Galatiya 3 - Dadiya NT

Bwangtǝm Diil Musaɨ Ka? N Nǝtǝm Bɨlǝngkɛl A Daagɔ Kiristi Woi Ka?

¹ Jǝ́ nǝbɔ Galatiyaɨ, jǝ́ swɛla swɛla ka? Na kaa nǝl a swag jeni ka? N nʊng jen kanga ja kʊʊm Yesu Kiristi wʊnɨ a bʊla a dʌbʌl tɨya kʊʊtǝmɨ.

² Kǝngkɔ mǝ swɨ lɛ n bʌ jen kɛlɔ win swar. Yʊwa Kwaamaɨ a bɛ jem a gola bwangtǝm diilɔ jǝ́ maaɨ ka? N ke bɔ a gola nǝtǝm bɨlǝngkɛlɔ a jʊ jǝ́ nyʊwaɨ ka?

³ Jǝ́ swɛla swɛla ka? N wɔ jǝ́ tǝl nǝn Yʊwa Kwaamaɨ, n wɛ a bwɨ jǝ́ swɨ lɛ jǝ́ tagǝm nǝn maajɨ bʊtɔɨ?

⁴ Gaalan nɨ jǝ́ nɔɔ a golantɨnɔ a gǝlala nyɨɨ, a kala nǝn kwan ka? N mɨ nǝn kaa jǝl.

⁵ Kwaama a nǝ jen Yʊwa gǝnɔ, a maatǝm kanjǝl laatǝm kang a kʊm jen. Jǝ́ kuwo lɛ a maa nyɔ a gola diilɔ jǝ́ bwangtǝn nɛɨ ka? N ke bɔ a gola nǝtǝm bɨlǝngkɛl a jʊ jǝ́ nyʊwaɨ ka?

⁶ Jǝ́ dʌng nǝn yɨm Ibrahimi. Kɛl Kwaamaɨ a sʊwa gɔ, “A nǝ bɨlǝngkɛl a daagɔ Kwaama woi, n jʊ a bwɨ Kwaama a yo gǝn gɔ n nǝ dǝngdǝngɨ.”

⁷ Jʊ jǝ́ nyǝm lɛɨ, nǝb nɨ a nǝ bɨlǝngkɛl a daagɔ Kwaama woi, nǝji jǝ bɛtɔ lɔ Ibrahimi.

⁸ Kɛl Kwaamaɨ a kwɛl a mʊla mʊlaɨ sʊwa lɛ gɔ, Kwaama dǝg dǝg Bʌtʌbɔ a yǝlam nǝb dǝngdǝng a gola nǝtǝm bɨlǝngkɛl a daa gǝ woi. N jʊ a bwɨ galɨgǝn ja kiyo Ibrahim gǝm fulon kɛl lǝmɨgɔ gɔ, “N dul mʊn nǝbɔ yoolii nɨ gwam nya bwili lɛɨ.”

⁹ Kǝngkǝnɨ nǝb nɨ a nǝ bɨlǝngkɛl a daagɔ Kwaama woi, Kwaama nǝ ji nǝ bwili dakini jǝbɔ Ibrahim, nǝ nǝtǝm bɨlǝngkɛlɔ.

¹⁰ Nǝb nɨ gwam kuwo lɛ gɔ Kwaama yo ji yo a gola bwangtǝm diili, ja lag ji. Mʊlalɨ kɛl Kwaamaɨ a sʊwa gɔ, “Gwam nʊ nɨ a bwangtǝn bɔ jʊ nɨ gwam ja mʊla a langǝn bwangǝn mʊlalɨ diilɔ gǝmɨ, ja lag gǝn.”

¹¹ Mɨ nǝn nʊ nɨ yǝlam nǝ dǝngdǝng lɛ a kǝga Kwaamaɨ a gola bwangtǝm diili, jʊ a bwɨɨ, “Nʊ nɨ a yǝlam nǝ dǝngdǝng a daa Kwaama woi a gola nǝtǝm bɨlǝngkɛlɨ, yɨ yɨ nǝn kʊlɨ.”

¹² Mɨ jʊ nɨ wo a mʊrka diilɔ jǝbɔ nǝtǝm bɨlǝngkɛlɨ, kanga a mʊla mʊlaɨ gɔ, “Na nʊ nɨ a maa kanjǝl nɨ gwam ja mʊla a mʊgɔ diili, yɨ yɨ nǝn kʊlɨɨ.”

¹³ Nǝn Kiristi ba jǝg dul bǝnɔ a mʊgɔ lagtǝm diili, wʊnɨ a yǝlam jǝ lagtǝm a kɛl dul bǝnɨ. A mʊla mʊlaɨ gɔ, “Nʊ nɨ ja kʊʊ gǝn a dʌbʌl nyiyo tɨyaɨ, a yǝlam jǝ lagtǝm.”

¹⁴ A jǝg bǝn sǝ bwili nɨ Kwaama a maa Ibrahim gǝmɨ, a bɛ Bʌtʌbɔ gǝm a gola Yesu Kiristii, sǝ bǝn a gola nǝtǝm bɨlǝngkɛl bǝ nya nya Yʊwa Kwaamaɨ nɨ Kwaama a swam yaaɨ.

