Luka 5 - Dadiya NT

Jotǝm Bɛtɔ Mɛlalɨ Tɨkǝgagɔ

¹ Kaa di Yesu tɨm a nyiyo wɨma Janisarata, nǝbɔ a mʊrka a lada mǝmsa gǝn nɛ, sǝ jǝ nyʊwa kɛl Kwaamaɨ.

² Nǝngɔ a kuwo tɨyamwɛngɔ yo tɨm a nyiyo wɨmagɔ gǝmɨ. Nǝb gǝnɔ a jelʌm a mʊgɔ tɨyamwɛngɔ gǝm, jǝ saal lɨyaltɨn jinɔ lɛ.

³ Nǝngɔ Yesu a gwi tɨyamwɛng wini, wʊnɨ ga gwii, na a Bitrusi. Nǝngɔ a kela Bitrus gɔ ga kʌl dǝm a kʌng wɨmagɔ gǝm. Nǝngɔ a yɨ a mʊgɔ gǝnɔ gǝmɨ, sʊwa nǝbɔ kɛl Kwaamaɨ lɛɨ.

⁴ A dɨ sʊwatǝm kɛlɔ jǝbɔ nǝbɨɨ, nǝngɔ a sʊwa Bitrus gɔ, “Jǝ́ mǝgtǝn tɨyamwɛngɔ a yɔ a daa nɨ mwɛmɔ a tushi tushii, jǝ́ mal lɨyalɔ, jǝ́ ta jʌngitɨnɔ.”

⁵ Nǝngɔ Bitrus a jǝla gǝn gɔ, “Nǝ dʊʊ, jʊ nɨ a ta nǝn kumi nǝn gʌ kungkwang nǝn ta bɔ jʌngi wo win. Mɨsɔ mǝ kɔ kɛl mʊnɔ lɛ, nǝn mal mal lɨyal nǝnɔ.”

⁶ Kwama nɨ ja mal lɨyalɨ, nǝngɔ ja ta jʌngigɔ a lada nyɨɨ, lɨyalɔ a tǝl tulola lɛ.

⁷ Nǝngɔ ja kela fatǝlam jinɔ a tɨyamwɛng wini gɔ ba ja tɨka jii. Jʌngi nɨ ja taɨ, a yii tɨyamwɛng nɨ yoi. Tɨyamwɛngtɨnɔ a tu lɛm lɛ a mʊgɔ mwɛmɔ gǝm.

⁸ Kwama nɨ Saminu Bitrus a kuwo jʊ nɨ a bwɨɨ, nǝngɔ a bɛ ba yal a kǝga Yesui gɔ, “Kʌlʌm a daa mɨ woi Tɛlalɔ! Mǝ nǝ bwɨlangkɛl.”

⁹ Bitrus jǝbɔ nǝb nɨ jǝ dakini ja ta kang a nyiyo a jʌngi nɨ jǝ tabaɨ.

¹⁰ Yakubu jǝbɔ Yohana bɛtɨ lɔ Zabadii fatǝm maajɨ Bitrusi, ja ta kang a nyiyo tʌji. Nǝngɔ Yesu a sʊwa Bitrus gɔ, “Ka ń nyʊwa lɛ taal, jʊ a ta kǝngkɨɨ, n nǝb ya jǝ́ bɛ lɛ nǝnɨ ke bɔ jʌngi.”

¹¹ Nǝngɔ ja mǝg tɨyamwɛng jinɔ ja bɛ nǝn a kʌng wɨmagɔ gǝmɨ, ja bǝla kanjǝl jinɔ gwam ja bwangtǝn Yesui.

Yesu A Gung Nʊ Nɨ A Mwata Mwataɨ

¹² Kaa di Yesu a bɛ a tuulɔ nɨ kaa nǝl wo a mwata mwataɨ. A kuwo Yesui, nǝngɔ a gǝla a jʊng a kǝga gǝnɨ, a kela gǝn gɔ, “Tɛlalɔ na ń jǝlaɨ, mʊ nǝn kwaan nɨ mʊ gung i lɛɨ sǝ n yǝlam sagsag.”

¹³ Nǝngɔ Yesu a gung kang gǝnɔ a ke gǝn nǝnɨ gɔ, “N jǝla, gun.” Tʌgo a kang a daa gɔ nǝngɔ mwatatǝm nɨ a bǝla gǝnɨ.

