Ibranii 6 - Dadiya NT

¹ A dul kɛl nɨ, bɛ bǝ sʊtǝn nyǝmtǝmɔ a shu kanjǝl nɨ ja mɛla bǝm nǝn tɨkǝga a dul Kiristii, a yɔ nǝn a dʊʊlǝn nyǝmtǝm. Ka bǝ yǝla lɛ bǝ swa fʌlʌm kanjǝl nɨ bǝ bǝla a guli. Jʊtǝb nɨ nǝn gɔ, n yǝlatǝm bǝlatǝm bwɨlangkɛl nɨ yɔ lɛ nǝn bǝn a bwaaɨ, jǝbɔ nǝtǝm bɨlǝngkɛl a daagɔ Kwaama woi,

² jǝbɔ mɛlalɨ a dul yʊtǝm mwɛ sagsag, jǝbɔ yatǝm kang bwili, jǝbɔ guntǝm a bwaa, jǝbɔ borang dɨltǝm yooligɔ.

³ Bǝ ja ja kǝga nǝn mɛlalɨgɔ na Kwaama a jǝlaɨ.

⁴ Nǝbɔ a nya nyalǝm Kwaamaɨ galɨgǝnɨ, ja twɨ nǝtǝm lǝma dʌbʌli, ja yo Yʊwa Kwaamaɨ tagɨ,

⁵ ja twɨ lǝma kɛl Kwaamaɨ jǝbɔ kwaan joltɨn nɨ bɛ lɛɨ,

⁶ kǝngkɔ ja yǝla ja kɔ bɨlǝngkɛlɨ, mɨsɔ maa lɛ ja gʊ ji ja yǝla ja bǝla bwɨlangkɛlɔ. Jʊ a bwɨɨ a yǝlatǝm dul jinɔ gǝm, ja kʊʊ Bʊla Kwaamaɨ. Ja nǝ gǝn gunidul a kǝga nǝbɨɨ.

⁷ Tǝm nɨ nɔɔm mwɛmɔ lɛ jǝ swiyo gǝm lɛ kwangkwangɨ, jǝg nǝbɔ gǝm jǝjalǝn nyanɔ lɛ wʊnɨ jǝ jʊng lɛ a dul gǝnɨ, Kwaama dǝg gǝm dǝg bwili.

⁸ Tǝm nɨ gim lɛ ka shola jǝbɔ nabǝrnabǝrɨ, mɨsɔ maa jǝ nyan nɛɨ, gǝ na a lagtǝm. Dɨltǝm gǝnɔ n twɨtǝm.

Yatǝm Nǝl Dangǝn

⁹ Fatǝm nyan nǝnɔ, nǝn jǝla nǝn jen dangǝn a dul jʊtǝb nɨ a bʊm a kɛl bʊʊtǝmɨ, kanga nǝn sʊwa nyɔ a dul jʊtǝb nɨ a bwa bwaɨ.

¹⁰ Kwaama n ke bɔ nʊ nɨ mɨ dǝngdǝngɨ, wʊnɨ kɔ dʌngtǝm maajɨ jenɔ lɛɨ, jǝbɔ swɨtǝm gǝnɔ nɨ jǝ́ nʊng lɛɨ, kanga jǝ́ tɨka nǝbam gǝnɔ lɛ ba la nǝn a di dwiyeni.

¹¹ Nǝn swɨ lɛ gwam jenɔ jǝ́ ja kǝga nǝn maatǝm maajɨ nyan nɨ yɔ lɛ nǝn a dɨltǝmɨ, sǝ jǝ́ nya jʊ nɨ jǝ́ ya nǝl woi.

¹² Bɛ ka jǝ́ maa lɛ sʊnǝn. Bɛ jǝ́ banga nǝb nɨ ja yo yiitǝm swatǝm yaa nɨ a gola nǝtǝm bɨlǝngkɛl jinɔ gǝmɨ, jǝbɔ kʊtǝm nǝl jini.

¹³ Nǝn kwama Kwaama a maa Ibrahim gǝm swatǝm yaaɨ, mɨ kaa nʊ nɨ wo a laa gǝn dʊʊn gǝ wɛɛl lɛ nǝnɨ, nǝngɔ a wɛɛl nǝn dun gǝnɨ.

¹⁴ A sʊwa gɔ, “Bɨlǝngǝn, mǝ dǝg mʊn dǝg bwili, sǝ n dǝg dʊʊm mʊnɔ a bwi.”

¹⁵ A dul kɛl nɨ, Ibrahim a kʊ nǝlɨ, nǝngɔ a yo yiitǝm swatǝm yaagɨɨ.

¹⁶ N bɨlǝngǝn nǝbɔ gǝ wɛɛl nǝn nʊ nɨ a laa jii. Wɛɛlɨgɔ, nǝn gɔ gǝ nʊng bɨlǝngkɛlɔ lɛ a jʊ ja sʊwaɨ, sǝ a tɨ nǝn gʊbkatǝm kɛlɔ gwam.

¹⁷ Kwaama tǝgǝn swɨ lɛ a nʊng nǝbɔ jʊ nɨ gǝ maa swatǝm yaa mɨsɔ gǝ fʌto lɛ woi, gǝ nʊng nǝn wɛɛlɨ.

¹⁸ Kanjǝl nɨ yoi mɨsɔ fʌto lɛ wo, swatǝm yaa jǝbɔ wɛɛlɨ nɨ Kwaama a maaɨ. Mɨsɔ bwɨ lɛ Kwaama a maa gabakɛl. A dul kɛl nɨ, bǝn nɨ bǝ mwala bǝ nya daa wuutǝmɨ bǝ nya kwaan dangǝn, bǝ ta jʊ nɨ bǝ ya nǝl wo a dul gǝn dangǝnɨ.

¹⁹ Yatǝm nǝl nɨ bǝ nǝngǝnɨ, a maa na anka a daa bǝn woi, wʊnɨ a ta bǝn gwanggwang mɨsɔ bǝ shu lɛɨ. Nǝn gɔ a dɔ fʌlen a mʊgɔ Daa nɨ a Laa Sagsagɨ, a gul dwang nɨ a tǝga kanɨ.

²⁰ N daa nɨ a kɛl dul bǝn Yesu a laa bǝn dɔtǝmɨ, a yǝlam dalɨ nǝkǝla nɨ mɨ dɨtǝm woi, jelkalǝng Malkisadiki.