Ibranii 5 - Dadiya NT

¹ Dalɨ nǝkǝla nɨ gwam ja jǝgǝm a mʊgɔ nǝbɨɨ, ja ya gǝn sǝ a bwangtǝn nǝn nǝbɔ a gola Kwaamaɨ, sǝ a tǝla twama jǝbɔ twɨtǝm yulʌn kǝlǝmtǝm bwɨlangkɛltɨn.

² A yǝlam nʊ nɨ dwal lɛ a ji bʊnǝn nǝb nɨ a nyǝm bɔ jǝlɨ, jǝbɔ nǝbɔ a kwɛl a lɛla golaɨ, kanga gǝ tǝgǝn ga gɨya gɨyaɨ.

³ A dul kɛl nɨ a yǝlam nyɔ ga tǝla twama, ke bɔ a dul kǝlǝmtǝm bwɨlangkɛl nǝbɨɨ kwaaji, jǝbɔ a gǝnɔ tǝgǝn.

⁴ Mɨ nʊ nɨ wo yɔ lɛ nǝn dul gǝnɔ a kotere dʊʊn nɨɨ. Nǝn Kwaama jo gǝn nɛɨ, kanga a jem Harunaɨ.

⁵ Kiristi tǝgǝn ke bɔ gɔ a gung dʊʊlǝn gǝnɔ a yǝlam dalɨ nǝkǝlaɨ. Nǝn Kwaama a sʊwa gǝn gɔ, “Mɔ nǝn Bʊla mɨ. Mǝ nǝn Tɛtɛ mɔ dwiyen.”

⁶ Kanga a kaa daa a sʊwa gɔ, “Mʊ n nǝkǝla mɨ dɨtǝm wo, jelkalǝng Malkisadiki.”

⁷ Yesu nǝn kwama yɨm gǝnɔ a yoolii, a maa kelitɨn jǝbɔ jitǝm wi nǝn kwaan nǝn mwɛ num. A maa nyɔ a nʊ nɨ nǝn fɔlɔn bʊʊ lɛ nǝn gɔ a bwaaɨ. A nyʊwa keli nɨ ga maa nǝn shigtǝm duli.

⁸ Gǝ Bwɛ sul, a mɛla shigtǝm dul a gaalan nɨ ga nɔɔɨ.

⁹ A yii dǝngdǝngɨ, nǝngɔ a yǝlam jʌng bʊʊlɨ nɨ mɨ dɨltǝm woi, a nǝb nɨ gwam maa gǝm shigtǝm dul lɛɨ.

¹⁰ Kwaama a jo gǝn gɔ dalɨ nǝkǝla, jelkalǝng Malkisadiki.

Gʊtǝm Lɔl A Dul Yǝlatǝm Nǝn Gul

¹¹ Nǝn nǝn jʊ nɨ a lada nǝn sʊwa lɛ a dul jʊ nɨɨ, bwa bwa sʊwatǝmɔ, na nɨ nyǝmtǝm jenɔ a gɨyaɨ.

¹² Kǝngkǝnɨ na a bʊm nyɔ jǝ́ yǝlam nǝb mɛlalɨ sul, jǝ́ saa lɛ kaa nǝl a yǝla a mɛla jem kɛltɨn tǝltǝm kɛl Kwaamaɨ tag. Jǝ nǝ jen yʊl, ke bɔ jǝjalǝn nɨ a kwamɨ.

¹³ Nʊ nɨ jǝjalǝn gǝnɔ n yʊlɨ, a nyǝm bɔ mɛlalɨ nɨ n dǝngdǝngɨ. A maa na bwɛ feli.

¹⁴ Jǝjalǝn kwamɨgɔ na a nǝb nɨ a dʊʊlɨ, nǝb nɨ bʊʊlalɨ jinɔ a nya mwɛl dwiyen jǝbɔ kwangkwangɨ. Ja nyǝm jǝ nyan jǝbɔ jǝ bwɨla.