Afisa 3 - Dadiya NT

Bulus A Kiyo Bʌtʌbɔ Gǝm Kɛl Kwaamaɨ

¹ A dul kɛl nɨ, mǝ Bulus, mǝ bwɛ lɔsomi a kɛl dul Kiristi Yesui, sǝ n tɨka jen jǝ́ Bʌtʌbɔ.

² Mɨ nyǝmatǝm wo jǝ́ nyʊwa fulon kɛlɔ a dǝg ɨ mǝ yǝlam nǝ maajɨ fulon kɛl lǝma nɨ Kwaama a nɨ ɨ a kɛl dul jeni.

³ Kwaama a nʊng ɨ a mʊgɔ dʊgam nyangnyang jʊ nɨ ga yʊ yʊɨ. N kwɛl n mʊla mʊlaɨ nǝn dǝm nyɔ.

⁴ Na nǝn kwama jǝ́ kiyo a wʊnɨɨ, jǝ́ dwal dwal jǝ́ nyǝm nyǝmtǝm mǝndɨ a dul jʊ nɨ Kwaama a yʊ yʊɨ a dul Kiristii,

⁵ a wʊnɨ a yooli nɨ galɨgǝn a sʊwa bɔ nǝfitʌm woi, kanga kǝngkɔ a nʊng bɛtɔ twama sagsagɔ jǝbɔ nǝbkuwotǝmkǝgagɔ a gola Yʊwaɨ.

⁶ Jʊ nɨ ja yʊ yʊɨ gǝ nʊng gɔ Bʌtʌbɔ fatǝm jatǝm kʊla jǝbɔ Yahudawagɔ. Jǝ jinʌn bʊtɔgɔ win. Jǝ fatǝm mʊrkalɨ tag a swatǝm yaa nɨ a mʊgɔ Kiristi Yesui a gola fulon kɛl lǝmɨ nɨɨ.

⁷ N yǝlam bwɛ jwaalɛ a maajɨ kiyotǝm fulon kɛl lǝmɨ nɨ, a dul lǝma nɨ Kwaama a nɨ ɨɨ, a gola kwaan gǝnɨ, kwaan gǝnɔ nɨ maa maajɨ lɛ a bʊtɔ mɨɨ.

⁸ N maa dǝm sul a mʊgɔ tangǝn nǝb bwangtǝm Kwaamaɨ, nǝmǝ a nɨ ɨ lǝma nɨɨ, sǝ n kiyo Bʌtʌbɔ gǝm fulon kɛl lǝmɨ a dul Kiristii, wʊnɨ a shu kwaan kiyotǝmɨ.

⁹ Sǝ n nʊng nǝbɔ gwam fɛkalɨ jǝ yʊtǝm nɨ a wʊnɨ jol jǝbɔ jol Kwaama a yʊ yʊɨ, nʊ nɨ a fwal kanjǝlɔ pʌdi.

¹⁰ Kwaama a maa jʊ nɨ kǝngkɔ sǝ a nʊng yʊlan gǝnɔ nǝn dʌmʌn a daagɔ nʊ nɨ maa fɔlɔn nɛɨ, jǝbɔ nǝblaamɔ a dʌbʌli, a gola mʊrkalɨ nǝb bwangtǝm Kwaamaɨ.

¹¹ Kwaama a maa fɛkalɨ nɨ a gola Kiristi Yesui, Tɛlalɔ bǝn, nǝngɔ la a fwal yooligɨɨ.

¹² N kɛl dul Kiristii jǝbɔ nǝtǝm bɨlǝngkɛl a daa gǝ woi, bǝ mwɨ bǝ bɛ lɛ a daa Kwaama woi, mɨ taal woi.

¹³ A dul kɛl nɨɨ, mǝ kela jen nɛ ka jǝ́ gʊ lɛ nǝn gul a kuwotǝm gaalanɔ mǝ nɔɔ lɛ a kɛl dul jeni. Jʊ nɨ n dʊʊlǝn jen.

Swɨtǝm Kiristii A Daa Bǝn Woi

¹⁴ N dul kɛl nɨ mǝ jʊng a kǝga Tɛtɛɨ mǝ maa kelii,

¹⁵ nʊ nɨ a fwal nǝbɔ gwam a dʌbʌl jǝbɔ tǝmɨ.

¹⁶ N maa keli mǝʊ a mʊgɔ dʊʊlǝn shilo gǝnɔ gǝm bɛ ga sʊ jem kwaan a gola Yʊwa gǝn a nǝl jen,

¹⁷ sǝ Kiristi a yɨ a mʊgɔ nǝl jen a gola nǝtǝm bɨlǝngkɛl. Mǝ maa keli lɛ tag bɛ swɨkanɔ a yǝlam jʊ nɨ jǝ́ ywɔ jʌng jenɔ woi, n daagɔ jǝ́ swa fʌlʌm jenɔ woi.

¹⁸ N maa keli mǝʊ jǝ́ nya kwaan nyǝmtǝm swɨtǝm Kiristii jǝbɔ nǝb sagsagɔ pʌd, tɛɛnatǝm gǝnɔ jǝbɔ somʌn gǝnɔ jǝbɔ debatǝm gǝnɔ, jǝbɔ tushitǝm gǝnɔ.

¹⁹ N maa keli mǝʊ jǝ́ nyǝm swɨtǝm nɨ Kiristi maa bǝm lɛɨ, wʊnɨ a laa laaɨ kwaan nyǝmtǝmɨ, sǝ ja yii jen pʌd nǝn yiitǝm Kwaamaɨ.

²⁰ Bɛ bǝlátǝmɔ a ta tʌgo gwanggwang a nʊ nɨ dwal maa jʊ nɨ lɛ a shu shui kwaan jʊ nɨ bǝ kel lɛɨ, jǝbɔ jʊ nɨ bǝ bʊʊla lɛɨ, a mʊgɔ kwaan gǝnɔ gǝm, wʊnɨ maa maajɨ lɛ a mʊgɔ nǝl bǝnɨ.

²¹ Bɛ dʊʊlǝnɔ a ta tʌgo gwanggwang a daa gǝ woi a mʊgɔ mʊrkalɨ nǝb bwangtǝm Kwaamaɨ, a mʊgɔ Kiristi Yesui, a yɔ nǝn a joltɨnɔ gǝm pʌd mɨ dɨtǝm wo. A daa nyɔ.