Yohana 3 - Dadiya NT

Nikodimu A Bɛ A Daagɔ Yesu Woi

¹ Kaa bwɛ Farisa wo, dunɔ nǝn Nikodimu. Gǝ na a mʊgɔ mʊrkalɨ nǝb dʊʊm Yahudawagɨɨ.

² Kaa kum a bɛ a daagɔ Yesu woi nǝn kum, nǝngɔ a sʊwa gǝn gɔ, “Feyi, nǝn nyǝm mʊ nǝ mɛlalɨ nɨ Kwaama twamɨ. Mɨ nǝn nʊ nɨ maa jǝ laatǝm kang nɨ mʊ maa lɛɨ, na Kwaama mɨ jǝbɔ gɨɨ.”

³ Nǝngɔ Yesu a sʊwa gǝn gɔ, “N bɨlǝngkɛl mǝ sʊwa ń nɛɨ, mɨ nǝn nʊ nɨ kuwo fɔlɔn lɔ Kwaamaɨ lɛ, na ja yǝla bɔ ja bʌ gǝn tʌgoi.”

⁴ Nǝngɔ Nikodimu a bʌ gǝn gɔ, “La jǝ yǝla jǝ bʌ nʊ nɨ a gʌloi nyǝn tag? Dɔ dɔ fʌl nyɨya gɨɨ, sǝla ja yǝla ja bʌ gǝn tʌgo ka?”

⁵ Nǝngɔ Yesu a jǝla gǝn gɔ, “N bɨlǝngkɛl mǝ sʊwa ń nɛɨ, na ja bʌ bɔ nǝl a gola mwɛ jǝbɔ Yʊwa Kwaamaɨ, mɨsɔ dɔ fɔlɔn lɔ Kwaamaɨ lɛ.

⁶ Jʊ nɨ nǝfili a bʌi, n bʊtɔ bǝn. Jʊ nɨ Yʊwa Kwaamaɨ a bʌi, n yʊwa.

⁷ Bɛ ka ń ta lɛ kang a nyiyo mǝ sʊwa ń mǝʊ, ‘Mɨsɔ mʊ kuwo fɔlɔn lɔ Kwaamaɨ lɛɨ na ja yǝla bɔ ja bʌ ń tʌgoi.’

⁸ Yʊwagɔ gǝ fʌl gǝ yɔ a daa nɨ a swɨɨ, mʊ nyʊwa diil gǝnɔ lɛ, mʊ nyǝm bɔ daagɔ a jelʌmi jǝbɔ daagɔ yilom woi. A na nyɔ dangǝn jǝbɔ nʊ nɨ a nya bʌtʌm Yʊwa Kwaamaɨ.”

⁹ Nǝngɔ Nikodimu a bʌ gɔ, “La jʊ nɨ bwɨ nyǝn?”

¹⁰ Nǝngɔ Yesu a jǝla gǝn gɔ, “Mʊ gʌleng dʊʊ nǝ mɛlalɨ a mʊgɔ Israila, la mɔ nyǝm bɔ jʊ nɨ ka?

¹¹ N bɨlǝngkɛl mǝ sʊwa ń nɛɨ, nǝn sʊwa jʊ nǝn nyǝmɨ, nǝn nǝ nyiyo fulon jʊ nɨ nǝ kuwoi, mɨ nǝn nʊ nɨ a kʊm jen a jǝla nǝn kɛl nǝnɨ.

¹² Na n sʊwa jen kɛl tǝm nɨɨ jǝ́ jǝla bɔ nǝn, la jǝ́ jǝla nyǝn nǝn kɛl dʌbʌlɔ, na n sʊwa jeni?

¹³ Mɨ nǝn nʊ nɨ wo gwi a yɔ a dʌbʌli, na ke bɔ Bʊla Nǝlɨ, wʊnɨ a gǝla a dʌbʌl a bɛɨ.

¹⁴ “Kanga Musa a gungʌm sɔɔ maalʊ a swɛ a mʊgɔ kuuli, n kanga jǝ gungʌm Bʊla Nǝlɨ lɛɨ,

¹⁵ sǝ nʊ nɨ a nǝ bɨlǝngkɛl a daa gǝ woi a nya kʊlɨ nɨ mɨ dɨtǝm woi.”

¹⁶ Kwaama a swɨ yooli nɨ dangǝn, nǝngɔ a nǝ Bʊla gɔ nɨ win swarɨ, dɨsɔ na nʊ nɨ a nǝ bɨlǝngkɛl a daa gǝ woi, mɨsɔ bʊla lɛ, nya nya kʊlɨ nɨ mɨ dɨtǝm woi.

¹⁷ Kwaama a twam bɔ Bʊla gɔ a yooli nɨ sǝ a mwatɨ yooli nɨ gǝm borang. A twam gǝn sǝ a bʊʊ nǝn yooligɔ a gola gǝn.

¹⁸ “Nǝb nɨ a nǝ bɨlǝngkɛl a daagɔ Bwɛ woi, a nǝ ji bɔ bwɨlangkɛl. Nǝb nɨ a nǝ bɔ bɨlǝngkɛlɨ, a kwɛl a nǝ ji bwɨlangkɛl, jʊ a bwɨɨ ja nǝ bɔ bɨlǝngkɛl a dun Bʊla Kwaamaɨ nɨ wini.

