Luka 9 - Dadiya NT

Yesu A Twam Bɛtɔ Mɛlalɨ Gǝnɔ Kʊb Jeli Yoi

¹ Nǝngɔ a jo kʊb jeli yo nɨɨ, a nǝ ji kwaan jǝbɔ fɔlɔn jǝgtǝm nǝblaamɨ, jǝbɔ gungtǝm nǝb nɨ mɨ kwamɨgǝnɨ.

² A twam ji sǝ ya ja kiyo fulon fɔlɔn lɔ Kwaamaɨ, ya ja gung nǝb bɔɔlamɔ lɛɨ.

³ Nǝngɔ a sʊwa ji gɔ, “Ka jǝ́ do lɛ kaa jǝl a yɔm jenɔ gǝm. Bɛ ka jǝ́ do lɛ dwam, jǝbɔ sʊwa yɔm, jǝbɔ jǝjalǝn, jǝbɔ kemʌn. Ka jǝ́ do lɛ bɛllɛgɔ yo.

⁴ Lɔ nɨ jǝ́ shig woi, jǝ́ yɨ wo ba la nǝn di nɨ jǝ́ kʌbom lɛɨ.

⁵ Na ja shig jeni, na jǝ́ bǝla tuulɔ gɔ lɛɨ, jǝ́ buum kuulɔ a naa jeni sǝ a yǝlam jim gʊtǝm lɔl.”

⁶ Nǝngɔ ja gun ja dɔba mʊgɔ bɛl tuulɔtɨnɨ, jǝ kiyo fulon kɛl lǝmɨgɔ lɛ, jǝ gung nǝb bɔɔlamɔ lɛ.

Komʌnɔ A Ta Hiridus

⁷ Fɔlɔ Hiridus a nyʊwa jʊ nɨ jǝ maa lɛ gwamɨ, a bwam dul gǝnɔ. Jʊ a bwɨɨ kaam nǝbɔ sʊwa lɛ gɔ nǝn Yohana ja gung a bwaaɨ.

⁸ Kaamɨ gɔ nǝn Iliya a yǝla a bɛɨ. Kaamɨ sʊwa lɛ gɔ na kaa win a mʊgɔ nǝbkuwotǝmkǝga galɨgɔ a guni.

⁹ Nǝngɔ Hiridus a sʊwa gɔ, “Yohana n mwatɨm mwatɨmɨ dulɔ. Nuwo nyɨ la mǝ nyʊwala katɨ nɨ lɛ a dul gǝnɨ?” Nǝngɔ a saa kuwotǝm gǝnɨ.

Yesu A Ja Nǝn Nǝbɔ Fʊlkʊblǝn Nʊ

¹⁰ Kwama nɨ bɛtɔ twama gǝnɔ a yǝlamɨ, nǝngɔ ja sʊwa Yesu kanjǝl nɨ ja maa a yɔm jinɔ gǝmɨ. Nǝngɔ ja waam ja shu jǝbɔ gɔ a kaa tuulɔ nɨ jǝ jo lɛ gɔ Betsaidaɨ.

¹¹ Nǝbɔ a kuwo nyɨɨ, nǝngɔ ja bwang gǝmɨ. A yo ji. Kiyo jim fulon fɔlɔn lɔ Kwaamaɨ lɛ. Nǝngɔ a gung nǝb bɔɔlamɨ.

¹² Kwamagɔ lɛ lɛɨ, nǝngɔ kʊb jeli yo nɨ a kʌl a bɛ a daa gǝ woi, ja sʊwa gǝn gɔ, “Ywa nǝb nɨ a mʊrkaɨ sǝ ja dɔ bɛlɨ tuulɔtɨnɔ jǝbɔ daatɨn nɨ fɔ nǝn dɔɔmɨ sǝ ja saa jǝjalǝnɔ wo jǝbɔ daa shigtǝmɔ. Jʊ a bwɨɨ, daa nɨ bǝ woi mɨ nǝb wo.”

¹³ Nǝngɔ a sʊwa ji gɔ, “Jǝ́ nǝ nǝb nɨ jǝjalǝnɔ.” Nǝngɔ ja sʊwa gɔ, “Jʊ bǝ nǝnɨ n kʊkkʊm nʊ jǝbɔ jʌngi nɨ yoi a dɨ, na ke bɔ jǝjalǝn ya bǝ ten bwɨ nǝb nɨ gǝm lɛ gwamɨ.”

¹⁴ Batǝmɔ a la fʊlkʊblǝn nʊ. Nǝngɔ a sʊwa bɛtɔ mɛlalɨ gǝnɔ gɔ, “Jǝ́ sʊwa ji ja yɨ nǝn nya nya, nyatɨnɔ fʊltǝnʊ nʊ.”

