Roma 16 - Dadiya NT

Yalkatǝm

¹ Mǝ nʊng jen kɨla bǝn nɔɔlɨgɔ Fibi lɛ. N nǝ maajɨ a mʊrkalɨ nǝb bwangtǝm Kwaamaɨ nɨ a tuulɔ Kankiriyaɨ.

² Jǝ́ yo gǝn kangɔ yo yo a mʊgɔ dun Tɛlalɔɨ, kanga a daa tʌgo a nǝb nɨ sagsagɨ. Jǝ́ nǝ gǝn tɨkalɨ nɨ swɨ lɛ a daa jen woi. Jǝ́ maa nyɔ jʊ a bwɨɨ gǝ nǝn dul gǝn a tɨka nǝbɔ a lada, jǝbɔ mǝ tǝmɨ a kʊm jin.

³ Jǝ́ yal Bilkisu jǝbɔ Akila fatǝm maajɨ mǝndɨ a mʊgɔ Kiristi Yesui.

⁴ Ja nǝ kʊlɨ jinɔ ya la bwaa lɛ a kɛl dul mɨ. Ke bɔ mǝ kwaamɨ mǝ buu jim kang lɛ a dul jʊ nɨɨ, pʌd jǝbɔ mʊrkalɨtɨn nǝb bwangtǝm Kwaamaɨ nɨ n Bʌtʌbi.

⁵ Jǝ́ yal mʊrkalɨ nǝb bwangtǝm Kwaamaɨ nɨ tag mʊrka lɛ a lɔ ji. Jǝ́ yal Abainitas, fwal mɨ nyangǝn. Nǝn gɔ nǝn tɨkǝga a yǝlam nǝ bwangtǝm Kiristii a tǝm Asiyaɨ.

⁶ Jǝ́ yal Maryamu wʊnɨ a maa maajɨ dangǝn nǝn bɨlǝngǝn a kɛl dul jeni.

⁷ Jǝ́ yal Andaranikas jǝbɔ Yuniyas nǝb nɨ n kɛtǝlam mɨɨ. N nǝbɔ a lɔsomi jǝbɔ mɨɨ, nǝb nɨ ja kwɛl ja nyǝm ji nyǝmɨ nyangǝn a mʊgɔ bɛtɔ twamagɨɨ. Ja kwɛl ja laa ɨ laa ɨ nǝtǝm bɨlǝngkɛl a mʊgɔ Kiristii.

⁸ Jǝ́ yal Amfiliyas fwal mɨ nyangǝn a mʊgɔ Tɛlalɔɨ.

⁹ Jǝ́ yal Urbanus fwalɨ maajɨ bǝnɔ a mʊgɔ Kiristii, jǝbɔ Istakis fwal mɨ nyangǝn.

¹⁰ Jǝ́ yal Abalis, wʊnɨ ja jǝla nǝn maajɨ gǝnɔ a mʊgɔ Kiristii. Jǝ́ yal nǝbɔ lɔ Aristobulusi.

¹¹ Jǝ́ yal Hirudiyan, nʊ nɨ nǝn kɨla mɨɨ. Jǝ́ yal nǝb bwangtǝm nɨ a mʊgɔ Tɛlalɔɨ a lɔ Narkisasɨ.

¹² Jǝ́ yal Tarafina jǝbɔ Tarafusa nɔɔtǝm nɨ gʌ lɛ a mʊgɔ maajɨ Tɛlalɔɨ. Jǝ́ yal Barsisa, fwal mɨ nyangǝn, nʊ nɨ gʌ lɛ nǝn maajɨ a dul Tɛlalɔɨ.

¹³ Jǝ́ yal Rufas. N bwɛ jwaalɛ nyangǝn a mʊgɔ Tɛlalɔɨ. Jǝ́ yal nɛnɛ gɔ wʊnɨ n nɛɛ a daa mɨ woi tǝmɨ.

¹⁴ Jǝ́ yal Asinkiritas, jǝbɔ Filiguna, jǝbɔ Hamisa, jǝbɔ Baturobas, jǝbɔ Hamasa jǝbɔ kambɔ nɨ jǝ dakini.

¹⁵ Jǝ́ yal Filulugusa, jǝbɔ Yuliya, jǝbɔ Niriyas, jǝbɔ kɨla gɔ nɔɔlɨgɔ, jǝbɔ Ulumfas, jǝbɔ nǝb sagsag nɨ gwam jǝbɔ jii.

