Luka 10 - Dadiya NT

Yesu A Twam Fʊltǝnʌbʌl Jeli Yogɔ

¹ Bǝmtǝn nɛɨ, Tɛlalɔ a jǝgam kaam nǝbɔ fʊltǝnʌbʌl jeli yo. Nǝngɔ a twam ji yo yo a tuulɔtɨn jǝbɔ daatɨn nɨ ba gǝ yɔ lɛ woi.

² Nǝngɔ a sʊwa ji gɔ, “Kʌsotǝmɔ a lada, nǝb maajɨgɔ nǝn dǝm nyɔ. Jǝ́ kela Tɛlalɔ tɔtwamɔ sǝ a twam nǝb kʌsotǝmɔ a tɔtwam.

³ Jǝ́ ta yɔmɔ. N wɔ n twam jen na bɛl kwamɨtɨn a kʊm bangashɨtɨn.

⁴ Ka jǝ́ do lɛ bǝla kemʌn, jǝbɔ sʊwa yɔm, jǝbɔ twamtɨn. Ka jǝ́ tɨla lɛ a yaltǝm nǝbɨɨ a gola.

⁵ “Na jǝ́ dɔ lɔɨ, bɛ jǝ́ yal jǝl jengɔ, ‘Kwaama a nǝ lɔ nɨ bwili lǝma!’

⁶ Na nǝl wo a lɔ gɔ n nǝ yɨm kwamɨgǝnɨ, yaltǝm jʊ a yɨ a dul gǝn. Na mɨ woi, yaltǝmɔ a yǝla a dul jen.

⁷ Bɛ jǝ́ yɨ a mʊgɔ lɔ gɔ, jǝ́ ja lɛ, jǝ́ nɔɔ jʊ nɨ lɛ ja nǝ jeni, jʊ a bwɨɨ a la nyɔ ja ywa nǝ maajɨ gaalan gǝnɔ a maaɨ. Bɛ ka jǝ́ bwangtǝn nɛ lɔtɨnɔ gwam.

⁸ “Na tuulɔtɨn nɨ jǝ́ dɔ ja yo jeni, jǝ́ ja jʊ nɨ ja nǝ jeni.

⁹ Jǝ́ gung nǝbɔ mɨ kwamɨgǝnɨ, jǝ́ sʊwa ji jengɔ, ‘Fɔlɔn lɔ Kwaamaɨ a bɛ nǝn dɔɔm a daa jen woi.’

¹⁰ Na tuulɔ nɨ jǝ́ dɔ ja yo jen bɨɨ, bɛ jǝ́ jel a gola jǝ́ sʊwa jengɔ,

¹¹ ‘Kuul tuulɔ jenɔ nɨ a naa nǝnɨ, nǝn buum sǝ a yǝlam gʊtǝm lɔl a daa jen woi. Bɛ jǝ́ fɛ jǝ́ nyǝm fulon fɔlɔn lɔ Kwaamaɨ a la nǝn dɔɔm.’

¹² Mǝ sʊwa jen nɛ nǝn di borang Kwaamaɨ, jʊ bwɨ lɛ nǝn tuulɔ gɨɨ bwɨla laa laa jʊ a bwɨ nǝn Sadumagɨɨ.

Tuulɔtɨn Nɨ Ja Yǝla Bɔ Ja Bǝla Bwɨlangkɛl Jini

¹³ “N mwɛ mʊn Korasinu! N mwɛ mʊn, Betsaida! Na na kanjǝl laatǝm kang nɨ mǝ maa a tuulɔ mʊnɨ mǝ maa a Taya jǝbɔ Sidoni, na ja yǝla ja bǝla bwɨlangkɛl jinɔ kǝnǝn, jǝ yǝm nǝn bwɨlang tulong dwang a mʊgɔ bugom.

¹⁴ Nǝn kɔkɔ borangɔ, nǝbɔ Tayaɨ jǝbɔ nǝbɔ Sidoni, Kwaama ji ji bʊnǝn jinɔ a laa a jenɔ.

¹⁵ Jǝ́ nǝbɔ Kafarnahumi jǝ́ kuwo lɛ jǝ gung jen a dʌbʌl ka? Ɔ ɔ, jǝ gǝla nǝn jen a daa yamtǝm borang.

