Luka 15 - Dadiya NT

Mʊsǝn Kɛl Nǝn Kwamɨ Nɨ A Lɛlaɨ

¹ Nǝb yotǝm kemʌn tǝmɔ jǝbɔ “nǝb bwɨlangkɛlɔ” ja bɛ sǝ ba ja nyʊwa mɛlalɨ Yesui.

² Nǝngɔ nǝbɔ Farisaɨ, jǝbɔ nǝb mɛlalɨ diilɔ ja tǝl kʊngatǝmɔ jǝ sʊwa lɛ gɔ, “Dʌng balɨ nɨ a jǝla a ja fwalɨ jǝbɔ nǝb bwɨlangkɛlɔ, jǝ ja jǝjalǝnɔ lɛ dakini.”

³ Nǝngɔ Yesu a sʊwa ji mʊsǝn kɛl nɨ,

⁴ “Nuwo nyɨ win a kʊm jen na nǝn kwamɨ fʊlkʊb, nǝngɔ win a lɛlaɨ, mɨsɔ bǝla fʊltʊlkʊb jeli tʊlkʊbɔ lɛ, ya saa nʊ nɨ a lɛlaɨ ka?

⁵ Na a nya gǝnɨ, maa maa bǝlátǝm, a do gǝn a kwɨl,

⁶ a yɔ nǝn a lɔ. Sǝ a jo fatǝlam gǝnɔ jǝbɔ nǝb nɨ jǝ dakini, a sʊwa ji gɔ, ‘Jǝ́ bɛ ba jǝ́ tɨka ɨ bǝlátǝmɔ, n nya kwamɨ mǝndɨ a lɛlaɨ.’

⁷ Mǝ sʊwa jen nɛ, jǝ maa fulotǝm nǝlɔ nyɔ a dʌbʌl, na nǝ bwɨlangkɛl win a yǝla a bǝla bwɨlangkɛl gǝnɨ, a laa nǝb nɨ dǝngdǝng fʊltʊlkʊb jeli tʊlkʊbɨ, wʊnɨ ja kwɛl ja yǝla ja bǝla bwɨlangkɛl jini.

Mʊsǝn Kɛl Nǝn Kemʌn Nɨ A Lɛlaɨ

⁸ “Na nɔɔlɨ nǝngǝn nǝn kemʌn sǝlǝnɔ kʊbɨ, na win a lɛlaɨ, mɨsɔ kul fitila lɛ, a kʊlam mʊgɔ lɔngɔ, a saa nǝn lǝma sǝ a nya ka?

⁹ Na a nyaɨ, a jo fatǝlam gǝnɔ jǝbɔ nǝb nɨ jǝ daam dakinii, sǝ a sʊwa ji gɔ, ‘Jǝ́ maa bǝlátǝm jǝbɔ mǝ. N nya kemʌn sǝlǝn mǝndɨ a lɛlaɨ.’

¹⁰ Gǝ na nyɔ, bɛtɔ twama Kwaamaɨ maa maa bǝlátǝmɔ nyɔ a dul nǝ bwɨlangkɛl nɨ win a yǝla a bǝla bwɨlangkɛl gǝnɨ.”

Mʊsǝn Kɛl Nǝn Bwɛ Nɨ A Lɛlaɨ

¹¹ Nǝngɔ Yesu a sʊwa gɔ, “Kaa balɨ wo nǝngǝn nǝn bɛtɨ batǝnɔ yo.

¹² Bwɛ dwalɨgɔ a sʊwa tɛtɛ gǝ gɔ, ‘Tɛtɛ, nɨ ɨ kʊla mǝndɨ mǝ nya lɛɨ.’ Nǝngɔ tɛtɛ ji a tǝga ji kʊla gɨɨ.

¹³ “A kʊta bɔ, nǝngɔ bwɛ dwalɨgɔ a mʊr kanjǝl gǝnɔ gwam a bǝla lɔngɨ. A shu a kaa tuulɔ nɨ a kʊta kʊtaɨ, ya jʌm kanjǝl gǝnɔ a yʊwaɨ.

¹⁴ Kwama nɨ a dɨm jʌtǝm jʊ gǝ nǝn gwamɨ, nǝngɔ jʊwan bwɨlagɔ a dɔ mʊgɔ tuulɔ gɨɨ, bʊnǝnɔ a ta gǝn.

¹⁵ Nǝngɔ ya saa maajɨ a daa kaa nǝl woi a tǝm gɨɨ. Nǝngɔ a tʊng gǝn a daa nǝtǝm nyiyolitɨnɔ jǝjalǝnɨ.

¹⁶ A saa gɔ sǝ gǝ ja sʊlǝn nyiyoligɔ. Mɨ nǝn nʊ nɨ a nǝ gǝnɨ.

