Afisa 5 - Dadiya NT

Jǝ́ Yɨ Yɨm A Mʊgɔ Nyalǝm

¹ Bɛ jǝ́ mɛla yɨm Kwaamaɨ. Nǝjen jǝ́ bɛtɔ lɔ gɨɨ swɨ lɛ nyangǝnɨ.

² Jǝ́ yɨ yɨm swɨkan kanga Kiristi a swɨ bǝnɨ, a nǝ dul gǝnɔ a kɛl dul bǝnɨ, jǝ twɨtǝm yulʌn lǝmɨ a Kwaamaɨ.

³ Bɛ ka jǝ́ kiyomtǝn nɛ kɛl a dul bulon jǝbɔ maajɨ kalalɨ, jǝbɔ wɛl a kʊm jen. Sʊwatǝm kɛl a dul bwɨlangkɛltɨn nɨɨ, a bʊm bɔ a kʊm nǝb sagsagɨɨ.

⁴ A na nyɔ tag a kɛl bulon, jǝbɔ sʊwalatǝm kɛl nǝn kwan, jǝbɔ kabatǝm jongʌn wʊnɨ mɨ nǝn kaa tɨkalɨɨ. Jʊ a laa jǝlɨ, bɛ ya jǝ́ buu Kwaama gǝm kang lɛ.

⁵ Bɛ jǝ́ nyǝm, nǝ maatǝm bulon, jǝbɔ nǝ maatǝm bwɨlan, jǝbɔ nǝ wɛl (gɔ jǝbɔ nǝ bwangtǝm shom pʌd jǝ win), mɨsɔ jǝ dɔ fɔlɔn lɔ Kiristii lɛ jǝbɔ a Kwaamaɨ.

⁶ Bɛ ka kaa nǝl ya swag jen nɛ nǝn kɛl nǝn kwan. N kɛl dul bwɨlangkɛltɨn nɨɨ nabwɨl Kwaamaɨ gǝ gǝla lɛ a dul nǝb kwamǝn duli.

⁷ Ka kaa jǝl ya dɔ kʊm jen nɛ jǝbɔ ji.

⁸ Galɨgǝn jǝ́ na a mʊgɔ kumtojili. Kǝngkɔ jǝ́ na a mʊgɔ nyalǝm Tɛlalɔɨ. Jǝ́ maa yɨm nǝb nɨ a nyalǝmɨ.

⁹ Jʊ a bwɨɨ nyalǝmɔ nǝn gɔ gǝ bʌ jʊ nɨ lɛ gwam na a nyanɨ, jǝbɔ jʊ nɨ dǝngdǝngɨ, jǝbɔ jʊ nɨ bɨlǝngkɛlɨ.

¹⁰ Jǝ́ mɛla jʊ nɨ fulo Tɛlalɔ gǝm nǝl lɛɨ.

¹¹ Bɛ ka kaa jǝl ya mʊrka jen nɛ jǝbɔ kanjǝl kumtojili. Na gǝ na nyɨɨ, bɛ jǝ́ jǝg bwɨlan jinɔ a talɨ.

¹² N jǝ gunidul ja sʊwa kanjǝl nɨ nǝb bwɨlangkɛlɔ maa lɛ daddadɨ.

¹³ Pʌd jʊ nɨ a jel a nyalǝmɨ, jǝ kuwo gǝn kuwo, jʊ a bwɨɨ n nyalǝm gǝ nʊng jǝl lɛ nyangnyangɨ.

¹⁴ N jʊ a bwɨ ja sʊwa gɔ, “Kǝla, mʊ nʊ nɨ mʊ daa dum lɛɨ. Gun a bwaa. Kiristi nʊng nʊng nyalǝm a dul mʊn.”

¹⁵ Bɛ jǝ́ kɨla yɨm jenɔ. Ka jǝ́ yɨ lɛ yɨm swɛlatǝm. Jǝ́ yɨ yɨm a nǝb yʊlanɨ.

¹⁶ Jǝ́ maa maajɨ nǝn gola nɨ jǝ́ nyaɨ, jʊ a bwɨɨ n kum bwɨlantɨn.

¹⁷ Bɛ ka jǝ́ yǝlam lɛ nǝb swɛlatǝm. Bɛ jǝ́ nyǝm jʊ Tɛlalɔ swɨ lɛɨ.

