Luka 20 - Dadiya NT

Jǝ Nyǝma Fɔlɔn Yesui Lɛ

¹ Kaa di Yesu a dɔ Kan Kwaamanɔ, maa mɛlalɨ lɛ, kiyo fulon kɛl lǝmɨgɔ lɛ. Nǝngɔ dʊʊm nǝbkǝlamɔ jǝbɔ nǝb mɛlalɨ diilɔ dakini jǝbɔ nǝb dʊʊmɔ ja bɛ nǝn dɔɔm a daa gǝ woi,

² ja bʌ gǝn gɔ, “Sʊwa nǝn n fɔlɔn woi mʊ maa jǝ laatǝm kang nɨ lɛ nǝnɨ? Nuwo a nǝ ń fɔlɔn nɨɨ?”

³ Yesu a jǝla ji gɔ, “Mǝ tǝmɨ mǝ bʌ jen kaa kɛl lɛ. Jǝ́ sʊwa ɨ,

⁴ fɔlɔn yʊtǝm mwɛ sagsag Yohanaɨ a jel a daagɔ Kwaama woi ka? N daagɔ nǝfili woi ka?”

⁵ Nǝngɔ jǝ sʊwaka lɛ a bʊtɔ ji daddad gɔ, “Na bǝ sʊwa bǝngɔ a jel a daa Kwaama woi, sʊwa sʊwa gɔ, ‘N wɛ a bwɨ jǝ́ nǝ bɔ bɨlǝngkɛl nǝn gɨɨ?’

⁶ Na bǝ sʊwa bǝngɔ a jel a daagɔ nǝfili woi, nǝb nɨ gwam mala bǝn mala nǝn tɛl sǝ ja jʌ bǝn, jʊ a bwɨɨ nǝbɔ gwam a jǝla gɔ Yohana n nǝkuwotǝmkǝga.”

⁷ Nǝngɔ ja jǝla gɔ, “Nǝn nyǝm bɔ daagɔ a jelʌmi.”

⁸ Nǝngɔ Yesu a sʊwa gɔ, “Mǝ tǝmɨ mɨsɔ mǝ sʊwa jen fɔlɔn nʊ nɨ lɛ mǝ maam kanjǝl nɨ lɛ nǝnɨ.”

Mʊsǝn Kɛl A Dul Nǝb Nɨ A Yo Twam Fogfogi Ywatǝmɨ

⁹ Yesu a sʊwa kaa mʊsǝn kɛl gɔ, “Kaa nǝl wo wʊnɨ a kwal tɔtwam fogfogi gǝnɨ. Nǝngɔ a nǝ kaam nǝb gɔ ya ja jʊng lɛ. A shu a kaa tǝm ya yɨ wo a kʊtaɨ.

¹⁰ Kwama kwasatǝm tʊʊl tɨyagɔ a laɨ, nǝngɔ a twam bwɛ jwaalɛ gǝnɔ win gɔ a yɔ a daagɔ nǝb nɨ a yo twam ywatǝmɨ sǝ ya yo gǝm a gǝnɔ tʊʊl tɨyagɔ. Nǝb nɨ a yo twam ywatǝmɨ a ta bwɛ jwaalɛ nɨ, ja bʊg gǝn, ja tʊng gǝn kangɔ kwakwa.

¹¹ Nǝngɔ a yǝla a twam kaa bwɛ jwaalɛ gǝnɔ tagɨ. Nǝb nɨ a bʊg gǝn, ja tuwola gǝn, ja ywa gǝn kangɔ kwakwa.

¹² A yǝla a twam bwɛ jwaalɛ na taalɔ. Gǝ tǝgǝn ja nyʊwa gǝm twɨla, ja mal gǝn a yooli.

¹³ “Nǝngɔ nǝ tɔtwamɔ a bʌ dul gǝnɔ gɔ, ‘N wɛ mǝ maa lɛ kǝngkɨɨ? Mǝ twam bʊla mɨ nɨ mǝ swɨ lɛɨ, n nyǝm jǝ nǝ gǝn nǝ dʊʊn.’

¹⁴ “Nǝb nɨ a yo twam ywatǝmɨ a kuwo gǝn bɛ lɛɨ, nǝngɔ ja sʊwaka a bʊtɔ ji gɔ, ‘Nǝ wɔɔtǝm kʊla twamɔ n wɔ, bǝ jʌm gǝn sǝ kʊlagɔ a yǝlam a bǝn.’

