Matta 9 - Dadiya NT

Yesu A Gung Nʊ Nɨ A Swam Swamɨ

¹ Yesu a dɔ tɨyamwɛngɔ, a yab wɨmagɔ a shu a tuulɔ nɨ ga dʊʊlǝmɨ.

² Nǝngɔ ja bɛ gǝm nǝn nʊ nɨ bʊtɔgɔ a swam swamɨ, daam a wɨlǝn. Yesu a kuwo nǝtǝm bɨlǝngkɛl jini, nǝngɔ a sʊwa nʊ nɨ a swam swamɨ gɔ, “Bʊla mɨ, maa fulotǝm nǝl. N kǝlǝm mʊn bwɨlangkɛl mʊnɔ.”

³ Nǝngɔ kaam nǝb mɛlalɨ diilɔ a sʊwaka a bʊtɔ ji gɔ, “Nʊ nɨ a kal dun Kwaamaɨ.”

⁴ Yesu a kwɛl a nyǝm bʊʊlalɨ jinɔ, nǝngɔ a sʊwa gɔ, “N wɛ a bwɨ jǝ́ maa bwɨlang bʊʊlalɨ lɛ a nǝl jeni?

⁵ Nʊ won a laa jǝlɨ, ja sʊwa gɔ, ‘Ja kǝlǝm mʊn bwɨlangkɛl mʊnɔ,’ jǝbɔ a wʊnɨ ja sʊwa gǝn gɔ, ‘Gun yɔ yɔm mʊnɨ?’

⁶ Mǝ swɨ lɛ jǝ́ nyǝm gɔ, Bʊla Nǝlɨ nǝngǝn nǝn fɔlɔn kǝlǝmtǝm bwɨlangkɛl a tǝm nɨɨ.” Nǝngɔ a sʊwa balɨ nɨ bʊtɔgɔ a swam swamɨ gɔ, “Gun do wɨlǝn mʊnɔ shu a lɔ.”

⁷ Gǝ tǝgǝn a gun, a shu a lɔ.

⁸ Nǝb nɨ a mʊrkaɨ a kuwo nyɨɨ, nǝngɔ taalɔ a ta jii, ja bǝlá Kwaama nɨ a nǝ nǝbɔ fɔlɔnɨ.

Jotǝm Mattaɨ

⁹ Yesu a yɔ a kǝgaɨ, nǝngɔ a kuwo kaa nǝl dunɔ nǝn Matta yǝm yo kemʌn tǝm lɛ. Nǝngɔ a sʊwa gǝn gɔ, “Bwang mɨ.” Nǝngɔ a gun a bwang gǝmɨ.

¹⁰ Kwama Yesu jam jǝjalǝn nɛ a lɔ Mattaɨ, nǝngɔ nǝb yotǝm kemʌn tǝmɔ jǝbɔ nǝb bwɨlangkɛlɔ a lada nyɔ ja bɛɨ, nǝngɔ ja yɨ dakini jǝbɔ gɨɨ jǝbɔ bɛtɔ mɛlalɨ gǝnɨ.

¹¹ Nǝbɔ Farisaɨ a kuwo nyɨɨ, nǝngɔ ja sʊwa bɛtɔ mɛlalɨ gǝnɨ gɔ, “N wɛ bwɨ nǝ mɛlalɨ jenɔ ja lɛ jǝbɔ nǝb yotǝm kemʌn tǝmɔ jǝbɔ nǝb bwɨlangkɛlɨ?”

¹² Nǝn kwama Yesu a nyʊwa nyɨɨ, a sʊwa ji gɔ, “Nǝb nɨ kwamɨgǝnɨ mɨ jǝ saa nǝ bʊʊ lɛ. N nǝb nɨ mɨ kwamɨgǝnɨ gǝ saa lɛɨ.

¹³ Ya jǝ́ mɛla n wɛ jʊ nɨ nʊng lɛɨ, ‘A mǝndɨ n jitǝm bʊnǝn nǝbɨɨ mǝ saa lɛ a daa jen woi, n ke bɔ twɨtǝm yulʌn.’ N ke bɔ jotǝm nǝb dǝngdǝng mǝ bɛɨ, mǝ bɛ jotǝm nǝb bwɨlangkɛl.”