¹⁴ Nǝngɔ Yesu a gʊ lɔl gǝnɨ gɔ, “Bɛ ka ń sʊwa lɛ kaa nǝl. A laa jǝl yɔ, ya nʊng dul mʊnɔ a daa nǝkǝlagɔ woi, sǝ ń tǝla twama butitǝm mʊnɔ, kanga Musa a nʊng gɔ ja maaɨ, sǝ a yǝlam nǝtǝm nyiyo a gungtǝm mʊnɔ gǝm.”

¹⁵ Fulon kɛl gǝnɔ a ja kǝga. Bwɨ nǝbɨɨ bɛ lɛ a daa gǝ woi, sǝ jǝ nyʊwa kɛl gǝnɔ, sǝ a gung ji a bɔɔla jinɔ gǝm.

¹⁶ Yesu gǝ jel jel kwaagɔ ya kela Kwaama.

Yesu A Gung Nʊ Nɨ A Swam Swamɨ

¹⁷ Kaa di Yesu mɛla nǝbɔ gǝm kɛl Kwaamaɨ lɛ. Nǝngɔ kaam nǝbɔ Farisaɨ jǝbɔ nǝb mɛlalɨ diilɔ, wʊnɨ a jela a bɛlɨ tuulɔ Galilii gwamɨ, jǝbɔ Yahudiyaɨ, jǝbɔ tuulɔ Urushalimaɨ, jǝ yǝm a daagɔ gǝm. Kwaan Tɛlalɔɨ yɔm jǝbɔ gɔ. Gung nǝb nɨ lɛ mɨ kwamɨgǝnɨ.

¹⁸ Nǝngɔ kaam nǝb a bɛ nǝn nʊ nɨ bʊtɔgɔ a swam swamɨ, ja do gǝn a kʌshen. Jǝ swɨ lɛ ja dɔ nǝn gɔ sǝ ja ya a kǝga Yesui.

¹⁹ Ja nya bɔ daa jǝ dɔ lɛ nǝn gɨɨ, jʊ a bwɨɨ nǝbɔ a lada a daa Yesu woi. Ja kuwo mɨ gola woi, nǝngɔ ja gwi a dul kanɨ, ja kwɨ dul kanɔ, ja shig gǝn a kǝga Yesui nǝn kʌshen nɨ gǝ daam woi.

²⁰ Yesu a kuwo nǝtǝm bɨlǝngkɛl jini, nǝngɔ a sʊwa gǝn gɔ, “Fwalgɔ, n kǝlǝm mʊn bwɨlangkɛl mʊnɔ.”

²¹ Nǝbɔ Farisaɨ jǝbɔ nǝb mɛlalɨ diilɔ jǝ bʌbko lɛ a bʊtɔ jin gɔ, “Nʊ nɨ nuwo kal dun Kwaamaɨ lɛɨ? Nǝn Kwaama kwaagɔ win kǝlǝm bwɨlangkɛl lɛɨ.”

²² Yesu a kwɛl a nyǝm bʊʊlalɨ jinɔ, nǝngɔ a sʊwa ji gɔ, “N wɛ a bwɨ jǝ́ maa bʊʊlalɨ nɨ lɛ nyɔ a nǝl jeni?

²³ Nʊ won a laa jǝlɨ, ‘Ja kǝlǝm mʊn bwɨlangkɛl mʊnɔ,’ jǝbɔ a wʊnɨ ja sʊwa gǝn gɔ, ‘Gun yɔ yɔm mʊnɨ’?

²⁴ Mǝ swɨ lɛ jǝ́ nyǝm gɔ, Bʊla Nǝlɨ nǝngǝn nǝn fɔlɔn kǝlǝmtǝm bwɨlangkɛl a tǝm nɨɨ.” Nǝngɔ a sʊwa balɨ nɨ bʊtɔgɔ a swam swamɨ gɔ, “Gun do wɨlǝn mʊnɔ shu a lɔ.”

²⁵ A tʌgo a kang dangǝn nǝngɔ nʊ nɨ a gun a kʊlʊm kʌshen gǝnɨ, a shu a lɔ gɨɨ, bǝlá Kwaama lɛɨ.

²⁶ Nǝbɔ gwam a ta kang a nyiyo, jǝ bǝlá Kwaama lɛ. Jʊ ja kuwoi, taalɔ a ta ji, nǝngɔ ja sʊwa gɔ, “Dwiyen bǝ kuwo jǝ laatǝm kang.”

