Yohana 19 - Dadiya NT

¹ Nǝngɔ Bilatus a dǝg ja maa Yesu gǝm banjangɨ.

² Nǝngɔ sʊwajaamtɨnɔ a bwa kaa dwang dul nǝn shola ja dǝg Yesu gǝm a duli. Nǝngɔ ja mal gǝm kaa bɛllɛ feli a fɔlɔlɔmɨ.

³ Nǝngɔ la jǝ bɛ lɛ a daa gǝ woi. Jǝ jǝga gǝn nɛ jǝ sʊwa lɛ gɔ, “Bɛ kʊlɨ mʊnɔ a kʌl, fɔlɔ Yahudawagɨɨ!”

⁴ Nǝngɔ Bilatus a yǝla a jel, a sʊwa Yahudawagɨɨ gɔ, “Jǝ́ dʌng, mǝ jel jem lɛ nǝn gɔ. Mǝ swɨ lɛ jǝ́ nyǝm mǝ nya gǝn bɔ nǝn kaa bwɨlangkɛl.”

⁵ Nǝngɔ la Yesu a jel nǝn dwang dul shola a dul gǝnɨ jǝbɔ bɛllɛ feli. Nǝngɔ Bilatus a sʊwa ji gɔ, “Nʊ nɨ n wɔ.”

⁶ Dʊʊm nǝbkǝlamɔ jǝbɔ nǝb dʌngtǝm Kan Kwaamanɔ ja kuwo Yesui, nǝngɔ jǝ gaba kwaalɨgɔ lɛ, jǝ sʊwa lɛ gɔ, “Kʊʊ gǝn! Kʊʊ gǝn!” Bilatus a sʊwa ji gɔ, “Jǝ́ ta gǝn ya jǝ́ kʊʊ gǝn nǝn kang jen, mǝ nya gǝn bɔ nǝn kaa bwɨlangkɛl.”

⁷ Nǝngɔ Yahudawagɔ a tɨtǝn gɔ, “Nǝn nǝngǝn nǝn diil, a diil nǝnɔ gǝmɨ a yǝlam nyɔ ga bʊla, jʊ a bwɨɨ a do dul gǝnɔ gɔ gǝ nǝn Bʊla Kwaamaɨ.”

⁸ Bilatus a nyʊwa kɛl nɨɨ, nǝngɔ a sʊtǝn nyʊwatǝm taalɨ.

⁹ A yǝla a dɔ mʊgɔ lɔ fɔlɔgɨɨ, nǝngɔ a bʌ Yesu gɔ, “Mʊ jel a fee?” Yesu a gar gǝm bɔ kaa kɛl.

¹⁰ Nǝngɔ Bilatus a sʊwa gǝn gɔ, “Ń kɔ sʊwatǝm kɛl jǝbɔ mǝ ka? Mʊ nyǝm bɔ mǝ nǝn kwaan n jǝg ń, n kʊʊ ńɨ ka?”

¹¹ Yesu a jǝla gǝn gɔ, “Kwaan nɨ mʊ nǝngǝn a dul mɨɨ, n kwaan nɨ Kwaama a nǝ ńɨ. A kɛl dul jʊ nɨɨ, nʊ nɨ a dǝg ɨ a kang mʊnɨ, a laa ń bwɨlangkɛlɔ.”

¹² A kɛl nɨ gǝm, Bilatus saa gola lɛ sǝ a dem kang a Yesu gǝm. Yahudawagɔ a gung diilɔ jǝ ma bwaalɨgɔ lɛ jǝ sʊwa lɛ gɔ, “Na ń dem kang a nʊ nɨ gǝmɨ, mʊ ke bɔ fwal Kaisarɨ. Gwam nʊ nɨ nʊng dul gǝnɔ lɛ gɔ gǝ fɔlɔɨ, bǝngɨ lɔl maa Kaisar gǝm lɛɨ.”

¹³ Bilatus a nyʊwa jʊ nɨ ja sʊwaɨ, nǝngɔ a jel nǝn Yesui. Nǝngɔ Bilatus a yɨ a daa yɨm maatǝm borang a kaa daa nɨ ja mɔ nǝn tatǝnɨ. Nǝn nyiyo Yahudawagɨɨ jǝ jo gɔ Gabbata.

¹⁴ Kum gɔ n kum fɛkalɨ Dikulom Yabtǝm, nǝn sɨmang kɔkɔ. Nǝngɔ Bilatus a sʊwa Yahudawagɨɨ gɔ, “Fɔlɔ jenɔ n wo!”

¹⁵ Yahudawagɔ a tɨtǝn matǝm bwaalɨgɔ gɔ, “Jʌ gǝn, jʌ gǝn, kʊʊ gǝn.” Nǝngɔ Bilatus a bʌ ji gɔ, “Jǝ́ swɨ lɛ n kʊʊ fɔlɔ jenɔ ka?” Nǝngɔ dʊʊm nǝbkǝlamɔ ja jǝla gɔ, “Mɨ nǝn nǝ kaa fɔlɔ na ke bɔ Kaisarɨ.”