Bʌtʌm Kɛl A Dul Dotǝm Diil Mwɛ

¹⁴ Nǝngɔ bɛtɔ mɛlalɨ Yohanaɨ ja bɛ a daa gǝ woi, ja bʌ gǝn gɔ, “Nǝn jǝbɔ nǝbɔ Farisaɨ nǝn do diil mwɛ lɛ. N wɛ a bwɨ bɛtɔ mɛlalɨ mʊnɔ mɨ jǝ do lɛɨ?”

¹⁵ Nǝngɔ Yesu a jǝla ji gɔ, “Fatǝm balɨgɨɨ ji ji wi bwaa na jǝ dakini a daa bwatǝm naakanɨ ka? Kwamagɔ bɛ lɛ wo wʊnɨ ba jǝ dem jim balɨgɔ lɛɨ, jǝ do diil mwɛmɔ nǝn kwama gɔ.

¹⁶ “Mɨ nǝn nʊ nɨ baka bɛllɛ galɨ lɛ nǝn mwan dwang fɨɨ. Na ga maa nyɨɨ, mwan dwang fɨgɔ wʊl wʊl bɛllɛ galɨgɔ. Wʊlatǝm gǝnɔ laa laa a galɨgɔ bwɨlatǝmɔ.

¹⁷ Mɨ nǝn nʊ nɨ tal bʊgɛ fɨ lɛ a sʊwa galɨɨ. Na ga maa nyɨɨ, sʊwagɔ fɛ fɛ, bʊgɛmɔ tǝlam tǝlam, sʊwagɔ kala kala. Bʊgɛ fɨgɔ jǝ tal a sʊwa fɨ. Na ja maa nyɨɨ, ja bʊʊ nǝn ji gwam.”

Bwɛnɔɔlɨ Nǝ Dʊʊgɨɨ Jǝbɔ Nɔɔlɨ Nɨ A Ke Dwang Kwabtǝm Yesui

¹⁸ Sʊwa ji kɛlɔ lɛ nyɨɨ, nǝngɔ kaa nǝ dʊʊ nǝbɨɨ a bɛ ba gǝla a jʊng a kǝga gǝnɨ, a sʊwa gɔ, “Kǝngkɔ kǝngkɔ nɨ bwɛnɔɔlɨ mǝndɨ a bʊla! Bɛ ba ya gǝm kang, gun gun nǝn kʊlɨ.”

¹⁹ Yesu a gun a bwang gǝm jǝbɔ bɛtɔ mɛlalɨ gǝnɔ.

²⁰ Kaa nɔɔlɨ wʊnɨ a maa jolɔ kʊb jeli yo gʌ lɛ nǝn tʊʊm jeltǝmɨ, a bɛ a gul gǝn nǝngɔ a ke nyiyo dwang kwabtǝm gǝnɨ,

²¹ a sʊwa a nǝl gǝn gɔ, “Na n dʊʊl gǝn mǝ ke dwalɨ, mǝ nya nya gungtǝm.”

²² Yesu a yǝla a dʌng gǝnɨ, nǝngɔ a sʊwa gǝn gɔ, “Bʊla mɨ, maa fulotǝm nǝl. Nǝtǝm bɨlǝngkɛl mʊnɔ a gung ń.” Tʌgo a kang nɔɔlɨ nɨ a gun.

²³ Yesu ya la lɔ nǝ dʊʊ nǝbɨɨ, ya nya nǝbɔ guu jwalɔ lɛ, nǝbɔ a mʊrka, jǝ ma bwaalɨgɔ lɛ.

²⁴ Nǝngɔ a sʊwa ji gɔ, “Jǝ́ nɨ ɨ talɨ, bwɛnɔɔlɨ nɨ a bʊla bɔ bʊlaɨ, dum daa lɛɨ.” Nǝngɔ ja dǝg gǝn dǝgɨ soganɨ.

