Luka 13 - Dadiya NT

Yǝla Bǝla Bwɨlangkɛl Mʊnɔ Na Mɨ Nyɨɨ Mʊ Kala Kala

¹ A kwama gɔ, kaam nǝb nɨ wo a daa gɨɨ a sʊwa Yesu gɔ Bilatus a jʌbo kaam nǝbɔ Galilii nɨ a bɛ twɨtǝm yulʌn a Kan Kwaamanɨ.

² Nǝngɔ Yesu a sʊwa ji gɔ, “A kuwotǝm jenɔ gǝmɨ, nǝbɔ Galilii nɨ ja jʌboi n nǝbɔ a laa tangǝn nǝbɔ a mʊgɔ Galilii bwɨlangkɛlɨ ka? Nǝn gɔ jʊ a bwɨ ja nɔɔ gaalanɨ ka?

³ N sʊwa jen, na jǝ́ yǝla bɔ jǝ́ bǝla bwɨlangkɛl jeni, mɨsɔ jǝ́ bʊʊ lɛ.

⁴ Jǝ́ kuwo lɛ jengɔ nǝb nɨ kʊb jeli naalǝb kan dʌbʌlɔ a kʌbo tʌgo a ji gǝm a jʌbo ji a Siluwamɨ, ja laa nǝbɔ yǝm a mʊgɔ Urushalimaɨ bwɨlangkɛl ka?

⁵ N sʊwa jen mɨ nyɔ, na jǝ́ yǝla bɔ jǝ́ bǝla bwɨlangkɛl jeni, mɨsɔ jǝ́ bʊʊ lɛ.”

Nʊngtǝm Nǝn Tɨya Jolʌm Dʌfeng

⁶ Nǝngɔ a sʊwa ji mʊsǝn kɛl nɨɨ gɔ, “Kaa nǝl a ywɔ tɨya dʌfeng a tɔtwam gǝn. Nǝngɔ a bɛ ba dʌng gɔ kɛna a tʊʊɨ, ba nya a tʊʊ bɔ.

⁷ Nǝngɔ a sʊwa nʊ nɨ jʊng twamɔ lɛɨ gɔ, ‘Jolɔ taal na mǝ bɛ saatǝm tʊʊl tɨya dʌfeng nɨ lɛɨ. Na n bɛɨ, mǝ nya a tʊʊ bɔ. Mwatɨm gǝn! Kal tǝmɔ lɛ nǝn kwan.’

⁸ “Nǝngɔ nǝ jʊngtǝm twamɔ a kela gǝn gɔ, ‘Tɛlalɔ mɨ, bǝla gǝn a maa kaa jolɔ win. Mǝ jʊng jʊng sǝ n yatǝn bun nɛɛgɔ tʌgo.

⁹ Na a tʊʊ tʊʊlɔ dikaɨ, a bʊm! Na a tʊʊ bɨɨ, sǝ n mwatɨm gǝn.’ ”

Yesu A Gung Nɔɔlɨ Nǝn Kum Fǝbtǝm

¹⁰ Kaa di Yesu maa mɛlalɨ lɛ a mʊgɔ kan mɛlalɨ nǝn Kum Fǝbtǝm.

¹¹ Kaa nɔɔlɨ wo wʊnɨ mɨ kwamɨgǝnɨ, nǝn twɨla yʊwa bwɨla nɨ a maa jolɔ kʊb jeli naalǝb a bʊtɔ gǝnɨ. Mɨ dwal lɛ a tɨ sɨn, bʊtɔgɔ a kol koli.

¹² Kwama nɨ Yesu a kuwo gǝnɨ, nǝngɔ a jo gǝn a sʊwa gǝn gɔ, “Nɔɔlɨ, n wʊlaka ń jǝbɔ twɨla litǝm mʊnɔ.”

