Matta 2 - Dadiya NT

Nǝb Nyǝmtǝmɔ A Ba Yal Yesu

¹ Nǝn kwama ja bʌm Yesu a Baitalami a Yahudiyaɨ, Hiridus nǝn gɔ fɔlɔ a kwama gɨɨ. Nǝngɔ kaam dʊʊm nǝb nyǝmtǝm a bɛ a twal a Urushalimaɨ,

² ja bʌ gɔ, “Fɔlɔ Yahudawagɔ ja bʌi n fee? Nǝn kuwo nyanyamɨ gǝnɔ a twal. Nǝngɔ nǝn bɛ sǝ ba nǝn jʊng nǝn nǝ gǝn dʊʊnɨ.”

³ Kwama Hiridus fɔlɔgɔ a nyʊwam kɛl nɨɨ, nǝl gǝnɔ a kala jǝbɔ nǝb nɨ a Urushalimaɨ gwam.

⁴ Nǝngɔ a jo mʊrkalɨ dʊʊm nǝbkǝlamɔ jǝbɔ nǝb mɛlalɨ diilɔ gwamɨ, a bʌ ji daagɔ jǝ bʌm Kiristi lɛɨ.

⁵ Nǝngɔ ja jǝla gǝn gɔ, “A Baitalami, a Yahudiya, kanga nǝkuwotǝmkǝgagɔ a mʊla gɔ,

⁶ “ ‘Mɔ tǝmʊn Baitalami, a tǝm Yahudiya, Mɨ mɔ dǝm a nǝb maatǝm fɔlɔnɔ gǝm a tǝm Yahudiyaɨ. Jʊ a bwɨɨ kaa nǝ maatǝm fɔlɔn jel jel a mɔ gǝm, wʊnɨ yǝlam nǝb mǝndɨ Israila gǝm dʊʊ lɛɨ.’ ”

⁷ Nǝngɔ Hiridus a jo dʊʊm nǝb nyǝmtǝm nɨ shig shigi, a bʌ ji kwama ja kuwom nyanyamɨ nɨɨ.

⁸ Nǝngɔ a tʊng ji a Baitalamii, a sʊwa ji gɔ, “Ya jǝ́ saa bwɛ feli nɨ nǝn lǝma. Na jǝ́ nya gǝnɨ, sǝ ba jǝ́ sʊwa ɨ, mǝ tǝmɨ sǝ ya n jʊng n nǝ gǝn dʊʊn.”

⁹ Kwama ja nyʊwa kɛl fɔlɔgɨɨ, nǝngɔ ja ja kǝga nǝn yɔm jini. Nyanyamɨ nɨ ja kuwo a twalɨ, nǝn gɔ a ja jim kǝgaɨ ba tɨ dǝngdǝng a daa nɨ ja bʌm bwɛ dwalɨ nɨɨ.

¹⁰ Nǝn kwama ja kuwo nyanyamɨ nɨɨ, ja maa fulotǝm nǝl dangǝn.

¹¹ Ba ja dɔ lɔngɨɨ, nǝngɔ ja kuwo bwɛ jǝbɔ nyɨya gɔ Maryamui. Nǝngɔ ja gǝla ja jʊng nǝn dun ja nǝ gǝn dʊʊnɨ. Nǝngɔ ja wumo bǝla kemʌn jini, nǝngɔ ja nǝ gǝn lǝma mʊn, jǝbɔ kaam kanjǝl twɨtǝm nɨ nǝn kunʌn lǝmɨ nɨ jǝ jo lɛ gɔ luban jǝbɔ mʊng.

¹² Kwaama a kwɛl a gʊ lɔl jinɔ a dʊgam gɔ, ka ja yǝla lɛ a daa Hiridus woi. Nǝngɔ ja yǝla ja do kaa gola ja shu a tǝm jini.

Tɛtǝlam Yesui A Mwal A Shu Nǝn Gɔ A Masar

¹³ Nǝn kwama nǝb nɨ a shui, nǝngɔ bwɛ twama Tɛlalɔɨ a nʊng Yusufu a mʊgɔ dʊgam gɔ, “Gun guni, do bwɛ dwalɨ nɨ jǝbɔ nyɨya gɔ ń mwal ń yɔ nǝn a tǝm Masar. Bɛ ka ń yǝla lɛ ń bɛ, na mǝ twam mʊn bɔ twamaɨ, jʊ a bwɨɨ Hiridus saa lɛ sǝ gǝ jʌ gǝn.”

¹⁴ Nǝngɔ Yusufu a do bwɛ dwalɨ nɨ jǝbɔ nyɨya gɔ a mwal nǝn ji a Masarɨ,

¹⁵ n daagɔ ja yɨmɨ, a yɔ nǝn a kwama Hiridus a bʊlamɨ. Jʊ nɨ a bwɨ sǝ ja yii jʊ Tɛlalɔ a sʊwa a nyiyo nǝkuwotǝmkǝgagɨɨ gɔ, “N jo bʊla mɨ a Masar.”

Ja Jʌbo Bɛtɔ Dwalǝnɔ

¹⁶ Nǝn kwama Hiridus a nyǝm gɔ nǝb nyǝmtǝm nɨ a swag gǝn swagɨ, nǝngɔ a maa nabwɨlɨ. Nǝngɔ a sʊwa gɔ ja jʌ bɛtɔ batǝnɔ gwam a Baitalamii jǝbɔ daatɨn nɨ a kɔtʌgo gwamɨ, ja jʌbo bɛtɔ batǝn nɨ a shu bɔ jolɔ yoi. A yɔ dǝngdǝng jǝbɔ kwamagɔ a nyʊwam bʌtʌm bwɛ balɨ nɨ a nyiyo nǝb nyǝmtǝm nɨɨ.

¹⁷ Wʊnɨ n yiitǝm kɛl nɨ nǝkuwotǝmkǝga Irimiya a sʊwaɨ gɔ,

¹⁸ “Ja nyʊwa diil a Rama, n jitǝm wi bwaa, Rahila ji lɛ a dul bɛtɔ lɔ gɨɨ, a kɔ yotǝm kang bwaangɔ, jʊ a bwɨɨ bɛtɔ lɔ gɨɨ mɨ wo.”

Yǝlatǝm A Tǝm Nazaratɨ

¹⁹ Nǝn kwama Hiridus a bʊlaɨ, nǝngɔ bwɛ twama Tɛlalɔɨ a bɛ Yusufu gǝm a mʊgɔ dʊgam a tǝm Masarɨ gɔ,

²⁰ “Gun, do bwɛ jǝbɔ nyɨya gɔ, ń yǝla nǝn ji a tǝm Israila. Nǝbɔ swɨ lɛ a jʌ gǝnɨ, ja bʊlala.”

²¹ Nǝngɔ a gun a do bwɛ jǝbɔ nyɨya gɨɨ, a yǝla a bɛ a tǝm Israilaɨ.

²² Nǝn kwama a nyʊwa gɔ nǝn Arkilayus bʊla Hiridusi a gwi fɔlɔn tɨya gɨɨ a Yahudiyaɨ, nǝngɔ a nyʊwa taal yɔtǝmɔ woi. Ja gʊ lɔl gǝnɔ a mʊgɔ dʊgam, nǝngɔ a tang a tǝm Galilii.

²³ A shu ya yɨ nǝn gɔ a kaa tuulɔ nɨ jǝ jo lɛ gɔ Nazaratɨ, sǝ a yii jʊ ja sʊwa a nyiyo nǝbkuwotǝmkǝgagɨɨ gɔ, “Jǝ jo gǝn gɔ Bwɛ Nazarat.”