Markus 5 - Dadiya NT

Yesu A Gung Nʊ Nɨ Nǝn Yʊwa Bwɨlaɨ A Garasina

¹ Nǝn kwama ba ja la kʌng wɨma wuleni a tǝm Garasinaɨ,

² gǝlatǝm jinɔ a mʊgɔ tɨyamwɛngɨ, kaa nʊ nɨ nǝn yʊwa bwɨlaɨ a jel a kalfʌto nǝngɔ a tǝga gǝnɨ.

³ Daa yɨm gǝnɔ n kalfʌto. Na na n golman tagɨ, mɨ nʊ nɨ wo dwal lɛ a kwa gǝn nǝnɨ.

⁴ Na ja kwa naa gǝnɔ jǝbɔ kang gǝnɔ nǝn golmanɨ, gǝ tulolam tulolam. Mɨ nǝn nʊ nɨ gǝ dwal lɛ a ta gǝnɨ.

⁵ Kwangkwang kum jǝbɔ kɔkɔ gǝ yɔ a kalfʌto, jǝbɔ dʌbʌl yem, gaba kwaalɨgɔ lɛ, kwaana bʊtɔ gǝnɔ lɛ nǝn tɛl.

⁶ A dǝg nu gǝnɔ a kuwo Yesu kʊta nyɨɨ, nǝngɔ a mwal ba jʊng a kǝga gǝnɨ.

⁷ A ga kwaalɨ nǝn diil gɔ, “Wɛ a mʊrka ɨ jǝbɔ mʊɨ Yesu Bʊla Kwaamaɨ, Nǝ Dʊʊ? N mʊrka ń jǝbɔ Kwaama ka ń nɨ ɨ lɛ gaalan.”

⁸ A sʊwa kɛl nɨ nǝn kwama Yesu a sʊwam gǝn gɔ, “Jelʌm a bʊtɔ nʊ nɨɨ gǝm, mʊ yʊwa bwɨla nɨ!”

⁹ Nǝngɔ Yesu a bʌ gǝn gɔ, “Dun mʊnɔ nǝn nuwo?” Nǝngɔ a jǝla gɔ, “Dun mǝndɨ nǝn Lada, jʊ a bwɨɨ nǝn lada.”

¹⁰ Nǝngɔ a kela Yesu nǝn bɨlǝngǝn gɔ ka ga kaa ji lɛ a tǝm nɨɨ.

¹¹ A daa gɔ, kaam kʌm nyiyolitɨn ja jam lɛ wo nǝn dɔɔm a gwanga kʊngnǝn yem.

¹² Nǝngɔ nǝblaam nɨ a kela gǝn gɔ, Yesu a tʊng ji a daa nyiyolitɨnɔ woi, sǝ jǝ dɔ ji.

¹³ Nǝngɔ a jǝla jimi. Nǝngɔ nǝblaam nɨ a jela a dɔ nyiyolitɨnɨ. Nyiyolitɨn nɨ a mʊrka woi, a la fʊlkʊblǝnɔ yo, nǝngɔ ja bwangtǝn gwanga gǝlalangɨ, ya ja tǝla a mʊgɔ wɨmaɨ, jǝ bʊlalaɨ.

¹⁴ Nǝb nɨ tɔɔ nyiyolitɨn nɨ lɛɨ, nǝngɔ ja mwal ya jǝ sʊwa tuulɔtɨnɔ jǝbɔ keli bǝlǝntǝmɔ fulon jʊ nɨ a bwɨɨ. Nǝngɔ nǝbɔ a jela sǝ ba jǝ kuwo jʊ a bwɨɨ.

¹⁵ Nǝngɔ ba ja nya Yesu yǝm jǝbɔ nʊ nɨ nǝn yʊwa bwɨla a ladaɨ. A dʊʊ dwang nyantɨn, dul gǝnɔ win. Nǝngɔ taalɔ a ta jii.

