariyagɨɨ.

² Nǝbɔ a lada nyɔ na a bwang gǝmɨ, jʊ a bwɨɨ, ja kuwo jǝ laatǝm kang nɨ gǝ maa nǝb bɔɔlamɔ gǝm lɛɨ.

³ Nǝngɔ Yesu a gwi yemɔ, a yɨ wo jǝbɔ bɛtɔ mɛlalɨ gǝnɨ.

⁴ A kwama gɔ Dikulom Yabtǝm Yahudawagɨɨ a dwama.

⁵ Yesu a gung nu gǝnɨ, a kuwo nǝbɔ a lada bɛ lɛ nǝn dɔɔm a daa gǝ woi. Nǝngɔ a bʌ Filibus gɔ, “Bǝ ten jǝjalǝnɔ fee a lada sǝ nǝb nɨ a ja?”

⁶ Yesu a bʌ Filibus jʊ nɨ nyɔ sǝ tɛl gǝn, jʊ a bwɨɨ, Yesu a kwɛl a nyǝm jʊ gǝ maa lɛɨ.

⁷ Nǝngɔ Filibus a jǝla gǝn gɔ, “Kemʌn sǝlǝn nɨ nǝ maatǝm maajɨ nya lɛ a kumɔ fʊlkʊb yoi, na bǝ ten jǝjalǝn nǝnɨ, mɨsɔ la jim lɛ gwam.”

⁸ Nǝngɔ win a kʊm bɛtɔ mɛlalɨ gǝnɔ dunɔ nǝn Andarawas, kɨla Bitrusi a sʊwa Yesu gɔ,

⁹ “Kaa bwɛsǝn fɔ nǝn kʊkkʊmɔ nʊ, ja maa nǝn mim tǝba jǝbɔ jʌngitɨnɔ yo. N wɛ maa nǝb nɨ gǝm lɛ a lada nyɨɨ?”

¹⁰ Nǝngɔ Yesu a sʊwa bɛtɔ mɛlalɨ gǝnɨ gɔ, “Jǝ́ sʊwa nǝbɔ a yɨ yɨɨ.” Daa gɔ yǝla yʌbigɔ wo. Batǝmɔ a yɨ yɨɨ, a la fʊlkʊblǝnɔ nʊ.

¹¹ Yesu a do kʊkkʊm nɨɨ, a buu Kwaama gǝm kangɨ, nǝngɔ a tǝga nǝb nɨ yǝm yǝmɨ, a nǝ ji kanga la jim lɛɨ. A maa nyɔ tag nǝn jʌngitɨnɔ.

¹² Ja ja, ja boba. Nǝngɔ a sʊwa bɛtɔ mɛlalɨ gǝnɔ gɔ, “Jǝ́ mʊr fʌtʌlogigɔ a bǝlaɨ. Ka jǝ́ bǝla lɛ kaa jǝl a kala.”

¹³ Nǝngɔ bɛtɔ mɛlalɨ gǝnɔ a mʊr fʌtʌlogi kʊkkʊmɨ, a yii tuntɨnɔ kʊb jeli yo. N fʌtʌlogi kʊkkʊm nɨ nʊ na mim tǝbaɨ, wʊnɨ nǝbɔ a ja a bǝlaɨ.

¹⁴ Nǝbɔ a kuwo jǝ laatǝm kang nɨ Yesu a maaɨ, nǝngɔ ja sʊwa gɔ, “Bɨlǝngkɛl, nʊ nɨ nǝn gɔ nǝkuwotǝmkǝga nɨ ja sʊwa gɔ bɛ lɛ a yooli nɨɨ!”

¹⁵ Nǝn kwama Yesu a nyǝm jǝ maa bʊʊlalɨ lɛ, sǝ ja do gǝn nǝn kwaan jǝ ya gǝn fɔlɔnɨ, nǝngɔ a yǝla a shu a dʌbʌl yem kwaagɨɨ.

