Afisa 6 - Dadiya NT

Yɨm Bɛtɨɨ Jǝbɔ Tɛtǝlam Jinɔ

¹ Jǝ́ bɛtɨɔ, jǝ́ bwangtǝn tɛtǝlam jenɔ a dul Tɛlalɔɨ. Jʊ nɨ nǝn gɔ dǝngdǝngɨ.

² Diil tɨkǝgagɔ nǝn swatǝm yaagɔ sʊwa lɛ gɔ, “Bɛ ń nǝ tɛtɛ mɔ jǝbɔ nɛnɛ mɔ dʊʊn,

³ sǝ a yɔ dǝngdǝng jǝbɔ mɔ, sǝ kʊlɨ mʊnɔ a kʊta a yooli.”

⁴ Jǝ́ tɛbɔ, ka jǝ́ dǝg lɛ bɛtɔ lɔ jeni ja maa nabwɨl. A bʊm nyɔ jǝ́ mwɛ ji a gola Tɛlalɔɨ.

Jwaalɛbɔ Jǝbɔ Tɛlalɔtɨnɔ

⁵ Jǝ́ jwaalɛbɔ, jǝ́ bwang tɛlalɔtɨn jenɔ gǝm nǝn shigtǝm dul jǝbɔ taal, nǝn nǝl nyan, kanga jǝ́ bwang Kiristi gǝm lɛɨ.

⁶ Jǝ́ bwang jim na jǝ woi, na mɨ jǝ woi. Jǝ́ maa nyɔ ke bɔ sǝ ja wana jen kwaagɔ. Na jwaalɛb Kiristii, jǝ́ bwangtǝn jʊ Kwaama swɨ lɛ jǝ́ maaɨ nǝn nǝl jenɔ gwam.

⁷ Jǝ́ maa maajɨ nǝlɔ win, maamɔ jǝ́ maam Tɛlalɔ, ke bɔ nǝfitʌm.

⁸ Jǝ́ nyǝm Tɛlalɔ nǝ nǝ bwili a nʊ nɨ pʌd a maa jǝ nyaɨ, na gǝ bwɛɨ, na gǝ bwɛ jwaalɛɨ.

⁹ Jǝ́ tɛlalɔtɨnɔ, jǝ́ maa nyɔ tʌjen. Ka jǝ́ nǝ ji lɛ gaalan. Jǝ́ nyǝm nʊ nɨ nǝn Tɛlalɔ ji jǝbɔ jen a dʌbʌl kwamaɨ, mɨ gǝ maa swɨtǝm dul lɛ.

Kanjǝl Tatǝm Kun Kwaamaɨ

¹⁰ A dɨltǝmɔ gǝm, bɛ jǝ́ ya kwaanɔ a daagɔ Tɛlalɔ woi jǝbɔ mʊgɔ kwaan dʊʊn gǝnɔ.

¹¹ Jǝ́ dʊʊ kanjǝl tatǝm kun Kwaamaɨ pʌd sǝ jǝ́ dwal jǝ́ tɨ, jǝ́ kʌshi dul jenɔ a yʊlan mammɨ gǝm.

¹² Kɨlan bǝnɔ ke bɔ a dul nǝfitʌmi bǝ maa lɛɨ, bǝ maa a dul kwaan yʊwa bwɨlantɨn nɨ a dʌbʌl kwamaɨ, jǝbɔ fɔlɔn nǝblaamɨ, jǝbɔ lɛɛ jǝbɔ yʊwa bwɨlantɨn nɨ gwam a mʊgɔ kumtojilii.

¹³ Bɛ jǝ́ dʊʊ kanjǝl tatǝm kun Kwaamaɨ pʌd, sǝ jǝ́ dwal jǝ́ tɨ, jǝ́ kʌshi dul jenɔ nǝn di kɔkɔ bwɨla nɨ, sǝ na nǝn kwama jǝ́ dɨm tatǝm kun nɨ, jǝ́ ja kǝga nǝn tɨmɔ nǝn kwaan.

¹⁴ Jǝ́ tɨ nǝn kwaan. Bɛ bɨlǝngkɛlɔ a yǝlam tafɨya jen. Bɛ maajɨ dǝngdǝngɔ a yǝlam bɛllɛ kemʌn jen.

¹⁵ Bɛ fɛkalɨ yɔtǝm nǝn fulon kɛl lǝmɨ lǝmagɔ a yǝlam na twam a naa jenɔ gǝm.

¹⁶ A sʊtǝnɨ, bɛ nǝtǝm bɨlǝngkɛlɔ a yǝlam kʊsa jen, wʊnɨ jǝ́ dwal lɛ jǝ́ dum ben kǝla bʊgɔ nǝ bwɨla nɨ nǝnɨ.

¹⁷ Bɛ bʊʊtǝmɔ a yǝlam bule kemʌn jen. Bɛ Yʊwagɔ a yǝlam gulʌn jen, wʊnɨ nǝn gɔ n kɛl Kwaamaɨ.

¹⁸ Bɛ ya jǝ́ maa keli lɛ kwangkwang a mʊgɔ kwaan Yʊwa. Jǝ́ maa kelitɨnɔ nǝn dʌmʌn. A dul kanjǝl nɨ, jǝ́ yɨ nǝn fɛkalɨ, ya jǝ́ maa keli lɛ kwangkwang a dul nǝb sagsagɨɨ.

¹⁹ Mǝ tǝmɨ jǝ́ maa mɨ keli. Jǝ́ kel mɨ Kwaama a nɨ ɨ kɛl nyan dɨsɔ n sʊwa fulon kɛl lǝmɨ nɨ a yʊ yʊɨ nyangnyang, mɨ taal wo.

²⁰ N dul fulon kɛl lǝmɨ nɨ mǝ do nyiyo gǝnɔ a mʊgɔ golmanɨ. Jǝ́ maa mɨ keli n kiyo fulon kɛl lǝmɨ nɨ mɨ nyʊwatǝm taal wo, kanga a bʊm na mǝ sʊwa lɛɨ.

Dɨltǝm Yaltǝmɔ

²¹ Mǝ swɨ lɛ jǝ́ nyǝm yɨm mǝndɨ jǝbɔ maajɨgɔ mǝ maa lɛɨ. N jʊ a bwɨ mǝ twam Tikikus a daa jen woi. N kɛ nǝ swɨtǝm, n nǝ tatǝm swatǝm yaa a maajɨ Tɛlalɔɨ. Sʊwa jen sʊwa kanjǝlɔ pʌd.

²² Mǝ twam gǝn a daa jen woi a dul kɛl nɨ, sǝ jǝ́ nyǝm yɨm nǝnɔ, sǝ a kʊʊ jem nǝl.

²³ Yɨm kwamɨgǝnɔ, jǝbɔ swɨkanɔ, jǝbɔ nǝtǝm bɨlǝngkɛl a Kwaama Tɛtɛɨ jǝbɔ a Tɛlalɔ Yesu Kiristii a ta tʌgo gwanggwang a jen gǝm kambɔ.

²⁴ Bɛ lǝmagɔ a ta tʌgo gwanggwang a nǝb nɨ swɨ Tɛlalɔ bǝn Yesu Kiristi lɛɨ nǝn swɨtǝm nɨ mɨ dɨtǝm woi.