Yohana 10 - Dadiya NT

Mʊsǝn Kɛl A Dul Nǝ Tɔɔtǝm Kwamɨtɨn Jǝbɔ Nya Kwamɨtɨnɔ

¹ “N bɨlǝngkɛl mǝ sʊwa jen nɛɨ, nʊ nɨ a dɔ bɔ kan kwamɨtɨnɔ a nyangaɨ, a gwi a kwalɨɨ, n nǝkuu, n nǝwultǝm tag.

² Nʊ nɨ a dɔ a nyangaɨ, nǝn gɔ n nǝ tɔɔtǝm kwamɨtɨnɨ.

³ Nʊ nɨ dʌng nyangagɔ lɛɨ, gǝ wum gǝm wum nyangagɔ. Kwamɨtɨnɔ jǝ nyʊwa nyʊwa diil nǝ tɔɔtǝmɔ. Gǝ jo jo kwamɨtɨn gǝnɔ nǝn duntɨn jinɔ, a yɔ nǝn ji a yooli.

⁴ Na a jǝg kwamɨtɨn gǝnɔ gwam a yoolii, sǝ a ja kǝga, kwamɨtɨnɔ bwang gǝm lɛ a gul, jʊ a bwɨɨ, ja nyǝm diil gǝnɔ.

⁵ Mɨsɔ jǝ bwang faabɨ gǝm lɛ. Jǝ mwal gǝn mwal, jʊ a bwɨɨ ja nyǝm bɔ diil faabɨgɔ.”

⁶ Yesu a sʊwa nǝbɔ mʊsǝn kɛl nɨɨ, ja nyǝm bɔ jʊ gǝ sʊwa lɛɨ.

Yesu Nǝn Gɔ Nǝ Tɔɔtǝm Kwamɨ Nyaɨ

⁷ A kɛl nɨ gǝmɨ, Yesu a yǝla a sʊwa ji gɔ, “Bɨlǝngkɛl, mǝ sʊwa jen nɛɨ, nǝmǝ mǝ nyanga kan kwamɨtɨnɨ.

⁸ Gwam nǝb nɨ a bɛ a laa ɨɨ, n nǝbkuum jǝbɔ nǝb wultǝm. Kwamɨtɨnɔ mɨ nyʊwa ji lɛ.

⁹ Nǝmǝ mǝ nyangagɨɨ, nʊ nɨ a dɔ a gola mɨɨ, bʊʊ bʊʊ. Gǝ dɔ dɔ, sǝ a jel, ya saa jǝjalǝn.

¹⁰ Nǝkuugɔ a bɛ sǝ ba kuu kuul, jǝbɔ jʌtǝm, jǝbɔ kaltǝm. Mǝ bɛ sǝ ja nya kʊlɨ, kʊlɨ nɨ a ladaɨ.

¹¹ “Nǝmǝ mǝ nǝ tɔɔtǝm kwamɨ nyaɨ. Nǝ tɔɔtǝm kwamɨ nyagɔ, gǝ nǝ nǝ kʊlɨ gǝnɔ a dul kwamɨtɨn.

¹² Bwɛ nɨ ja do gǝn tɔɔtǝmɨ, ke bɔ nǝ kwamɨtɨnɨ, kwamɨtɨnɔ ke bɔ a gɨɨ, na a kuwo bangashɨgɔ bɛ lɛɨ, gǝ mwal gǝ bǝla bǝla kwamɨtɨnɔ. Bangashɨgɔ a ta kaam kwamɨtɨnɔ, sǝ tangǝnɔ a kwɨya nǝn kwan.

¹³ Nʊ gɔ gǝ mwal mwal jʊ a bwɨɨ, gǝ maa maajɨ kemʌn. Mɨ jʊ nɨ wo a kom gǝn jǝbɔ kwamɨtɨnɨ.