Yesu A Yɔ Yɔm A Dʌbʌl Mwɛ

¹⁶ Kwamagɔ kumɔ a tǝl fim lɛɨ, bɛtɔ mɛlalɨgɔ a gǝla a yem sǝ jǝ yɔ a wɨmaɨ,

¹⁷ nǝngɔ ja dɔ tɨyamwɛngɔ ja tǝl yabtǝmɔ jǝ shu lɛ a Kafarnahumi. Kwama gɔ kumɔ a fii, Yesu lǝga bɔ bɛ a daa ji woi.

¹⁸ Nǝngɔ la wɨmagɔ a tǝl bwɨyagɨɨ, jʊ a bwɨɨ kaa yʊwa bwɨla guu lɛ.

¹⁹ Nǝn kwama ja mǝgǝm tɨyamwɛngɔ mɛlɔ taalɨ na mɨ nyɨɨ naalɨ, nǝngɔ la jǝ kuwo Yesu yɔ yɔmɔ lɛ a dʌbʌl mwɛɨ, bɛ lɛ nǝn dɔɔm a tɨyamwɛngɔ gǝm. Nǝngɔ taalɔ a ta jii.

²⁰ Nǝngɔ Yesu a sʊwa ji gɔ, “Nǝmǝ, ka jǝ́ nyʊwa lɛ taal.”

²¹ Nǝngɔ ja jǝla ja yo gǝn a mʊgɔ tɨyamwɛngɔ gǝmɨ. Tʌgo a kang, nǝngɔ tɨyamwɛngɔ a la kʌng wɨmagɔ jǝ yilomi.

Nǝbɔ A Lada A Saa Yesu

²² Nǝn tǝmsɛlɨɨ, tangǝn nǝbɔ a bǝla a dʌng wɨma wuleni, ja bʊʊla tɨyamwɛngɔ win tɨm wo a kwama gɨɨ, ja nyǝm Yesu a dɔ bɔ tɨyamwɛngɔ jǝbɔ bɛtɔ mɛlalɨ gǝnɔ, nǝbɔ a kuwo bɛtɔ mɛlalɨgɔ a shu kwaaji.

²³ Kaam tɨyamwɛngtɨnɔ a bɛ a Tibariya, ba ja tɨ nǝn dɔɔm a daa nɨ nǝbɔ a jam kʊkkʊmɔ a gul buutǝm kang Tɛlalɔɨ.

²⁴ Nǝbɔ a kuwo mɨ Yesu wo jǝbɔ bɛtɔ mɛlalɨ gǝnɨ, nǝngɔ ja dɔ tɨyamwɛngtɨnɔ ja shu a Kafarnahum a saatǝm Yesui.

Yesu Nǝn Gɔ Kʊkkʊm Nɨ Nǝ Kʊlɨ Lɛɨ

²⁵ Ja nya gǝn a kʌng wɨmaɨ, nǝngɔ jǝ bʌ gǝn gɔ, “Feyi, fɨyang mʊ bɛ fǝɨ?”

²⁶ Nǝngɔ Yesu a jǝla ji gɔ, “Bɨlǝngǝn, mǝ sʊwa jen nɛɨ, jʊ a bwɨ jǝ́ saa ɨ lɛɨ, n ke bɔ jǝ laatǝm kang nɨ jǝ́ kuwo mǝ maa lɛɨ. Jǝ́ saa ɨ, n kɛl kʊkkʊmɔ jǝ́ ja, jǝ́ bobaɨ.

²⁷ Ka jǝ́ gaala lɛ a dul jǝjalǝn nɨ kala lɛɨ. Bɛ jǝ́ gaala a dul jǝjalǝn nɨ mɨsɔ kala lɛ woi, wʊnɨ nǝ kʊlɨ lɛ mɨ dɨtǝm woi. Wʊnɨ nǝn gɔ jǝjalǝnɔ Bʊla Nǝlɨ nǝ jen nɛɨ. A dul Bʊla Nǝlɨ Kwaama Tɛtɛ a kwɛl a gatǝn mɛl gǝnɔ tʌgoi, a jǝla nǝnɨ.”

²⁸ Nǝngɔ nǝbɔ a bʌ Yesu gɔ, “Wɛ nǝ maa lɛ sǝ nǝn yii jʊ Kwaama swɨ lɛɨ?”