¹⁶ Nǝngɔ Bilatus a nǝ Yahudawagɔ Yesui, sǝ ja kʊʊ gǝnɨ.

Ja Kʊʊ Yesu

¹⁷ Nǝngɔ sʊwajaamtɨnɔ a shu nǝn Yesui. Yesu a jel a mʊgɔ tuulɔ. A do tɨya kʊʊtǝm gǝnɔ nǝn kang gǝn. A yɔ nǝn a kaa daa nɨ ja jo lɛ gɔ Kwasɨ duli. Nǝn nyiyo Yahudawagɨɨ jǝ jo gɔ Golgota.

¹⁸ N daagɔ ja kʊʊm Yesu jǝbɔ kaam nǝb yoi, win a kang jajǝng, win a kang fɔlɔng gǝn.

¹⁹ Bilatus a maa kaa mʊlalɨ, wʊnɨ ja ga tʌgo a tɨya kʊʊtǝm gǝnɔ gǝmɨ. Jʊ nɨ a mʊlaɨ gɔ, “yesu n bwɛ nazarat, fɔlɔ yahudawagɨɨ.”

²⁰ Yahudawagɔ a lada nyɔ na a kiyo mʊlalɨ nɨɨ, jʊ a bwɨɨ daa nɨ ja kʊʊm Yesui nǝn dɔɔm jǝbɔ tuulɔngɔ. Mʊlalɨ nɨ ja mʊla nǝn nyiyo Yahudawagɨɨ jǝbɔ nyiyo Roma jǝbɔ nyiyo Girika.

²¹ Nǝngɔ dʊʊm nǝbkǝlam Yahudawagɔ a sʊwa Bilatus gɔ, “Ka ń mʊla lɛ mɔ, ‘Fɔlɔ Yahudawagɨɨ.’ Bɛ ń mʊla mɔʊ, ‘Nʊ nɨ a sʊwa gɔ nǝn gɔ gǝ fɔlɔ Yahudawagɨɨ.’ ”

²² Bilatus a jǝla gɔ, “Jʊ nɨ mǝ mʊlaɨ, n kwɛl n mʊla.”

²³ Nǝn kwama nɨ sʊwajaamtɨnɔ a kʊʊm Yesui, nǝngɔ ja wɔɔ dwangtɨn gǝnɔ ja tǝga lɔngɔ naalɨ, nǝngɔ ja do lɔngɔ win wini. Ba bǝla kaa bɛllɛ wʊnɨ ja sʊʊl bɔ sʊʊlɨ, jʊ a ta dʌbʌl a gǝla tal nǝn a tǝmɨ.

²⁴ Nǝngɔ ja sʊwaka a bʊtɔ jin gɔ, “Bɛ ka bǝ wʊl lɛ bɛllɛ nɨ. Bǝ gam kwannya nǝngǝn, sǝ bǝ kuwo nʊ nɨ ku jelʌn nɛɨ.” Jʊ nɨ a bwɨ nyɔ sǝ ja yii mʊlalɨ kɛl Kwaamaɨ sʊwa lɛ gɔ, “Ja tǝga dwangtɨn mǝndɨ a kʊm jin. Bɛllɛ mǝndɨ ja gam kwannya nǝngǝn.” N jʊ sʊwajaamtɨnɔ a maaɨ.

²⁵ Nǝb nɨ tɨm nǝn dɔɔm jǝbɔ tɨya kʊʊtǝm Yesui, na bǝ nɛnɛ gǝ, jǝbɔ kɨla gǝ nɔɔlɨgɔ, jǝbɔ Maryamu nwala Kilofasɨ, jǝbɔ Maryamu bwɛn Magadaliya.

²⁶ Yesu a kuwo nɛnɛ gɔ jǝbɔ bwɛ mɛlalɨ gǝnɔ gǝ swɨ lɛɨ tɨm nǝn dɔɔmɨ, nǝngɔ a sʊwa nɛnɛ gǝ gɔ, “Nɛnɛ, wʊnɨ bɛ a yǝlam bʊla mɔ!”

²⁷ Nǝngɔ a sʊwa bwɛ mɛlalɨ gǝnɨ gɔ, “Wʊnɨ bɛ a yǝlam nɛnɛ mɔ.” A di gɔ nǝngɔ bwɛ mɛlalɨ nɨ a yɔ nǝn nɛnɛ Yesui a lɔ gɨɨ.

Bwaa Yesui

²⁸ Yesu a nyǝm gɔ ja dɨ kanjǝlɔ gwamɨ, sǝ ja yii jʊ nɨ mʊlalɨ kɛl Kwaama a sʊwaɨ, nǝngɔ a sʊwa gɔ, “Mǝ nyʊwa diil mwɛ lɛ.”

