Roma 3 - Dadiya NT

¹ Yahudawagɔ nǝn kaa jǝl wʊnɨ ja laam Bʌtʌbɔ nǝnɨ ka? N wɛ biyotǝm mwɛnɔ gǝ sʊ lɛɨ?

² Gǝ maa maa nyɔ a golantɨnɔ a lada! Nǝn tɨkǝga Yahudawagɔ nǝji Kwaama a jǝla nǝn ji a nǝ ji kɛl gǝnɨ.

³ Maa nyǝn na kaamɨ n nǝb jatǝm swatǝm yaaɨ? Jatǝm swatǝm yaa jinɔ kal kal tatǝm swatǝm yaa Kwaamaɨ ka?

⁴ Ɔ ɔ mɨ nyɔ! Bɨlǝngǝn Kwaama n Nǝ dǝngdǝng, mɨ nyǝmatǝm wo. Nǝbɔ gwam n nǝb gabakɛl. Kanga a mʊla mʊlaɨ gɔ, “Na ń sʊwa kɛlɨ, jǝ nya n bɨlǝngǝn, mʊ ja ja kɛl mʊnɔ na ja yɔ nǝn mɔ a kan borangɨ.”

⁵ Na maajɨ bwɨla bǝnɔ a nʊng gɔ Kwaama n nǝ dǝngdǝngɨ, n wɛ bǝ sʊwa lɛɨ? Bǝ sʊwa sʊwa bǝngɔ Kwaama a maa jǝ bwɨla a mwɛ bǝnɨ ka? (Mǝ sʊwa kɛl nǝfilii.)

⁶ Mɨ nyɔ! Na gǝ na nyɨɨ, Kwaama la maa yooligɔ gǝm borang nyǝn?

⁷ Na a dul kɛl gabakɛl mǝndɨ, bɨlǝngkɛl Kwaamaɨ sʊ sʊ nʊngtǝmɨ, jǝ sʊ sʊ dʊʊltǝm gǝnɨ, n wɛ a bwɨ kǝngkɔ jǝ maa mɨ borang lɛ gɔ mǝ nǝ bwɨlangkɛlɨ?

⁸ Na gǝ na nyɨɨ, bɛ ya bǝ maa jǝ bwɨla lɛ, sǝ a yǝlam bǝm gola nyatǝm jǝ nya, kanga kaamɨ gǝ kǝl nǝm lɛ gɔ nǝ sʊwa nyɨɨ ka? Biyotǝm borang nɨ jǝ maa nǝb nɨ gǝm lɛɨ n dǝngdǝng.

Mɨ Nǝl Wo Win N Nǝ Dǝngdǝngɨɨ

⁹ A maa nyǝn? Nǝn Yahudawagɔ nǝn laa Bʌtʌbɔ ka? Ɔ ɔ mɨ nyɔ! Jʊ a bwɨɨ galɨgǝn nǝ do Yahudawagɔ jǝbɔ Bʌtʌbɔ nǝngɔ pʌd jinɔ bwɨlangkɛlɔ maa fɔlɔn nɛ a dul jin.

¹⁰ Kanga a mʊla mʊlaɨ sʊwa lɛ gɔ, “Mɨ nʊ nɨ wo dǝngdǝngɨ, mɨ wo win,

¹¹ mɨ nǝ nyǝmtǝm wo, mɨ nʊ nɨ wo saa Kwaama lɛɨ.

¹² Gwam jinɔ ja yǝla nǝn gul, ja yǝlam bwɨlang jǝl gwam, mɨ nʊ nɨ wo maa maajɨ nyan nɛɨ, mɨ wo win.”

¹³ “Mɨya jinɔ a maa na tuutɨnɔ a wumo wumoi, bentɨn jinɔ gǝ maa gabakɛl, kɛltɨn jinɔ a maa na twalǝm faatɨn.”

¹⁴ “Nyiyo jinɔ na lagtǝm jǝbɔ tuwolatǝm nǝb.”

¹⁵ “N nǝb tǝlatǝm tʊʊm dǝbǝr.

¹⁶ Daa nɨ gwam ja yɔ woi, n kaltǝm jǝbɔ fitǝm nǝl.

¹⁷ Ja nyǝm bɔ gola yɨm kwamɨgǝn.”