¹⁷ “A gulɔ gǝmɨ, nǝngɔ a yǝla a bʊʊlalɨ gǝnɔ gǝmɨ, a sʊwa gɔ, ‘Nǝb maajɨ tɛtɛ mɨɨ gwam jinɔ jǝ maam fanyal lɛ nǝn jǝjalǝnɔ. Wɔ mǝ bʊla lɛ fɔ nǝn jʊwan!

¹⁸ Mǝ gun sǝ n yǝla yɔ a lɔ a daa tɛtɛ mɨ woi sǝ n kela gǝn mǝʊ, Tɛtɛ, n maa Kwaama gǝm bwɨlangkɛl jǝbɔ mɔ.

¹⁹ Mǝ la bɔ kǝngkɔ jǝ jo i lɛ gɔ bʊla mʊɨ. Dǝg ɨ n yǝlam win a mʊgɔ nǝb maajɨ mʊnɔ gǝm.’

²⁰ A gun a ta gola a shu a daa tɛtɛ gǝ woi. “Kwama nɨ gǝ bɛm lɛɨ, tɛtɛ gɔ a kuwo gǝn. Bʊnatǝmɔ a ta gǝn. Nǝngɔ a gun a ka sʊgɔl ya tǝga gǝn, a kwal gǝnɨ.

²¹ Nǝngɔ bwɛ gɔ ‘Tɛtɛ, n maa Kwaama gǝm bwɨlangkɛl jǝbɔ mɔ. Mǝ la bɔ ja jo i gɔ mǝ nǝn bʊla mɔ.’

²² “Nǝngɔ tɛ bwɛ a jo bɛtɔ jwaalɛn gǝnɔ, a sʊwa ji gɔ, ‘Jǝ́ bɛ nǝn bɛllɛ nyanɔ dǝbǝr ba jǝ́ mal gǝm. Jǝ́ dǝg gǝm kanɨgɔ jǝbɔ twamɔ.

²³ Jǝ́ bɛ nǝn bɛ nɛɛ balɨ nɨ a dʊʊl nǝn lʊglʊg nyɨɨ, ba jǝ́ biyo, sǝ bǝ maam fulotǝm nǝl nǝn.

²⁴ Bʊla mɨ nɨ a bʊla, a yǝla a fulo. A lɛla, ja nya gǝn.’ Nǝngɔ ja tǝl gaanɨ.

²⁵ “Kwama nɨ bwɛ dʊʊnɔ a yǝla a kuul bɛm lɛɨ, ba dwama lɔngɨ, nǝngɔ a nyʊwa jǝ ga bʌnɔ lɛ, jǝ ye yegɔ lɛɨ.

²⁶ A jo kaa bwɛ jwaalɛ, nǝngɔ a bʌ gǝn jʊ bwɨ lɛɨ.

²⁷ Nǝngɔ a sʊwa gɔ, ‘Nǝn kɨla mɔ a yǝla a bɛ a lɔɨ, nǝngɔ tɛtɛ mɔ a biyo bɛ nɛɛ balɨ nɨ a dʊʊl nǝn lʊglʊg nyɨɨ, jʊ a bwɨɨ a yǝla a bɛ kwamɨgǝn kwamɨ.’

²⁸ “Kɨla gǝ dʊʊnɔ a kal nǝl a kɔ dɔtǝm lɔngɔ. Nǝngɔ tɛtɛ gɔ a jel ya kela gǝn gɔ ga dɔɨ.

²⁹ Nǝngɔ a gar tɛtɛ gɔ gǝm gɔ, ‘Dʌng bwɨ jol nɨ mǝ maa mʊn maajɨ lɛ. Mǝ kɔ bɔ kɛl mʊnɔ wo. Mʊ nɨ ɨ bɔ bɛ bɨ wo n maam bǝlátǝm nǝbɔ fatǝlam mɨɨ.

³⁰ A bʊla mɔ wʊnɨ ya jʌm kemʌn mʊnɔ a daagɔ nɔɔtǝm bulonɔ woi a yǝla a bɛɨ, ń biyo gǝm bɛ nɛɛ balɨ nɨ a dʊʊl nǝn lʊglʊg nyɨɨ!’

³¹ “Nǝngɔ tɛtɛ gɔ a gar gǝm gɔ, ‘Bʊla mɨ, kwangkwang bǝ dakini. Jʊ nɨ gwam mǝ nǝngǝnɨ, na a mɔ.

³² A la nyɔ bǝ maa bǝlátǝm jǝbɔ fulotǝm nǝl, jʊ a bwɨɨ kɨla mɔ nɨ a bʊlaɨ, a yǝla a fulo tag. A lɛla, ja nya gǝn.’ ”