¹⁴ “Nǝmǝ mǝ nǝ tɔɔtǝm kwamɨtɨn nyaɨ. N nyǝm a mǝndɨ, a mǝndɨ a nyǝm ɨ,

¹⁵ kanga mǝ nyǝm Tɛtɛɨ, Tɛtɛ tǝgǝn a nyǝm ɨ. Mǝ nǝ kʊlɨ mǝndɨ a dul kwamɨtɨnɔ gǝm.

¹⁶ Mǝ nǝn kaam kwamɨtɨn nɨ ke bɔ a mʊgɔ yaa mǝndɨɨ, mǝ bɛ bɛ nǝn ji. Jǝ nyʊwa nyʊwa diil mǝndɨ. Jǝ yǝlam kʌm kwamɨgɔ win, jǝ na na nǝn nǝ tɔɔtǝmɔ win.

¹⁷ Jʊ a bwɨ Tɛtɛ swɨ ɨ lɛɨ nǝn gɔ, n nǝ kʊlɨ mǝndɨɨ, sǝ n yǝla n yo tag.

¹⁸ Mɨ nʊ nɨ wo do mɨ kʊlɨ lɛɨ. Nǝmǝ nǝn kang mɨ mǝ nǝ lɛɨ. Mǝ nǝn fɔlɔn nɨ mǝ nǝ lɛɨ. Mǝ nǝn fɔlɔn nɨ mǝ do lɛ tagɨ. N diilɔ Tɛtɛ mɨ a sʊwa ɨ gɔ n maaɨ.”

¹⁹ A dul kɛl nɨ Yesu a sʊwa nyɨɨ, nǝngɔ Yahudawagɔ a dɔ gʊbkatǝm a kang bʊtɔ jini.

²⁰ Nǝbɔ a lada nyɔ a kʊm ji ja sʊwa gɔ, “Gǝ nǝngǝn nǝn yʊwa bwɨla, n jʊ a bwɨ maa wabɨ lɛɨ. Wɛ a bwɨ bǝ nyʊwa gǝn nɛɨ?”

²¹ Kaamɨ a sʊwa gɔ, “Mɨ nyɔ. Kɛl nɨ ke bɔ kɛl nʊ nɨ yʊwa bwɨla maa maajɨ lɛ nǝn gɨɨ. Bwɛlaa dwal dwal a wum nu kulii ka?”

Yahudawagɔ A Kɔ Yesu

²² N kwama juul, jǝ maa Dikulom Fɛtǝm talɨ Kan Kwaamanɔ lɛ a Urushalima.

²³ Yesu kɛla lɛ a lʌbo Sulemanui nɨ a mʊgɔ talɨ Kan Kwaamanɨ,

²⁴ nǝngɔ Yahudawagɔ ba kang gǝn ja sʊwa gǝn gɔ, “Na fɨyang nyɨɨ mʊ bǝla nǝn nɛ a mʊgɔ nyǝmatǝmɨ? Nǝmɔ mʊ Kiristi ka? Sʊwa nǝn a talɨ.”

²⁵ Yesu a jǝla ji gɔ, “N kwɛl n sʊwa jen, jǝ́ nǝ bɔ bɨlǝngkɛl. Kanjǝl laatǝm kang nɨ mǝ maa lɛ a mʊgɔ dun Tɛtɛ mɨɨ, nǝn gɔ nʊng lɛ mǝ nǝn nuwoi.

²⁶ Jǝ́ nǝ bɔ bɨlǝngkɛl, jʊ a bwɨɨ, jǝ́ ke bɔ kwamɨtɨn mɨ.

²⁷ Kwamɨtɨn mɨɨ bwangtǝn jʊ nɨ lɛ mǝ sʊwa lɛɨ. N nyǝm ji, jǝ bwang mɨ lɛ tag.

²⁸ Mǝ nǝ ji kʊlɨ nɨ lɛ mɨ dɨtǝm woi. Mɨsɔ jǝ bʊla lɛ wo tag. Mɨ nʊ nɨ wo dwal lɛ a yem ji a kang mɨɨ.

