Ibranii 7 - Dadiya NT

Maajɨ Nǝkǝla Malkisadiki A Laa Maajɨ Nǝkǝla Lawii

¹ Malkisadik nɨ n fɔlɔ Shalimaɨ, n nǝkǝla Kwaama Nǝ dʊʊɨ. A tǝgaka jǝbɔ Ibrahim bɛ lɛ a jʌbotǝm fɔlɔlɔmɨ, a dǝg gǝm bwili.

² Nǝngɔ Ibrahim a nǝ gǝn win a mʊgɔ kʊb a kanjǝlɔ gwamɨ. Nǝn tɨkǝga dun gǝnɔ gǝ nʊng, “Fɔlɔ nǝ dǝngdǝng.” Nǝn gɔ Fɔlɔ Shalimaɨ, gǝ nʊng, “Fɔlɔ yɨm kwamɨgǝn.”

³ Mɨ nǝn tɛ, mɨ nǝn nɛ, mɨ nǝn guu nanǝga, mɨ nǝn kum bʌtʌm, mɨ nǝn kum bʊlatǝm, a jelka Bʊla Kwaamaɨ, a yǝlam nǝkǝla mɨ dɨtǝm wo.

⁴ Jǝ́ dʌng gʌleng dʊʊn gǝnɔ! Tʊga bǝn Ibrahim a nǝ gǝn win a mʊgɔ kʊb wʊnɨ ga yo a kuni!

⁵ N wɔ kaamɨ n dʊʊm Lawii, nǝbɔ a nya maajɨ nǝbkǝlamɨɨ, diilɔ a sʊwa ji gɔ ja yo win a mʊgɔ kʊb a daa nǝbɔ woi, kɛtǝlam jinɔ, ji tʌji jǝ dʊʊm Ibrahimi.

⁶ A nʊ nɨɨ n ke bɔ a guu Lawii, a yo win a mʊgɔ kʊb a daagɔ Ibrahim woi, a dǝg gǝm bwili, nʊ nɨ Kwaama a maa gǝm swatǝm yaaɨ.

⁷ Ke bɔ jǝ bǝngkatǝm, nʊ nɨ a kǝgaɨ nǝn gɔ gǝ dǝg nʊ nɨ lɛ a guli gǝm bwilii.

⁸ A guu Lawii nǝb nɨ a yo win a mʊgɔ kʊb nɨɨ, n nǝb bʊlatǝm. A Malkisadiki a yo win a mʊgɔ kʊb nɨ, ja nǝ nyiyo gɔ nǝn kʊlɨɨ.

⁹ Nǝl sʊwa sʊwa gɔ Lawi nʊ nɨ a yo win a mʊgɔ kʊbɨ, a yǝla a nǝ Malkisadik win a mʊgɔ kʊb a gola Ibrahimi.

¹⁰ Jʊ a bwɨɨ, kwamagɔ Malkisadik a tǝga Ibrahimi, Lawi gǝ na a bʊtɔ Ibrahimi, lǝga bɔ ja bʌ gǝn dɨn, wʊnɨ n dʊʊm Ibrahimi.

Yesu N Nǝkǝla Jelkalǝng Malkisadiki

¹¹ Na na maajɨ nǝbkǝlamɔ a dʊʊm Lawii gǝ dǝg dǝg nǝbɔ a yii dǝngdǝngɨ, (ji nɨ ja yo diilɔ a kang jini), na la n wɛ bǝ saa lɛ tagɨ, kaa nǝkǝla jelkalǝng Malkisadiki, wʊnɨ jǝ nʊng lɛ a yɔ bɔ dǝngdǝng jǝbɔ dʊʊm Harunaɨ?

¹² Na ja fʌto dʊʊm nǝbkǝlamɨɨ, a yǝlam nyɔ jǝ fʌto fʌto diilɔ tǝgǝn.

¹³ Yesu nɨ nǝn sʊwa kɛl lɛ a dul gǝnɨ, gǝ na a kaa dʊʊm, wʊnɨ mɨ nʊ nɨ wo a dʊʊm jin a tǝla twama wo a daa twɨtǝm yulʌni.

