Maajɨ Bɛtɔ Twamagɨɨ 9 - Dadiya NT

Shawulu A Yǝlam Nǝ Bwangtǝm Yesui

¹ Shawulu a ja kǝga nǝn nǝtǝm nǝb bwangtǝm Tɛlalɔɨ gaalan dangǝn, sʊwa lɛ gɔ gǝ jʌ ji jʌ. Nǝngɔ a yɔ a daa dalɨ nǝkǝlagɔ woi,

² a kela gǝn gɔ a nǝ gǝn langǝn bwangǝntɨnɔ gǝ yɔ nǝn a kantɨn mɛlalɨ a Dimaska, na gǝ nya nǝb nɨ bwangtǝn gola Tɛlalɔɨ lɛɨ, batǝm jǝbɔ nɔɔtǝm sǝ gǝ bwaba ji gǝ bɛ nǝn a Urushalima.

³ A mʊgɔ yɔm gǝnɔ gǝm ya dwama Dimaska lɛɨ, kaa nyalǝm a dʌbʌl kwama beta lɛ a kangǝm gǝn.

⁴ Nǝngɔ a yal a tǝmɨ. A nyʊwa kaa diil sʊwa gǝn nɛ gɔ, “Shawulu! Shawulu! Wɛ a bwɨ mʊ nɨ ɨ gaalan nɛɨ?”

⁵ Nǝngɔ gǝ tǝgǝn a sʊwa gǝn gɔ, “Mʊ nǝn nuwo, Tɛlalɔ?” Nǝngɔ diilɔ a jǝla gɔ, “Nǝmǝ mǝ Yesu wʊnɨ mʊ nǝ gǝn gaalan nɛɨ.

⁶ Gun dɔ mʊgɔ tuulɔngɔ. Jǝ sʊwa ń sʊwa ń jʊ mʊ maa lɛɨ.”

⁷ Fatǝm yɔm gǝnɔ shig, ja gar bɔ kɛl. Jǝ nyʊwa diilɔ lɛ, ja kuwo bɔ kaa nǝl.

⁸ Nǝngɔ Shawulu a gun a tǝmɨɨ, a wum nu gǝnɔ, a kuwo bɔ daa. Nǝngɔ ja ta gǝm kang ja bɛ nǝn gɔ a Dimaskaɨ.

⁹ A maa kumɔ taal mɨ kuwo lɛ, mɨ ja lɛ, mɨ nɔɔ lɛ tag.

¹⁰ Kaa nǝ bwangtǝm wo a Dimaska, dun gǝnɔ nǝn Hananiya. Tɛlalɔ a sʊwa gǝn kɛl a mʊgɔ dʊgam nyangnyang gɔ, “Hananiya!” Gǝ tǝgǝn a jǝla gɔ, “Mǝ wɔ, Tɛlalɔ.”

¹¹ Nǝngɔ Tɛlalɔ a sʊwa gǝn gɔ, “Gun yɔ a gola nɨ jǝ jo lɛ gɔ Sɨnɨ. Yɔ a lɔ Yahuzaɨ, ń bʌ kaa balɨ bwɛ Tarsus wo, dunɔ nǝn Shawulu. Maa keli lɛ a daa gɔ.

¹² A mʊgɔ dʊgam nyangnyang a kuwo kaa balɨ dunɔ nǝn Hananiya, a dɔ, a ya gǝm kang bwili sǝ ga yǝla ya ga kuwo daagɔ lɛ.”

¹³ Nǝngɔ Hananiya a jǝla gǝn gɔ, “Tɛlalɔ, n nyʊwa fulon kɛl balɨ nɨ a daa nǝbɔ woi a gǝlala, a kɛl shil nɨ maa nǝb bwangtǝm mʊnɔ gǝm lɛ a Urushalimaɨ.

¹⁴ Wɔ tag dʊʊm nǝbkǝlamɔ a nǝ gǝn fɔlɔn tatǝm nǝb nɨ gwam maa keli lɛ nǝn dun mʊnɨ.”

¹⁵ Nǝngɔ Tɛlalɔ a sʊwa gǝn gɔ, “Mɔ, yɔ! N nʊ nɨ mǝ jǝgǝm jǝgǝmɨ sǝ a maa maajɨ mǝndɨ, sǝ a sʊwa fulon dun mǝndɨ a daagɔ Bʌtʌbɔ woi, jǝbɔ fɔlɔlɔm jini, jǝbɔ nǝbɔ Israilaɨ.

