Matta 4 - Dadiya NT

Mammɔ A Tɛl Yesu

¹ Nǝngɔ Yʊwa Kwaamaɨ a shu nǝn Yesu a mʊgɔ kuul sǝ mammɔ ya tɛl gǝnɨ.

² A do diil mwɛmɔ kɔkɔgɔ fʊltǝnaal jǝbɔ kumɔ fʊltǝnaal a ja bɔ jǝl, jʊwanɔ a ta gǝn.

³ Nǝngɔ Mammɔ ba sʊwa gǝn gɔ, “Na mʊ nǝn Bʊla Kwaamaɨ, sʊwa tatǝn nɨ a yǝlam kʊkkʊm.”

⁴ Nǝngɔ a jǝla gɔ, “A mʊla mʊlaɨ gɔ, ‘Ke bɔ nǝn jǝjalǝn kwaagɔ nǝl bʊʊ lɛɨ, n kɛltɨn nɨ gwam jel lɛ a nyiyo Kwaamaɨ.’ ”

⁵ Nǝngɔ mammɔ a do gǝn a yɔ nǝn gɔ a tuulɔ nɨ sagsagɨɨ, a tɨ nǝn gɔ a jʊblɨ Kan Kwaamanɨ.

⁶ A sʊwa gǝn gɔ, “Na mʊ nǝn Bʊla Kwaamaɨ, gǝla mɔ. A mʊla mʊlaɨ tag gɔ, “ ‘Nǝ nǝ bɛtɔ twama gǝnɔ diil a dul mʊn, jǝ kɔ kɔ kang jinɔ ja kʌshi ń nǝn, kage ń ga naa a tɛl.’ ”

⁷ Nǝngɔ Yesu a jǝla gǝn gɔ, “A mʊla mʊlaɨ gɔ, ‘Ka ń tɛl lɛ Tɛlalɔ mʊnɔ Kwaama.’ ”

⁸ Nǝngɔ mammɔ a do gǝn a yɔ nǝn gɔ a yem nɨ a deba nyɨɨ. Nǝngɔ a nʊng gǝn fɔlɔn yooli nɨ gwam jǝbɔ dʊʊlǝn jini.

⁹ Nǝngɔ a sʊwa gǝn gɔ, “Gwam jʊtǝb nɨ mǝ nǝ ń nǝ ń, na mʊ jʊng jʊng ń nɨ ɨ dʊʊnɨ.”

¹⁰ Nǝngɔ Yesu a sʊwa gǝn gɔ, “Kʌlʌm shu fɔ a kǝga mɨ Mamm! A mʊla mʊlaɨ gɔ, ‘Maa Tɛlalɔ Kwaama mʊnɔ gǝm bǝlátǝm. Nǝn gɔ kwaagɔ mʊ nǝ gǝn dʊʊn nɛɨ.’ ”

¹¹ A daagɔ, nǝngɔ Mammɔ a bǝla gǝnɨ. Nǝngɔ bɛtɔ twama Kwaamaɨ ba tɨka gǝnɨ.

Yesu A Tǝl Maajɨ Gǝnɔ A Galili

¹² Yesu a nyʊwa fulon kubʌltǝm Yohanaɨ a lɔsomii, nǝngɔ a yǝla a bɛ a mʊgɔ Galilii.

¹³ A bǝla Nazaratɨ, nǝngɔ a shu ya yɨ a Kafarnahumi, daa gɔ gǝ na a gwanga wɨma a tǝm Zabalunaɨ jǝbɔ Naftali.

¹⁴ A maa nyɔ sǝ a yii jʊ nɨ ja sʊwa a nyiyo nǝkuwotǝmkǝga Ishayaɨ gɔ,

¹⁵ “Tǝm Zabalunaɨ, jǝbɔ tǝm Naftalii, jǝ na a golagɔ a yɔ a dʌng tiyo Urduni, tǝm Galili a daa nɨ nǝbɔ woi n Bʌtʌbi.

¹⁶ Nǝb nɨ yǝm a kumtojili a kuwo gʌleng nyalǝmɔ, nǝb nɨ yǝm a tǝm duuli bwaagɨɨ nyalǝmɔ a gwi jim.”

¹⁷ Nǝngɔ Yesu a tǝl kiyotǝm kɛl Kwaamaɨ gɔ, “Jǝ́ yǝla jǝ́ bǝla bwɨlangkɛltɨn jenɔ, jʊ a bwɨɨ fɔlɔn lɔ Kwaamaɨ a dwama.”

Yesu A Jo Nǝb Tatǝm Jʌngigɔ

¹⁸ Kwama Yesu yɔ lɛ a kʌng wɨma Galilii, nǝngɔ a kuwo kaam kɛb yoi, nǝn Saminu wʊnɨ jǝ jo lɛ gɔ Bitrusi jǝbɔ kɨla gɔ Andarawas. Jǝ nǝb tatǝm jʌngi, jǝ mal lɨyal a mʊgɔ wɨma.

¹⁹ Nǝngɔ Yesu a sʊwa ji gɔ, “Jǝ́ bwang mɨ, mǝ dǝg jen ya jǝ́ bɛ nǝn nǝb.”

²⁰ A ta bɔ bʊtɔ, nǝngɔ ja bǝla lɨyaltɨn jinɔ ja bwang gǝmɨ.

²¹ A ja kǝga nǝn yɔmɨ, nǝngɔ a kuwo kaam kɛb yo tagɨ, nǝn Yakubu bʊla Zabadii, jǝbɔ kɨla gɔ Yohana, jǝ na a mʊgɔ tɨyamwɛng jǝ fɛ lɨyal jinɔ lɛ jǝbɔ tɛtɛ ji Zabadi. Nǝngɔ Yesu a jo jii.

²² A ta bɔ bʊtɔ, nǝngɔ ja bǝla tɨyamwɛng jinɔ jǝbɔ tɨya ji ja bwang gǝmɨ.

Yesu A Mɛla Nǝbɔ Gǝm Kɛl Kwaamaɨ A Gung Nǝb Bɔɔlamɔ A Lada

²³ Yesu a bwangtǝn tǝm Galiligɔ gwam, mɛla nǝbɔ gǝm lɛ a kantɨn mɛlalɨ, kiyo jim fulon kɛl lǝmɨ fɔlɔn lɔ Kwaamaɨ lɛ, gung nǝb twɨlamɔ lɛ, jǝbɔ nǝb bɔɔlamɔ a kʊm nǝbɨɨ.

²⁴ Fulon gungtǝm nǝbɔ gǝ maa lɛɨ, a la tǝm Suriyagɔ gwam. Nǝbɔ bɛ gǝm lɛ nǝn nǝb bɔɔlamɔ jǝbɔ nǝb twɨlagɔ, jǝbɔ nǝb yʊwa bwɨlagɔ, jǝbɔ nǝb jwigɔ, jǝbɔ nǝbɔ bʊtɔgɔ a swam swamɨ, a gung ji gwam.

²⁵ Nǝbɔ a lada nyɔ na a bwang gǝm a mʊgɔ Galilii, jǝbɔ Dikafolis, jǝbɔ Urushalima, jǝbɔ Yahudiya jǝbɔ tangǝn tǝmtɨn nɨ a dʌng tiyo Urduni.