¹⁶ “Na nʊ nɨ a nyʊwa jeni, a nyʊwa ɨ. Na nʊ nɨ a kɔ jeni, a kɔ ɨ. Nʊ nɨ a kɔ ɨɨ, a kɔ nʊ nɨ a twam ɨɨ.”

Fʊltǝnʌbʌl Jeli Yo Nɨ Ja Yǝla Nǝn Fulotǝm Nǝl

¹⁷ Nǝngɔ fʊltǝnʌbʌl jeli yo nɨ a yǝla bɛ nǝn fulotǝm nǝlɨ, ja sʊwa gǝn gɔ, “Tɛlalɔ, nǝn laa kwaan nǝblaamɨ gwam a mʊgɔ dun mʊn.”

¹⁸ Nǝngɔ a sʊwa ji gɔ, “N kuwo Mammɔ a gǝla a dʌbʌl ba yal a tǝm biyo lɛ na kwama beta lɛɨ.

¹⁹ N nǝ jen kwaan jǝ́ fala sɔɔtɨnɔ jǝbɔ dǝnatɨnɔ. N nǝ jen kwaan a dul Mammɨ. Mɨ nǝn jʊ nɨ ke jen nɛɨ.

²⁰ Ka jǝ́ maa lɛ fulotǝm nǝl jengɔ kwaan jenɔ a laa a nǝblaamɨ. Bɛ jǝ́ maa fulotǝm nǝl nǝn dun jenɔ ja mʊla a dʌbʌli.”

Yesu A Maa Fulotǝm Nǝl

²¹ Nǝn kwama gɔ, Yesu maa fulotǝm nǝl lɛ nǝn Yʊwa Kwaamaɨ, a sʊwa gɔ, “Tɛtɛ, Tɛlalɔ dʌbʌlɔ jǝbɔ tǝmɔ, n buu mʊn kang mʊ yʊ nǝb yʊlanɔ jǝbɔ nǝb nyǝmtǝmɔ kanjǝl nɨɨ, mʊ nʊng bɛtɔ dwalǝnɨ. Tɛtɛ, n jʊ mʊ swɨ maatǝmɨ.

²² “Kanjǝlɔ gwam Tɛtɛ mɨ a nɨ ɨ nɨ ɨɨ. Mɨ nǝn nʊ nɨ a nyǝm Bwɛɨ, na ke bɔ Tɛ bwɛɨ. Mɨ nǝn nʊ nɨ a nyǝm Tɛ bwɛɨ, na ke bɔ Bwɛɨ jǝbɔ nʊ nɨ Bwɛ swɨ lɛ a fɛta ji ja nyǝm Tɛ bwɛɨ.”

²³ Nǝngɔ a yǝla a sʊwa bɛtɔ mɛlalɨ gǝnɔ daddad gɔ, “Bwiligɔ na a nʊ nɨ kuwo kanjǝl nɨ lɛ jǝ́ kuwoi.

²⁴ Mǝ sʊwa jen nɛ, nǝbkuwotǝmkǝgagɔ jǝbɔ fɔlɔlɔmɔ a gǝlala, ja saa ja kuwo jʊ nɨ jǝ́ kuwo lɛɨ, ja kuwo bɔ, ja nyʊwa jʊ nɨ jǝ́ nyʊwa lɛɨ, ja nyʊwa bɔ.”

Swɨ Nʊ Nɨ Jǝ́ Yǝm Dakinii Kanga Mʊ Swɨm Dul Mʊnɔ Lɛɨ

²⁵ Na kaa nǝ mɛlalɨ diil Musaɨ a gun a tɛl Yesu gɔ, “Feyi, wɛ mǝ maa lɛ sǝ n nya kʊlɨ nɨ mɨ dɨtǝm woi?”

²⁶ Yesu a jǝla gɔ, “N wɛ ja mʊla a diilɔ gǝmɨ? N wɛ mʊ nyǝm woi?”

²⁷ Nǝngɔ a jǝla gǝn gɔ, “Bɛ ń swɨ Tɛlalɔ Kwaama mʊnɔ nǝn nǝl mʊnɔ gwam, nǝn dʊʊmɨ mʊnɔ gwam, nǝn kwaan mʊnɔ gwam, nǝn bʊʊlalɨ mʊnɔ gwam. Swɨ fwalɨ yɨm mʊnɔ kanga mʊ swɨm dul mʊnɔ lɛɨ.”

