Matta 14 - Dadiya NT

Bwaa Yohanaɨ Nǝ Yʊtǝm Mwɛ Sagsag

¹ Nǝn kwama nɨ Hiridus Fɔlɔgɔ a nyʊwa fulon Yesui, nǝngɔ a

² sʊwa nǝbɔ maa gǝm maajɨ lɛɨ gɔ, “Wʊnɨ nǝn Yohana nǝ Yʊtǝm mwɛ Sagsagɔ, a bʊla, a gun nǝn kʊlɨɨ. N jʊ a bwɨ a nya kwaan maatǝm kanjǝl laatǝm kangɨ.”

³ A sʊwa nyɔ jʊ a bwɨɨ a kwamagɔ a shui Hiridus a ta Yohana a bwa, a mal a lɔsomi, a kɛl dul Hirudiyaɨ, nwala kɨla gǝ Filibusi.

⁴ Jʊ a bwɨɨ, Yohana sʊwa lɛ gɔ, a bʊm bɔ Hiridus a naa Hirudiya.

⁵ Hiridus swɨ lɛ a jʌ Yohana sul, nyʊwa taal nǝbɨɨ lɛ, jʊ a bwɨɨ nǝbɔ a do gɔ Yohana n nǝkuwotǝmkǝga.

⁶ Kum bʌtʌm Hiridusi a kɛla a bɛɨ, bwɛnɔɔlɨ Hirudiya a ye ye a kǝga faabǝm nɨ ja bɛ dikulomi, Hiridus a nyʊwa lǝma ye gǝnɔ.

⁷ Nǝngɔ a wɛɛl wɛɛlɨ jǝbɔ swatǝm yaa gɔ gǝ nǝ gǝn nǝ gwam jʊ nɨ ga bʌ lɛɨ.

⁸ Nǝngɔ nɛnɛ gɔ a sʊ gǝm yʊlan kɛl gɔ ga sʊwa gɔ, “Nɨ ɨ dul Yohanaɨ nǝ Yʊtǝm mwɛ Sagsagɔ a bashɛ kǝngkɔ.”

⁹ Fɔlɔgɔ a maa bwantǝm dangǝn, n kɛl dul swatǝm yaa nɨ ga maa a kǝga faabǝm gǝnɔ gǝmɨ, nǝngɔ a jǝla gǝmɨ.

¹⁰ A twam ya ja mwatɨ dul Yohanaɨ a lɔsomii.

¹¹ Ja bɛ nǝn dulɔ a bashɛɨ ba ja nǝ bwɛnɔɔlɨgɨɨ, nǝngɔ a yɔ nɛnɛ gɔ gǝm nǝngǝnɨ.

¹² Nǝngɔ bɛtɔ mɛlalɨ Yohanaɨ ya ja do bʌlʌnɔ ja fʌli. Nǝngɔ ya ja sʊwa Yesui.

Yesu A Ja Nǝn Nǝbɔ Fʊlkʊblǝn Nʊ

¹³ Yesu a nyʊwa nyɨɨ, nǝngɔ a gun a dɔ tɨyamwɛngɔ a yab a shu a kaa daa nɨ mɨ kaa nǝl woi, sǝ ya yɨ wo kwaagɔ. Nǝbɔ a nyʊwa nyɨɨ, nǝngɔ ja jela a tuulɔtɨnɔ gǝm ja bwang gǝm nǝn naaɨ.

¹⁴ A jel a tɨyamwɛng a kuwo kʌm nǝbɨɨ a mʊrka a lada nyɨɨ, bʊnatǝmɔ a ta gǝn, a gung nǝb bɔɔlamɔ a kʊm jin.

¹⁵ Nǝn kwama dǝlǝng, nǝngɔ bɛtɔ mɛlalɨ gǝnɔ ja mʊrka a daa gǝ woi, ja sʊwa gɔ, “Daa nɨ mɨ nǝb wo, n wɔ kwamagɔ a lɛ, ywa nǝbɔ sǝ ja yɔ a bɛlɨ tuulɔtɨn ya ja ten jǝjalǝnɔ wo.”

¹⁶ Nǝngɔ Yesu a sʊwa ji gɔ, “Mɨsɔ jǝ shu lɛ, jǝ́ nǝ ji jǝjalǝnɔ ja ja.”

¹⁷ Nǝngɔ ja sʊwa gǝn gɔ. “Mɨ nǝn nǝn kaa jǝl, na ke bɔ kʊkkʊm nɨ nʊ jǝbɔ jʌngitɨnɔ yoi.”

¹⁸ Nǝngɔ a sʊwa gɔ, “Jǝ́ bɛ mɨ nǝn.”