¹⁶ Nǝb nɨ a kuwo jʊ nɨ a bwɨ nǝn balɨ nɨ nǝn yʊwa bwɨlaɨ jǝbɔ nyiyolitɨnɔ a nu jini, ja sʊwa ji kanga a bwɨmɨ.

¹⁷ Nǝngɔ ja kela Yesu gɔ a jel a bǝla jim tǝm jini.

¹⁸ Nǝn kwama Yesu dɔm mʊgɔ tɨyamwɛngɔ lɛɨ, nǝngɔ nʊ nɨ ga jǝg gǝm yʊwa bwɨlaɨ a kela gǝn gɔ, jǝ ya dakinii.

¹⁹ Yesu a jǝla bɔ ga bwang gǝm. A sʊwa gǝn gɔ, “Yǝla yɔ a lɔ a daa kɛtǝlam mʊnɔ woi, ya ń sʊwa ji daltɔ kanjǝl nɨ Tɛlalɔ a maa mʊnɨ, kanga a ji bʊnǝn mʊnɨ.”

²⁰ Nǝngɔ a shu ya sʊwa nǝbɔ fulon kɛl nɨ a Dikafolisi, daltɔ kanjǝl nɨ Yesu a maa gǝmɨ. Nǝbɔ gwam a ta kang a nyiyo.

Gungtǝm Bwɛnɔɔlɨ Yayirusi Jǝbɔ Nɔɔlɨ Nɨ A Ke Nyiyo Dwang Malǝng Dʊʊn Yesui

²¹ Kwama Yesu a yǝla a yabǝm a mʊgɔ tɨyamwɛngɨ, nǝbɔ a lada ba kang gǝn, kwama a kʌng wɨmaɨ.

²² Nǝngɔ win a mʊgɔ nǝb dʊʊm kan mɛlalɨgɔ, dunɔ nǝn Yayirus a bɛɨ. Kuwotǝm Yesui, nǝngɔ ba jʊng a kǝga gǝnɨ.

²³ Nǝngɔ a kela gǝn gɔ ba ga tɨka gǝnɨ, sʊwa gǝn nɛ gɔ, “Bwɛnɔɔlɨ dwalɨ mǝndɨ gǝ na a nyiyo bwaa, bɛ ba ke gǝn, gun gun nǝn kʊlɨ.”

²⁴ Nǝngɔ ja yɔ dakinii. Nǝbɔ a lada bwang gǝm lɛ, jǝ mǝmsa gǝn nɛ nyɔ.

²⁵ Kaa nɔɔlɨ wo a daa gɔ, a maa jolɔ kʊb jeli yo tʊʊmɔ jel gǝm lɛ.

²⁶ A nɔɔ gaalan dangǝn a kang nǝb bʊʊgɨɨ, a jʌm kemʌn nɨ gǝ nǝn gwamɨ, a nyʊwa bɔ lǝma. Bɔɔla gǝnɔ sʊ lɛ sʊɨ.

²⁷ A nyʊwa fulon Yesui, nǝngɔ a bɛ a gul gǝn a kʊm mʊrkalɨ nǝbɨɨ ba ke nyiyo dwang gǝnɨ.

²⁸ A sʊwa a nǝl gǝn gɔ, “Na n dʊʊl gǝn mǝ ke dwalɨ, mǝ nya nya gungtǝm.”

²⁹ Nǝn kwama a kem gǝnɨ, tʊʊm nɨ jel gǝm lɛɨ, a tɨɨ. A nyʊwa a bʊtɔ gǝn ja gung gǝn a bɔɔla gǝnɔ gǝm.

³⁰ Tʌgo a kang Yesu a nyʊwa kwaan gungtǝm nǝbɨɨ a jel a daa gǝ woi. Nǝngɔ a yǝla a dʌng kʊm nǝbɨɨ, a sʊwa gɔ, “Nuwo a ke dʊʊl mǝndɨɨ?”