²⁹ Tɛtɛ mɨ nɨ a nɨ ɨ kwamɨtɨn nɨɨ, a laa ji dʊʊnɔ gwam. Mɨ nǝn nʊ nɨ wo dwal yem ji lɛ a kang Tɛtɛ mɨɨ.

³⁰ Mǝ nǝbɔ Tɛtɛ mɨ nǝn win.”

³¹ Nǝngɔ Yahudawagɔ a yǝla tag ja wɔɔ tɛlɔ sǝ jǝ mala gǝn ja jʌi.

³² Nǝngɔ Yesu a jǝla ji gɔ, “N maa jem kanjǝl nyantɨnɔ a lada a daagɔ Tɛtɛ woi. Nʊ won a kʊm ji, jǝ́ swɨ lɛ jǝ́ mala ɨ nǝn tɛl sǝ jǝ́ jʌ ii?”

³³ Yahudawagɔ a jǝla gǝn gɔ, “N ke bɔ a dul kɛl maajɨ nyantɨn nɨ mʊ maa nǝn mala ń nɛ nǝn tɛl sǝ nǝn jʌ ńi, n kɛl kaltǝm dun Kwaamaɨ. Mɔ nɨ mʊ nǝfili nǝn kwanɨ, mʊ do dul mʊnɔ lɛ dǝngdǝng jǝbɔ Kwaama.”

³⁴ Nǝngɔ Yesu a jǝla ji gɔ, “A mʊla mʊlaɨ a mʊgɔ diil jen gɔ, Kwaama a sʊwa gɔ, ‘N sʊwa mǝʊ jǝ́ kwaamatɨn.’

³⁵ Bǝ nyǝm mʊlalɨ kɛl Kwaamaɨ mɨsɔ kʌbo lɛ. Kwaama a sʊwa gɔ nǝbɔ gǝ nǝ ji twama gǝnɨ ‘n kwaamatɨn.’

³⁶ N wɛ a bwɨ jǝ́ sʊwa jengɔ n soga Kwaama a kwama mǝ sʊwa mǝʊ mǝ nǝn bʊla Kwaamaɨ? Nǝn Tɛtɛ a jǝg ɨ a kɛl dul maajɨ nɨɨ. Nǝn gɔ tag a twam ɨ a yoolii.

³⁷ Na ke bɔ maajɨ gɔ Tɛtɛ mɨ maa lɛɨ, nǝn gɔ mǝ maa lɛɨ, ka jǝ́ nǝ lɛ bɨlǝngkɛl a daa mɨ woi.

³⁸ Na maajɨgɔ mǝ maa lɛɨ, na jǝ́ nǝ bɔ bɨlǝngkɛl nǝn mǝɨ, jǝ́ nǝ bɨlǝngkɛl nǝn maajɨgɔ, sǝ jǝ́ nyǝm tag jengɔ, Tɛtɛ gǝ na a mʊgɔ mɨ, mǝ tǝmɨ mǝ na a mʊgɔ Tɛtɛɨ.”

³⁹ Jǝ swɨ lɛ ja ta gǝn tag, nǝngɔ a mwal a bʊʊ jimi.

⁴⁰ Nǝngɔ Yesu a yǝla yab dʌng tiyo Urduni a daa Yohana yʊm nǝbɔ mwɛ sagsag lɛɨ nǝn tɨkǝgaɨ, a yɨ woi.

⁴¹ Nǝbɔ a lada nyɔ a bɛ a daa gǝ woi. Jǝ sʊwa lɛ gɔ, “Yohana a maa bɔ jǝ laatǝm kang wo. Pʌd kanjǝl nɨ a sʊwa a dul nʊ nɨɨ, n bɨlǝngkɛl.”

⁴² A daa gɔ, nǝbɔ a lada a nǝ bɨlǝngkɛl a daa Yesu woi.