Ibranii 10 - Dadiya NT

Kiristi A Nǝ Nǝbɔ Dul Gǝnɔ Naa Win

¹ Diil Musaɨ n duuli a dul kanjǝl bʊmɨ nɨ bɛ lɛ a kǝgaɨ. Duuli nɨ n ke bɔ kanjǝl bʊmɨ dul jin, jʊ a bwɨɨ mɨsɔ jǝg nǝbɔ lɛ a mʊgɔ bwɨlangkɛl a dul twamagɔ jǝ tǝla lɛ jol jǝbɔ joli.

² Na na diil Musaɨ jǝg bwɨlangkɛl lɛɨ, na a bʊm nyɔ ja bǝla tǝlatǝm twamagɔ. Na na ja saalǝm nǝl nǝb bǝlátǝm nɨ dangǝnɨ, na ja kom bɔ dul jinɔ a dul maatǝm bwɨlangkɛl.

³ A kɛl dul tǝlatǝm twama nɨɨ, jǝ bʊʊla bʊʊla nǝn bwɨlangkɛl jol jǝbɔ jol.

⁴ Mɨsɔ maa lɛ tʊʊm nɛɛ batǝn jǝbɔ a bɨntɨn a dem bwɨlangkɛl.

⁵ N jʊ a bwɨ, nǝn kwama Kiristi a dɔm yooligɨɨ a sʊwa gɔ, “Twɨtǝm yulʌn jǝbɔ tǝlatǝm twama mʊ swɨ bɔ. N bʊtɔ mʊ nɨ ɨ sǝ n tǝlam twama,

⁶ Mɨ mʊ maa fulotǝm nǝl lɛ nǝn twɨtǝm yulʌn jǝbɔ tǝlatǝm twama nɨ dem bwɨlangkɛl lɛɨ.

⁷ Nǝngɔ mǝ sʊwa mǝʊ, ‘A mʊla mʊlaɨ a dul mɨ a mʊgɔ langǝn bwangǝn, Mǝ wɔ. N bɛ sǝ ba n maa jʊ mʊ swɨ lɛɨ Kwaama.’ ”

⁸ A tǝltǝmɔ gǝm a sʊwa gɔ, “Tǝlatǝm twama jǝbɔ twɨtǝm yulʌn, jǝbɔ tǝlatǝm twama kǝlǝmtǝm bwɨlangkɛl mʊ swɨ bɔ. Mɨ mʊ maa fulotǝm nǝl lɛ nǝn ji.” Jʊtǝb nɨ nǝn gɔ kanjǝlɔ diil Musaɨ a sʊwa gɔ nǝbɔ a maaɨ.

⁹ Nǝngɔ a sʊ tʌgo gɔ, “Mǝ wɔ, sǝ ba n maa jʊ mʊ swɨ lɛɨ.” A kʌlʌm swatǝm yaa a tɨkǝgagɔ sǝ a ywɔ a yogɔ.

¹⁰ N jʊ a bwɨ Kiristi a maa jʊ Kwaama swɨ lɛ a maaɨ, Kwaama a saal bǝn sagsag a gola nǝtǝm bʊtɔ Yesu Kiristii naa win swar mɨ sʊtǝm wo.

¹¹ Nǝb nɨ gwam a yǝlam nǝbkǝlamɨɨ, jǝ tɨ tʌgo a kǝga maajɨ jinɔ gǝm kum jǝbɔ kum. Jǝ tǝla twamagɔ lɛ kangɔ win kwangkwang wʊnɨ mɨsɔ dem bwɨlangkɛl lɛ woi.

¹² A Kiristii a tǝla twama kǝlǝmtǝm bwɨlangkɛlɔ naa win swar mɨ sʊtǝm wo. Nǝngɔ a yɨ a kang jajǝng Kwaamaɨ.

¹³ Jʊ a ta a kwama gɨɨ, yam lɛ sǝ nǝb kiim gǝnɔ a yǝlam daa fatǝm naa gǝn.

¹⁴ Gǝ na a tǝlatǝm twama naa win, a yii nǝb nɨ ja buti ji sagsag mɨ dɨtǝm woi.

¹⁵ Yʊwa Kwaamaɨ a nǝ nyiyo a dul bǝn nǝn tɨkǝga a sʊwa gɔ,

¹⁶ “Jʊ nɨ nǝn gɔ n swatǝm yaagɔ mǝ maa lɛ nǝbɔ jii a gul kumtɨn gɨɨ, sʊwatǝm Tɛlalɔɨ. Mǝ dǝg dǝg diil mǝndɨ a mʊgɔ nǝl jinɔ gǝm, mǝ mʊla mʊla a mʊgɔ bʊʊlalɨ jinɔ gǝm.”

¹⁷ Nǝngɔ a sʊ tʌgo gɔ, “Mɨsɔ mǝ bʊʊla lɛ nǝn bwɨlangkɛl jinɔ jǝbɔ bwɨlang maajɨ jinɔ tag.”

¹⁸ Na nɨ ja nya kǝlǝmtǝm bwɨlangkɛlɨ, mɨ tǝlatǝm twama wo tag na kǝlǝmtǝm bwɨlangkɛl.

Bɛ Bǝ Bɛ Nǝn Dɔɔm A Daa Kwaama Woi

¹⁹ Na gǝ na nyɨɨ, kɛtǝlam mɨ, tʊʊm Yesui a nǝ bǝn bɨtǝm nǝl nɨ bǝ dɔ Daa nɨ a Laa Sagsagɨ.

²⁰ Bǝ dɔ daagɔ a gola fɨgɔ gǝm, wʊnɨ nǝn kʊlɨɨ, wʊnɨ a wum bǝm dwang nyanga kanɨ, nǝn gɔ n bʊtɔ gǝnɨ.