¹⁶ Mǝ nǝn kang mɨ, mǝ nʊng gǝn nʊng gaalanɔ gǝ nɔɔ lɛ a kɛl dun mɨɨ.”

¹⁷ Nǝngɔ Hananiya a yɔɨ, a dɔ lɔgɨɨ. A ya gǝm kang a sʊwa gɔ, “Kɨla mɨ Shawulu, nǝn Tɛlalɔ a twam ɨ, wʊnɨ nǝn Yesu nʊ nɨ a tǝga ń a gola nɨ mʊ bwangtǝnɨ. Swɨ lɛ ń yǝla ń kuwo daa, sǝ ja yii ń nǝn Yʊwa Kwaamaɨ.”

¹⁸ Tʌgo a kang nǝngɔ kaa jǝl na wʊlang a gǝla a nu Shawului a yalɨ, nǝngɔ la kuwo daagɔ lɛɨ. A gun ja yʊ gǝn mwɛ sagsagɨɨ.

¹⁹ Nǝngɔ a ja jǝjalǝnɨ, a yǝla a nya kwaan gǝnɨ. Shawulu a maa kumtɨn jǝbɔ nǝb bwangtǝm Kwaamaɨ a Dimaska.

Shawulu A Kiyo Kɛl Kwaamaɨ A Dimaska

²⁰ A kʊta bɔ, Shawulu a tǝl sʊwatǝm kɛl Yesui a kantɨn mɛlalɨ Yahudawagɨɨ sʊwa lɛ gɔ, “Yesu nǝn gɔ nǝn Bʊla Kwaamaɨ.”

²¹ Nǝb nɨ gwam a nyʊwa gǝnɨ, ja ta kang a nyiyo. Jǝ sʊwa lɛ gɔ, “Wʊnɨ, ke bɔ nʊ a jʌbo, a kwɨ nǝb nɨ maa keli lɛ nǝn dun nɨ a Urushalimaɨ ka? Kɛna a bɛ fɔ sǝ a bwaba ji, sǝ a yɔ nǝn ji a daagɔ dʊʊm nǝbkǝlamɔ woi?”

²² Shawulu a sʊtǝn nyatǝm kwaanɔ. Gung nǝl Yahudawa nɨ lɛ jǝ yǝm a Dimaskaɨ. Sʊwa ji lɛ yǝlɨgǝn gɔ, Yesu nǝn gɔ nǝn Kiristii.

Shawulu A Bʊʊ Yahudawagɔ Gǝm

²³ Kumtɨnɔ a gǝlala, nǝngɔ Yahudawagɔ a fwam sǝ jǝ jʌ Shawului.

²⁴ Shawulu tǝgǝn a nyʊwa fɛkalɨ bwɨla jinɔ. Kum jǝbɔ kɔkɔ jǝ dʌng nyanga tuulɔ jinɔ lɛ sǝ jǝ jʌ gǝn.

²⁵ Nǝngɔ bɛtɔ mɛlalɨ gǝnɔ a do gǝn nǝn kum a mʊgɔ dalɨ tuni, ja shig gǝn a kaa du kwalɨ.

Shawulu A Yǝla A Urushalima

²⁶ Kwama Shawulu a yǝla a Urushalimaɨ, a maa kanga gǝ dɔ mʊgɔ nǝb bwangtǝmɔ lɛɨ, ji tʌji jǝ nyʊwa taal gǝnɔ lɛ, jʊ a bwɨɨ, ja jǝla bɔ gɔ gǝ bwɛ mɛlalɨ.

²⁷ Nǝngɔ Barnaba a do gǝn a bɛ nǝn a daagɔ bɛtɔ twamagɔ woi. A sʊwa ji kanga Shawulu a kuwom Tɛlalɔ a golaɨ, jǝbɔ kanga Tɛlalɔ a sʊwa gǝn kɛlɨ, jǝbɔ kanga Shawulu a kiyo kɛl Yesui a Dimaskaɨ, mɨ taal woi.

²⁸ Nǝngɔ la Shawulu dɔ lɛ, jel lɛ jǝbɔ ji a Urushalimaɨ, kiyo kɛlɔ lɛ nǝn dun Tɛlalɔɨ mɨ taal wo.

²⁹ Kiyo kɛlɔ lɛ jǝbɔ Yahudawa nɨ nyʊwa nyiyo Girikagɔ lɛɨ, bǝngka lɛ jǝbɔ ji. Nǝngɔ la jǝ saa gola nɨ lɛ jǝ jʌm gǝn nɛɨ.