¹⁵ Nǝngɔ bɛtɔ mɛlalɨgɔ a maa nyɨɨ, ja dǝg nǝbɔ pʌd a yɨ yɨɨ.

¹⁶ Nǝngɔ a do kʊkkʊm nɨ nʊɨ jǝbɔ jʌngitɨn nɨ yoi, a gung dul gǝnɔ a dʌbʌli, a buu Kwaama gǝm kangɨ, nǝngɔ a kǝlsa kʊkkʊmɨ. Nǝngɔ a nǝ bɛtɔ mɛlalɨ gǝnɔ gɔ ja nǝ nǝbɔ.

¹⁷ Gwam jinɔ ja ja, ja boba. Nǝngɔ bɛtɔ mɛlalɨgɔ a mʊr fʌtʌlogi jǝjalǝn nɨ a bǝlaɨ, tunɔ kʊb jeli yo.

Bitrus A Nʊng Yesu Nǝn Kiristi

¹⁸ Kwama nɨ Yesu maam keli lɛ kwaagɨɨ, bɛtɔ mɛlalɨ gǝnɔ wo. Nǝngɔ a bʌ ji gɔ, “Nǝbɔ gǝ sʊwa gɔ mǝ nǝn nuwo?”

¹⁹ Nǝngɔ ja jǝla gǝn gɔ, “Kaamɨ gɔ mʊ nǝn Yohana nǝ Yʊtǝm mwɛ Sagsagɔ. Kaamɨ gɔ mʊ nǝn Iliya. Kaamɨ gɔ mʊ na kaa nǝl win a mʊgɔ nǝbkuwotǝmkǝga nɨ galɨgǝnɨ, a guni.”

²⁰ Nǝngɔ a bʌ ji gɔ, “A jenɔ jǝ́ sʊwa jengɔ mǝ nǝn nuwo?” Nǝngɔ Bitrus a jǝla gǝn gɔ, “Mʊ nǝn Kiristi, wʊnɨ Kwaama a twamɨ.”

²¹ Nǝngɔ a gʊ lɔl jinɔ gwam gɔ ka ja sʊwa lɛ kaa nǝl kɛl nɨ wo.

Gaalan Yesui Jǝbɔ Bwaa Gǝnɔ

²² Nǝngɔ a sʊwa gɔ, “Bʊla Nǝlɨ nɔɔ nɔɔ gaalan a kanjǝlɔ a gǝlala. Dʊʊmɔ, jǝbɔ dʊʊm nǝbkǝlamɔ, jǝbɔ nǝb mɛlalɨ diilɔ jǝ kɔ ɨ kɔ ɨ, ja jʌ i. A kum na taalɔ gǝm, mǝ gun gun nǝn dʊʊmɨ.”

²³ Nǝngɔ a sʊwa gɔ, “Na nǝl swɨ lɛ a bwang mɨɨ, bɛ ga kɔ dul gǝnɔ. Ga do tɨya kʊʊtǝm gǝnɔ kum jǝbɔ kum. Ga bwang mɨ.

²⁴ Na nʊ nɨ swɨ lɛ a bʊʊ nǝn kʊlɨ gǝnɨ, jʊ jʊ kʊlɨ gǝnɔ. Na nʊ nɨ a lɛ kʊlɨ gǝnɔ a kɛl dul mɨɨ, bʊʊ bʊʊ nǝn.

²⁵ N wɛ nǝl nya lɛ na ga nya yooli nɨ gwam, ga lɛ kʊlɨ gǝnɨ?

²⁶ Na nʊ nɨ a nyʊwa gunidul mɨɨ jǝbɔ kɛl mǝndɨ, Bʊla Nǝlɨ nyʊwa nyʊwa gunidul gǝnɔ tǝgǝn nǝn kwama nɨ yǝla bɛm lɛ nǝn dʊʊlǝn gǝnɨ, jǝbɔ dʊʊlǝn Tɛtɛ gɨɨ, jǝbɔ a bɛtɔ twama Kwaamaɨ sagsagɨ.

²⁷ “Bɨlǝngkɛl mǝ sʊwa jen nɛɨ, kaam nǝb nɨ tɨlam fǝɨ, mɨsɔ jǝ bʊla lɛ na ja kuwo bɔ fɔlɔn lɔ Kwaamaɨ.”

Kǝga Yesui A Fʌto

²⁸ Yesu a sʊwa kɛl nɨɨ, a shu bɔ kumɔ naalǝb, nǝngɔ a do Bitrus, jǝbɔ Yohana, jǝbɔ Yakubui, nǝngɔ a gwi kaa yem sǝ a maa keli woi.

²⁹ Maa keligɔ lɛɨ, nǝngɔ kǝga gǝnɔ a fʌtoi, dʊʊl gǝnɔ a yǝla a fulo nǝn fǝbfǝb nyɔ, beta yo nu lɛ na nyalǝm.