¹³ Nǝngɔ a ya gǝm kangɔ a dul gǝnɔ gǝmɨ. Nǝngɔ nɔɔlɨ nɨ a gun a tɨ sɨn, bǝlá Kwaama lɛɨ.

¹⁴ Nǝl nǝ dʊʊ kan mɛlalɨ nɨ a kala a dul Yesui a kɛl gungtǝm nǝ bɔɔla nɨ nǝn Kum Fǝbtǝmɨ. “A sʊwa nǝbɔ gɔ kumɔ nukun na maatǝm maajɨ. Jǝ́ bɛ ja gung jen a kumtɨn gɔ. Ke bɔ a Kum Fǝbtǝm.”

¹⁵ Nǝngɔ Tɛlalɔ a jǝla gǝn gɔ, “Nǝb fento nǝn kwan! Nuwo a kʊm jen mɨsɔ kwɨ nɛɛ gǝnɔ lɛ, mɨsɔ kwɨ lungsong gǝnɔ lɛ a daa kwatǝm, a yɔ nǝn ya nǝ gǝn mwɛ nǝn Kum Fǝbtǝmɨ?

¹⁶ Nɔɔlɨ nɨ nǝn bʊla Ibrahimi, a wʊnɨ Mammɔ a bwa jolɔ kʊb jeli naalǝbɨ. A bʊm bɔ ja kwɨ gǝn a Kum Fǝbtǝm ka?”

¹⁷ Nǝb nɨ gwam kɔ gǝn nɛɨ ja nyʊwa jʊ nɨ Yesu a sʊwaɨ, ja nyʊwa gunidul. Tangǝn nǝbɔ a maa bǝlátǝm nǝn kanjǝl laatǝm kang nɨ gǝ maa lɛɨ.

Mʊsǝn Kɛl A Dul Nu Tɨya Mastad

¹⁸ Nǝngɔ a sʊwa gɔ, “Fɔlɔn lɔ Kwaamaɨ a jelka wɛ? Mǝ mʊrka gǝn jǝbɔ wɛ nyɨɨ?

¹⁹ A maa na nu mastad wʊnɨ nǝn kǝlwʊn nyɨɨ, kaa nǝl a do a kwal a twam gǝnɨ, nǝngɔ a dʊʊl a yǝlam tɨyaɨ. Lǝbɨgɔ gǝ tii lɔngɔ wo a kangtɨn gǝnɔ gǝm.”

Mʊsǝn Kɛl A Dul Yisti

²⁰ Nǝngɔ a bʌ ji tag gɔ, “Fɔlɔn lɔ Kwaamaɨ jǝ mʊrka gǝn jǝbɔ wɛ?

²¹ Gǝ na na yisti wʊnɨ kaa nɔɔlɨ a dǝg tʌgo a mim nuyila taasa taalɨ, a fi gǝn gwamɨ.”

Nyanga Kan Nɨ A Gwag Gwagɨ

²² A ta yɔm gǝnɔ bwangtǝn tuulɔtɨnɔ lɛ jǝbɔ bɛlɨ tuulɔtɨnɔ. Nǝngɔ maa jim mɛlalɨgɔ lɛ a gola Urushalimaɨ.

²³ Nǝngɔ kaa nǝl a sʊwa gǝn gɔ, “Tɛlalɔ, nǝbɔ bʊʊ lɛɨ a lada bɔ ka?” Nǝngɔ a sʊwa ji gɔ,

²⁴ “Jǝ́ maa kwaan bʊtɔ jǝ́ dɔ a nyanga kan nɨ a gwag gwagɨ. Mǝ sʊwa jen nɛ nǝbɔ a lada swɨ dɔtǝm lɛ. Mɨsɔ jǝ dwal lɛ.