²⁵ Nǝn kwama ja jǝg nǝbɔ a yoolii, a dɔ a ta kang gǝnɔ, nǝngɔ bwɛnɔɔlɨ nɨ a guni.

²⁶ Fulon kɛl nɨ a wa tʌgo a tǝmɔ gǝm gwam.

Kululʌmɔ Yo A Nya Kuwotǝm Daa

²⁷ Yesu bǝla daagɔ lɛɨ, nǝngɔ kaam kululʌmɔ yo ja bwang gǝm, jǝ jo jangajǝng lɛ nǝn kwaan jǝ sʊwa lɛ gɔ, “Yesu Bʊla Daudaɨ, ji bʊnǝn nǝnɔ!”

²⁸ Yesu a dɔ kaa lɔɨ, nǝngɔ kululʌm nɨ a bɛ a daa gǝ woi, Yesu a sʊwa ji gɔ, “Jǝ́ nǝ bɨlǝngkɛl, mǝ nǝn kwaan maatǝmɔ nyɔ ka?” Nǝngɔ ja jǝla gǝn gɔ, “Ɔɔ Tɛlalɔ!”

²⁹ Nǝngɔ a ke nu jini, a sʊwa gɔ, “A dul nǝtǝm bɨlǝngkɛl jenɔ gǝm, mǝ gung jen gung.”

³⁰ Nǝngɔ nu jinɔ a wumoi. Nǝngɔ Yesu a mwɛ ji dangǝn gɔ, “Ka jǝ́ jǝla lɛ kaa nǝl a nyʊwa fulon kɛl nɨ.”

³¹ Nǝngɔ ja shu ya ja sʊwa fulon kɛl nɨ a tǝmɔ gǝm gwamɨ.

Nʊ Nɨ Mɨ Sʊwa Kɛl Lɛɨ A Sʊwa Kɛl

³² Ja gun jǝ shu lɛɨ, nǝngɔ ja bɛ nǝn nʊ nɨ nǝn bwɛlaaɨ, mɨ sʊwa kɛl lɛɨ.

³³ Kwama nɨ a jǝgǝm bwɛlaagɨɨ, nǝngɔ nʊ nɨ a sʊwa kɛlɨ, mʊrkalɨ nǝbɨɨ a ta kang a nyiyo, nǝngɔ ja sʊwa gɔ, “Bǝ kuwo bɔ jǝ laatǝm kang nɨ wo nyɔ a mʊgɔ Israila.”

³⁴ Nǝngɔ nǝbɔ Farisaɨ gɔ, “N kwaan fɔlɔn nǝblaamɨ, jǝg nǝblaamɔ lɛ nǝnɨ.”

Yesu A Ji Bʊnǝn Nǝbɨɨ

³⁵ Nǝngɔ Yesu a kɛla tuulɔngɔ jǝbɔ bɛlɨ tuulɔngɔ gwam mɛla jim lɛ a kantɨn mɛlalɨɨ, kiyo jim fulon kɛl lǝmɨgɔ lɛ a dul fɔlɔn lɔ Kwaamaɨ, gung nǝb twɨlamɔ lɛ jǝbɔ nǝb nɨ mɨ kwamɨgǝnɨ.

³⁶ A kuwo mʊrkalɨ nǝbɨɨ a lada nyɨɨ, bʊnatǝmɔ a ta gǝn, jʊ a bwɨɨ jǝ nɔɔ gaalan nɛ, ja kwɨya tǝmɔ nǝn kwan, na kwamɨtɨn nɨ mɨ nǝ tɔɔtǝm woi.

³⁷ Nǝngɔ a sʊwa bɛtɔ mɛlalɨ gǝnɨ gɔ, “Kʌsotǝmɔ a lada, nǝb maajɨgɔ nǝn dǝm nyɔ.

³⁸ Jǝ́ kela Tɛlalɔ tɔtwamɔ sǝ a twam nǝb kʌsotǝmɔ a tɔtwam.”