³⁰ Tʌgo a kang, kaam nǝb yo sʊwa kɛl lɛ jǝbɔ gɔ. Nǝn Musa jǝbɔ Iliya.

³¹ Ja jel nǝn gʌleng dʊʊlǝn. Jǝ sʊwa kɛl bwaa gǝnɔ, kanga bwɨ lɛ a Urushalimaɨ.

³² Bitrus jǝbɔ fatǝlam gǝnɔ yoi jǝ daa dum lɛ. Nǝn kwama ja kǝlaɨ, nǝngɔ ja kuwo dʊʊlǝn gǝnɔ jǝbɔ nǝbɔ yo tɨlam jǝbɔ gɨɨ.

³³ Nǝb nɨ wʊlaka lɛ nyɔ jǝbɔ gɨɨ, nǝngɔ Bitrus a sʊwa Yesu gɔ, “Tɛlalɔ, a bʊm nyɔ nǝn nɨ fɔ a daa nɨɨ, nǝn ma gushigɔ taal, win na a mɔ, win na a Musaɨ, win na a Iliyaɨ.” A nyǝm bɔ jʊ sʊwa lɛɨ.

³⁴ Sʊwa lɛ nyɨɨ, nǝngɔ lulɔ a gǝla a sum jii. Lul nɨ a sum jii, nǝngɔ taalɔ a ta jii.

³⁵ Nǝngɔ ja nyʊwa kaa diil a mʊgɔ luli gɔ, “Nʊ nɨ nǝn Bʊla mɨ mǝ jǝgǝmɨ. Jǝ́ nyʊwa gǝn.”

³⁶ Diilɔ a sʊwa kɛlɨ, nǝngɔ ja kuwo Yesu kwaagɨɨ. Nǝngɔ ja yɨ shigi. Kumtɨn gɔ ja sʊwa bɔ kaa nǝl jʊ nɨ ja kuwoi.

Yesu A Gung Bwɛsǝn Nɨ Nǝn Jwii

³⁷ Nǝn tǝmsɛlɨ, ja gǝla a dʌbʌl yemi, nǝngɔ tonʌn nǝbɨɨ ba tǝga jii.

³⁸ Nǝngɔ kaa nǝl a mʊgɔ tonʌn nǝbɨɨ a jo gǝn gɔ, “Feyi, mǝ kela ń nɛ dʌng bʊla mɨ nǝn nu bʊnatǝm. Nǝn gɔ n bwɛ win mǝ nǝnɨ.

³⁹ Yʊwa bwɨlagɔ gǝ gung gǝn gung a ga a tǝm. Ga kamɨgɔ lɛ, swamǝm lɛ, fʊnɨgɔ jel lɛ a nyiyo. Mɨ gǝ bǝla gǝn nɛ, na a kubom bɔ bʊtɔ gǝnɨ.

⁴⁰ N kela bɛtɔ mɛlalɨ mʊnɔ mǝʊ ja jǝg. Ja dwal bɔ.”

⁴¹ Nǝngɔ Yesu a sʊwa ji gɔ, “Jǝ́ nǝbɔ kal nɨɨ mɨ jen nǝn nǝtǝm bɨlǝngkɛl, jǝ́ nǝb bwɨlan, naa nyǝn mǝ yɨ lɛ nǝbɔ jeni, naa nyǝn mǝ kʊ nǝl lɛ nǝn jeni? Bɛ nǝn bʊla mɔ fɔ.”

⁴² Bɛ lɛɨ, nǝngɔ yʊwa bwɨlagɔ a ga gǝn a mal a tǝmɨ, swamǝm lɛɨ. Nǝngɔ Yesu a ga yʊwa bwɨlagɔ gǝm wulongi. Nǝngɔ a gung bwɛɨ, a nǝ tɨya gɨɨ.

⁴³ Gwam jinɔ ja ta kang a nyiyo a gʌleng kwaan Kwaamaɨ gǝm. Kwama nǝbɔ a tam kang a nyiyo a dul kanjǝl laatǝm kang nɨ Yesu a maaɨ, nǝngɔ a sʊwa bɛtɔ mɛlalɨ gǝnɨ gɔ,

Yesu A Yǝla A Sʊwa Kɛl Bwaa Gǝnɔ

⁴⁴ “Jǝ́ kaa lɔl jǝ́ nyʊwa kɛl nɨ! Jǝ nǝ nǝ Bʊla Nǝlɨ a kang nǝfitʌmi.”

⁴⁵ Bɛtɔ mɛlalɨ gǝnɔ a nyǝm bɔ kɛl nɨ ga sʊwaɨ. Ja yʊ ji yʊɨ kɛlɔ ja nyǝm bɔ. Ja mwɨ bɔ ja bʌ gǝn.