²⁸ Yesu a jǝla gǝn gɔ, “Ń sʊwa dǝngdǝng. Ya maa lɛ nyɔ mʊ bʊʊ bʊʊ.”

²⁹ Nǝngɔ nʊ nɨ swɨ lɛ a nʊng dul gǝnɔ gɔ gǝ dǝngdǝngɨ, a bʌ Yesu gɔ, “Nuwo nyɨ n fwalɨ yɨm mǝndɨɨ?”

³⁰ Nǝngɔ Yesu a jǝla gǝn gɔ, “Kaa nǝl a jel a Urushalima gǝla yi a Yeriko. Nǝn kwama shum lɛɨ, nǝngɔ nǝbkuumɔ a gun tʌgo a gǝ gǝmɨ. Ja bʊg gǝn, ja jǝgǝm dwang dʊʊl gǝnɔ, ja bǝla gǝn dʊʊmɨgɔ a kang Kwaamaɨ.

³¹ Nǝngɔ kaa nǝkǝla a bwangtǝn golagɨɨ. A kuwo gǝnɨ, nǝngɔ a tangǝm a keli a shui.

³² A na nyɔ, kaa bwɛ Lawi ba kuwo gǝnɨ, nǝngɔ a tangǝm a keli tǝgǝn a shui.

³³ “A kʊta bɔ nǝngɔ kaa bwɛ Samariya ba kuwo nʊ nɨ daam woi, nǝngɔ a ji bʊnǝn gǝnɨ.

³⁴ A yɔ a daa gǝ woi, nǝngɔ a ya gǝm nwangɔ jǝbɔ mwɛ nyinongɔ a dɛɛbǝlɔ gǝmɨ, nǝngɔ a bwaɨ. Nǝngɔ a gung gǝn a ya a lungsong gǝnɔ gǝmɨ, a yɔ nǝn gɔ a daa shigtǝmɨ.

³⁵ Nǝn tǝmsɛlɨ nǝngɔ a jǝg kemʌn sǝlǝnɔ yoi, a nǝ nǝ lɔngɨ. A sʊwa gǝn gɔ, ‘Tɔɔ gǝn, na jʊ a sʊɨ, na n yǝla n bɛɨ sǝ ba n ywa ń.’ ”

³⁶ Nǝngɔ Yesu a bʌ gɔ, “A kʊm nǝb nɨ taalɨ, nuwo mʊ kuwo lɛ n fwalɨ yɨm nʊ nɨ nǝbkuumɔ a bʊgɨ?”

³⁷ Nǝngɔ nǝ mɛlalɨ diil Musaɨ a sʊwa gɔ, “Nʊ nɨ a ji bʊnǝn gǝnɨ.” Nǝngɔ Yesu gɔ, “Mʊ tǝmʊn yɔ ya maa nyɔ.”

Marta Jǝbɔ Maryamu

³⁸ Ja a mʊgɔ yɔm jinɔ gǝm, nǝngɔ ja la kaa tuulɔɨ. Kaa nɔɔlɨ dun gǝnɔ nǝn Marta ba shig ji a lɔ gɨɨ.

³⁹ Dun kɨla gǝ nɔɔlɨgɨɨ nǝn Maryamu wʊnɨ a yɨ a kǝga Tɛlalɔɨ nyʊwa kɛl gǝnɔ lɛɨ.

⁴⁰ A Martaɨ maajɨgɔ a kom gǝn. Nǝngɔ ba nya gǝnɨ, nǝngɔ a kela gǝn gɔ, “Tɛlalɔ, mʊ kuwo bɔ kɨla mɨ nɔɔlɨgɔ a bǝla ɨ nǝn maajɨgɔ kwaamɨ wini ka? Sʊwa gǝn ba tɨka ɨ!”

⁴¹ Nǝngɔ Tɛlalɔ a jǝla gǝn gɔ, “Marta, Marta, mʊ kom dul mʊnɔ lɛ, ń nya komʌn a dul kanjǝlɔ a lada.

⁴² Jǝ saatǝmɔ win, Maryamu a jǝgǝm jǝ nyan, mɨsɔ jǝ yem gǝm lɛ.”