Roma 5 - Dadiya NT

Yɨm Kwamɨgǝn Jǝbɔ Yatǝm Nǝl

¹ Gǝ na nyɔ bǝn nɨ Kwaama a kwɛl a dǝg bǝn bǝ yǝlam dǝngdǝng a kɛl nǝtǝm bɨlǝngkɛlɨ, bǝ nǝngǝn nǝn yɨm kwamɨgǝn jǝbɔ Kwaama, a gola Tɛlalɔ bǝn Yesu Kiristii.

² N daa gǝ woi bǝ nya lǝma nɨ bǝ yǝm woi, a gola nǝtǝm bɨlǝngkɛl. Bǝ maa lɨyal lɛ jǝbɔ yatǝm nǝl a dʊʊlǝn Kwaamaɨ.

³ A sʊtǝnɨ, bǝ maa lɨyal lɛ nǝn nɔɔtǝm gaalan bǝnɔ. Bǝ nyǝm nɔɔtǝm gaalanɔ nǝn gɔ gǝ bɛ lɛ nǝn bwatǝm nǝlɨ.

⁴ Bwatǝm nǝlɔ nǝn gɔ gǝ bɛ lɛ nǝn nǝl nyaɨ. Nǝl nyagɔ tag nǝn gɔ bɛ lɛ nǝn yatǝm nǝlɨ.

⁵ Yatǝm nǝlɔ mɨ gǝ bɛ lɛ nǝn gunidul, jʊ a bwɨɨ Kwaama a kwɛl a tal swɨtǝm gǝnɔ a nǝl bǝnɔ gǝm, a gola Yʊwa Kwaamaɨ nɨ ga nǝ bǝnɨ.

⁶ A dǝngdǝng kwama nɨ, kwama lǝga bɔ bǝ kwamɨ, Kiristi a bʊla a kɛl dul nǝb nɨ a nyǝm bɔ Kwaamaɨ.

⁷ Bwa bwa ja nya nʊ nɨ nǝ kʊlɨ gǝnɔ lɛ a kɛl dul nʊ nɨ n nǝ dǝngdǝngɨ, maa maa nyɔ ja nya kaa nʊ nɨ kʊ nǝl lɛ a nǝ kʊlɨ gǝnɔ a kɛl dul nǝ nyaɨ.

⁸ Kwaama a nʊng bǝn swɨtǝmɔ gǝ maa bǝm lɛɨ, nǝn kwama bǝ nǝb bwɨlangkɛlɨ, Kiristi a bʊla a kɛl dul bǝn.

⁹ Kanga kǝngkɔ bǝ yǝlam dǝngdǝng a gola tʊʊm gǝn, laa na nyǝn a bʊʊtǝmɔ bǝ nya lɛ a nabwɨl Kwaamaɨ a gola gǝnɨ.

¹⁰ Na a kwamagɔ bǝ nǝb kiim Kwaamaɨ, ja dɔ kʊm bǝnɔ ja fɛka bǝn a gola bwaa Bʊla gɨɨ, la na nyǝn, na ja dɔ kʊm bǝnɔ ja fɛka bǝnɨ, bǝ bʊʊ bʊʊ a gola kʊlɨ gǝnɔ gǝm!

¹¹ A sʊtǝnɨ, bǝ maa lɨyal lɛ tag nǝn Kwaama a gola Tɛlalɔ bǝn Yesu Kiristii, wʊnɨ n daa gǝ woi ja dɔ kʊm bǝnɔ ja fɛkaɨ.

Adamu Jǝbɔ Kiristi

¹² Kanga bwɨlangkɛlɔ a dɔ yooligɔ a gola nǝl wini, bwɨlangkɛl nɨ nǝn gɔ a bɛ nǝn bwaaɨ, n jʊ a bwɨ bwaagɔ a yǝlam kʊla nǝbɨɨ gwamɨ, jʊ a bwɨɨ pʌd bǝ maa bwɨlangkɛl.

¹³ Bɨlǝngǝn, bwɨlangkɛlɔ wo a yooli nɨ na lǝga bɔ ja nǝ diilɔ. Daagɔ mɨ diil woi, mɨ jǝ kiyo bwɨlangkɛlɔ lɛ.

¹⁴ Bwaagɔ a tǝl nǝn Adamu a yɔ nǝn a daagɔ Musa woi. A yɔ nǝn tag a dul nǝb nɨ bwɨlangkɛl jinɔ a maa bɔ na bwɨlangkɛl Adamui, wʊnɨ a jelka nʊ nɨ bɛ lɛɨ.

¹⁵ Nǝtǝm Yesui nɨ mɨ dǝngdǝng jǝbɔ bwɨlangkɛl Adamui. Bwɨlangkɛl nʊ nɨ wini a gʊ nǝb nɨ a lada nyɨɨ gǝm bwaa. La na nyǝn a lǝma Kwaamaɨ jǝbɔ nǝtǝm nɨ a bɛ a gola nǝfilii win swarɨ, Yesu Kiristi, a sʊ nǝbɔ gǝm a lada nyɨɨ!

¹⁶ Nǝtǝm lǝma Kwaamaɨ nɨ mɨ nyɔ na bwɨlangkɛl nʊ nɨ wini. Jʊ a bwɨɨ biyotǝm borang nɨ ja maa a dul bwɨlangkɛl nʊ nɨ wini, n jʊ a bɛ nǝn kalatǝmɨ. Nǝtǝm nɨ ja nǝ a bwɨlangkɛltɨn nɨ a lada nyɨɨ, n jʊ dǝg lɛ bǝ yǝlam dǝngdǝngɨ.

¹⁷ Na n dul bwɨlangkɛl nʊ nɨ win bwaagɔ a wɔɔ nǝbɔ gwamɨ, la na nyǝn a nǝb nɨ a nya lǝma a lada, jǝbɔ nǝtǝm wʊnɨ n dǝngdǝng Kwaamaɨ? Jǝ maa fɔlɔn a mʊgɔ kʊlɨ, a gola nʊ nɨ wini, nǝn gɔ nǝn Yesu Kiristi.

¹⁸ Kanga bwɨlangkɛl nʊ nɨ wini a gʊ nǝbɔ gǝm gwam kalatǝmɨ, gǝ na nyɔ tag maajɨ dǝngdǝng nʊ nɨ wini a dǝg nǝbɔ gwam a yǝlam dǝngdǝng nǝn kʊlɨ.

¹⁹ Kanga nǝbɔ a lada a yǝlam nǝb bwɨlangkɛl a gola nʊ nɨ win a kɔ bwangtǝm jʊ ja sʊwa gǝnɨ, na nyɔ nǝbɔ a lada yǝlam yǝlam nǝb dǝngdǝng a gola nʊ nɨ win a bwangtǝn jʊ ja sʊwa gǝnɨ.

²⁰ Ja dɔ nǝn diilɔ sǝ bwɨlangkɛlɔ a jel a talɨ. Daagɔ bwɨlangkɛlɔ a sʊtǝnɨ, lǝma Kwaamaɨ gǝ sʊ sʊ a laa nyɔ.

²¹ Kanga bwɨlangkɛlɔ a maa fɔlɔnɔ a gola bwaaɨ, na nyɔ tag lǝma Kwaamaɨ maa fɔlɔnɔ a gola dǝngdǝng, sǝ a nǝ bǝn kʊlɨ nɨ mɨ dɨtǝm woi a gola Yesu Kiristii, Tɛlalɔ bǝn.