Roma 4 - Dadiya NT

Nʊngtǝm Nǝn Kɛl Ibrahimi

¹ N wɛ bǝ sʊwa lɛ a dul Ibrahimi, tʊga tʊgalam bǝnɨ a mʊgɔ bʊtɔɨ?

² Na na Ibrahim a yǝlam nǝ dǝngdǝng a makajǝng gǝnɔ gǝmɨ, na nǝngǝn nǝn jʊ nɨ maam lɨyal lɛɨ, ke bɔ a kǝga Kwaamaɨ.

³ N wɛ mʊlalɨgɔ a sʊwaɨ? “Ibrahim a nǝ bɨlǝngkɛl a daa Kwaama woi, nǝtǝm bɨlǝngkɛl gǝnɔ nǝn gɔ a dǝg ja kiyo gǝn n nǝ dǝngdǝng a daagɔ Kwaama woi.”

⁴ Nʊ nɨ maa maajɨ lɛɨ, ywatǝm gǝnɔ ke bɔ nǝtǝm nǝn kwan, a yo a dul maajɨ gǝnɔ a maaɨ.

⁵ Nʊ nɨ a ya bɔ nǝl gǝnɔ a maajɨ nyatǝmɨ, a ya nǝl gǝnɔ a daa Kwaama woi, Kwaama nɨ dǝg nǝb bwɨlangkɛlɔ lɛ a yǝlam nǝb dǝngdǝngɨ, a kiyo nǝtǝm bɨlǝngkɛl gǝnɔ n dǝngdǝng.

⁶ Dauda a sʊwa nyɔ tag a kɛl bwili wʊnɨ ja maa nǝfitʌm nɨ gǝm Kwaama a kiyo ji dǝngdǝngɨ, n ke bɔ a gola maajɨ jin. A sʊwa gɔ,

⁷ “Bwiligɔ na a nǝb nɨ Kwaama a kǝlǝm jim bwɨlangkɛltɨn jini, a sɔm bwɨlangkɛltɨn jini.

⁸ Bwiligɔ na a nʊ nɨ Tɛlalɔ mɨsɔ kiyo bwɨlangkɛl gǝnɔ lɛ a dul gǝnɨ.”

⁹ Bwili nɨ Kwaama a maam nǝbɔ a biyo mwɛnɨ kwaaji ka? A maa nǝb nɨ gǝm wo a biyo bɔ mwɛnɨ tʌji ka? Jʊ bǝ sʊwa lɛɨ nǝn gɔ, “Kwaama a kiyo nǝtǝm bɨlǝngkɛl Ibrahimi n dǝngdǝng a daa gǝ woi.”

¹⁰ A dul wɛ a kiyo gǝm jʊ nɨ? Na lǝga bɔ ja biyo gǝm mwɛnɔ ka? A gul biyotǝm mwɛn ka? Ke bɔ a gul biyotǝm mwɛn. A maa nǝn tɨkǝga.

¹¹ Biyotǝm mwɛn nɨ ja maa gǝmɨ, gǝ nʊng dǝgtǝm kang gǝ ga yǝlam dǝngdǝng a gola nǝtǝm bɨlǝngkɛl nɨ gǝ nǝngǝn na lǝga bɔ ja biyo gǝm mwɛnɨ. N jʊ nɨ a dǝg gǝn ga yǝlam tɛ bwɛ a nʊ nɨ gwam a nǝ bɨlǝngkɛlɨ, ja biyo bɔ mwɛn, ja kiyo ji a mʊgɔ nǝb dǝngdǝng.

¹² Nǝn gɔ tag a yǝlam tɛtɛ nǝb biyotǝm mwɛnɨ, nǝb nɨ ke bɔ biyotǝm mwɛn kwaagɔ jǝ nǝngǝnɨ. Jǝ bwangtǝn gola nǝtǝm bɨlǝngkɛl tʊga bǝn Ibrahimi, wʊnɨ tǝgǝn a bwangtǝn na lǝga bɔ ja biyo gǝm mwɛnɨ.

