Roma 14 - Dadiya NT

Bɛ Ka Ń Ya Lɛ Kɨla Mɔ Gǝm Bwɨlangkɛl

¹ A dul nʊ nɨ nǝtǝm bɨlǝngkɛl gǝnɔ a kwam bɨɨ, bɛ jǝ́ yo gǝn kangɔ yo yo. Ka jǝ́ gʊbka lɛ a dul jʊ nɨ nǝl gǝnɔ swɨ lɛɨ.

² Nǝtǝm bɨlǝngkɛl kaa nǝlɨ a jǝla gǝm gɔ ga ja pʌd jʊ nɨ gǝ swɨ lɛɨ. Nʊ nɨ nǝtǝm bɨlǝngkɛl gǝnɔ a gɨyaɨ, n jǝjalǝn tɔtwam kwaagɔ gǝ ja lɛɨ.

³ Bɛ ka nʊ nɨ gǝ ja jǝjalǝn nɨ lɛ gwamɨ, ya soga lɛ nʊ nɨ jǝgam lɛ jǝgamɨ. Bɛ ka nʊ nɨ jǝgam lɛ jǝgamɨ, ya kuwo bwɨlan nʊ nɨ lɛ ja lɛ gwamɨ, jʊ a bwɨɨ Kwaama a kwɛl a yo gǝn yoi kangɔ yo.

⁴ Nǝmɔ mʊ wo mʊ ya bwɨlan nɛ a dul kaa bwɛ jwaalɛ nǝlɨ? Na tɨ tɨɨ, na yal yalɨ, n mwɛ tɛlalɔ gǝnɨ. Jǝ tɨ tɨ nǝn gɔ, jʊ a bwɨɨ Tɛlalɔ nǝn kwaan nɨ tɨ lɛ nǝn gɨɨ.

⁵ Kaa nǝl gǝ kuwo kuwo kaa kum a laa gǝm tangǝn kumtɨnɔ. A kuwotǝm kaa nǝlɨ, pʌd win swar a daa gǝ woi. Bɛ pʌd bǝnɔ bǝ jǝla nǝn jʊ nɨ dǝngdǝngɨ a nǝl bǝn.

⁶ Pʌd nʊ nɨ a kuwo kaa kumɔ a laa gǝm kaa kum a bǝlátǝm Tɛlalɔɨ, gǝ maa nyɔ sǝ a nǝ Tɛlalɔ dʊʊn. Nʊ nɨ ja nam lɛ tagɨ, gǝ maa nyɔ sǝ a nǝ Tɛlalɔ dʊʊn. Nʊ nɨ jǝgam lɛ jǝgamɨ, gǝ maa nyɔ sǝ a nǝ Tɛlalɔ dʊʊn. Gǝ tǝgǝn gǝ maa nyɔ sǝ a buu Kwaama gǝm kang.

⁷ A kʊm bǝn, mɨ nʊ nɨ wo yɨ yɨm lɛ n kɛl dul gǝnɨ, mɨ nʊ nɨ wo bʊla lɛ n kɛl dul gǝnɨ.

⁸ Na bǝ yǝm nǝn kʊlɨɨ, n yɨm Tɛlalɔɨ bǝ maa lɛɨ. Na bǝ bʊlaɨ, bǝ bʊlam Tɛlalɔ. Na bǝ nǝn kʊlɨɨ, na bǝ bʊlaɨ, bǝ maam Tɛlalɔ.

⁹ Mɨ nyǝmatǝm wo Kiristi a bʊla, a gun nǝn kʊlɨ, jʊ a bwɨɨ sǝ a yǝlam Tɛlalɔ nǝb nɨ a bʊla bʊlaɨ jǝbɔ nǝb nɨ nǝn kʊlɨ.

¹⁰ Mɔ, n wɛ a bwɨ mʊ kuwo kɨla mʊ lɛ nǝn bwɨlanɨ? N wɛ a bwɨ mʊ soga kɨla mɔ lɛɨ? Pʌd bǝnɔ bǝ tɨ tɨ a kǝga Kwaamaɨ, wʊnɨ maa bǝm borang lɛɨ.