¹⁸ Ka jǝ́ nɔɔ lɛ bʊgɛ a maa jen, wʊnɨ kal kʊlɨ jenɔ lɛɨ. A laa jǝl jǝ́ yii nǝn Yʊwa.

¹⁹ Bɛ jǝ́ ma nafɨ Zaburaɨ, jǝbɔ nafɨtɨn bǝlátǝm, jǝbɔ nafɨgɔ Yʊwagɔ a nǝ jeni. Bɛ jǝ́ ma nafɨ, jǝ́ bǝlá Tɛlalɔ nǝn nǝl jenɔ gwam.

²⁰ Kwangkwang bɛ ya jǝ́ buu Kwaama Tɛtɛ gǝm kang lɛ a dul kanjǝlɔ gǝm gwam, a mʊgɔ dun Tɛlalɔ bǝn Yesu Kiristii.

Nɔɔtǝm Jǝbɔ Batǝm

²¹ Bɛ jǝ́ nǝbka dul jenɔ a kɛl dul nǝtǝm Kiristii dʊʊn.

²² Jǝ́ nɔɔtǝm naatǝmɔ jǝ́ nǝ batǝlam jenɔ dul jenɔ, kanga jǝ́ maam Tɛlalɔ gǝm lɛɨ.

²³ Jʊ a bwɨɨ balɨ nǝn gɔ a dul nwala gɨɨ, kanga Kiristi nǝn gɔ a dul mʊrkalɨ nǝb bwangtǝm Kwaamaɨ wʊnɨ n bʊtɔ gǝnɨ. Nǝn gɔ n nǝ bʊʊtǝm nǝn mʊrkalɨ nǝb bwangtǝm Kwaamaɨ.

²⁴ Kanga mʊrkalɨ nǝb bwangtǝm Kwaamaɨ a nǝ Kiristi dul gǝnɨ, nɔɔtǝmɔ tʌji ja nǝ batǝlam jinɔ dul jinɔ a kanjǝlɔ gǝm gwam.

²⁵ Jǝ́ batǝmɔ, jǝ́ swɨ nɔɔtǝlam jenɔ kanga Kiristi a swɨ mʊrkalɨ nǝb bwangtǝm Kwaamaɨ, a nǝ dul gǝnɔ a kɛl dul gǝnɨ.

²⁶ A maa nyɔ sǝ a dǝg gǝn sagsag, a gola saaltǝm gǝn nǝn mwɛ sagsag, a mʊgɔ Kɛl Kwaamaɨ,

²⁷ sǝ a do dul gǝnɔ gǝm mʊrkalɨ nǝb bwangtǝm Kwaamaɨ nɨ a bʊm bʊmɨ, mɨ nǝn kʊlan jǝbɔ wʊrmatǝm tɛ bʊtɔ jǝbɔ jǝ bwɨla, a yǝlam sagsag mɨ nǝn jǝ tuwol.

²⁸ A na nyɔ, a yǝlam nyɔ jǝ́ batǝmɔ jǝ́ swɨ nɔɔtǝlam jenɔ kanga jǝ́ swɨm dul jenɔ lɛɨ. Nʊ nɨ swɨ nwala gǝ lɛɨ, gǝ swɨ dul gǝn.

²⁹ Mɨ nʊ nɨ wo kɔ bʊtɔ gǝnɔ lɛɨ. Gǝ ja ja nǝn dul gǝnɔ. A kɨla nǝn gɔ, kanga Kiristi maa mʊrkalɨ nǝb bwangtǝm Kwaamaɨ gǝm lɛɨ,

³⁰ jʊ a bwɨɨ bǝn bǝ jinʌn bʊtɔ gǝn.

³¹ Kanga mʊlalɨgɔ a sʊwa gɔ, “Nǝl bǝla bǝla tɛtɛ gɔ jǝbɔ nɛnɛ gɔ. A mʊrka jǝbɔ nwala gɔ. Ji yo nɨɨ, ja yǝlam bʊtɔgɔ win.”

³² Jʊ nɨ n gʌleng jǝ yʊtǝm. Jʊ mǝ sʊwa kɛl lɛ a dul gǝnɨ, nǝn gɔ nǝn Kiristi jǝbɔ mʊrkalɨ nǝb bwangtǝm Kwaamaɨ.

³³ Bɛ balɨ a swɨ nwala gɔ kanga ga swɨm dul gǝnɨ. Bɛ nɔɔlɨ a nǝ bwɨla gɔ shigtǝm dul.