Nuwo A Laa Dʊʊnɨ?

⁴⁶ Nǝngɔ bǝngkatǝm kɛlɔ a gun a kʊm bɛtɔ mɛlalɨgɨɨ gɔ nuwo nyɨ a kʊm ji a laa dʊʊnɨ?

⁴⁷ Yesu a nyǝm bʊʊlalɨ mʊgɔ nǝl jini, nǝngɔ a ta kaa bwɛ dwalɨ a ya a daalɨ gǝnɨ.

⁴⁸ Nǝngɔ a sʊwa ji gɔ, “Nʊ nɨ a yo bwɛ dwalɨ na wʊnɨ nǝn dun mɨɨ, nǝmǝ ga yo ii. Nʊ nɨ a yo ii, a yo nʊ nɨ a twam ɨɨ. Nʊ nɨ a dwal a kʊm jeni, nǝn gɔ n dʊʊɨ.”

Nʊ Nɨ Mɨ Maa Kii Lɛ Jǝbɔ Jeni Na A Jen

⁴⁹ Yohana a sʊwa gǝn gɔ, “Nǝ dʊʊ, nǝn kuwo kaa nǝl jǝg nǝblaamɔ lɛ nǝn dun mʊn, nǝngɔ nǝn kaa gǝnɨ, jʊ a bwɨɨ mɨ a kʊm bǝn.”

⁵⁰ Nǝngɔ Yesu a jǝla gǝn gɔ, “Ka jǝ́ kaa gǝn nɛ. Nʊ nɨ ke bɔ nǝ kii jeni, na a jen.”

Kaa Bɛ Tuulɔ A Samariya A Kɔ Yotǝm Yesui

⁵¹ Kumɔ jǝ dem gǝn nɛ a dʌbʌli a dwama, sɨn yɔtǝmɔ lɛ a Urushalima.

⁵² Nǝngɔ a twam kaam bɛtɔ twama gǝnɨ, nǝngɔ ja shu ja dɔ tuulɔ a tǝm Samariyaɨ sǝ ja fɛka gǝm daa woi.

⁵³ Nǝbɔ Samariyaɨ a kɔ yotǝm gǝnɔ, jʊ a bwɨɨ a sɨn gɔ gǝ yi a Urushalima.

⁵⁴ Bɛtɔ mɛlalɨ gǝnɔ, Yakubu jǝbɔ Yohana ja kuwo nyɨɨ, nǝngɔ ja bʌ gǝn gɔ, “Tɛlalɔ, mʊ swɨ lɛ nǝn jo kǝlagɔ a dʌbʌl a gǝla ba twɨm ji ka?”

⁵⁵ Nǝngɔ Yesu a yǝla a wɛla jimi.

⁵⁶ Nǝngɔ ja shu a kaa bɛ tuulɔɨ.

Nǝb Nɨ Swɨ Lɛ A Bwangtǝn Yesui

⁵⁷ Jǝ shu lɛ a gola, nǝngɔ kaa nǝl a sʊwa gǝn gɔ, “Daa nɨ mʊ yɔm lɛ gwamɨ, mǝ bwang mʊn bwang.”

⁵⁸ Yesu a sʊwa gǝn gɔ, “Fʌlʌmtɨnɔ nǝn bʊwantɨn. Lǝbɨtɨnɔ nǝn lɔtɨn. A Bʊla Nǝlɨ mɨ nǝn daa nɨ yam dul gǝnɔ lɛɨ.”

⁵⁹ Nǝngɔ a sʊwa kaa nǝl gɔ, “Bwang mɨ.” Nǝngɔ nʊgɔ a sʊwa gǝn gɔ, “Tɛlalɔ, bǝla ɨ wo n fʌlʌm tɛtɛ mɨ dɨn.”

⁶⁰ Nǝngɔ a sʊwa gǝn gɔ, “Bǝla bʌlʌntɨnɔ ya fʌl bʌlʌn jinɔ. A mʊnɔ ya sʊwa nǝbɔ fulon fɔlɔn lɔ Kwaamaɨ.”

⁶¹ Nǝngɔ kaa nǝl a sʊwa gǝn gɔ, “Mǝ bwang mʊn bwang, Tɛlalɔ, na ń jǝlaɨ bǝla ɨ wo ya n sʊwa nǝbɔ lɔ mɨɨ kɛl dɨn.”

⁶² Nǝngɔ Yesu a sʊwa gǝn gɔ, “Nʊ nɨ ka twam lɛ nǝn nɛɛɨ, na a yǝla a dʌng guli, a la bɔ dɔtǝm fɔlɔn lɔ Kwaamaɨ.”