Jǝlatǝm Nǝn Swatǝm Yaa A Gola Nǝtǝm Bɨlǝngkɛl

¹³ Swatǝm yaa nɨ ja maa Ibrahim gǝm jǝbɔ dʊʊm gǝnɨ, sʊwa lɛ gɔ ja ja kʊla yooligɨɨ, a bɛ bɔ a gola diil. N gola dǝngdǝng nɨ jǝ nya lɛ a gola nǝtǝm bɨlǝngkɛlɨ.

¹⁴ Na na nǝb bwangtǝm diilɔ nǝji jǝ ja kʊlagɔ lɛɨ, na nǝtǝm bɨlǝngkɛlɔ n jǝl nǝn kwan. Swatǝm yaagɔ tag n jǝl nǝn kwan.

¹⁵ Jʊ a bwɨɨ, diilɔ gǝ gʊ gʊ nabwɨl Kwaamaɨ. Daa nɨ mɨ diil woi, mɨ kǝltǝm diil wo.

¹⁶ N kɛl dul jʊ nɨ, Kwaama a nǝ kanjǝl nɨ ga maa swatǝm yaaɨ a nǝb nɨ a nǝ bɨlǝngkɛlɨ. Jʊ nɨ nǝn gɔ a yǝlam lǝma Kwaamaɨ, a yɔ nǝn a dʊʊm Ibrahimi. Ke bɔ a dul nǝb nɨ bwangtǝn diil lɛɨ kwaaji. A yɔ nǝn a nǝb nɨ a nǝ bɨlǝngkɛlɨ kanga Ibrahim a maamɨ. Nǝn gɔ nǝn Tɛtɛ bǝn pʌdi.

¹⁷ Kanga a mʊla mʊlaɨ gɔ, “N dǝg ń ń yǝlam tɛ a bǝlǝntǝmɔ gǝm a lada.” Nǝn gɔ nǝn tɛtɛ bǝn a kǝga Kwaamaɨ, wʊnɨ ga nǝ bɨlǝngkɛl a daa gǝ woi. Nǝn gɔ nǝ kʊlɨ lɛ a bʌlʌntɨnɨ. Nǝn gɔ nǝn kwaan jotǝm jʊtǝb nɨ mɨ woi a yǝlam woi.

¹⁸ A ya bɔ nǝl a dul gǝn nǝn kang gǝn. A ya nǝl a daa Kwaama woi. A nǝ bɨlǝngkɛl gɔ gǝ yǝlam yǝlam “Tɛtɛ bǝlǝntǝmɨ a lada.” Kanga Kwaama a sʊwa gǝn gɔ, “Bɨlǝngǝn dʊʊm mʊnɔ yǝlam yǝlam a lada.”

¹⁹ Nǝtǝm bɨlǝngkɛl gǝnɔ a yʌb bɔ. A dʌng bɔ kwaan bʊtɔ gǝnɔ nɨ a maa na bʌlʌni, jʊ a bwɨɨ jol gǝnɔ a la fʊlkʊb win a kwama gɔ. A dʌng bɔ gɔ Saratu a shu kwaan bʌtʌm bwɛ.

²⁰ A kɨɨ bɔ nǝl a dul swatǝm yaa Kwaamaɨ, a bǝla bɔ nǝtǝm bɨlǝngkɛlɔ. A sʊtǝn kwaan a nǝtǝm bɨlǝngkɛl gǝnɔ ga maaɨ, a dʊʊl Kwaama.

²¹ A jǝla nǝn sʊwa lɛ gɔ, Kwaama nǝn kwaan yiitǝm swatǝm yaa gǝnɔ.

²² N jʊ a bwɨ “Kwaama a kiyo nǝtǝm bɨlǝngkɛl gǝnɔ n dǝngdǝngɨ.”

²³ Ja mʊla gɔ, “Ja kiyo gǝn n nǝ dǝngdǝng,” ja mʊlam bɔ gɔ kwaagɔ.

²⁴ A yɔ nǝn a kɛl dul bǝn tag. Kwaama kiyo bǝn kiyo bǝ dǝngdǝng bǝn nɨ bǝ nǝ bɨlǝngkɛl a daa nʊ nɨ a gung Yesu Tɛlalɔ bǝn a bwaaɨ.

²⁵ Wʊnɨ ja jʌ a kɛl dul bwɨlangkɛl bǝnɨ, Kwaama a gung gǝn sǝ bǝ yǝlam dǝngdǝng a daa gǝ woi.