Luka 7 - Dadiya NT

Yesu A Gung Bwɛ Jwaalɛ Dʊʊ Sʊwajaamɨ

¹ Yesu a dɨ sʊwatǝm nǝbɔ kɛltɨn nɨ gwamɨ, nǝngɔ a gun a shu a Kafarnahumi.

² A daagɔ kaa dʊʊ sʊwajaam wo wʊnɨ bwɛ jwaalɛ gǝnɔ mɨ kwamɨgǝnɨ, ya bʊla lɛ. Dʊʊ sʊwajaam nɨ swɨ bwɛ jwaalɛ gǝnɔ nɨ lɛ dangǝn.

³ A nyʊwa fulon Yesui, nǝngɔ a twam kaam dʊʊm Yahudawagɨɨ sǝ ja kel gǝn a bɛ, ba gung bwɛ jwaalɛ gǝnɔ.

⁴ Dʊʊm nɨ ja bɛ a daa Yesu woi, ja kel gǝn bɨlǝngǝn, ja sʊwa gɔ, “Nʊ nɨ a bʊm nyɔ ń tɨka gǝn,

⁵ jʊ a bwɨɨ swɨ bǝlǝntǝm bǝnɔ lɛ, a mɔ bǝm kan mɛlalɨ.”

⁶ Nǝngɔ Yesu a shu dakini jǝbɔ jii. Ya dwama lɔngɨ, dʊʊ sʊwajaam nɨ a twam tangǝn fatǝlam gǝnɔ gɔ ja sʊwa Yesu gɔ, “Tɛlalɔ bɛ ka ń kom lɛ dul mʊnɔ a mǝ gǝm! Mǝ la bɔ nyɔ mʊ bɛ lɛ a lɔ mɨɨ.

⁷ N jʊ a bwɨ mǝ la bɔ nyɔ n yɔ a daa mɔ woi. Sʊwa kɛl, bwɛ jwaalɛ mɨɨ gun gun.

⁸ Mǝ tǝmɨ mǝ na a kang fɔlɔn kaa nǝlɨ. Mǝ nǝngǝn nǝn sʊwajaamtɨnɔ a mʊgɔ fɔlɔn mɨ. Mǝ sʊwa sʊwa kaa mǝʊ ‘Yɔ,’ a yɔ. Mǝ sʊwa sʊwa kaa mǝʊ, ‘Ba,’ a bɛ. Mǝ sʊwa sʊwa kaa bwɛ jwaalɛ mɨɨ mǝʊ, ‘Maa nyɔ,’ a maa.”

⁹ Yesu a nyʊwa nyɨɨ, nǝngɔ a ta kang a nyiyoi. Nǝngɔ a yǝla a daa nǝb nɨ bwang gǝm lɛɨ, a sʊwa gɔ, “Mǝ sʊwa jen nɛ, mǝ nya bɔ nǝl wo nǝn gʌleng nǝtǝm bɨlǝngkɛl nyɔ a mʊgɔ Israila!”

¹⁰ Nǝbɔ ja twamɨ ja yǝla a lɔ nǝ dʊʊ sʊwajaam nɨɨ, ya ja nya bwɛ jwaalɛ nɨ kwamɨgǝn.

Yesu A Gung Bʊla Nɔɔkʊlagɨɨ

¹¹ A kʊta bɔ, nǝngɔ Yesu a shu a kaa tuulɔ nɨ jǝ jo lɛ gɔ Nayini. Bɛtɔ mɛlalɨ gǝnɔ jǝbɔ bwɨ nǝbɨɨ ja shu dakini.

¹² Ya ja dwama nyanga tuulɔngɨɨ, kaam nǝb jǝ jel lɛ nǝn bʌlʌn bwaa kaa bwayǝlɨɨ, nɛnɛ gɔ a bʌ gǝn kwaagɔ win, n nɔɔkʊla. Nǝbɔ a lada a tuulɔ gɔ ja jel jǝ ywa gǝn nɛ.