Yesu A Jo Lawi

²⁷ A bǝmtǝnɨ, Yesu a jel nǝngɔ a kuwo kaa nǝ yotǝm kemʌn tǝmɨ, dun gǝnɔ nǝn Lawi, yǝm a daa yotǝm kemʌn tǝm. Nǝngɔ Yesu a sʊwa gǝn gɔ, “Bwang mɨ.”

²⁸ Nǝngɔ Lawi a gun a bǝla kanjǝlɔ gwam a bwang gǝmɨ.

²⁹ Nǝngɔ Lawi a fɛka Yesu gǝm jǝjalǝn shigtǝm faabǝnɔ a lada a lɔ gɔ, nǝb yotǝm kemʌn tǝmɔ a lada jǝbɔ tangǝn nǝbɔ jǝ wo tʌji, jǝ ja jǝjalǝnɔ lɛ dakini.

³⁰ Nǝbɔ Farisaɨ jǝbɔ nǝb mɛlalɨ diilɔ ja tǝl kʊngatǝm kɛlɔ jǝ sʊwa bɛtɔ mɛlalɨ Yesui lɛ gɔ, “N wɛ a bwɨ jǝ́ ja lɛ, jǝ́ nɔɔ lɛ jǝbɔ nǝb yotǝm kemʌn tǝmɔ jǝbɔ nǝb bwɨlangkɛlɨ?”

³¹ Nǝngɔ Yesu a jǝla ji gɔ, “Nǝb nɨ kwamɨgǝnɨ mɨ jǝ yɔ lɛ a daa nǝ bʊʊ woi, n nǝbɔ mɨ kwamɨgǝnɨ gǝ yɔ lɛ woi.

³² Mǝ bɛ bɔ sǝ ba n jo nǝb dǝngdǝng. Mǝ bɛ jotǝm nǝb bwɨlangkɛl, sǝ ja yǝla ja bǝla bwɨlangkɛl jinɔ.”

Bʌtʌm Kɛl A Dul Dotǝm Diil Mwɛ

³³ Na kaam nǝb ba bʌ Yesu gɔ, “Bɛtɔ mɛlalɨ Yohanaɨ jǝ do do diil mwɛ kwangkwang mɨ jǝ ja jǝjalǝn nɛ, jǝ maa maa keli Kwaamaɨ, bɛtɔ mɛlalɨ nǝbɔ Farisaɨ nyɔ tʌji. N wɛ a bwɨ bɛtɔ mɛlalɨ mʊnɔ jǝ ja lɛ, jǝ nɔɔ lɛ, ja do bɔ diil mwɛɨ?”

³⁴ Nǝngɔ Yesu a jǝla ji gɔ, “Jǝ́ dǝg dǝg fatǝm balɨgɨɨ jǝ do diil mwɛ na jǝ dakini jǝbɔ gɔ a daa bwatǝm naakanɨ ka?

³⁵ Kwamagɔ bɛ lɛ wo wʊnɨ ba jǝ dem balɨgɔ lɛ a daa ji woi, a kumtɨn gɔ jǝ do do diil mwɛ.”

³⁶ Nǝngɔ a sʊwa ji kaa mʊsǝn kɛl gɔ, “Mɨ nǝn nʊ nɨ wʊl dwang lɛ dǝm a bɛllɛ fɨ sǝ a bakam bɛllɛ galɨɨ. Na ga maa nyɨɨ, bɛllɛ fɨgɔ kala kala. Sʊʊltǝmɔ mɨsɔ bʊm bɛllɛ galɨgɔ gǝm lɛ.

³⁷ Mɨ nǝn nʊ nɨ tal bʊgɛ fɨ lɛ a sʊwa galɨɨ. Na ga maa nyɨɨ, sʊwagɔ fɛ fɛ, bʊgɛmɔ tǝlam tǝlam, sʊwagɔ kala kala.

³⁸ Bʊgɛ fɨgɔ jǝ tal a sʊwa fɨ!

³⁹ Mɨ nǝn nʊ nɨ na a nɔɔ bʊgɛ galɨɨ, swɨ a fɨgɔ lɛɨ. Sʊwa gɔ, ‘A galɨgɔ a lǝm.’ ”