²⁹ Nǝngɔ Yesu a jǝla ji gɔ, “Wʊnɨ nǝn gɔ jʊ Kwaama swɨ lɛɨ, jǝ́ nǝ bɨlǝngkɛl a nʊ nɨ ga twamɨ.”

³⁰ Nǝngɔ nǝbɔ a bʌ Yesu gɔ, “N jǝ laatǝm kang wɛ mʊ maa lɛɨ, sǝ nǝn kuwo nǝn nǝ bɨlǝngkɛl a daa mɔ woi? Wɛ mʊ maa lɛɨ?

³¹ Dʊʊm tʊgalam bǝnɔ, ja ja manna a kuul, kanga a mʊla mʊlaɨ gɔ, ‘A nǝ ji kʊkkʊmɔ a dʌbʌl kwama sǝ ja ja.’ ”

³² Nǝngɔ la Yesu a sʊwa ji gɔ, “Bɨlǝngkɛl mǝ sʊwa jen nɛɨ, ke bɔ Musa a nǝ jen kʊkkʊm nɨ a dʌbʌli. Tɨya mɨ nǝn gɔ a nǝ jen kʊkkʊm bɨlǝngǝnɔ a dʌbʌli.

³³ Jǝjalǝn Kwaamaɨ nʊ nɨ gǝla lɛ a dʌbʌli, wʊnɨ nǝ yooligɔ kʊlɨ lɛɨ.”

³⁴ Nǝngɔ ja sʊwa gǝn gɔ, “Tɛlalɔ, bɛ ya nǝ nǝn jǝjalǝn nɨ lɛ kwangkwang!”

³⁵ Nǝngɔ Yesu a jǝla ji gɔ, “Nǝmǝ mǝ jǝjalǝn kʊlɨgɨɨ. Nʊ nɨ a bɛ daa mǝ woi, mɨsɔ nyʊwa jʊwan nɛ wo. Nʊ nɨ a nǝ bɨlǝngkɛl a daa mǝ woi, mɨsɔ yǝla lɛ a nyʊwa diil mwɛn wo tag.

³⁶ Kanga mǝ sʊwa jen galɨgǝnɨ, jǝ́ kuwo i, jǝ́ nǝ bɔ bɨlǝngkɛl.

³⁷ Pʌd nʊ nɨ Tɛtɛ a nɨ ɨɨ, jǝ bɛ bɛ a daa mɨ woi. Nʊ nɨ a bɛ a daa mǝ woi, mɨsɔ mǝ kaa gǝn nɛ.

³⁸ Jʊ a bwɨɨ, mǝ gǝla bɔ a kwama sǝ ba n maa jʊ nɨ nǝl mǝndɨ swɨ lɛɨ. Mǝ gǝla sǝ ba n maa jʊ nʊ nɨ a twam ɨɨ swɨ lɛɨ.

³⁹ Swɨtǝm nʊ nɨ a twam ɨɨ, gɔ bɛ ka n dǝg lɛ kaa nǝl win a lɛla a mʊgɔ nǝb nɨ ga nɨ ɨɨ. Bɛ n gung ji a kɔkɔ dɨltǝmɔ gǝm.

⁴⁰ Swɨtǝm Tɛtɛ mɨɨ gɔ, na nʊ nɨ a dʌng Bwɛɨ, a nǝ bɨlǝngkɛl a daa gǝ woi, nya nya kʊlɨ nɨ mɨ dɨtǝm woi, mǝ gung gǝn gung nǝn kum dɨltǝmɔ.”

⁴¹ Nǝngɔ Yahudawagɔ a maa kʊngatǝm a dul Yesui, jʊ a bwɨɨ, a sʊwa gɔ, “Nǝmǝ mǝ jǝjalǝn nɨ a gǝla a dʌbʌli.”

⁴² Nǝngɔ ja sʊwa gɔ, “Bwɛ nɨ ke bɔ Yesu bʊla Yusufui, wʊnɨ bǝ nyǝm nɛnɛ gɔ jǝbɔ tɛtɛ gɨɨ ka? A la a maa nyǝn sʊwa lɛ gɔ, ‘Mǝ gǝla a dʌbʌli?’ ”

⁴³ Nǝngɔ Yesu a jǝla ji gɔ, “Jǝ́ bǝla kʊngatǝmɔ wo a kʊm jen.

