Luka 17 - Dadiya NT

Kanjǝlɔ Gǝ Dǝg Nǝl Maatǝm Bwɨlangkɛl Lɛɨ

¹ Yesu a sʊwa bɛtɔ mɛlalɨ gǝnɔ gɔ, “Kanjǝl nɨ dǝg nǝbɔ maatǝm bwɨlangkɛl lɛɨ bɛ bɛ. N mwɛ nʊ nɨ gʊba kanjǝl nɨ lɛ a bɛ nǝnɨ.

² A laa jǝl ja kwa gǝm nɛl kʊwalɨ a kwɨl, ja mal gǝn a mʊgɔ wɨma, na gǝ dǝg dǝg kaa win a kʊm bɛtɔ dwalǝn nɨ a maa bwɨlangkɛlɨ.

³ Bɛ jǝ́ kɨla dul jenɔ! Na kɨla mɔ a maa mʊn bwɨlangkɛlɨ, bɛ ń ga gǝn. Na a saa kǝlǝmtǝmɨ, bɛ ń kǝlǝm gǝm.

⁴ Na a maa mʊn bwɨlangkɛl naagɔ nʌbʌl a kɔkɔɨ, nǝngɔ a yǝla bɛ naagɔ nʌbʌl a daa mʊ woi gɔ ń kǝlǝm gǝmɨ, bɛ ń kǝlǝm gǝm.”

Sʊ Nǝm Nǝtǝm Bɨlǝngkɛlɔ

⁵ Bɛtɔ twamagɔ a sʊwa Tɛlalɔ gɔ, “Sʊ nǝm nǝtǝm bɨlǝngkɛlɔ.”

⁶ Tɛlalɔ a sʊwa ji gɔ, “Na jen nǝn nǝtǝm bɨlǝngkɛl nǝn dǝm nyɔ na nu mastadɨ, jǝ́ sʊwa sʊwa tɨya kʊmalo nɨ jengɔ ku fɔ a daa nɨ ya ń ywɔ a wɨma, bwangtǝn bwang jʊ jǝ́ sʊwa gǝn gɔ a maaɨ.”

Bwɛ Jwaalɛ Nya

⁷ Yesu a ja kǝga nǝn mɛlalɨ gǝnɔ gɔ, “Nuwo a kʊm jen na nǝngǝn nǝn bwɛ jwaalɛ wʊnɨ jʊng gǝm twam lɛɨ, tɔɔ gǝm kwamɨ lɛɨ, na a yǝla a bɛ a lɔɨ, sʊwa gǝn nɛ gɔ, ‘Ba yɨ fɔ ja jǝjalǝnɨ’?

⁸ Mɔ tǝmʊn mɨsɔ mʊ sʊwa gǝn nɛ mɔʊ, ‘Fɛka mɨ jǝjalǝn kwaamɨgɔ dɨn, fɛka bʊtɔ mʊnɔ, ń bɛ mɨ nǝn. Na n ja, n nɔɔɨ, sǝla ń ja a mʊnɔ’ ka?

⁹ Gǝ buu buu bwɛ jwaalɛgɔ gǝm kang na a maa jʊ nɨ ga dǝg gǝn gɔ a maaɨ ka?

¹⁰ Gǝ na nyɔ tʌjen, na jǝ́ bwangtǝn jʊ nɨ gwam Kwaama a sʊwa jen gɔ jǝ́ maaɨ, bɛ jǝ́ sʊwa gɔ, ‘Nǝn jwaalɛb nǝn kwan. Nǝn maa jʊ nɨ a bʊm nǝn maa lɛɨ.’ ”

Yesu A Gung Nǝb Nɨ Bʊtɔgɔ A Mwata Mwataɨ Kʊb

¹¹ Kwama nɨ Yesu a shum a Urushalimaɨ, a bwangtǝn a yǝga tǝm Samariya jǝbɔ Galili.

¹² Ya dɔ kaa tuulɔ lɛɨ, batǝmɔ kʊb nǝn twɨla mwatatǝmɨ ja bɛ a daa gǝ woi. Ja tɨ a kʊta nyɔ.

¹³ Nǝngɔ ja jo jangajǝl nǝn diil gɔ, “Yesu, Nǝ dʊʊ, ji bʊnǝn nǝnɔ.”

¹⁴ Yesu a kuwo jii, nǝngɔ a sʊwa ji gɔ, “Ya jǝ́ nʊng dul jenɔ a daa nǝbkǝlamɔ woi.” Kwama ja ja kǝga nǝn yɔm jini, nǝngɔ ja kuwo bʊtɔ jinɔ kwamɨgǝnɨ.

¹⁵ Nǝngɔ win a kʊm jin a kuwo Yesu a gung gǝnɨ, a yǝla a bɛ a daa Yesu woi, bǝlá Kwaama lɛ nǝn diil.

¹⁶ Nǝngɔ ba jʊng a kǝga Yesui, a buu gǝm kangɨ. Balɨ nɨ ke bɔ bwɛ Yahudaɨ. Gǝ na a tǝm Samariya.

