Ibranii 2 - Dadiya NT

Gʊtǝm Lɔl A Kɔtǝm Kɛl Bʊʊlɨ

¹ A dul kɛl nɨ, bɛ bǝ sʊtǝn bʊʊlalɨ dangǝn a kanjǝl nɨ bǝ nyʊwaɨ, kage bǝ swɨmam nǝn.

² Kɛl nɨ ja sʊwa a nyiyo bɛtɔ twama Kwaamaɨ, n diil. Nǝb nɨ gwam a kɔ nyʊwatǝmɔ, ja bwangtǝn bɨɨ, ja mwɛ ji dǝngdǝng a dul jʊ ja maaɨ.

³ La bǝ bʊʊ mwɛlɔ nyǝn, na bǝ swa bɔ lɔl a bʊʊlɨ dʊʊn nɨɨ? Tɛlalɔ nǝn kang gǝn nǝn gɔ a tǝl sʊwatǝmɨ, nǝb nɨ ja nyʊwa gǝnɨ ja sʊwa bǝn gɔ, n dǝngdǝng.

⁴ Kwaama a mʊrka nǝtǝm nyiyo tǝgǝn jǝbɔ a jinɔ a dul bʊʊlɨ nɨ, a daa kanjǝl nʊngtǝm jǝbɔ kanjǝl laatǝm kang jǝbɔ kanjǝl tatǝm kang a nyiyo jǝbɔ nǝtǝm lǝma Yʊwa Kwaamaɨ nǝn dʌmʌn, wʊnɨ a tǝga kanga a swɨmɨ.

Yesu A Yǝlam Nǝfili Sǝ A Bʊʊ Nǝn Bǝn

⁵ N ke bɔ a daagɔ bɛtɔ twama Kwaamaɨ woi Kwaama a ya fɔlɔn yooli nɨ bɛ lɛɨ, wʊnɨ bǝ sʊwa lɛɨ.

⁶ Kaa, a mʊlalɨ langǝn bwangǝn Kwaamaɨ a sʊwa gɔ, “Nǝfili mʊ bʊʊla lɛ nǝn gɨɨ, n wɛ? Bʊla nǝlɨ mʊ dʌng gǝn, a wɛ tǝgǝn?

⁷ A kǝlɨ kwama ń dǝg gǝn a gɨya bɛtɔ twama Kwaamaɨ gǝm. Ń ya gǝn a nya gungtǝm jǝbɔ dʊʊlǝn.

⁸ Ń ya kanjǝlɔ gwam a kwaan fɔlɔn gǝnɔ gǝm.” Mʊ bǝla bɔ kaa jǝl wo wʊnɨ mɨ a kwaan fɔlɔn gǝnɨ. Kǝngkɔ bǝ kuwo bɔ kanjǝlɔ gwam a kwaan fɔlɔn gǝn.

⁹ Nǝn Yesu bǝ kuwoi, wʊnɨ a kumtɨnɔ nǝn dǝm nyɔ a dǝg gǝn a la bɔ bɛtɔ twama Kwaamaɨ. Kǝngkɔ ja nǝ gǝn gungtǝm jǝbɔ dʊʊlǝn, n kɛl nɔɔtǝm gaalan gǝnɔ a yɔ nǝn a bwaaɨ. N dul kɛl lǝma Kwaamaɨ, Yesu a bʊla a kɛl dul nǝbɨɨ gwamɨ.

¹⁰ Kwaama nǝn gɔ a fwal kanjǝlɔ gwamɨ, kanjǝlɔ gwam n dʊʊlǝn gǝn. Swɨ lɛ gǝ nya bɛtɨ a lada a nya dʊʊlǝn gǝnɔ, a bʊm a fɛ nʊ nɨ win bwangtǝn nɛ nǝn nǝbɔ a nya bʊʊtǝm nyan a gola gaalan gǝnɨ.

¹¹ Yesu nɨ saal nǝb lɛ sagsagɨ, jǝbɔ nǝb nɨ ga saalǝmɨ, gwam jinɔ dʊʊmɔ win. N jʊ a bwɨ mɨ nyʊwa gunidul jotǝm jinɔ lɛ gɔ kɛtǝlam gǝnɨ.

¹² A sʊwa gɔ, “Mǝ sʊwa sʊwa dun mʊnɔ a daa kɛtǝlam mǝndɨ woi. A tɨbǝl mʊrkalɨ nǝb bwangtǝm Kwaamaɨ, mǝ bǝlá ń bǝlá ń nǝn nafɨ.”

¹³ A sʊwa tag gɔ, “Mǝ ya nǝl mɨɨ a daa gǝ woi.” A sʊwa tag gɔ, “Mǝ wɔ, jǝbɔ bɛtɨ nɨ Kwaama a nɨ ɨɨ.”

¹⁴ Na nɨ bɛtɨ gwam nǝn nam jǝbɔ tʊʊmɨ, gǝ tǝgǝn a do jelkalǝng nyɔ, sǝ a gola bwaa gǝnɔ gǝm a kǝl kwaan nʊ nɨ a ta kwaan bwaagɨɨ, nǝn gɔ nǝn mammɨ.

¹⁵ A jǝg nǝb nɨ gwam a bʌtʌm jinɔ gǝm jǝ na a yɨm jwaalɛn a kɛl taal bwaaɨ.

¹⁶ Bɨlǝngǝn ke bɔ bɛtɔ twama Kwaamaɨ gǝ tɨka ji lɛɨ. Mɨ nyɔ. N dʊʊm Ibrahimi gǝ tɨka ji lɛɨ.

¹⁷ N jʊ a bwɨ a yǝlam nyɔ na kɛtǝlam gǝnɔ a golantɨnɔ gǝm gwamɨ, sǝ a yǝlam dalɨ nǝkǝla, nǝ jitǝm bʊnǝn jǝbɔ nǝ tatǝm swatǝm yaa a maajɨ Kwaamaɨ, sǝ ya tǝla twama kǝlǝmtǝm bwɨlangkɛl nǝbɨɨ lɛ.

¹⁸ Kanga nɨ gǝ dul gǝn a nyʊwa gaalan a tɛltǝmɔ ja maa gǝm sǝ a maa bwɨlangkɛlɨ, dwal dwal a tɨka nǝb nɨ ja tɛl jii.