¹⁵ Nǝngɔ ja ma gǝn a gul kwalɨ tɔtwam, ya ja jʌ gǝnɨ. “N wɛ jǝ́ kuwo lɛ nǝ twam nɨ maa lɛ nǝn nǝb nɨɨ?

¹⁶ Bɛ ba jʌbom jʌbom nǝb nɨ a yo twam ywatǝmɨ sǝ a nǝ kaam nǝb twam ywatǝmɔ.” Nǝbɔ a nyʊwa nyɨɨ, nǝngɔ ja sʊwa gɔ, “Bɛ Kwaama a shigʌm.”

¹⁷ Yesu a dʌng jii, nǝngɔ a bʌ ji gɔ, “Wɛ kɛl Kwaamaɨ nɨ sʊwa lɛɨ? “ ‘Tɛl nɨ nǝb mɔtǝm kanɔ a kɔɨ, nǝn gɔ a yǝlam tɛl fʌlʌm kanɨ.’

¹⁸ Na nʊ nɨ a yal a dʌbʌl tɛl nɨɨ, kǝlala nǝn fǝtǝlag nyɔ. Na tɛl nɨ a yal a dul gǝnɨ, kʊwa gǝn gǝ yǝlam mim.”

¹⁹ Nǝb mɛlalɨ diilɔ jǝbɔ dʊʊm nǝbkǝlamɔ ja nyǝm Yesu a sʊwa mʊsǝn kɛl nɨ a dul jini, n jʊ a bwɨ jǝ swɨ lɛ ja ta Yesu tʌgo a kangɨ. Ja ta gǝn bɔ jʊ a bwɨɨ jǝ nyʊwa taal nǝbɨɨ lɛ.

Bʌtʌm Kɛl A Dul Ywatǝm Kemʌn Tǝm

²⁰ Nǝngɔ nǝb dʊʊm nɨ a saa gola ja sʌblo Yesu daddadɨ. Ja twam nǝb jatɔlɔ, ja nʊng dul jinɔ maamɔ jǝ nǝb dǝngdǝng. Ja twam ji sǝ ja shi Yesu gǝm kwalɨ nǝn bʌtʌm kɛl nɨ jǝ maa gǝm lɛɨ, sǝ ja yɔ nǝn gɔ a daa nǝb kwaan fɔlɔn gwamnagɨɨ.

²¹ Nǝb jatɔl nɨ ja twamɨ, ja bʌ Yesu gɔ, “Nǝ mɛlalɨ, nǝ nyǝm kɛl mʊnɔ jǝbɔ mɛlalɨ mʊnɔ n bɨlǝngkɛl. Nǝ nyǝm ń bɔ nǝn swɨtǝm dul. Mʊ mɛla gola Kwaamaɨ lɛ a mʊgɔ bɨlǝngkɛl.

²² N dǝngdǝng bǝ ywa Kaisar kemʌn tǝm ka? Ka bǝ ywa lɛ ka?”

²³ A nyǝm yʊlan jinɔ. Nǝngɔ a sʊwa ji gɔ,

²⁴ “Jǝ́ nʊng ɨ kemʌnɔ. N duuli woi jǝbɔ dun woi a bʊtɔ gǝnɔ gǝmɨ?” Ja jǝla gǝn gɔ, “Na a Kaisarɨ.”

²⁵ A sʊwa ji gɔ, “Jǝ́ nǝ Kaisar jʊ nɨ a yǝlam a Kaisarɨ. Jǝ́ nǝ Kwaama jʊ nɨ a yǝlam a Kwaamaɨ.”

²⁶ Ja nya bɔ jʊ nɨ jǝ tam gǝn nɛ nǝn a dul kɛl nɨ a sʊwa a kǝga nǝbɨɨ. Kɛl nɨ ga gar jimi, a yǝlam jim jǝ tatǝm kang a nyiyo. Ja gar bɔ kɛl.

Guntǝm A Bwaa Jǝbɔ Naakan

²⁷ Kaam nǝbɔ Sadukiyaɨ nɨ a sʊwa gɔ mɨ guntǝm wo a bwaaɨ, ja bɛ a daa Yesu woi nǝn bʌtʌm kɛl.

²⁸ Ja bʌ gǝn gɔ, “Feyi, Musa a mʊla nǝm gɔ, na kɨla nǝlɨ a bʊla a bǝla nwala gɔ mɨ nǝn bwɛɨ, bɛ kɨla gɔ a naa nɔɔlɨ gɔ sǝ a bʌ kɨla gɔ gǝm bɛtɨ.

