Roma 7 - Dadiya NT

Nʊngtǝm Kɛl A Dul Naakan

¹ Kambɔ, jǝ́ nyǝm bɔ diilɔ nǝn kwaan a dul nǝlɨ na nǝngǝn nǝn kʊlɨɨ ka? Mǝ sʊwa kɛlɔ a dul nǝb nɨ a nyǝm diili.

² Nʊngtǝm kɛl nɨ a nʊng gɔ nɔɔlɨ nɨ nǝn naakanɨ, diilɔ a bwa gǝn bwaɨ a bwɨla gɔ gǝm kwama bwɨla gǝ nǝn kʊlɨɨ. Na bwɨla gɔ a bʊlaɨ, ga jelʌm a diil naakanɔ gǝm.

³ Na bwɨla gɔ wo nǝn kʊlɨɨ, na ga naa kaa nǝlɨ, ga maa bulon. Na bwɨla gɔ a bʊlaɨ, ga jelʌm a diil naakan. Na ga naa kaa balɨ, gǝ ke bɔ nǝ bulon.

⁴ A na nyɔ kɛtǝlam mɨ, jǝ́ bʊla a diilɔ gǝm a gola bʊtɔ Kiristii, jʊ a bwɨɨ sǝ jǝ́ yǝlam a kaa nǝlɨ, wʊnɨ ja gung gǝn a bwaaɨ, sǝ jǝ́ maa maajɨ nya a kǝga Kwaamaɨ.

⁵ Nǝn galɨgǝn bǝ bwangtǝn bʊtɔ lɛɨ, wɛl bwɨlanɔ a gun a gola diil, n jʊ maa maajɨ lɛ a bʊtɔ bǝnɨ, n jʊ gʊ bǝm bwaa lɛɨ.

⁶ N wɔ kǝngkɔ bǝ nya yɨm dul. Bǝ bʊla bʊlaɨ a diil nɨ galɨgǝn a bwa bǝnɨ. A kǝngkɔ bǝ dwal bǝ maa maajɨ Kwaamaɨ lɛ nǝn yɨm fɨ a gola Yʊwa Kwaamaɨ. Ke bɔ a mʊgɔ mʊlalɨ diiltɨn galɨ.

Diilɔ Jǝbɔ Bwɨlangkɛlɔ

⁷ N wɛ tag bǝ sʊwa lɛɨ? Diilɔ n bwɨlangkɛl ka? Ɔ ɔ, mɨ nyɔ! Na ke bɔ diili, mɨsɔ mǝ nyǝm bwɨlangkɛl lɛ. Na ke bɔ diil a sʊwa gɔ “Bɛ ka ń kona lɛ nu a jǝ nǝlɨ,” na mɨsɔ mǝ nyǝm jʊ nɨ lɛ jǝ jo lɛ gɔ konatǝm nui.

⁸ Nǝn kwama bwɨlangkɛlɔ a nya gola dɔtǝm a daa mǝ woi a gola diili, nǝngɔ a mʊrka konatǝm nu nǝn dʌmʌn a mʊgɔ nǝl mɨɨ. Na ke bɔ diili, na bwɨlangkɛlɔ mɨ nǝn kaa kwaan wo.

⁹ Galɨgǝn mǝ nyǝm bɔ diili, mǝ nǝn kʊlɨ. Kwama mǝ nyǝm diili, nǝngɔ bwɨlangkɛlɔ a fuloi, nǝngɔ mǝ bʊlaɨ.

¹⁰ Diil nɨ na bɛ lɛ nǝn kʊlɨ a daa mǝ woi, nǝn gɔ a gʊ mɨ bwaaɨ.

¹¹ Jʊ a bwɨɨ bwɨlangkɛlɔ a nya dɔtǝm a gola diil, nǝn gɔ a swag ɨɨ, n gola gɔ a jʌ ii.

¹² Gǝ na nyɔ diiltɨnɔ gwam n sagsag. Diilɔ tǝgǝn n sagsag, n dǝngdǝng, a bʊm.

¹³ Jʊ nɨ n jǝ nyaɨ, nǝn gɔ a bɛ mɨ nǝn bwaaɨ ka? Ɔ ɔ, mɨ nyɔ! N bwɨlangkɛl a bɛ mɨ nǝn bwaa a gola diil nyaɨ, sǝ a nʊng dul gǝnɔ gɔ gǝ bwɨlangkɛl. A gola diil nɨ tagɨ, bwɨlangkɛlɔ a nʊng bwɨlatǝm gǝnɔ dangǝn.

¹⁴ Bǝ kwɛl bǝ nyǝm diilɔ na a yʊwa. Mɨ mǝ nǝn yʊwa. Ja miyo i na jwaalɛ a kang bwɨlangkɛlɨ.

¹⁵ Mǝ nyǝm bɔ jʊ a bwɨ mǝ maa jʊ nɨ nyɨɨ. Jʊ mǝ swɨ lɛ n maaɨ, n ke bɔ jʊ mǝ maa lɛɨ. Jʊ mǝ kɔɨ, n jʊ mǝ maa lɛɨ.

¹⁶ Na n maa jʊ mǝ swɨ bɔ n maaɨ, n jǝla nyɔ diilɔ n jǝ nya.

¹⁷ N ke bɔ mǝ mǝ maa jʊ nɨ lɛ mǝ maa lɛɨ, n bwɨlangkɛl nɨ yǝm a mʊgɔ bʊtɔ mɨɨ.

¹⁸ N nyǝm mɨ jǝ nyan wo a mǝ gǝm, a bʊtɔ mɨ. Mǝ swɨ lɛ n maa jʊ nɨ a bʊm bʊmɨ sul, mǝ dwal bɔ n maa.

¹⁹ Jǝ nyan nɨ mǝ swɨ lɛ n maaɨ, n ke bɔ jʊ mǝ maa lɛɨ. Jǝ bwɨla nɨ mǝ swɨ bɔ n maaɨ, nǝn gɔ jʊ mǝ maa lɛɨ.

²⁰ Na n maa jʊ ke bɔ jʊ mǝ swɨ lɛ n maaɨ, ke bɔ mǝ mǝ maa lɛɨ, n bwɨlangkɛl nɨ yǝm a bʊtɔ mɨɨ.

²¹ N kuwo, a yǝlam mɨ diil, na n swɨ maatǝm jǝ nyaɨ, jǝ bwɨlagɔ yǝm jǝbɔ mǝ.

²² Mǝ a mʊgɔ nǝl mɨɨ, nǝl mɨɨ a fulo nǝn diil Kwaamaɨ.

²³ N kuwo kaa diil maa maajɨ lɛ a jinʌn bʊtɔ mɨ, wʊnɨ ta kun nɛ jǝbɔ diil nɨ a bʊʊlalɨ mɨɨ, a dǝg ɨ a lɔsomii, diil bwɨlangkɛlɔ, wʊnɨ yǝm a jinʌn mɨɨ.

²⁴ N mwɛ mɨ! N yǝlam jǝ bʊnatǝm! Nuwo jǝg ɨ lɛ a mʊgɔ bʊtɔ nɨ, wʊnɨ yɔ lɛ nǝn mǝ a bwaaɨ?

²⁵ Buutǝm kangɔ na a Kwaamaɨ a gola Yesu Kiristii, Tɛlalɔ bǝn! Mǝ nǝn dul mɨ, a bʊʊlalɨ mɨ n jwaalɛn mǝ maa lɛ a diil Kwaamaɨ. A bʊtɔ mɨ n jwaalɛn mǝ maa lɛ a diil bwɨlangkɛlɨ.