³¹ Nǝngɔ bɛtɔ mɛlalɨ gǝnɔ a bʌ gǝn gɔ, “Dʌng bwɨ nǝb nɨ a mǝmsa ń nyɨɨ, mʊ nyǝmǝm nǝn nuwo a ke ńi?”

³² Nǝngɔ Yesu a yǝla dʌng nʊ nɨ lɛ a ke gǝnɨ.

³³ Nɔɔlɨ nɨ a nyǝm jʊ nɨ a bwɨ nǝn gɨɨ, nǝngɔ a bɛ a mʊgɔ taal, bʊtɔ gǝnɔ ka lɛ nǝn kʌbkʌb nyɔ, a gǝla a jʊng a kǝga Yesui, a sʊwa gǝn bɨlǝngkɛlɨ.

³⁴ Nǝngɔ a sʊwa gǝn gɔ, “Bʊla mɨ, nǝtǝm bɨlǝngkɛl mʊnɔ a gung ń. Yɔ kwamɨgǝn. N gung ń a twɨla mʊnɔ gǝm.”

³⁵ Sʊwa kɛlɔ lɛ wo, nǝngɔ kaam nǝbɔ a bɛ a mʊgɔ lɔng Yayirusi, nǝ dʊʊ kan mɛlalɨgɔ, ja sʊwa gɔ, “Bwɛnɔɔlɨ mʊnɔ a bʊla. N wɛ mʊ nǝm feyigɔ gaalan nɛɨ?”

³⁶ Yesu a swa bɔ lɔl a jʊ nɨ ja sʊwaɨ. A sʊwa nǝ dʊʊ kan mɛlalɨgɔ gɔ, “Ka ń nyʊwa lɛ taal, nǝ bɨlǝngkɛl.”

³⁷ Yesu a jǝla bɔ nǝbɔ a bwang gǝm, na kebɔ Bitrus, jǝbɔ Yakubu jǝbɔ kɨla gɔ Yohanaɨ.

³⁸ Ba ja la mʊgɔ lɔ nǝ dʊʊ kan mɛlalɨ nɨɨ, nǝngɔ ja nya tǝmɔ a komaɨ, nǝbɔ ji lɛ, ma bwaalɨgɔ lɛ.

³⁹ Yesu a dɔ mʊgɔ lɔngɨ, nǝngɔ a sʊwa ji gɔ, “Wɛ a bwɨ jǝ́ gaba kwaalɨ lɛ, jǝ́ ji wi lɛɨ? Bwɛnɔɔlɨ nɨ a bʊla bɔ bʊlaɨ, gǝ daa dum.”

⁴⁰ Nǝngɔ nǝbɔ a nʊngǝm gǝn nǝn nʊngǝlɨ. Nǝn kwama ga jǝgǝm ji gwam a mʊgɔ kanɨ, nǝngɔ a yɔ jǝbɔ tɛtɛ bwɛnɔɔlɨgɨɨ, jǝbɔ nɛ bwɛɨ, jǝbɔ bɛtɔ mɛlalɨ gǝnɔ taal a daa nɨ bwɛnɔɔlɨgɔ woi.

⁴¹ Nǝngɔ a ta kang gǝnɔ a sʊwa gǝn gɔ, “Talita kumi!” Wʊnɨ dǝngdǝng jǝbɔ, “Kǝlɨ bwɛnɔɔlɨ mǝ sʊwa ń mǝʊ ń gun.”

⁴² Nǝngɔ bwɛnɔɔlɨ nɨ a gun yɔ yɔmɔ lɛɨ. Bwɛnɔɔlɨ nɨ jolɔ kʊb jeli yo. Ja ta kang a nyiyo.

⁴³ Nǝngɔ Yesu a sʊwa ji gɔ, “Ka jǝ́ kiyo lɛ kaa nǝl gǝm jʊ nɨ a bwɨɨ.” Nǝngɔ a sʊwa ji gɔ, “Jǝ́ nǝ bwɛnɔɔlɨ nɨ jǝjalǝnɔ.”