⁴⁴ Mɨ nʊ nɨ dwal lɛ a bɛ a daa mǝ woi, na ke bɔ Tɛtɛ nɨ a twam ɨ a gʊ gǝnɨ. Mǝ tǝmɨ mǝ gung gung nʊ nɨ a kɔkɔ dɨltǝmɔ gǝm.

⁴⁵ Ja mʊla mʊlaɨ a mʊgɔ langǝn bwangǝn nǝbkuwotǝmkǝgagɨɨ, sʊwa lɛ gɔ, ‘Pʌd jinɔ nǝn Kwaama mɛla jim lɛɨ.’ Pʌd nʊ nɨ a nyʊwa, a mɛla a daagɔ Tɛtɛ woi, bɛ bɛ a daa mǝ woi.

⁴⁶ Mɨ nǝn nʊ nɨ a kuwo Tɛtɛɨ, na ke bɔ nʊ nɨ a gǝla a daagɔ Kwaama woi, nǝn gɔ kwaagɔ win a kuwo Tɛtɛɨ.

⁴⁷ “Bɨlǝngǝn mǝ sʊwa jen nɛɨ, nʊ nɨ a nǝ bɨlǝngkɛl a daa mǝ woi, a nya kʊlɨ nɨ mɨ dɨltǝm woi.

⁴⁸ Nǝmǝ mǝ jǝjalǝn nɨ nǝ kʊlɨ lɛɨ.

⁴⁹ Dʊʊm tʊgalam jenɔ a ja mannagɔ a mʊgɔ kuul, ja bʊlala.

⁵⁰ Jǝjalǝnɔ wɔ wʊnɨ gǝla lɛ a dʌbʌli, sǝ nʊ nɨ pʌd a ja jǝjalǝn nɨɨ, mɨsɔ bʊla lɛ.

⁵¹ Nǝmǝ mǝ jǝjalǝn kʊlɨ nɨ a gǝla a dʌbʌli. Na nʊ nɨ a ja jǝjalǝn nɨ, yɨ yɨ nǝn kʊlɨ mɨ dɨltǝm wo. Jǝjalǝn nɨ n nam bʊtɔ mɨ, wʊnɨ mǝ nǝ lɛɨ sǝ yooli nɨ a nya kʊlɨɨ.”

⁵² Nǝngɔ Yahudawagɔ a tǝl bǝngkatǝmɔ nǝn diil a kʊm jini, jǝ sʊwa lɛ gɔ, “Bwɨ nyǝn nʊ nɨ dwal nǝ bǝn nam bʊtɔ gǝnɔ lɛ bǝ woi?”

⁵³ Nǝngɔ Yesu a sʊwa ji gɔ, “Bɨlǝngkɛl mǝ sʊwa jen nɛɨ, na jǝ́ wo bɔ nam bʊtɔ Bʊla Nǝlɨ, jǝ́ nɔɔ bɔ tʊʊm gǝnɔ tagɨ, mɨ jen nǝn kʊlɨ a mʊgɔ bʊtɔ jen.

⁵⁴ Na nʊ nɨ a wo nam bʊtɔ mǝndɨ, a nɔɔ tʊʊm mǝndɨ, nǝngǝn nǝn kʊlɨ nɨ mɨ dɨtǝm woi, mǝ gung gǝn gung a kɔkɔ dɨltǝm tag.

⁵⁵ Jʊ a bwɨɨ, nam bʊtɔ mǝndɨ n bɨlǝng jǝjalǝn, tʊʊm mǝndɨ n bɨlǝng jǝ nɔɔtǝm.

⁵⁶ Nʊ nɨ wo nam bʊtɔ mǝndɨ lɛ, nɔɔ tʊʊm mǝndɨ lɛɨ, gǝ na jǝbɔ mǝ, mǝ tǝmɨ mǝ na jǝbɔ gɔ.