²⁹ Kaa kwal wo tɨm nǝn mwɛ fwalɨ a daa gɔ. Nǝngɔ ja dǝg fʊgɔgɔ a mwɛ fwalɨ nɨɨ, ja dǝg a dwam, ja gung ja yɔ nǝn a nyiyo Yesui.

³⁰ Yesu a twɨ mwɛ fwalɨ nɨ nyɨɨ, nǝngɔ a sʊwa gɔ, “A dɨɨ.” Nǝngɔ a sul dul gǝnɔ a dem kang a dʊʊmɨ gǝnɔ gǝmɨ.

Ja Kul Yesu Nǝn Yaa

³¹ Nǝngɔ dʊʊm Yahudawagɔ a kela Bilatus gɔ a bǝla ji wo jǝ kǝlala naa nǝb nɨ ja kʊʊɨ, sǝ ja shig bʊtɔ jinɔ a tɨya kʊʊtǝmɔ gǝm. Ja maa keli nɨ, jʊ a bwɨɨ n kum fɛkalɨ, ja swɨ bɔ bʊtɔgɔ a dʌbʌl tɨya kʊʊtǝm nǝn Kum Fǝbtǝm. Kum Fǝbtǝm nɨ bɛ lɛɨ, Kum Fǝbtǝm dʊʊn.

³² Nǝngɔ sʊwajaamtɨnɔ a bɛ ba kǝlalam naa nʊ nɨ ja kʊʊ nǝn tɨkǝga jǝbɔ Yesui, ja kǝlalam naa a wini tagɨ.

³³ Kwama ja bɛ a daa Yesu woi, ja nya a kwɛl a bʊlaɨ, ja kǝlala bɔ naa gǝnɔ.

³⁴ Nǝngɔ kaa win a kʊm sʊwajaamtɨnɔ a kul Yesu nǝn yaa a gwanga baya gǝnɔ gǝmɨ, tʌgo a kang, tʊʊmɔ jǝbɔ mwɛmɔ a jel.

³⁵ Nʊ nɨ a kuwo jʊ nɨ a bwɨɨ, nǝn gɔ a nǝ nyiyo a dul gǝnɨ. Nǝtǝm nyiyo gǝnɔ, n bɨlǝngkɛl. Gǝ nǝn dul gǝn a nyǝm gɔ gǝ sʊwa bɨlǝngkɛl, gǝ nǝ nyiyo sǝ jen tʌjen jǝ́ nǝ bɨlǝngkɛl.

³⁶ Jʊ nɨ a bwɨ sǝ ja yii jʊ nɨ mʊlalɨ kɛl Kwaamaɨ a sʊwaɨ gɔ, “Mɨ kuto gǝnɔ wo win jǝ kǝl lɛɨ.”

³⁷ Kaa mʊlalɨ kɛl Kwaamaɨ a sʊwa gɔ, “Jǝ dʌng dʌng nʊ nɨ ja kuli.”

Fʌltǝm Yesui

³⁸ Bwangtǝn nɛɨ, Yusufu bwɛ Arimatiyaɨ a kela Bilatus gɔ a nǝ gǝn bʌlʌn Yesui. Yusufu n bwɛ mɛlalɨ Yesui, wʊnɨ a nʊng bɔ dul gǝnɨ, nyʊwa taal Yahudawagɨɨ lɛ. Bilatus tǝgǝn a jǝla gǝm. Nǝngɔ a do bʌlʌn Yesui.

³⁹ Nikodimu balɨ nɨ a bɛ a daa Yesu woi nǝn kumi, a yɔ jǝbɔ Yusufu, a ta mʊng nɨ nǝn kunʌn lǝmɨɨ a kang wʊnɨ a mʊrka jǝbɔ alosi, tuulo gǝnɔ ja sʊwaɨ a la fʊlkʊb win.

⁴⁰ Nǝngɔ nǝb nɨ yoi ja do bʌlʌn Yesui, ja kʊlʊm a dwang lilin jǝbɔ nwang nɨ nǝn kunʌn lǝmɨɨ, kanga jǝfʊlǝn nǝbɔ Yahudiyaɨ a nʊng a fʌltǝmɔ gǝmɨ.

⁴¹ A daa nɨ ja kʊʊm Yesui, kaa yaa wo a daa gɔ. A mʊgɔ yaa nɨ, kaa tuu fɨ wo wʊnɨ lǝga bɔ ja fʌl nǝl wo dɨnɨ.

⁴² N kum fɛkalɨ Yahudawagɨɨ, tuugɔ nǝn dɔɔm nǝngɔ nǝb nɨ a dǝg bʊtɔ Yesui a daa gɨɨ.