¹³ Kwama Tɛlalɔ a kuwo nɔɔlɨ nɨɨ, nǝngɔ a ji bʊnǝn gǝnɨ, a sʊwa gǝn gɔ, “Bɛ ka ń ji lɛ wi.”

¹⁴ Nǝngɔ a yɔ ya ke wɨlǝn bwaagɨɨ, nǝbɔ a taba wɨlǝnɨ nǝngɔ ja tɨɨ. Yesu gɔ, “Bwayǝlɨ, n sʊwa ń mǝʊ ń gun!”

¹⁵ Nǝngɔ nʊ nɨ a bʊlaɨ, a gun a yɨɨ, a tǝl sʊwa kɛlɔ lɛɨ. Nǝngɔ Yesu a nǝ nɛnɛ gɨɨ.

¹⁶ Taalɔ a ta ji gwam. Jǝ bǝlá Kwaama lɛ jǝ sʊwa lɛ gɔ, “Gʌleng nǝkuwotǝmkǝga a bɛ a kʊm bǝn. Kwaama a bɛ sǝ ba tɨka nǝb gǝnɔ.”

¹⁷ Fulon kɛl Yesui a wa tʌgo a mʊgɔ tǝm Yahudiya jǝbɔ bǝlǝntǝmɔ gwam.

Yesu Jǝbɔ Yohana Nǝ Yʊtǝm Mwɛ Sagsagɔ

¹⁸ Bɛtɔ mɛlalɨ Yohanaɨ nǝ Yʊtǝm mwɛ Sagsagɔ a sʊwa gǝn jʊtǝb nɨ a bwɨɨ.

¹⁹ Nǝngɔ a jo yo a kʊm jini. A twam ji a daa Tɛlalɔ woi, gɔ ja bʌ gǝn, “Nǝmɔ wʊnɨ ja sʊwa gɔ bɛ lɛɨ ka? Nǝ dʌng kaa nǝl ka?”

²⁰ Ja yɔ a daa Yesu woi, nǝngɔ ja sʊwa gɔ, “Yohana nǝ Yʊtǝm mwɛ Sagsagɔ a twam nǝn gɔ ba nǝn bʌ ń, ‘Nǝmɔ wʊnɨ ja sʊwa gɔ bɛ lɛɨ ka? Nǝ dʌng kaa nǝl ka?’ ”

²¹ Kwama ja bɛmɨ, ba ja nya Yesu gung nǝbɔ lɛ mɨ kwamɨgǝnɨ a gǝlala, jǝbɔ nǝb twɨlamɔ, jǝbɔ nǝbɔ nǝn yʊwa bwɨlaɨ, jǝbɔ kululʌmɔ a lada ja nya kuwotǝm daa.

²² Nǝngɔ a jǝla ji gɔ, “Ya jǝ́ sʊwa Yohana jʊ jǝ́ kuwo, jǝ́ nyʊwaɨ. Kululʌmɔ kuwo daagɔ lɛ, nǝbɔ bʊtɔgɔ a swam swamɨ yɔ yɔm lɛ, nǝbɔ a mwata mwataɨ a nya lǝma, nǝb nɨ mɨ jǝ nyʊwa lɔl lɛɨ, jǝ nyʊwa kɛlɔ lɛ, nǝbɔ a bʊlaɨ, ja gun, ja kiyo nǝb bʊnǝnɔ gǝm fulon kɛl lǝmɨgɔ.

²³ Bwiligɔ na a nǝb nɨ a kɨɨ bɔ nǝl a dul mɨɨ!”

²⁴ Nǝn kwama bɛtɔ twama Yohanaɨ a shumi, nǝngɔ Yesu a tǝl sʊwa nǝbɔ kɛlɔ lɛ a dul Yohanaɨ gɔ, “N wɛ jǝ́ jel sǝ jǝ́ kuwo a mʊgɔ kuuli? N yayiligɔ yʊwagɔ mǝg lɛɨ ka?