⁵⁷ Kanga nɨ Tɛtɛ kʊlɨ a twam ɨɨ, a dul gǝn mǝ nya kʊlɨ nɨɨ, nʊ nɨ a dǝg ɨ mǝ yǝlam jǝjalǝn gǝnɨ, nya nya kʊlɨ a kɛl dul mɨ.

⁵⁸ Nǝmǝ mǝ jǝjalǝn nɨ a gǝla a dʌbʌli. Dʊʊm tʊgalam jenɔ ja ja mannagɔ, nǝngɔ ja bʊlaɨ. Nʊ nɨ a ja jǝjalǝn nɨɨ, yɨ yɨ nǝn kʊlɨ mɨ dɨltǝm wo.”

⁵⁹ Yesu a sʊwa kanjǝl nɨ gwam nǝn kwamagɔ maa mɛlalɨ lɛ a mʊgɔ kan mɛlalɨ a Kafarnahumi.

Kɛl Kʊlɨ Nɨ Mɨ Dɨltǝm Woi

⁶⁰ Nyʊwatǝm kɛl nɨ nyɨɨ, nǝngɔ kaam bɛtɔ mɛlalɨ gǝnɔ a lada nyɔ a kʊm tangǝnɨ a sʊwa gɔ, “Kɛl nɨ a bwa. Nuwo dwal lɛ a yoi?”

⁶¹ Yesu a kwɛl a nyǝm bɛtɔ mɛlalɨ gǝnɔ maa kʊngatǝm lɛ a mɛlalɨ nɨ gǝm. Nǝngɔ a sʊwa ji gɔ, “Mɛlalɨ nɨ a kal jem nǝl ka?

⁶² La nǝl jenɔ yǝlam nyǝn na jǝ́ kuwo Bʊla Nǝlɨ gwi shu lɛ a daagɔ a jelʌmi?

⁶³ Yʊwa Kwaamaɨ nǝn gɔ nǝ kʊlɨ lɛɨ, bʊtɔgɔ mɨ nǝn kaa kwaan wo. Kɛltɨn nɨ mǝ sʊwa jeni, n Yʊwa jǝbɔ kʊlɨ.

⁶⁴ Kaam jenɔ wo a nǝ bɔ bɨlǝngkɛl.” A sʊwa nyɔ jʊ a bwɨɨ, a tǝltǝmɔ gǝm Yesu a nyǝm nyǝmɨ nǝb nɨ a nǝ bɔ bɨlǝngkɛlɨ, jǝbɔ nʊ nɨ lungto gǝn nɛɨ.

⁶⁵ Nǝngɔ Yesu a sʊtǝn sʊwatǝmɔ gɔ, “N jʊ a bwɨ mǝ sʊwa jen nɛ mǝʊ, ‘Mɨ nʊ nɨ wo dwal lɛ a bɛ a daa mǝ woi, na Tɛtɛ a jǝla gǝm bɨɨ.’ ”

⁶⁶ Nǝn kwama Yesu a sʊwam kɛl nɨɨ, bɛtɔ mɛlalɨ gǝnɔ a lada a bǝla bwangtǝm gǝnɔ.

⁶⁷ Nǝngɔ Yesu a bʌ bɛtɔ mɛlalɨ gǝnɔ nɨ kʊb jeli yoi gɔ, “Jen tʌjen jǝ́ swɨ lɛ jǝ́ shu ka?”

⁶⁸ Nǝngɔ Saminu Bitrus a jǝla gǝn gɔ, “Tɛlalɔ, nǝ yi a daa woi? Mɔ nǝngǝn nǝn kɛl nɨ nǝ kʊlɨ lɛ mɨ dɨltǝm woi.

⁶⁹ Nǝn, nǝn nǝ bɨlǝngkɛl, nǝn nyǝm, mɔ Nǝ Sagsag Kwaamaɨ.”

⁷⁰ Nǝngɔ Yesu a jǝla ji gɔ, “Nǝmǝ mǝ jǝgam jen kʊb jeli yo nɨɨ, win a kʊm jen n mamm.”

⁷¹ Gǝ nʊng Yahuza bʊla Saminu Iskariyotii. Nǝn gɔ nʊ lungto gǝn nɛɨ, gǝ na win a mʊgɔ kʊb jeli yo nɨɨ.