¹¹ A mʊlalɨgɔ gǝm Tɛlalɔ a sʊwa gɔ, “N wɛɛl nǝn dul mǝndɨ, dunɔ gwam jʊng jʊng a kǝga mɨ. Benɔ gwam bǝlá bǝlá Kwaamagɔ.”

¹² Pʌd bǝnɔ bǝ kiyo kiyo jʊ bǝ maaɨ nǝn nyiyo bǝn a kǝga Kwaamaɨ.

Bɛ Ka Ń Dǝg Lɛ Kɨla Mɔ Fǝtǝm Naa

¹³ Bɛ bǝ bǝla kuwotǝm bwɨlan a kʊm bǝn. Na a bʊm nyɔ ń do a nǝl mʊn, mɨsɔ yǝlam jǝ fǝtǝm naa lɛ jǝbɔ yaltǝm kɨla mʊɨ.

¹⁴ Mɨ nyǝmatǝm wo a kʊm mɨ nǝbɔ Tɛlalɔ Yesu gɔ, mɨ jʊ nɨ wo mɨ sagsag a tǝltǝm gǝnɔ gǝmɨ. Nʊ nɨ a do gǝn gɔ mɨ sagsag a daa gǝ woi, mɨ sagsag.

¹⁵ Na jʊ mʊ ja lɛɨ a dǝg kɨla mɔ komʌni, ke bɔ yɨm swɨkan mʊ maa lɛɨ. Ka jatǝm mʊnɔ ya yǝlam lɛ gola kalatǝm kɨla mʊɨ, wʊnɨ Kiristi a bʊla a kɛl dul gǝnɨ.

¹⁶ Bɛ ka jʊ nɨ mʊ do n dǝngdǝng a kuwotǝm mʊnɨ a yǝlam jǝ tuwol a daa kaamɨ woi.

¹⁷ Fɔlɔn lɔ Kwaamaɨ n ke bɔ jatǝm jǝbɔ nɔɔtǝm. N kɛl yɨm dǝngdǝng, jǝbɔ yɨm kwamɨgǝn, jǝbɔ fulotǝm nǝl a mʊgɔ Yʊwa Kwaamaɨ.

¹⁸ Pʌd nʊ nɨ maa Kiristi gǝm maajɨ lɛ a gola nɨɨ, n jǝ yotǝm a daagɔ Kwaama woi. N nǝ jǝlatǝm a daagɔ nǝbɔ woi tag.

¹⁹ Bɛ bǝ sʊtǝn kwaan sǝ bǝ maa jʊ nɨ bɛ lɛ nǝn yɨm kwamɨgǝn jǝbɔ sʊbkatǝm kwaanɨ.

²⁰ Bɛ ka ń kʌb lɛ maajɨ Kwaamaɨ a kɛl dul jǝjalǝn. Bɨlǝngǝn, jǝjalǝnɔ gwam sagsag, a kaa gola n bwɨlang jǝl na jǝjalǝn nɨ nǝfili ja lɛɨ yǝlam yǝlam jǝ fǝtǝm naa a daa kaa nǝl woi.

²¹ A bʊm nyɔ ka ń wo lɛ nam, ka ń nɔɔ lɛ bʊgɛ, ka ń maa lɛ jʊ nɨ gwam dǝg kɨla mɔ lɛ a fǝ naaɨ.

²² Nǝtǝm bɨlǝngkɛlɔ mʊ nǝn a dul kanjǝl nɨɨ, bɛ ń ta gǝn a tɨbǝl mʊn jǝbɔ Kwaama. Bwiligɔ na a nʊ nɨ nǝl gǝnɔ a nǝ gǝn bɔ bwɨlangkɛl a dul jʊ bʊʊlalɨ gǝnɔ a do n dǝngdǝngɨ.

²³ Nʊ nɨ a kɨɨ nǝl, a jaɨ, a gʊ dul gǝnɔ gǝm mwɛl dangǝn, jʊ a bwɨɨ a ja bɔ a gola nǝtǝm bɨlǝngkɛl. Pʌd jʊ nɨ ja maa bɔ a gola nǝtǝm bɨlǝngkɛlɨ, n bwɨlangkɛl.