²⁵ Na tɛlalɔngɔ a gun a nʊng nyanga kanɨ, jǝ́ tɨ a yooli, jǝ́ ga nyanga kanɔ lɛ. Jǝ́ sʊwa lɛ jengɔ, ‘Tɛlalɔ, wum nǝm nyanga kanɔ!’ Jǝla jen gɔ, ‘Mǝ nyǝm jen bɔ. Mǝ nyǝm bɔ daagɔ jǝ́ jelʌmi.’

²⁶ “Jǝ́ sʊwa sʊwa jengɔ, ‘Bǝ ja, bǝ nɔɔ bǝnɔ mɔ. Mʊ mɛla nǝbɔ gǝm fɔ a gola nǝnɔ gǝm!’

²⁷ “Jǝla jen gɔ, ‘Mǝ nyǝm jen bɔ! Mǝ nyǝm bɔ daagɔ jǝ́ jelʌmi! Jǝ́ kʌlʌm mɨ, jǝ́ nǝb maajɨ bwɨlan gwam!’

²⁸ “Na jǝ́ kuwo Ibrahim, jǝbɔ Ishaku, jǝbɔ Yakubu jǝbɔ nǝbkuwotǝmkǝgagɔ gwam a fɔlɔn lɔ Kwaamaɨ, nǝngɔ a jenɔ ja bǝla jen a yoolii, jitǝm wigɔ wo jǝbɔ kʊʊtǝm nungʌn.

²⁹ Nǝbɔ jel a twal jǝbɔ diyeng, a gwilʌng jǝbɔ gǝlalǝng ba ja yɨ jatǝm dikulom a fɔlɔn lɔ Kwaamaɨ.

³⁰ Nǝbɔ a ga guli, n nǝbɔ yǝlam nǝb kǝgam lɛɨ. Nǝb kǝgamɔ, n nǝbɔ yǝlam nǝb gul lɛɨ.”

Yesu A Ji Bʊnǝn Urushalimagɔ

³¹ Nǝn kwama gɔ kaam nǝbɔ Farisaɨ ba nya Yesui, nǝngɔ ja sʊwa gǝn gɔ, “Hiridus saa jʌtǝm mʊnɔ lɛ. Bǝla daa nɨ ń shu a kaa daa.”

³² Nǝngɔ a jǝla ji gɔ, “Ya jǝ́ sʊwa fʌlʌmɔ jengɔ, ‘Mǝ ja ja kǝga nǝn jǝgtǝm nǝblaamɔ a bʊtɔ nǝbɨɨ. Mǝ gung gung nǝb bɔɔlamɔ dwiyen, jǝbɔ fʌng, a kum na taalɔ gǝm n dɨ maajɨ mǝndɨ.’

³³ A yǝlam nyɔ n ja kǝga nǝn yɔmɔ dwiyen, fʌng jǝbɔ jil. A bʊm bɔ ja jʌ nǝkuwotǝmkǝga a yooli na ke bɔ a mʊgɔ Urushalimaɨ.

³⁴ “A laa dɨsɔ jǝ́ nǝbɔ Urushalimaɨ, jǝ́ nǝbɔ Urushalimaɨ nɨ jǝ́ jʌbo nǝbkuwotǝmkǝgagɨɨ, jǝ́ mala nǝb nɨ ja twam ji a daa jen woi nǝn tɛl ja bʊlalaɨ! Naa nyǝn mǝ swɨ lɛ n dǝg jen a mʊgɔ gaamɨ mǝndɨ gǝmɨ, kanga jangagɔ gǝ dǝgam bɛlɨ gǝnɔ lɛ a mʊgɔ bɨlǝn gǝnɨ, jǝ́ kɔɨ!

³⁵ N wɔ kǝngkɔ ja bǝla jem lɔ jenɔ. Mǝ sʊwa jen nɛ, mɨsɔ jǝ́ kuwo i lɛ wo tag, na ke bɔ kwama jǝ́ sʊwa lɛ jengɔ, ‘Bwiligɔ na a nʊ nɨ bɛ lɛ a mʊgɔ dun Tɛlalɔɨ.’ ”