²⁹ Kaam kɛb batǝn wo jǝ nʌbʌl. Bwɛ tɨkǝgagɔ a naa nɔɔlɨ, nǝngɔ a bʊlaɨ, a bʌ bɔ bwɛ.

³⁰ Bwɛ na yogɔ

³¹ jǝbɔ bwɛ na taalɔ ja naa gǝn. Gwam jinɔ jǝ nʌbʌl nɨ ja naa gǝn, ja bʊlala, ja bʌ bɔ bwɛ.

³² A gulɔ gǝm, nǝngɔ nɔɔlɨ nɨ a bʊlaɨ.

³³ Yǝlam nwala woi a kɔkɔ guntǝmɔ a bwaaɨ? N wɔ gwam jinɔ nʌbʌli ja naa gǝn wo.”

³⁴ Yesu a jǝla ji gɔ, “Nǝbɔ a kal nɨ kǝngkɨɨ naaka lɛ, jǝ nǝbka naakanɔ lɛ.

³⁵ Nǝb nɨ Kwaama a kuwo ja la nyɔ jǝ la jol gɔ lɛ a guntǝm nǝn kʊlɨ a bwaaɨ, mɨ naakan wo.

³⁶ Mɨsɔ jǝ bʊla bwaa lɛ wo tag, jǝ dǝngdǝng jǝbɔ bɛtɔ twama Kwaamaɨ, n bɛtɔ lɔ Kwaamaɨ, kanga nɨ ja gun a bwaaɨ.

³⁷ A nǝtǝm fulon kɛl twɨtǝm kʊm tɨya, Musa a nʊng gɔ nǝb nɨ a bʊlaɨ, a gun, kanga nɨ Musa a jo Tɛlalɔ gɔ, ‘Kwaama Ibrahimi jǝbɔ Kwaama Ishakui jǝbɔ Kwaama Yakubui.’

³⁸ Kwaama ke bɔ Kwaama nǝb nɨ a bʊla bʊlaɨ. N Kwaama nǝb nɨ nǝn kʊlɨɨ. A daa Kwaama woi nǝbam gǝnɔ a na nǝn kʊlɨ.”

³⁹ Tangǝn nǝb mɛlalɨ diilɔ a gar gǝm gɔ, “Nǝ mɛlalɨ, ń jǝla a bʊm.”

⁴⁰ Mɨ nʊ nɨ wo tag a nya kwaan nɨ bʌ gǝn kɛl lɛ tagɨ.

Bʌtʌm Kɛl A Dul Bʊla Daudaɨ

⁴¹ Nǝngɔ Yesu a sʊwa ji gɔ, “Wɛ a bwɨ ja sʊwa gɔ Kiristi nǝn bʊla Daudaɨ?

⁴² Dauda nǝn kang gǝn a sʊwa a langǝn bwangǝn Zaburaɨ gɔ, “ ‘Tɛlalɔ a sʊwa Tɛlalɔ mɨ gɔ, “Yɨ fɔ a kang jajǝng mɨ,

⁴³ ba la nǝn kwama nɨ mǝ dǝg nǝb kiim mʊnɔ lɛ ja yǝlam, daa fatǝm naa mʊnɨ.” ’

⁴⁴ Dauda a jo gǝn gɔ, ‘Tɛlalɔ.’ A maa nyǝn la a yǝlam bʊla gɔ tagɨ?”

Yesu A Jǝg Duul Nǝb Mɛlalɨ Diilɔ

⁴⁵ A sʊwa bɛtɔ mɛlalɨ gǝnɔ a kǝga nǝbɨɨ gwam gɔ,

⁴⁶ “Bɛ jǝ́ nyǝm nǝb mɛlalɨ diilɔ. Jǝ swɨ maltǝm bɛllɛ dʊʊntɨn sǝ ya ja bola lɛ nǝn. Jǝ swɨ lɛ ya ja yal ji lɛ a gamdʌbo. Jǝ swɨ lɛ ya ja yɨ lɛ a daa nyan a kantɨn mɛlalɨ jǝbɔ daa yɨm nyan a lɔ kangwaal.

⁴⁷ N nǝbɔ ja kʊla nɔɔtǝmkʊlabɨ lɛɨ. Jǝ maa keligɔ a som nyɔ sǝ nǝbɔ a sʊwa gɔ jǝ nǝb sagsag. N nǝbɔ jǝ mwɛ ji lɛ a bʊwa a shiloi.”