¹⁹ Nǝngɔ a sʊwa nǝbɔ gɔ ja yɨ yɨɨ a dʌbʌl yǝlaɨ. Nǝngɔ a do kʊkkʊm nɨ nʊɨ jǝbɔ jʌngitɨn nɨ yoi, a gung dul gǝnɔ a dʌbʌli, a buu Kwaama gǝm kangɨ, nǝngɔ a kǝlsa kʊkkʊmɨ. Nǝngɔ a nǝ bɛtɔ mɛlalɨ gǝnɔ gɔ ja nǝ nǝbɔ.

²⁰ Gwam jinɔ ja ja, ja boba. Bɛtɔ mɛlalɨgɔ a mʊr fʌtʌlogi jǝjalǝnɔ a bǝlaɨ, a yiilo tunɔ kʊb jeli yo.

²¹ Batǝmɔ fʊlkʊblǝnɔ nʊ n nǝbɔ ja ja jǝjalǝnɨ, ja kiyo bɔ nɔɔtǝmɔ jǝbɔ bɛtɨɨ.

Yesu A Yɔ Yɔm A Dʌbʌl Mwɛ

²² Jǝ dɨ lɛ nyɨɨ, nǝngɔ Yesu a dǝg bɛtɔ mɛlalɨgɔ ja dɔ tɨyamwɛngɔ sǝ ja yǝla a dʌng wini. Nǝngɔ a tɨ wo a daa gɔ sǝ a ywa nǝbɔ a golaɨ.

²³ Kwamagɔ a ywam nǝbɨɨ, nǝngɔ a gwi yemɔ kwaagɔ win sǝ a maa keli wo. Kwama yukumɔ a nya gǝn wo kwaagɔ win.

²⁴ A kwama gɔ tɨyamwɛngɔ gǝ na a tɨbǝl wɨma, a kʊta jǝbɔ kʌng wɨmagɔ. Yʊwa mwɛmɔ mǝg tɨyamwɛngɔ lɛ. Yʊwagɔ kom ji lɛ.

²⁵ Kemʌnɔ taal na kum Yesu yɔ lɛ a dʌbʌl wɨma, bɛ lɛ a daa bɛtɔ mɛlalɨ gǝnɔ woi.

²⁶ Kwama nɨ bɛtɔ mɛlalɨ gǝnɔ a kuwo gǝn yɔ lɛ a dʌbʌl wɨmaɨ, nǝngɔ ja nyʊwa taal jǝ sʊwa lɛ gɔ, “N bʊtɔ!” Ja nyʊwa taal ja ga kwaalɨ.

²⁷ Yesu a sʊwa ji kɛlɔ tʌgo a kang gɔ, “Nǝmǝ, ka jǝ́ nyʊwa lɛ taal!”

²⁸ Nǝngɔ Bitrus a jǝla gǝn gɔ, “Tɛlalɔ, na nǝn nǝmɔɨ, jǝla mɨ n yɔ a daa mʊ woi a dʌbʌl mwɛ.”

²⁹ Nǝngɔ Yesu gɔ, “Bɛ.” Nǝngɔ Bitrus a gǝla a dʌbʌl tɨyamwɛng a tǝl yɔmɔ a dʌbʌl mwɛɨ, yilo a daa Yesu woi.

³⁰ A kuwo yʊwagɔ a kwamɨ, nǝngɔ a nyʊwa taalɨ, a tǝl lɛm lɛɨ, a ga kwaalɨ gɔ, “Tɛlalɔ, bʊʊ nǝn mǝ!”

³¹ Tʌgo a kang nǝngɔ Yesu a mal kang gǝnɔ a ta gǝnɨ, nǝngɔ a sʊwa gǝn gɔ, “Mɔ nǝ nǝtǝm kǝlɨ bɨlǝngkɛl, n wɛ a bwɨ mʊ kǝma lɛɨ?”

³² Ja dɔ tɨyamwɛngɨ, nǝngɔ yʊwagɔ a tam maatǝmɨ.

³³ Nǝbɔ a mʊgɔ tɨyamwɛngɨɨ a jʊng a nǝ Yesu dʊʊn, jǝ sʊwa lɛ gɔ, “Bɨlǝngǝn, mʊ nǝn Bʊla Kwaamaɨ.”

Yesu A Gung Nǝbɔ Mɨ Kwamɨgǝnɨ A Janisarata

³⁴ Ja yab wɨmagɨɨ, nǝngɔ ja bɛ a kʌng wɨmagɔ gǝm a tǝm Janisarataɨ.

³⁵ Nǝbɔ tǝmgɨɨ ja nyǝm gǝnɨ, nǝngɔ ja twam gɔ, ya ja sʊwa nǝb nɨ gwam a tǝmgɨɨ, sǝ ja bɛ gǝm nǝn nǝb nɨ mɨ kwamɨgǝnɨ.

³⁶ Ja kela gǝn sǝ jǝ ke nyiyo dwang malǝng gǝnɔ. Gwam nǝb nɨ a kei, ja gun a twɨla jinɔ gǝm.