²⁵ N wɛ jǝ́ yɔ dʌngtǝmɨ? Jǝ́ yɔ dʌngtǝm nʊ nɨ a mal bɛllɛ nyantɨnɨ ka? Ɔ ɔ! Nǝbɔ a dǝg bɛllɛ nya nyʊwa lǝma lɛɨ, n nǝbɔ a lɔ fɔlɔnɨ.

²⁶ Wɛ jǝ́ yɔ dʌngtǝmɨ? N nǝkuwotǝmkǝga ka? N bɨlǝngǝn mǝ sʊwa jen nɛɨ, a laa nǝkuwotǝmkǝga.

²⁷ Nʊ nɨ nǝn gɔ ja mʊla a dul gǝn gɔ, “ ‘Mǝ twam twam bwɛ twama mǝndɨ a kǝga mʊn, wʊnɨ fɛka mʊn golagɔ lɛɨ dɨsɔ la ń bɛɨ.’

²⁸ N sʊwa jen, a kʊm nǝbɔ nɔɔtǝmɔ a bʌi, mɨ nʊ nɨ wo a laa Yohana dʊʊnɨ. Kǝngkǝnɨ nʊ nɨ a dwal a fɔlɔn lɔ Kwaamaɨ a laa gǝn.”

²⁹ Nǝbɔ gwam, jǝbɔ nǝb yotǝm kemʌn tǝmɔ tʌji, kwama ja nyʊwa kɛl Yesui, ja jǝla gɔ gola Kwaamaɨ n dǝngdǝng, n gola jǝlatǝm Yohana a yʊ ji mwɛ sagsagɨ.

³⁰ Nǝngɔ nǝbɔ Farisaɨ jǝbɔ nǝb mɛlalɨ diilɔ ja bwangtǝn bɔ jʊ nɨ Kwaama swɨ lɛ a nǝ jii, ja jǝla bɔ Yohana a yʊ ji mwɛ sagsag.

³¹ Yesu a ja kǝga sʊwa lɛ gɔ, “N wɛ mǝ mʊrka nǝbɔ kal nɨ lɛ nǝnɨ? Jǝ na nyǝn?

³² Jǝ maa na bɛtɨ nɨ jǝ yɨ lɛ a gamdʌboi. Jǝ jobka lɛ, jǝ sʊwa lɛ gɔ, “ ‘Nǝ guu jem jwalɔ, jǝ́ kɔ yegɔ. Nǝ ma nafɨ bwaagɔ, jǝ́ kɔ jitǝm wigɔ.’

³³ Yohana nǝ Yʊtǝm mwɛ Sagsagɔ a bɛɨ, mɨ ja jǝjalǝn nɛ, mɨ nɔɔ bʊgɛ lɛ. Jǝ́ sʊwa lɛ jengɔ, ‘Nǝngǝn nǝn nǝblaam.’

³⁴ Bʊla Nǝlɨ a bɛ, ja lɛ, nɔɔ lɛ, jǝ́ sʊwa lɛ gɔ, ‘Jǝ́ kuwo nǝ jam nɨ jǝbɔ nǝ nɔɔtǝm nɨ jǝbɔ fatǝm nǝb yotǝm kemʌn tǝmɔ, jǝbɔ nǝb bwɨlangkɛlɔ!’

³⁵ Yʊlan Kwaamaɨ gǝ nʊng dǝngdǝng gǝnɔ a gola nǝb nɨ a bwangtǝnɨ.”

Yesu A Lɔ Saminui Bwɛ Farisagɔ

³⁶ Kaa bwɛ Farisa a kela Yesu jatǝm jǝjalǝn a lɔ gɔ, nǝngɔ Yesu a yɔ ya yɨ jǝbɔ gɔ, ja lɛɨ.

³⁷ A tuulɔ nɨ, kaa nɔɔlɨ wo wʊnɨ a yɨ yɨm bwɨlangkɛlɨ. A nyʊwa gɔ Yesu ja jǝjalǝn nɛ a lɔ bwɛ Farisa nɨ, nǝngɔ a bɛ nǝn kwallangǝn nwang nɨ kunʌnɔ a lǝm nyɨɨ.

