Roma 6 - Dadiya NT

Bwaa A Bwɨlangkɛl Kʊlɨ A Mʊgɔ Kiristii

¹ N wɛ bǝ sʊwa lɛɨ? Bǝ ja kǝga nǝn maatǝm bwɨlangkɛlɔ, sǝ lǝma Kwaamaɨ a sʊtǝn ka?

² Ɔ ɔ, mɨ nyɔ! Bǝn nɨ bǝ bʊlam a bwɨlangkɛlɨ, laa maa nyǝn bǝ ja kǝga lɛ nǝn yɨmɔ a mʊgɔ gǝnɨ?

³ Jǝ́ nyǝm bɔ jengɔ bǝn nɨ gwam ja yʊ bǝn mwɛ sagsag a mʊgɔ Kiristi Yesui, n mʊgɔ bwaa gǝn ja yʊ bǝn mwɛ sagsagɨɨ ka?

⁴ Ja fʌl bǝn bǝnɔ gɔ a gola yʊtǝm mwɛ sagsag a mʊgɔ bwaa gǝnɔ gǝm, sǝ bǝ yɨ yɨm fɨ kanga ja gung Kiristi a bwaaɨ a gola dʊʊlǝn Tɛtɛɨ.

⁵ Na bǝ win bǝnɔ gɔ a gola bwaa gǝnɔ gǝmɨ, bǝ win bǝnɔ gɔ a guntǝm gǝnɔ gǝm a bwaa.

⁶ Bǝ nyǝm ja kʊʊ kʊʊɨ bʊtɔ galɨ bǝnɔ jǝbɔ gɔ a dʌbʌl tɨya, sǝ a kǝl kwaan bwɨlangkɛlɔ a bʊtɔ bǝnɨ sǝ kǝngkɔ bǝ yǝlam bɔ jwaalɛb bwɨlangkɛlɨ.

⁷ Nʊ nɨ a bʊla bwaa nyɨɨ, ja jǝg gǝn jǝgɨ a mʊgɔ bwɨlangkɛlɔ gǝm.

⁸ Na bǝ bʊla dakini jǝbɔ Kiristii, bǝ nǝ bɨlǝngkɛl bǝ yɨ yɨ dakini bǝnɔ gɔ.

⁹ Bǝ kwɛl bǝ nyǝm nyǝmɨ ja gung gungi Kiristi a bwaa, mɨsɔ yǝla lɛ a bʊla wo tag. Bwaagɔ mɨ nǝn kwaan wo a dul gǝn.

¹⁰ Bwaa nɨ a maaɨ, a bʊla naa win swar mɨ sʊtǝm wo, sǝ a kǝl kwaan bwɨlangkɛlɔ. Kǝngkǝnɨ yɨm nɨ gǝ yǝmɨ, n yɨm Kwaamaɨ.

¹¹ Jen tʌjen bɛ jǝ́ kiyo dul jenɔ maamɔ jǝ́ bʊla bʊlaɨ a bwɨlangkɛl. Kiristi Yesu a nǝ jen kʊlɨ, jǝ́ yɨ yɨm Kwaamaɨ.

¹² Bɛ ka jǝ́ jǝla lɛ bwɨlangkɛlɔ a maa fɔlɔn nǝn bʊtɔ jenɔ nɨ bʊla lɛɨ, kage jǝ́ bwangtǝn kanjǝl bwɨlan nɨ jǝ́ swɨ lɛɨ.

¹³ Bɛ ka jǝ́ nǝ lɛ jinʌn bʊtɔ jenɔ a maatǝm bwɨlangkɛl, ja yǝlam na kanjǝl maatǝm shil. Bɛ jǝ́ nǝ dul jenɔ a daagɔ Kwaama woi, na nǝb nɨ ja bʊʊ nǝn ji a bwaa a yɔ nǝn a nyatǝm kʊlɨɨ. Bɛ jǝ́ nǝ jinʌn bʊtɔ jenɔ a daagɔ Kwaama woi, ja yǝlam na kanjǝl maatǝm jǝ dǝngdǝng.

¹⁴ Bwɨlangkɛlɔ mɨsɔ maa fɔlɔn nɛ a dul jen. Ke bɔ diil maa fɔlɔn nɛ a dul jeni, n lǝma Kwaamaɨ.

Jwaalɛb Dǝngdǝngɔ

¹⁵ Bǝ maa nyǝn? Bɛ bǝ maa bwɨlangkɛlɔ jʊ a bwɨɨ diilɔ mɨ nǝn kwaan a dul bǝn, n lǝma Kwaamaɨ nǝn kwaan a dul bǝnɨ ka? Ɔ ɔ, mɨ wo dǝm!

¹⁶ Jǝ́ nyǝm bɔ nʊ nɨ jǝ́ jǝg jǝ́ bwang gǝm lɛ na jwaalɛbɨɨ, jǝ́ yǝlam jwaalɛb gǝnɨ ka? Na jǝ́ jǝgǝm jǝ́ maa bwɨlangkɛlɨ, jǝ́ jwaalɛb gǝn wʊnɨ yɔ lɛ nǝn jen a bwaaɨ. Na jǝ́ jǝgǝm jǝ́ bwangtǝn Kwaamaɨ, jǝ́ yǝlam dǝngdǝng.

¹⁷ Buutǝm kangɔ na a Kwaamaɨ. Galɨgǝn jǝ́ jwaalɛb bwɨlangkɛl. Kǝngkɔ jǝ́ bwangtǝn mɛlalɨ nɨ mǝ nǝ jeni nǝl jenɔ win.

¹⁸ Ja jǝgǝm jen jǝgǝmɨ a mʊgɔ maatǝm bwɨlangkɛl. Jǝ́ yǝlam jwaalɛb nɨ dǝngdǝngɨ.

¹⁹ Mǝ sʊwa jen kɛl nǝfitʌmi, jʊ a bwɨɨ jǝ́ gɨya a bʊʊlalɨ jenɔ gǝm. Kanga galɨgǝn jǝ́ nǝ jinʌn bʊtɔ jenɔ a maatǝm jwaalɛn a maajɨ bwɨlanɨ, wʊnɨ sʊtǝn shil lɛɨ, kǝngkɔ bɛ jǝ́ nǝ jinʌn bʊtɔ jenɔ a bwangtǝm maajɨ dǝngdǝng, wʊnɨ yɔ lɛ nǝn jen jǝ́ yǝlam sagsagɨ.

²⁰ Nǝn kwama jǝ́ jwaalɛb bwɨlangkɛlɨ, mɨ mwɛ jen wo a maajɨ dǝngdǝng.

²¹ N sʊtǝm wɛ jǝ́ nya kwama gɔ a dul kanjǝl nɨ jǝ́ nyʊwa gunidul jinɔ lɛ kǝngkɨɨ? Dɨltǝm kanjǝl nɨ n bwaa.

²² Kanga Kwaama a jǝg jen a maatǝm bwɨlangkɛl jǝ́ yǝlam jwaalɛb gǝnɨ, sʊtǝmɔ jǝ́ nya lɛɨ, jǝ́ yǝlam sagsag, dɨltǝmɔ n kʊlɨ nɨ mɨ dɨtǝm woi.

²³ Ywatǝm bwɨlangkɛlɔ n bwaa. Nǝtǝm lǝma Kwaamaɨ n kʊlɨ nɨ mɨ dɨtǝm wo a mʊgɔ Kiristi Yesui, Tɛlalɔ bǝn.