¹⁸ “Mɨ nyʊwatǝm taal Kwaamaɨ wo, a nu jin.”

¹⁹ Bǝ kwɛl bǝ nyǝm nyǝmɨ jʊ nɨ gwam diilɔ a sʊwaɨ, gɔ a yɔ nǝn nǝb nɨ a mʊgɔ gǝnɨ, jʊ a bwɨɨ sǝ a tɨ nǝn tabatǝm fɨɨ nǝbɨɨ, sǝ yooli nɨ gwam a nyǝm jǝ na a mʊgɔ borang Kwaamaɨ.

²⁰ Mɨ nʊ nɨ wo yǝlam lɛ dǝngdǝng a kǝga Kwaamaɨ a gola kɨlatǝm diili, n gola diil bǝ kuwo bwɨlangkɛl bǝnɔ lɛɨ.

Dǝngdǝng A Gola Nǝtǝm Bɨlǝngkɛl

²¹ Kǝngkǝnɨ, kaa gola nyatǝm dǝngdǝng Kwaamaɨ wo, ke bɔ a gola diil, wʊnɨ langǝn bwangǝntɨn Musaɨ jǝbɔ a nǝbkuwotǝmkǝgagɨɨ a nǝ nyiyo a dul gǝnɨ.

²² Dǝngdǝng nɨ na a Kwaamaɨ, wʊnɨ nyatǝm gǝnɔ n gola nǝtǝm bɨlǝngkɛl a daa Yesu Kiristi woi a nǝb nɨ gwam a nǝ bɨlǝngkɛlɨ, mɨ nʊngtǝm wo nǝn dʌmʌn.

²³ Jʊ a bwɨɨ nǝfitʌmɔ gwam a maa bwɨlangkɛl, ja gɨya tag a dʊʊlǝn Kwaamaɨ.

²⁴ Kwaama a dǝg ji ja yǝlam dǝngdǝng a mʊgɔ lǝma gǝnɔ gǝm nǝn kwan, ja nya jǝgtǝm dul nɨ a gola Kiristi Yesui.

²⁵ Kwaama a tʊng Yesu Kiristi, a yǝlam tǝlatǝm tʊʊm twama na kǝlǝmtǝm bwɨlangkɛl. N gola nǝtǝm bɨlǝngkɛl a daa gǝ woi. Kwaama a maa nyɔ sǝ a nʊng dǝngdǝng gǝnɔ, jʊ a bwɨɨ galɨgǝn n bwatǝm nǝl gǝnɔ a mam nu a bwɨlangkɛltɨn nɨ ja kwɛl ja maaɨ.

²⁶ Kwaama a maa nyɔ sǝ a nʊng dǝngdǝng gǝnɔ a kwama nɨ, gǝ nǝn dul gǝn n nǝ dǝngdǝng, nʊ nɨ a dǝg ji ja yǝlam dǝngdǝng a nǝtǝm bɨlǝngkɛl a daa Yesu woi.

²⁷ Maatǝm lɨyal bǝnɔ n fee? Mɨ wo! N gola diil won? N gola diil maatǝm maajɨ nyan ka? Ɔ ɔ! N gola diil nɨ bɛ lɛ nǝn nǝtǝm bɨlǝngkɛlɨ.

²⁸ Jʊ a bwɨɨ, bǝ do n gola nǝtǝm bɨlǝngkɛl nǝfili a yǝlam dǝngdǝngɨ, n ke bɔ kɨlatǝm diil.

²⁹ Kwaamagɔ n Kwaama Yahudawagɨɨ kwaaji ka? Ke bɔ a Bʌtʌbi tʌji ka? N bɨlǝngǝn na a Bʌtʌbi tʌji.

³⁰ Kanga nɨ Kwaama win swar, dǝg nǝb biyotǝm mwɛnɔ lɛ a yǝlam dǝngdǝng a dul nǝtǝm bɨlǝngkɛlɨ, n kanga dǝg nǝb nɨ lɛ a biyo bɔ mwɛnɨ ja yǝlam dǝngdǝng a gola nǝtǝm bɨlǝngkɛl tʌjii.

³¹ Bǝ kalǝm diilɔ a gola nǝtǝm bɨlǝngkɛl nɨ ka? Ɔ ɔ, mɨ nyɔ! N jǝlatǝm nǝn bǝ maaɨ.