¹⁹ Jʊ wɔ a bwɨ Kwaama a maa jim borangɨ, nyalǝmɔ a bɛ a yooligɔ gǝm, nǝbɔ a swɨ duddugigɔ a laa nyalǝmɔ, jʊ a bwɨɨ maajɨ jinɔ na a bwɨla gwam.

²⁰ Nǝb nɨ gwam maa bwɨlang maajɨ lɛ a kɔ nyalǝmɨ, mɨsɔ jǝ bɛ lɛ a daagɔ nyalǝmɔ woi, kage ja nʊng maajɨ jinɔ nyangnyang.

²¹ Nǝb nɨ maa jʊ nɨ lɛ dǝngdǝngɨ, jǝ bɛ lɛ a daagɔ nyalǝmɔ woi, sǝ nyalǝmɔ a nʊng maajɨ nɨ ja maaɨ ja bwangtǝn diil Kwaamaɨ.”

Kɛlɔ Yohana Nǝ Yʊtǝm Mwɛ Sagsagɔ A Sʊwa A Dul Yesui

²² A gulɔ gǝmɨ, nǝngɔ Yesu jǝbɔ bɛtɔ mɛlalɨ gǝnɔ ja shu a Yahudiyaɨ. A yɨ bʊd a daagɔ jǝbɔ ji, yʊ nǝbɔ mwɛ sagsag lɛ.

²³ Yohana tǝgǝn yʊ nǝbɔ mwɛ sagsag lɛ a tuulɔ Ainon, wʊnɨ a kɔtʌgo a Salimaɨ. Jʊ a bwɨɨ mwɛmɔ a lada a daa gɔ. Nǝbɔ bɛ lɛ, yʊ ji mwɛ sagsagɔ lɛ.

²⁴ (Kwama jʊ nɨ a bwɨmɨ, na lǝga bɔ ja kubʌl Yohana a mʊgɔ lɔsomi.)

²⁵ Nǝngɔ bɛtɔ mɛlalɨ Yohanaɨ ja dɔ bǝngkatǝm kɛl jǝbɔ kaa bwɛ Yahudaɨ a dul jǝfʊlǝn saaltǝm bʊtɔ wʊnɨ gǝ dǝg nǝl lɛ a yǝlam sagsagɨ.

²⁶ Nǝngɔ ja yɔ a daagɔ Yohana woi, ya ja bʌ gǝn gɔ, “Nǝ mɛlalɨ, nʊ nɨ mɔ dakini jǝbɔ gɨɨ, a gwanga twal a tiyo Urduni, wʊnɨ mʊ sʊwa kɛl lɛ a dul gǝnɨ, n wɔ kǝngkɔ yʊ nǝbɔ mwɛ sagsag lɛ, nǝbɔ gwam yilo a daa gǝ woi.”

²⁷ Nǝngɔ Yohana a jǝla gɔ, “Mɨ nǝn nʊ nɨ nya jǝl lɛ, na ja nǝ gǝn bɔ a dʌbʌli.

²⁸ Jen jǝ́ nǝ nǝ nyiyo a dul mɨ, jengɔ n sʊwa mǝʊ, ‘Mǝ ke bɔ Kiristi. Mǝ ja twam ɨ sǝla a bɛ a gul mɨ.’

²⁹ A kangwaal naakan, balɨgɔ nǝn gɔ a naa nɔɔlɨgɨɨ. Fwal balɨ nɨ a naa nɔɔlɨgɨɨ, gǝ yam kɛl nɨ jel lɛ a nyiyo balɨgɨɨ. Gǝ nyʊwa nyʊwa lǝma na a nyʊwa kɛl nɨ a jel a nyiyo balɨgɨɨ. N jʊ a bwɨ mǝ nǝn fulotǝm nǝlɨ.

³⁰ Nʊ nɨ nya nya sʊtǝm, mǝ tǝmɨ sǝ ya n nya shigtǝm lɛ.

Nʊ Nɨ A Bɛ A Dʌbʌli

³¹ “Nʊ nɨ a bɛ a dʌbʌli a laa nǝbɔ gwam. Nʊ nɨ a jel a yooli nɨɨ, na a yooli nɨɨ, gǝ sʊwa kɛl gǝnɔ a kanjǝl yooli nɨ. Nʊ nɨ a jel a dʌbʌli a laa nǝbɔ gwam.

³² Gǝ nǝ nyiyo a jʊ nɨ ga nyʊwaɨ jǝbɔ jʊ nɨ ga kuwoi sul, mɨ nǝn nʊ nɨ a jǝla nǝn kɛl gǝnɨ.

³³ Na nʊ nɨ a yo kɛl nɨɨ, a nʊng gɔ Kwaama n nǝ bɨlǝngkɛl.

³⁴ Nʊ nɨ Kwaama a twamɨ, gǝ sʊwa kɛl Kwaamaɨ, jʊ a bwɨɨ nǝn Kwaama a nǝ gǝn Yʊwa gǝnɔ mɨ dɨtǝm woi.

³⁵ Tɛ bwɛ swɨ Bʊla gɔ lɛ, a nǝ gǝn kanjǝlɔ gwam a mʊgɔ kang gǝn.

³⁶ Nʊ nɨ a nǝ bɨlǝngkɛl a daa Bʊla Kwaamaɨ woi, a nya kʊlɨ nɨ mɨ dɨtǝm woi. Nʊ nɨ a kɔ Bʊla Kwaamaɨ, mɨ nǝn kʊlɨ, nabwɨl Kwaamaɨ gǝ na a dul gǝn.”