¹⁶ Jǝ́ yalka nǝn kwalkatǝm sagsag. Gwam mʊrkalɨ nǝb bwangtǝm Kiristii yal jen nɛ.

¹⁷ Kambɔ, mǝ kela jen nɛ, bɛ jǝ́ yɔ nǝn lǝma jǝbɔ nǝb nɨ bɛ lɛ nǝn beltǝm a kʊm jeni. Mɛlalɨ jinɔ a yɔ bɔ dǝngdǝng jǝbɔ mɛlalɨ nɨ jǝ́ yoi. Bɛ bɛ nǝn fǝtǝm naa. Bɛ jǝ́ tɨ a kʊta jǝbɔ ji.

¹⁸ Nǝb nɨ ja bwang bɔ Tɛlalɔ bǝn Kiristi gǝm. N mʊgɔ fʌl jin jǝ bwangtǝn nɛɨ. N gola nyiyo lǝmɨ jinɔ jǝbɔ teman nǝbɨɨ, jǝ swag nǝb nɨ lɛ bʊʊlalɨ jinɔ a la bɔ daaɨ.

¹⁹ Nǝbɔ gwam a nyǝm kanga jǝ́ jǝla jǝ́ bwangtǝn Kwaamaɨ. N jʊ a nɨ ɨ fulotǝm nǝl jǝbɔ jeni. Mǝ swɨ lɛ jǝ́ nyǝm jʊ nɨ a bʊmɨ, ka jǝ́ dǝg lɛ dul jenɔ a jʊ nɨ a yǝlam shili.

²⁰ Kwaama nɨ nǝ yɨm kwamɨgǝn nɛɨ, fala fala Mammɔ mɨsɔ kʊta lɛ, sǝ a nǝ kwaan jen a dul gǝn. Bɛ lǝma Tɛlalɔ Yesui a yɨ jǝbɔ jen.

²¹ Timoti fwalɨ maajɨ mǝndɨ, yal jen nɛ. A na nyɔ Lukiyas jǝbɔ Yason jǝbɔ Susibataras, kɛtǝlam mǝndɨ, jǝ yal jen nɛ.

²² Mǝ Tartiyas, wʊnɨ Bulus a dǝg ɨ mǝ mʊla langǝn bwangǝn nɨ, mǝ yal jen nɛ a mʊgɔ dun Tɛlalɔɨ.

²³ Gayus, nʊ nɨ a shig i a mʊgɔ lɔ gɨɨ, nʊ nɨ yo mʊrkalɨ nǝb bwangtǝm Kwaamaɨ lɛ a mʊgɔ lɔ gɨɨ, yal jen nɛ. Arastas nǝ gol kemʌn tuulɔngɔ jǝbɔ kɨla bǝn Kawartas, jǝ yal jen nɛ.

²⁴ Bɛ lǝma Tɛlalɔ bǝn Yesu Kiristii a yɨ jǝbɔ jen gwam. A daa nyɔ.

Keli Dɨltǝmɔ

²⁵ Bɛ bǝlátǝmɔ a ta tʌgo gwanggwang a daa Kwaama woi, wʊnɨ nǝn kwaan a dǝg jen jǝ́ tɨ a mʊgɔ nǝtǝm bɨlǝngkɛl a gola fulon kɛl lǝmɨ nɨɨ, wʊnɨ mǝ kiyo lɛ a dul Yesu Kiristii. Fulon kɛl lǝmɨ nɨ ja yʊ yʊɨ jol jǝbɔ joli.

²⁶ Jǝ yʊtǝm nɨ ja sʊwa Bʌtʌbɔ gwamɨ. Kwaama nɨ mɨ dɨtǝm woi, a nǝ nǝbkuwotǝmkǝgagɔ diil gɔ ja mʊla a dul fulon kɛl lǝmɨ nɨ, sǝ yooligɔ gwam a jǝla a bwangtǝn Kwaama sǝ ja nǝ bɨlǝngkɛl.

²⁷ Bɛ dʊʊlǝn nɨ mɨ dɨtǝm woi, a ta tʌgo gwanggwang a gola Yesu Kiristii a daa Kwaama woi, wʊnɨ n nǝ yʊlan kwaagɨɨ! A daa nyɔ.