Dʊgam Nyangnyang 10 - Dadiya NTBwɛ Twama Kwaamaɨ Jǝbɔ Bɛ Langǝn Bwangǝnɔ Ja Kʊlʊm Kʊlʊmɨ 1 Nǝngɔ mǝ kuwo kaa gʌleng bwɛ twama Kwaamaɨ gǝla lɛ a dʌbʌli. Lulɔ a kwabǝm bʊtɔ gǝnɔ. Nǝngǝn nǝn jʌm a dʌbʌl dul gǝnɔ gǝm. Kǝga gǝnɔ maamɔ nu kwama. Naatɨn gǝnɔ maamɔ tɨya lɔng ta kǝla lɛɨ. 2 Nǝngǝn nǝn kaa bɛ langǝn bwangǝn nɨ a wumo wumoi a kang gǝn. A fa naa kang jajǝng gǝnɔ a dʌbʌl wɨma, naa kang fɔlɔng gǝnɔ a tǝm. 3 A jo jangajǝng nǝn diil nǝn kwaan na tulʌm nɨ yʊʊl lɛɨ. A jo jangajǝngɨ, nǝngɔ kunnyiyotɨn nɨ nʌbʌli a bwangtǝnɨ. 4 Nǝn kwama nɨ kunnyiyotɨn nɨ nʌbʌl a gaɨ, n maa fɛkalɨ mʊlatǝmɔ. Nǝngɔ mǝ nyʊwa kaa diil a dʌbʌl sʊwa lɛ gɔ, “Nʊngǝm jʊ kunnyiyo nɨ nʌbʌl a sʊwaɨ. Bɛ ka ń mʊla lɛ.” 5 Nǝngɔ bwɛ twama Kwaamaɨ nɨ mǝ kuwo tɨm a tǝm jǝbɔ wɨmaɨ a gung kang jajǝng gǝnɔ a dʌbʌli. 6 A wɛɛl nǝn dun nʊ nɨ nǝn kʊlɨ mɨ dɨltǝm woi, nʊ nɨ a fwal dʌbʌlɔ jǝbɔ jʊ nɨ a mʊgɔ gǝnɨ, jǝbɔ tǝmɔ jǝbɔ jʊ nɨ a mʊgɔ gǝnɨ, jǝbɔ wɨmagɔ jǝbɔ jʊ nɨ a mʊgɔ gǝnɨ. Nǝn gɔ a wɛɛl gɔ, “Mɨ fiten wo tag. 7 Nǝn kwama nɨ bwɛ twama Kwaamaɨ na nʌbʌlɔ guum jum gǝnɔ lɛɨ, n kwama jǝ yiim jʊ nɨ lɛ Kwaama a yʊ yʊɨ, kanga a sʊwam bɛtɔ jwaalɛn gǝnɨ, nǝbkuwotǝmkǝgagɔ.” 8 Diil wʊnɨ mǝ nyʊwa a dʌbʌli a sʊwa ɨ tag gɔ, “Yɔ ya do bɛ langǝn bwangǝn wʊnɨ a wumo wumoi a kang bwɛ twama Kwaamaɨ nɨ tɨm a dʌbʌl wɨma jǝbɔ tǝmɨ.” 9 Nǝngɔ mǝ yɔ a daagɔ bwɛ twama Kwaamaɨ nɨɨ, mǝ bʌ gǝn mǝʊ ga nɨ ɨ bɛ langǝn bwangǝn nɨɨ. Nǝngɔ gɔ, “Yo sǝ ń wo. Tuul mʊn tuul a mʊgɔ fʌl. Lǝm lǝm maamɔ tɛlɨ a nyiyo mʊn.” 10 Nǝngɔ mǝ yo bɛ langǝn bwangǝnɔ a kang bwɛ twama Kwaamaɨ nɨ gǝmɨ, mǝ womi. A lǝm nyɔ na tɛlɨ a nyiyo mɨ. La mǝ mɨɨ, fʌl mǝndɨ a tuulʌm. 11 Nǝngɔ la ja sʊwa ɨ gɔ, “A bʊm nyɔ ń yǝla ń sʊwa kɛl kuwotǝmkǝga a dul nǝbɨɨ nǝn dʌmʌn jǝbɔ Bʌtʌbɔ jǝbɔ nyiyotɨnɔ nǝn dʌmʌn jǝbɔ fɔlɔlɔmɔ a lada.” |
©️2024 Luke Initiative for Scripture Translation
The Seed Company