¹⁷ Yesu a bʌ gɔ, “Ke bɔ nǝbɔ kʊb ja nya gungtǝmɨ ka? Tangǝnɔ tʊlkʊbɨ jǝ fee?

¹⁸ Mɨ kaa nʊ nɨ wo a yǝla ba bǝlá Kwaamaɨ na ke bɔ bwɛ bʌl nɨɨ?”

¹⁹ Nǝngɔ Yesu a sʊwa gǝn gɔ, “Gun yilo, nǝtǝm bɨlǝngkɛl mʊnɔ nǝn gɔ a gung ńi.”

Yesu A Maa Mɛlalɨ A Dul Kum Bɛtǝm Fɔlɔn Lɔ Kwaamaɨ

²⁰ Kaamɨ a kʊm nǝbɔ Farisaɨ ja bʌ Yesu gɔ, “Fɨyang fɔlɔn lɔ Kwaamaɨ bɛ lɛɨ?” Yesu a jǝla ji gɔ, “Bɛtǝm fɔlɔn lɔ Kwaamaɨ ke bɔ jʊ nɨ jǝ kuwo lɛ nǝn nui.

²¹ Ke bɔ jʊ nɨ kaa nǝl sʊwa lɛ gɔ, ‘Wɔ a daa nɨ. Wulen fʌleni,’ jʊ a bwɨɨ fɔlɔn Lɔ Kwaamaɨ gǝ na a kʊm jen.”

²² Nǝngɔ a sʊwa bɛtɔ mɛlalɨ gǝnɨ gɔ, “Kɔkɔgɔ bɛ lɛ wo wʊnɨ jǝ́ swɨ lɛ jǝ́ kuwo Bʊla Nǝlɨ maa fɔlɔn nɛɨ, mɨsɔ jǝ́ kuwo lɛ.

²³ Nǝbɔ sʊwa jen sʊwa gɔ, ‘N wɔ fɔ! Wulen fʌlen!’ Bɛ ka jǝ́ jǝla lɛ nǝn ji.

²⁴ Kanga kwama gǝ biyom lɛ a gwanga twalɨ a shu nǝn a gwanga diyengi, bɛtǝm Bʊla Nǝlɨ yǝlam nyɔ.

²⁵ Nǝn tɨkǝga Bʊla Nǝlɨ nɔɔ nɔɔ gaalan a lada. Kal nɨ kɔ gǝn kɔ.

²⁶ “Kanga a bwɨm nǝn jol Nuhui, yǝlam nyɔ tag nǝn jolɔ Bʊla Nǝlɨ yǝla bɛm lɛɨ.

²⁷ Nǝbɔ ja lɛ, nɔɔ lɛ, jǝ naa nɔɔtǝmɔ lɛ, jǝ nǝbka naakanɔ lɛ, a ba la nǝn kumɔ Nuhu a dɔm mʊgɔ tɨyamwɛngɨ. Nǝngɔ mwɛmɔ a swiyo a yii tǝmɔ gwamɨ, a jʌbo nǝb nɨ mɨ a mʊgɔ tɨyamwɛngɨ.

²⁸ “Gǝ na nyɔ tag nǝn kwama Lutui, nǝbɔ ja lɛ, nɔɔ lɛ, jǝ ten nɛ, jǝ miyo lɛ, jǝ kwal kwalagɔ lɛ, jǝ mɔba lɔngɔ lɛ.

²⁹ A kumɔ Lutu a bǝlam Sadumagɨɨ, kǝlagɔ jǝbɔ tɛl nɨ a fo, a shii, a gǝla a dʌbʌl kwama ba jʌbom ji gwam.

³⁰ “Yǝlam nyɔ nǝn kwama Bʊla Nǝlɨ yǝla ba nʊngǝm dul gǝnɔ lɛɨ.

³¹ A kum gɔ, nʊ nɨ a dul kanɨ, ka ga gǝla lɛ ga wɔɔ kanjǝl gǝnɔ a mʊgɔ lɔng. Nʊ nɨ a shu a kuuli, ka ga yǝla lɛ ga bɛ a lɔ.

³² Bʊʊla nǝn jʊ a bwɨ nǝn nwala Lutui.

³³ Nʊ nɨ swɨ nyatǝm kʊlɨ gǝnɔ lɛɨ, jʊ jʊ. Nʊ nɨ a lɛ kʊlɨ gǝnɨ, bʊʊ bʊʊ nǝn.

³⁴ N sʊwa jen, a kum gɔ gǝm, nǝbɔ yo daam wɨlǝnɔ win. Kwaama dem dem win, sǝ a bǝla win.

³⁵ Nɔɔtǝmɔ yo kʊwa nɛl lɛ dakini. Kwaama dem win, sǝ a bǝla win.

³⁶ Batǝmɔ yo dakini jwiyo twam lɛ. Kwaama dem win, sǝ a bǝla win.”

³⁷ Nǝngɔ bɛtɔ mɛlalɨ gǝnɔ a bʌ gǝn gɔ, “A fee nyɨɨ, Tɛlalɔ?” Yesu a sʊwa ji gɔ, “Daa nɨ bʌlʌnɔ woi, n daagɔ jɛtɨnɔ gǝ mʊrkam lɛɨ.”