Afisa 2 - Dadiya NT

Nyatǝm Kʊlɨ A Daa Kiristi Woi

¹ Galɨgǝn, jǝ́ bʌlʌntɨn a kɛl dul bwɨlantɨn jenɔ jǝbɔ bwɨlangkɛltɨn jenɔ.

² Wʊnɨ galɨgǝn jǝ́ yǝm a mʊgɔ gǝnɨ, jǝ́ bwangtǝn kanjǝl yooli nɨ lɛɨ, jǝ́ bwangtǝn Mamm, nǝ maatǝm fɔlɔn yʊwa, yʊwa nɨ dʊwa nǝl nǝb nɨ lɛ nǝn bǝngɨ lɔl kǝngkɨɨ.

³ Pʌd bǝnɔ galɨgǝn bǝ yɨ a kʊm jin. Bǝ bwangtǝn wɛl kanjǝl bʊtɔ. Bǝ bwangtǝn kanjǝl nɨ bʊtɔgɔ jǝbɔ nǝlɔ swɨ lɛɨ. Bɨlǝngǝn a yɨm bʊtɔ nabwɨl Kwaamaɨ gǝla gǝla a dul bǝn na a tangǝn nǝfitʌmi.

⁴ Kwaama n nǝ jitǝm bʊnǝn, swɨ bǝn nɛ dangǝn.

⁵ A kwama nɨ bǝ bʌlʌntɨn a mʊgɔ bwɨlangkɛl bǝnɔ gǝmɨ, nǝn gɔ a nǝ bǝn kʊlɨ jǝbɔ Kiristii. (N gola lǝma Kwaamaɨ a bʊʊ nǝn bǝnɨ!)

⁶ A gung bǝn a bwaa dakini jǝbɔ Kiristi. A nǝ bǝn daa yɨm jǝbɔ gɔ a dʌbʌl kwama, a mʊgɔ Kiristi Yesui.

⁷ Kwaama a maa jʊ nɨ sǝ joltɨn nɨ bɛ lɛ a kǝgaɨ sǝ a nʊng shilo lǝma gǝnɔ nɨ mɨ dɨtǝm woi jǝbɔ jǝ nya a daa bǝn woi, a mʊgɔ Kiristi Yesui.

⁸ N gola lǝma Kwaamaɨ a bʊʊ nǝn jen a nǝtǝm bɨlǝngkɛlɨ. N ke bɔ kwaan dul jen. N nǝtǝm lǝma a daagɔ Kwaama woi.

⁹ Ke bɔ a kɛl maatǝm maajɨ nyantɨn nɨ jǝ́ maaɨ, kage kaa nǝl a maa lɨyal.

¹⁰ Bǝn bǝ kanjǝl maajɨ Kwaamaɨ. A fwal bǝn a mʊgɔ Kiristi Yesui, sǝ bǝ maa maajɨ nyantɨn nɨ Kwaama a fɛka nǝn tɨkǝga gɔ bǝ maaɨ.

Bǝ Yǝlam Win A Mʊgɔ Kiristii

¹¹ Bɛ jǝ́ bʊʊla, galɨgǝn jǝ́ Bʌtʌb a mʊgɔ bʌlʌng. Nǝb nɨ a biyo mwɛnɨ (wʊnɨ nǝfitʌmɔ gǝ maa lɛ nǝn kangɨ), jǝ jo jen gɔ, “nǝb nɨ a biyo bɔ mwɛnɨ.”

¹² Bɛ jǝ́ bʊʊla galɨgǝn jǝ́ nyǝm bɔ Kiristi. Jǝ́ Bʌtʌb a daagɔ nǝbɔ Israilaɨ. Jǝ́ faabǝm a swatǝm yaa nɨ Kwaama a maa jimi. Jǝ́ yǝm a yooli nɨ mɨ jen nǝn yatǝm nǝl. Mɨ jen nǝn Kwaama.

¹³ A kǝngkǝnɨ a mʊgɔ Kiristi Yesui, jen nɨ galɨgǝn jǝ́ kʊtaɨ, a gʊ jen nǝn dɔɔm a gola tʊʊm Kiristii.

¹⁴ Jʊ a bwɨɨ, Kiristi nǝn gɔ yɨm kwamɨgǝn bǝnɨ, nʊ nɨ a mʊr Yahudawagɔ jǝbɔ Bʌtʌbɔ wini, a kʌbʌm kwalɨ kii nɨ a wʊlaka jii.

¹⁵ A kalǝm diil Musaɨ jǝbɔ borang gǝnɔ a gola nǝtǝm bʊtɔ gǝn. A maa nyɔ sǝ a mʊr dʊʊm nɨ yoi, Yahudawagɔ jǝbɔ Bʌtʌbɔ a daa gǝ woi ja yǝlam win. A maa nyɔ sǝ a bɛ nǝn yɨm kwamɨgǝn a kʊm jin.

¹⁶ A dɔ kʊm dʊʊm nɨ yoi tag. A mʊrka ji jǝbɔ Kwaama. Ja yǝlam bʊtɔgɔ win a gola kʊʊtǝm a tɨya. A gola nɨɨ, a kalǝm kii nɨ a wʊlaka jii.

¹⁷ A bɛ ba kiyo fulon kɛl yɨm kwamɨgǝn a daa jen woi, jǝ́ nǝb nɨ jǝ́ kʊta a daa Kwaama woi. Nǝn gɔ a kiyo fulon kɛl yɨm kwamɨgǝnɔ tag a nǝb nɨ nǝn dɔɔmɨ.

¹⁸ N daa gǝ woi gwam bǝnɔ yo bǝ nya bɛtǝm a daagɔ Tɛtɛ woi a gola Yʊwagɔ wini.

¹⁹ Kǝngkɔ jǝ́ ke bɔ faabǝm. Jǝ́ ke bɔ Bʌtʌb. Jǝ́ nǝb yɨm dul jǝbɔ nǝb sagsagɔ. Jǝ́ nǝbɔ lɔ Kwaamaɨ.

²⁰ Jǝ́ nǝb nɨ ja mɔ a dʌbʌl fʌlʌm bɛtɔ twamagɨɨ jǝbɔ a nǝbkuwotǝmkǝgagɨɨ. Kiristi Yesu nǝn dul gǝn nǝn gɔ tɛl fʌlʌm kanɨ.

²¹ N daa gǝ woi mɔtǝmɔ a mʊrka dakinii. Nǝn gɔ gǝ dǝg mɔtǝmɔ lɛ a ja kǝga ya gun nɛɨ, ba yǝlam Kan Kwaaman sagsag a Tɛlalɔɨ.

²² N daa gǝ woi tag ja mɔ jen dakini jǝbɔ tangǝnɨ sǝ jǝ́ yǝlam daa yɨm Kwaamaɨ a gola Yʊwa gǝn.