Diilɔ Jǝbɔ Swatǝm Yaagɔ

¹⁵ Kambɔ, mǝ yǝla mǝ nʊng jen kaa gola. Na nǝbɔ yo a swa yaaɨ, nǝngɔ ja dǝg kangɨ, mɨ nǝn nʊ nɨ buul lɛɨ, mɨ nǝn nʊ nɨ sʊ jǝl lɛ wo a mʊgɔ gǝn tagɨ.

¹⁶ Kwaama a maa swatǝm yaa jǝbɔ Ibrahim, jǝbɔ dʊʊm gǝnɔ. Kɛl Kwaamaɨ a sʊwa bɔ gɔ, “Kʌm dʊʊm” wʊnɨ nʊng lɛ gɔ a ladaɨ. Mɨ nyɔ. A sʊwa gɔ “Dʊʊm mʊnɔ” wʊnɨ a nʊng nʊ wini, nǝn gɔ nǝn Kiristi.

¹⁷ Jʊ mǝ swɨ lɛ n sʊwaɨ, nǝn gɔ diil nɨ ja bɛ nǝn a gul jolɔ fʊlkʊb naal jǝbɔ fʊtǝtaalɨ, mɨsɔ fʌto swatǝm yaa nɨ lɛ Kwaama a maaɨ a kala nǝn kwan.

¹⁸ Na na bǝ nya bwilitɨn Kwaamaɨ a gola bwangtǝm diili, na mɨsɔ bǝ nya lɛ a gola swatǝm yaa. Kwaama a nǝ Ibrahim bwili nɨ a gola swatǝm yaa.

¹⁹ N wɛ a bwɨ Kwaama a nǝ diili? A sʊ diilɔ sǝ a nʊng jʊ nɨ n bwɨlangkɛlɨ a talɨ, sǝ a yɔ nǝn a kwama nɨ dʊʊm Ibrahimi bɛm lɛɨ, wʊnɨ n dul gǝn a maa swatǝm yaa nɨɨ. Diil nɨ bɛtɔ twama Kwaamaɨ a nǝ Musa, nʊ nɨ a tɨbǝl Kwaamaɨ jǝbɔ nǝbɨɨ.

²⁰ Nʊ nɨ a tɨbǝlɨ, gǝ nʊng a shu nǝl win. Kwaamagɔ win.

Jʊ Diilɔ Nʊng Lɛɨ

²¹ Diilɔ maa kii lɛ jǝbɔ swatǝm yaa Kwaamaɨ ka? Ɔ ɔ, mɨ nyɔ. Na na ja bɛ nǝn kaa diil wʊnɨ dǝg lɛ bǝ bʊʊɨ, na bǝ nya nya dǝngdǝng Kwaamaɨ, na bǝ bwangtǝn diili.

²² Mʊlalɨ kɛl Kwaamaɨ a sʊwa gɔ yooligɔ gwam gǝ na a mʊgɔ bwɨlangkɛl. N wɛ a bwɨɨ? Sǝ swatǝm yaa nɨ Kwaama a maa a dul nǝtǝm bɨlǝngkɛl a daa Yesu Kiristi woi, a bɛ nǝb nɨ gǝm a nǝ bɨlǝngkɛlɨ.

²³ Nǝn kwama nɨ bǝ nǝ bɔ bɨlǝngkɛl a daa Yesu woi, diil nɨ a kubʌl bǝn ba la nǝn kwama nǝtǝm bɨlǝngkɛlɔ ba jelʌmi.

²⁴ Diil nɨ a yǝlam bwaɨ bǝn, wʊnɨ a yɔ nǝn bǝn a kwama Kiristi a bɛmɨ, sǝ bǝ yǝlam nǝb dǝngdǝng a kǝga Kwaamaɨ a gola nǝtǝm bɨlǝngkɛl.

²⁵ Kǝngkɔ nǝtǝm bɨlǝngkɛlɔ a bɛɨ, mɨ bǝn nǝn yɨm wo a mʊgɔ diil tag.

²⁶ Jʊ a bwɨɨ gwam jǝ́ bɛtɔ lɔ Kwaamaɨ a gola nǝtǝm bɨlǝngkɛl a daa Kiristi Yesu woi.

²⁷ Gwam jenɔ nɨ ja yʊ jen mwɛ sagsagɨ, jǝ́ yǝlam win jǝbɔ Kiristi, jǝ́ do yɨm Kiristii.

²⁸ Mɨ nʊngtǝm dʌmʌn wo a nǝb nɨ n Yahudawaɨ jǝbɔ Bʌtʌbɔ, nʊ nɨ bwɛ jwaalɛ jǝbɔ nʊ nɨ ke bɔ bwɛ jwaalɛɨ, nɔɔlɨ jǝbɔ balɨ. Jǝ́ yǝlam win a daagɔ Yesu Kiristi woi.

²⁹ Na jǝ́ na a Kiristii, jǝ́ dʊʊm Ibrahimi. Jǝ́ yo yo kʊla nɨ Kwaama a maa swatǝm yaa gǝnɨ.