Filibii 3 - Dadiya NT

Mɨ Yatǝm Nǝl Wo A Maajɨ Bʊtɔ

¹ A dɨltǝmɔ gǝmɨ kambɔ, jǝ́ maa fulotǝm nǝl nǝn Tɛlalɔ! Mɨ komtǝm wo n yǝla n mʊla jem kanjǝl nɨ tʌgo tag. Maatǝmɔ nyɨɨ nǝn gɔ n tɨkalɨ jeni.

² Bɛ jǝ́ kɨla sǝgantɨn nɨɨ! Bɛ jǝ́ kɨla nǝb maajɨ bwɨla nɨ! Jǝ́ kɨla nǝb biyotǝm mwɛn nɨ!

³ Jʊ a bwɨɨ, nǝbǝn bǝ biyo mwɛn bɨlǝngǝnɨ. Bǝn nǝb nɨ bǝ bǝlá Kwaama lɛ a gola Yʊwa Kwaamaɨ. Bǝ maa sʊtɔ lɛ a mʊgɔ Kiristi Yesui. Bǝ ya bɔ kwaan a maajɨ bʊtɔ sul,

⁴ mǝ tǝmɨ mǝ ya ya nǝl a maajɨ bʊtɔ na mǝ swɨ lɛɨ. Na kaam nǝbɔ ji nǝn jǝ yatǝm nǝl a maajɨ bʊtɔɨ, mǝ tǝmɨ mǝ nǝngǝn, n laa ji.

⁵ Ja biyo mɨ mwɛnɔ a kum na naalǝb. Mǝ bwɛ Israila. Mǝ dʊʊm Biliyaminui. Mǝ bwɛ Ibrane, bʌtʌm Ibrane. A diilɔ gǝmɨ mǝ bwɛ Farisa, mǝ kɨla diilɔ lɛ dangǝn.

⁶ A gom maajɨ nǝn kwaan bʊtɔ, n nʊ nǝ mʊrkalɨ nǝb bwangtǝm Kwaamaɨ gaalan bwɨla lɛɨ. A gola kɨlatǝm diilɔ gǝm sǝ n yǝlam nǝ dǝngdǝngɨ, mɨ mǝ nǝn daa tuwol.

⁷ Gwam jʊ nɨ na jeltǝmɨ, n do gǝn a yǝlam yalatǝm a kɛl dul Kiristii.

⁸ Bɨlǝngǝn n do kanjǝlɔ gwam yalatǝm na n mʊrka ji jǝbɔ nyǝmtǝm dʊʊlǝn Yesu Kiristii, Tɛlalɔ mɨ. N kɛl dul gǝn mǝ tǝlam kanjǝlɔ gwamɨ, n do ji n jǝl nǝn kwan sǝ Kiristi a yǝlam a mɨ,

⁹ sǝ n yǝlam win nǝbɔ gɔ. Mǝ ya bɔ nǝl mǝ mǝ nǝ dǝngdǝng a gola bwangtǝm diil, na ke bɔ a gola nǝtǝm bɨlǝngkɛl a dul Kiristii. N dǝngdǝng nɨ a daa Kwaama woi bɛ lɛ nǝn nǝtǝm bɨlǝngkɛlɨ.

¹⁰ Swɨtǝm mǝndɨ nǝn gɔ n nyǝm Kiristi, n nyǝm kwaan guntǝm gǝnɔ a bwaaɨ, n nya mʊrkatǝm nǝbɔ gɔ a nɔɔtǝm gaalan gǝnɔ gǝm, n yǝlam na gɔ a bwaa gǝnɔ gǝm,

¹¹ sǝ na maa nyǝnɨ, sǝ a la nǝn mǝ a guntǝm a bwaa.

Sɨnatǝm Jatǝm Kǝga A Daagɔ Bǝ Ya Nǝl Woi

¹² Mǝ sʊwa bɔ mǝʊ n kwɛl n nya kanjǝl nɨ gwam. Mǝ lǝga bɔ n dɨl. Mǝ sɨn nɛ tʌgo sǝ n la kanjǝl nɨ Yesu Kiristi a jo i a kɛl dul gǝnɨ.

¹³ Kambɔ, mǝ do bɔ mǝʊ n kwɛl n la kanjǝl nɨ. Jʊ win na mǝ maa lɛɨ, mǝ twab jʊ nɨ lɛ a guli, mǝ dɔta lɛ sǝ n la jʊ nɨ a kǝgaɨ.

¹⁴ Mǝ sɨn nɛ n ja kǝga sǝ n yo lǝma. Lǝma nɨ Kwaama a jo i a dʌbʌl kwamaɨ, a kɛl dul Kiristi Yesui.

¹⁵ Gwam bǝnɔ nɨ bǝ yǝlam nǝfitʌm a mʊgɔ bwangtǝmɨ, bɛ bǝ bʊʊla nǝn kanjǝl nɨ nyɔ. Na jǝ́ jǝla bɔ nǝn kaam kanjǝl nɨɨ, Kwaama nʊng jen nʊng jʊ nɨ dǝngdǝngɨ.

¹⁶ Bɛ bǝ ja kǝga nǝn jʊ nɨ Kwaama swɨ lɛ bǝ maaɨ.

¹⁷ Kambɔ, bɛ jǝ́ maa mɛlalɨ nǝn mǝ. Jǝ́ dʌng nǝb nɨ yɨm jinɔ win jǝbɔ mɛlalɨ nɨ nǝ maaɨ.

¹⁸ N sʊwa jen naagɔ a lada, kǝngkɔ mǝ sʊwa jen nɛ tag nǝn mwɛ num, nǝbɔ a lada yɨm jinɔ maamɔ nǝb kiim tɨya kʊʊtǝm Kiristii.

¹⁹ Dɨltǝm jinɔ n bwaa, kwaama jinɔ n fʌl. Jǝ maa sʊtɔ jinɔ nǝn jǝ gunidul. Ja ya nǝl jinɔ a kanjǝl yooli nɨ.

²⁰ A bǝnɔ bǝ na a yɨm dʌbʌl. N daagɔ bǝ yam Nǝbʊʊlɨ Tɛlalɔ Yesu Kiristi bɛm lɛɨ.

²¹ Nǝn gɔ fʌto bʊtɔ bǝnɔ nɨ lɛ a gɨya gɨyaɨ, sǝ a fʌto nǝn bʊtɔ dʊʊlǝn na gǝnɔ. Maa nyɔ nǝn kwaan gǝnɔ wʊnɨ bɛ lɛ nǝn kanjǝlɔ gwam a fɔlɔn gǝnɨ.