¹⁴ N bɨlǝngǝn dangǝn sʊwatǝmɔ gɔ, Tɛlalɔ bǝn a jel a dʊʊm Yahudaɨ. Musa a sʊwa bɔ kaa kɛl a dul nǝbkǝlam wʊnɨ a jel a dʊʊm gɨɨ.

¹⁵ Jʊ nɨ a jel a talɨ nyangnyang, a kwama nɨ kaa nǝkǝla a nʊng dul gǝnɔ na Malkisadiki.

¹⁶ A yǝlam nǝkǝla nɨ ke bɔ a gola diil dʊʊm Lawii. N gola kwaan kʊlɨ nɨ mɨ dɨltǝm woi.

¹⁷ Ja nʊng nǝn sʊwatǝm nɨ gɔ, “Mʊ n nǝkǝla mɨ dɨtǝm wo, jelkalǝng Malkisadiki.”

¹⁸ N gola nɨ ja fʌtom diil galɨgɨɨ, wʊnɨ a kwam bɨɨ, mɨ nǝn kaa tɨkalɨ.

¹⁹ Diilɔ a yii bɔ kaa jǝl. A kaa gola ja dɔ nǝn yatǝm nǝl nɨ a laa jǝlɨ, n gola daa gǝ woi a gʊ bǝn nǝn dɔɔm a daagɔ Kwaama woi.

²⁰ Kwaama a maa gǝn a gola wɛɛlɨ! Kaamɨ a yǝlam nǝbkǝlam ke bɔ a gola wɛɛlɨ.

²¹ A gǝnɔ a yǝlam nǝkǝla nǝn wɛɛlɨ nǝn kwama Kwaama a sʊwa gǝn gɔ, “Tɛlalɔ a wɛɛl mɨsɔ fʌto kɛl gǝnɔ lɛ gɔ, ‘Mʊ n nǝkǝla, mɨ dɨtǝm wo.’ ”

²² N gola wɛɛlɨ nɨ Yesu a do tuulo swatǝm yaa nyan nɨ a tɨbǝl bǝn jǝbɔ Kwaamaɨ.

²³ Nǝbkǝlamɔ a dʊʊm Lawii ja maa maajɨɨ ja bʊlalaɨ a lada. Bwaagɔ a bǝla ji bɔ ja yɨ a kʊta a maajɨgɔ gǝm.

²⁴ A gǝnɔ a yǝlam nʊ nɨ yɨ yɨm nɨ lɛ mɨ dɨtǝm woi. Dʊʊn gǝnɔ na nǝkǝlaɨ, mɨsɔ dɨ lɛ wo.

²⁵ Gǝ na nyɔ nǝn kwaan bʊʊtǝm nǝn nǝb nɨ bɛ lɛ nǝn dɔɔm a daagɔ Kwaama woi a gola gǝn, bʊʊtǝm nɨ mɨ dɨtǝm woi, kanga nɨ kwangkwang nǝn kʊlɨɨ, kela Kwaama lɛ a kɛl dul jin.

²⁶ Nǝn gɔ n dalɨ nǝkǝlagɔ bǝ saa lɛɨ, nǝ sagsag, mɨ nǝn bwɨlangkɛl, mɨ nǝn jǝ tuwol, wʊnɨ ja wʊlaka gǝn jǝbɔ nǝb bwɨlangkɛlɨ, nǝ gungtǝm a kanjǝlɔ gwam a dʌbʌli.

²⁷ A nǝ dul gǝnɔ naa win swar a kwama a nǝ dul gǝnɔ n jǝ twɨtǝmɨ. Mɨsɔ twɨ yulʌn nɛ kum jǝbɔ kum na tangǝn daltɔ nǝbkǝlamɔ, na winɔ a dul bwɨlangkɛl gǝn, bwangtǝn nɛɨ a dul bwɨlangkɛl nǝbɨɨ.

²⁸ Diilɔ gǝ dǝg dǝg nǝbɔ a yǝlam daltɔ nǝbkǝlam a gɨyatǝm jinɔ gǝm. A kɛl wɛɛlɨ nɨ a gǝla a gul diilɔ gǝmɨ, a dǝg Bwɛ a yii dǝngdǝng mɨ dɨtǝm wo.