²¹ Na nɨ bǝ nǝngǝn nǝn gʌleng nǝkǝla nɨ a dul nǝbɔ a lɔ Kwaamaɨ,

²² bɛ bǝ bɨtʌgo a daa Kwaama woi nǝn nǝlɔ win jǝbɔ yiitǝm nǝtǝm bɨlǝngkɛl, jǝbɔ nǝl sagsag wʊnɨ ja saalǝm mɨ jǝ gunidul woi, jǝbɔ bʊtɔ bǝnɔ nɨ ja saalǝm nǝn mwɛ sagsagɨɨ.

²³ Bɛ bǝ ta yatǝm nǝl nɨ bǝ sʊwa lɛ bǝngɔ bǝ nǝnɨ gwanggwang, jʊ a bwɨɨ nʊ nɨ a maa swatǝm yaa nɨɨ, n nǝ yiitǝm swatǝm yaa.

²⁴ Bɛ ya bǝ dʌngko lɛ sǝ bǝ kʊʊka nǝl, bǝ swɨka lɛ jǝbɔ maatǝm jǝ nyan.

²⁵ Bɛ ka bǝ bǝla lɛ mʊrkatǝm dakini, bǝ bǝlá Kwaama kanga kaam nǝbɔ maa lɛɨ. Bɛ bǝ ja kǝga ya bǝ kʊʊka nǝl lɛ, kanga jǝ́ kuwo kɔkɔ nɨ a dwamaɨ.

²⁶ Na bǝ ja kǝga nǝn maatǝm bwɨlangkɛlɔ nǝn kʊshɨ gǝn kwama nɨ bǝ kwɛl bǝ jǝla nǝn bɨlǝngkɛlɨ, mɨ kaa tǝlatǝm twama wo wʊnɨ saalǝm bwɨlangkɛl nɨ lɛɨ.

²⁷ N gʌleng jǝ yaltǝm kuli a borang nɨ bɛ lɛɨ, jǝbɔ kǝla nɨ a shilo shiloi, wʊnɨ twɨ nǝb kiim Kwaamaɨ lɛɨ.

²⁸ Nʊ nɨ a kǝl diil Musaɨ, jǝ jʌ gǝn jʌ mɨ bʊnatǝm wo, na nǝb nǝtǝm nyiyogɔ wo yo a yɔ nǝn a taalɨ.

²⁹ Nʊ nɨ a soga Bʊla Kwaamaɨ, a kal tʊʊm swatǝm yaa nɨ a dǝg gǝn ga yǝlam sagsagɨ, a tuwo Yʊwa lǝmagɨɨ, n borang bwɨla won laa jǝ maa gǝm lɛɨ.

³⁰ Jʊ a bwɨɨ bǝ nyǝm gǝn tǝbǝn, nʊ nɨ a sʊwa gɔ, “Ywatǝm naanɔ na a mɨɨ. Nǝmǝ mǝ ywa lɛɨ.” A bɨtǝnɨ, “Tɛlalɔ nǝn gɔ maa nǝbam gǝnɔ gǝm borang lɛɨ.”

³¹ N jǝ taal na nǝl a yal a nabwɨl Kwaama kʊlɨɨ.

³² Bɛ jǝ́ bʊʊla, nǝn joltɨn nɨ a shui, nǝn kwama jǝ́ yem bɨlǝngkɛlɨ, jǝ́ kʊ nǝl nǝn gaalanɔ jǝbɔ gʌtǝmɨ.

³³ Kaam ditɨnɔ jǝ tuwola jen nɛ, jǝ nǝ jen gaalan nɛ a kanjǝlɔ gǝm a gǝlala a kǝga nǝbɨɨ. Kaam ditɨnɔ jǝ́ nɔɔ gaalan nɛ dakini jǝbɔ nǝb nɨ jǝ nǝ ji gaalan nɛɨ.

³⁴ Jʊ a bwɨɨ, jǝ́ ji bʊnǝn nǝb nɨ a lɔsomii. Jǝ́ jǝla nǝn swɨtǝm nǝl jen nǝn kanjǝlɔ ja yem jemi, jʊ a bwɨɨ jǝ́ nyǝm jen nǝn kʊlagɔ a lada, wʊnɨ mɨ yemtǝm woi.

³⁵ A dul kɛl nɨɨ, ka jǝ́ gɨya lɛ kʊtǝm nǝl jenɔ, jʊ a bwɨɨ nyatǝm lǝmagɔ wo a lada.

³⁶ Jǝ́ kʊ nǝl, sǝ na jǝ́ maa jʊ Kwaama swɨ lɛɨ, jǝ́ nya nya jʊ nɨ a maa jem swatǝm yaaɨ.

³⁷ “A bǝla kwama nǝn dǝm nyɔ, “Nǝ bɛtǝm nɨ bɛ bɛ, mɨsɔ ta bʊtɔ lɛ.

³⁸ Nǝ mǝndɨ nɨ maa jʊ nɨ lɛ dǝngdǝngɨ, yɨ yɨ nǝn kʊlɨ a gola nǝtǝm bɨlǝngkɛl. Na ga yǝla ga gʊ nǝn guli, mɨsɔ mǝ maa fulotǝm nǝl lɛ nǝn gɔ.”

³⁹ A bǝnɔ bǝ ke bɔ nǝb nɨ a gʊ nǝn gul ja jʌbo jii. Bǝn bǝ nǝb nǝtǝm bɨlǝngkɛl, wʊnɨ yɔ lɛ nǝn kʊlɨ bǝnɔ a bʊʊtǝmɨ.