Yohana 17 - Dadiya NT

Yesu A Maa Dul Gǝnɔ Gǝm Keli

¹ Nǝn kwama Yesu a sʊwam kanjǝl nɨɨ, nǝngɔ a gung dul gǝnɔ a dʌbʌl a maa keligɨɨ gɔ, “Tɛtɛ, kwamagɔ a la. Dʊʊl Bʊla mɔ, sǝ Bʊla mɔ a dʊʊl ń tǝgǝn.

² Ń kwɛl ń nǝ gǝn fɔlɔn a dul nǝfitʌmi gwam, sǝ a nǝ kʊlɨ nɨ mɨ dɨtǝm woi a nǝb nɨ gwam mʊ nǝ gǝnɨ.

³ Kʊlɨ nɨ mɨ dɨtǝm woi sǝ nǝbɔ a nyǝm ń, nǝmɔ mʊ Kwaama mʊ nǝ bɨlǝngkɛl kwaamɔ wini, jǝbɔ Yesu Kiristi nɨ mʊ twamɨ.

⁴ N dʊʊl ń a yooli nǝn yiitǝm maajɨ nɨ mʊ nɨ ɨ mɔʊ n maaɨ.

⁵ Kǝngkɔ, Tɛtɛ, dʊʊlɨ ɨ a kǝga mʊn nǝn dʊʊlǝn nɨ mǝ nǝn nǝbɔ mɔ nǝn tɨkǝga na lǝga bɔ ń fwal yooligɨɨ.

Yesu A Maa Bɛtɔ Mɛlalɨ Gǝnɔ Gǝm Keli

⁶ “N kwɛl n nʊng ń nʊng ńɨ nǝb nɨ mʊ nɨ ɨ a yooli nɨɨ. Galɨgǝn jǝ na a mɔ, ń nɨ ɨ ji, ja bwangtǝn kɛl mʊnɔ.

⁷ Kǝngkɔ ja nyǝm kanjǝl nɨ gwam mʊ nɨ ɨɨ, a bɛ a daa mʊ woi.

⁸ Jʊ a bwɨɨ kɛl nɨ mʊ sʊwa ɨɨ, n sʊwa ji. Ja yo, ja nyǝm n bɨlǝngkɛl mǝ jel a daa mɔ woi, ja nyǝm bɨlǝngǝn nǝmɔ mʊ twam ɨɨ.

⁹ “Keligɔ mǝ maa lɛɨ, mǝ maa a dul ji. Mǝ maa bɔ yooligɔ gǝm keli. Mǝ maa a dul nǝb nɨ mʊ nɨ ɨɨ, jʊ a bwɨɨ jǝ na a mɔ.

¹⁰ Nǝb nɨ pʌd mǝ nǝngǝnɨ, na a mɔ, nǝb nɨ pʌd mʊ nǝnɨ, na a mɨɨ, jǝ dʊʊlɨ ɨ lɛ.

¹¹ Kǝngkǝnɨ mɨsɔ mǝ yɨ lɛ a yooli, nǝb nɨ gǝ na a yooli nɨ, mǝ yilo a daa mɔ woi. Tɛtɛ Nǝ Sagsag, bɛ ń kɨla ji nǝn kwaan dun mʊnɔ, dun nɨ mʊ nɨ ɨɨ, sǝ ja yǝlam win kanga bǝ wini.

¹² Kwama mǝ dakini nǝbɔ jii, n kɨla ji nǝn kwaan dun mʊnɔ nɨ mʊ nɨ ɨɨ. N kɨla ji, mɨ nʊ nɨ wo a lɛlaɨ, na ke bɔ nʊ a gola kalatǝmɨ, sǝ a yii jʊ mʊlalɨ kɛl Kwaamaɨ a sʊwaɨ.

¹³ “Kǝngkǝnɨ mǝ yilo a daa mɔ woi. Mǝ sʊwa kanjǝl nɨ lɛ mǝ a yooli, sǝ nǝb nɨ bwang mɨ lɛɨ a nya fulotǝm nǝl mǝndɨ nyangǝn a mʊgɔ nǝl jinɔ gǝm.

¹⁴ N sʊwa ji kɛl mʊnɔ, yooli nɨ a kɔ ji, jʊ a bwɨɨ jǝ ke bɔ a yooli nɨɨ, kanga mǝ tǝmɨ mǝ ke bɔ a yooli nɨɨ.

¹⁵ Mǝ maa bɔ keli mǝʊ ń dem ji a yooli nɨ. Mǝ kela ń mǝʊ ń kɨla ji a daagɔ Nǝ bwɨla nɨ woi.

¹⁶ Jǝ ke bɔ a yooli nɨ, kanga mǝ tǝmɨ mǝ ke bɔ a yooli nɨ.

¹⁷ Kɛl mʊnɔ n bɨlǝngkɛlɨ. Bɛ ń saal ji sagsag a gola bɨlǝngkɛl.

¹⁸ Mǝ twam ji a yooli nɨ, kanga mɔ tǝmʊn mʊ twam ɨ a yooli nɨ.

¹⁹ N kɛl dul jin, mǝ dǝg dul mǝndɨɨ, sǝ ji tʌji ja dǝg dul jinɔ a gola bɨlǝngkɛl.

Yesu A Maa Nǝb Bwangtǝmɔ Gǝm Keli

²⁰ “Ke bɔ nǝb nɨ kwaaji mǝ maa jim keli lɛɨ, mǝ maa keligɔ tag a nǝb nɨ nǝ bɨlǝngkɛl lɛ a kɛl jinɔ gǝmɨ.

²¹ Tɛtɛ, mǝ kela lɛ sǝ pʌd jinɔ ja yǝlam win, kanga mʊ yǝm a mʊgɔ mɨɨ, mǝ yǝm a mʊgɔ mʊnɨ, mǝ kela lɛ bɛ ja yɨ a mʊgɔ bǝn, sǝ nǝbɔ yooli nɨ a nǝ bɨlǝngkɛl gǝ nǝmɔ mʊ twam ɨɨ.

²² Nǝmɔ mǝ nǝ nǝb nɨ dʊʊlǝnɔ mʊ nɨ ɨɨ, sǝ ja yǝlam win kanga bǝn bǝ wini.

²³ Mǝ yɨ yɨ a mʊgɔ jin, mɔ tǝmʊn a mʊgɔ mɨ, sǝ ja yǝlam win nyangǝn, sǝ yooligɔ a nyǝm gɔ nǝmɔ mʊ twam ɨɨ, sǝ ja nyǝm mʊ swɨ ji lɛ kanga mʊ swɨ ɨ lɛɨ.

²⁴ “Tɛtɛ, mǝ swɨ lɛ nǝb nɨ mʊ nɨ ɨɨ, ja yɨ jǝbɔ mǝ a daagɔ mɔ woi, sǝ ja kuwo dʊʊlǝn mǝndɨ, dʊʊlǝnɔ mʊ nɨ ɨ a dul swɨtǝmɔ mʊ maa mɨ lɛɨ na lǝga bɔ ja fwal yooligɨɨ.

²⁵ “Tɛtɛ, nǝ dǝngdǝng, yooligɔ a nyǝm ń bɔ, mǝ, n nyǝm ń, nǝb nɨ a nyǝm nǝmɔ mʊ twam ɨɨ.

²⁶ N nʊng ji nʊngɨ mɔ, mǝ ja ja kǝga nǝn nʊngtǝm jinɔ tag, sǝ swɨtǝmɔ mʊ maa mɨ lɛɨ, a yɨ jǝbɔ ji, sǝ mǝ tǝmɨ n yɨ a kʊm jin.”