Matta 3 - Dadiya NT

Yohana Nǝ Yʊtǝm Mwɛ Sagsagɔ A Fɛka Golagɔ

¹ Nǝn joltɨn nɨ a shui, Yohana nǝ Yʊtǝm mwɛ Sagsagɔ a jel kiyo kɛl Kwaamaɨ lɛ a mʊgɔ kuul Yahudiya,

² sʊwa lɛ gɔ, “Jǝ́ yǝla jǝ́ bǝla bwɨlangkɛltɨn jenɔ, jʊ a bwɨɨ fɔlɔn lɔ Kwaamaɨ a dwama.”

³ N nʊ nɨ Ishaya nǝkuwotǝmkǝgagɔ a sʊwa kɛl gǝnɔ gɔ, “Diilɔ jo jangajǝng lɛ a mʊgɔ kuul. Sʊwa lɛ gɔ, ‘Jǝ́ fɛka gola Tɛlalɔɨ, jǝ́ fɛka gǝm golantɨnɔ sɨn.’ ”

⁴ Yohana gǝ dʊʊ dwang nɨ ja sʊʊl nǝn yitʌn namtenʌmi. A bwa kʊng gǝnɔ nǝn tɛ. Jǝjalǝn gǝnɔ n kʊgɨ jǝbɔ tɛlɨ.

⁵ Nǝbɔ a Urushalimaɨ jǝbɔ nǝbɔ Yahudiyaɨ gwam, jǝbɔ tǝm nɨ gwam a kʌng tiyo Urduni ja bɛ a daa gǝ woi.

⁶ Jǝ sʊwa bwɨlangkɛl jinɔ lɛ. Yʊ ji mwɛ sagsagɔ lɛ a tiyo Urdun.

⁷ Nǝn kwama a kuwo nǝbɔ Farisaɨ jǝbɔ nǝbɔ Sadukiyaɨ a lada nyɔ bɛ lɛ a daa gǝ woi, sǝ ga yʊ ji mwɛ sagsagɨɨ, nǝngɔ a sʊwa ji gɔ, “Jǝ́ bɛlɨ faatɨn! Nuwo a gʊ lɔl jenɔ gɔ jǝ́ mwal nabwɨl Kwaamaɨ nɨ bɛ lɛɨ?

⁸ Jǝ́ maa maajɨ nɨ nʊng lɛ gɔ jǝ́ yǝla jǝ́ bǝla bwɨlangkɛl jeni.

⁹ Bɛ ka jǝ́ sʊwa lɛ jengɔ, ‘Ibrahim nǝn gɔ nǝn tɛtɛ bǝnɨ.’ Mǝ sʊwa jen nɛ, Kwaama a mʊgɔ kwaan gǝn gung gung Ibrahim gǝm bɛtɔ dwalǝn a mʊgɔ tatǝn nɨ.

¹⁰ Ja kwɛl ja swa swaɨ twanɔ a jʌng tɨyantɨnɔ gǝm. Tɨya nɨ gwam a tʊʊ bɔ tʊʊl nyaɨ, jǝ mwatɨ gǝn ja mal a mʊgɔ kǝla.

¹¹ “Mǝ yʊ jen mwɛ sagsagɔ nǝn mwɛ sǝ a nʊng jǝ́ yǝla jǝ́ bǝla bwɨlangkɛl jenɔ. Kaa nǝl bɛ lɛ a gul mɨ, a laa ɨ dʊʊn. Twam gǝnɔ mǝ la bɔ n do. Yʊ jen yʊ mwɛ sagsagɔ nǝn Yʊwa Kwaamaɨ jǝbɔ kǝla.

¹² Nǝngǝn nǝn jǝ yutʌm gǝnɔ a kang, wʊnɨ yum bum fǝtɨgɔ lɛɨ, sǝ a mʊr nu jaam gǝnɔ a tal a bʌni. Twɨm twɨm fǝtɨgɔ nǝn kǝla nɨ mɨsɔ dumo lɛ woi.”

Yohana A Yʊ Yesu Mwɛ Sagsagɔ

¹³ Kwamagɔ Yesu a jel a mʊgɔ Galilii, nǝngɔ a bɛ a tiyo Urdun a daa Yohana woi, sǝ Yohana a yʊ gǝn mwɛ sagsag.

¹⁴ Yohana swɨ lɛ a kɔ, nǝngɔ a sʊwa gɔ, “Mǝ swɨ lɛ ń yʊ ɨ mwɛ sagsag. Maa nyǝn mʊ bɛ lɛ a daa mǝ woi?”

¹⁵ Nǝngɔ Yesu a jǝla gǝn gɔ, “Bɛ a yǝlam nyɔ kǝngkɔ. A bʊm nyɔ bǝ maa nyɔ sǝ bǝ yii kanjǝl dǝngdǝngɔ gwam Kwaama swɨ lɛɨ.” Nǝngɔ Yohana a jǝlaɨ.

¹⁶ Kwama Yohana a yʊm Yesu mwɛ sagsagɨɨ, kanga gǝ jel lɛ a mʊgɔ mwɛmɔ gǝmɨ, nǝngɔ dʌbʌl kwamagɔ a wumoi, nǝngɔ a kuwo Yʊwa Kwaamaɨ gǝla lɛ a dul gǝn na kumfiyoi, a gǝla a yɨ a dul gǝnɨ.

¹⁷ Nǝngɔ kaa diil a jel a dʌbʌl kwama sʊwa lɛ gɔ, “Bwɛ nɨ nǝn Bʊla mɨ, wʊnɨ mǝ swɨ gǝn nɛɨ. Nǝl mǝndɨ nyʊwa lǝma gǝnɔ lɛ dangǝn.”