³⁸ Nǝngɔ ba jʊng a gul gǝnɨ, nǝngɔ ji lɛɨ, mwɛ num gǝnɔ tǝla lɛ a naa gǝnɔ gǝm, waam lɛ nǝn yitʌn dul gǝnɔ, nǝngɔ a kwal naa gǝnɔ waa gǝm nwang nyanɔ lɛɨ.

³⁹ Bwɛ Farisa nɨ a kuwo jʊ nɨ nɔɔlɨ nɨ maa lɛɨ, nǝngɔ a sʊwa a nǝl gǝn gɔ, “Na na nʊ nɨ n nǝkuwotǝmkǝgaɨ, na nyǝm nyǝm gɔ nɔɔlɨ nɨ ke naa gǝnɔ lɛɨ, nǝn nuwo. N nǝ bwɨlangkɛl.”

⁴⁰ Yesu a sʊwa gǝn gɔ, “Saminu, mǝ nǝn jʊ nɨ mǝ sʊwa ń nɛɨ.” Nǝngɔ gɔ, “Sʊwa ɨ sɔ feyi.”

⁴¹ Yesu a sʊwa gǝn gɔ, “Kaam nǝb wo yo kaa nǝl bwang jim kemʌn nɛ. A wini gǝ bwang gǝm kemʌn sǝlǝnɔ fʊlkʊb nʊ, a wini kemʌn sǝlǝnɔ fʊltǝnʊ.

⁴² Pʌd jinɔ ja nya bɔ kemʌn nɨ jǝ ywa gǝn nɛ nǝnɨ, nǝngɔ a kǝlǝm jimi. Mɔ kuwo lɛ a kʊm jini nuwo swɨ nǝ kemʌn nɨ lɛ a laa a wini?”

⁴³ Nǝngɔ Saminu gɔ, “A kuwotǝm mǝndɨ n nʊ nɨ a kǝlǝm gǝm kemʌnɔ a ladaɨ.” Nǝngɔ Yesu a sʊwa gǝn gɔ, “Ń mwatɨ borangɔ dǝngdǝng.”

⁴⁴ Nǝngɔ a dʌng nɔɔlɨ nɨɨ, nǝngɔ a sʊwa Saminu gɔ, “Ń kuwo nɔɔlɨ nɨ ka? N dɔ lɔ mʊnɔ, mʊ nɨ ɨ bɔ mwɛ n saalǝm naa, nɔɔlɨ nɨ a saalam naa mǝndɨ nǝn mwɛ num gǝnɔ, a waam naa mǝndɨ nǝn yitʌn dul gǝnɔ.

⁴⁵ Mʊ kwal ɨ bɔ. Nǝn kwama mǝ dɔmɨ, a bǝla bɔ kwaltǝm naa mǝndɨ wo.

⁴⁶ Mʊ waa mɨ bɔ nwang a dul, nɔɔlɨ nɨ a waa mɨ nwang nya a naatɨn mɨ.

⁴⁷ Mǝ sʊwa ń nɛ, bwɨlangkɛl nɔɔlɨɨ nɨ a maaɨ, ja kǝlǝm gǝm a lada, jʊ a bwɨɨ swɨtǝm gǝnɔ a lada. Nʊ nɨ ja kǝlǝm gǝm dǝmɨ, swɨtǝm gǝnɔ nǝn dǝm nyɔ.”

⁴⁸ Nǝngɔ a sʊwa nɔɔlɨ nɨ gɔ, “N kǝlǝm mʊn bwɨlangkɛl mʊnɔ.”

⁴⁹ Nǝb nɨ a daagɨɨ ja tǝl jǝ sʊwaka lɛ gɔ, “Nʊ nɨ nǝn nuwo tǝgǝn kǝlǝm bwɨlangkɛl lɛɨ?”

⁵⁰ Nǝngɔ Yesu a sʊwa nɔɔlɨ nɨ gɔ, “Nǝtǝm bɨlǝngkɛl mʊnɔ nǝn gɔ a bʊʊ nǝn mʊɨ, ya kwamɨgǝn.”