³⁰ Kambɔ a nyǝm nyɨɨ, nǝngɔ ja yɔ nǝn gɔ a tuulɔ Kaisarɨ, ja tʊng gǝn a tuulɔ Tarsusi.

³¹ Nǝngɔ la mʊrkalɨ nǝb bwangtǝm Kwaamaɨ nɨ a Yahudiyaɨ, jǝbɔ Galilii, jǝbɔ Samariyaɨ, ja nya lǝma yɨmɔ, ja nya kwaan ja ja kǝga dangǝn, jǝ yɔ lɛ nǝn maajɨ jinɔ jǝ dʊʊl Tɛlalɔ lɛ, Yʊwa Kwaamaɨ tɨka ji lɛ, jǝ bwi lɛ.

Bitrus A Gung Iniyasu

³² Bitrus a kɛla tǝmgɔ gwamɨ, nǝngɔ la a yɔ a daa nǝb bwangtǝm Kwaamaɨ nɨ yǝm a tuulɔ Liddaɨ.

³³ Nǝngɔ a tǝga kaa nǝl dunɔ nǝn Iniyasu, wʊnɨ daam jolɔ naalǝbɨ, jʊ a bwɨɨ a swam swamɨ.

³⁴ Nǝngɔ Bitrus a sʊwa gǝn gɔ, “Iniyasu, Yesu Kiristi a gung ń. Gun, kʊlʊm daa daalǝng mʊnɔ.” Tʌgo a kang Iniyasu a gun.

³⁵ Gwam nǝbɔ a tuulɔ Liddaɨ jǝbɔ Saronaɨ ja kuwo gǝn a guni, nǝngɔ ja yǝla a daagɔ Tɛlalɔ woi.

Bitrus A Gung Tabita A Bwaa

³⁶ Kaa nɔɔlɨ nǝ bwangtǝm Kwaamaɨ wo a Yafa dunɔ nǝn Tabita, (wʊnɨ win jǝbɔ Dokasɨ). Nɔɔlɨ nɨ gǝ maa nǝbɔ gǝm jǝ nyan, jǝbɔ maatǝm tɨkalɨ nǝb bʊnǝnɨ.

³⁷ A kumtɨn gɔ a daa bɔɔla a bʊla. Ja yʊ gǝn mwɛmɨ, nǝngɔ ja ya bʌlʌn gǝnɔ a kan dʌbʌli.

³⁸ Liddagɔ a kɔtʌgo a Yafa, nǝb bwangtǝm Kwaamaɨ ja nyʊwa gɔ Bitrus gǝ na a Liddaɨ, nǝngɔ ja twam nǝbɔ yo a daa gǝ woi. Ja kela gǝn gɔ ga bɛ a daa ji woi dǝbǝr.

³⁹ Nǝngɔ Bitrus a gun a shu jǝbɔ jii. Kwama a bɛmɨ, nǝngɔ ja yɔ nǝn gɔ a kan dʌbʌlɔ gǝmɨ. Nɔɔtǝmkʊlabɔ gwam, ja tɨ a kɔtʌgo a gǝ gǝm jǝ ji lɛ. Jǝ nʊng bɛllɛtɨnɔ lɛ jǝbɔ dwangtɨn nɨ Dokas a sʊʊl jim kwama yǝm dakini jǝbɔ jii.

⁴⁰ Nǝngɔ Bitrus a jǝg ji gwam a yoolii, a jʊng a maa keligɨɨ. A yǝla a daagɔ bʌlʌnɔ woi, a sʊwa gɔ, “Tabita, gun.” Nǝngɔ a wum nu gǝnɨ. A kuwo Bitrusi, nǝngɔ a gun a yɨ yɨɨ.

⁴¹ Nǝngɔ Bitrus a mal kang a tɨka gǝn a guni. Nǝngɔ a jo nǝb bwangtǝm Kwaamaɨ jǝbɔ nɔɔtǝmkʊlabɔ, a nǝ ji gɔ nǝn dʊʊmɨɨ.

⁴² Fulon kɛl nɨ ja sʊwa a mʊgɔ Yafa gwam. Nǝbɔ a lada ja nǝ bɨlǝngkɛl a daa Tɛlalɔ woi.

⁴³ Bitrus a maa kumtɨnɔ a gǝlala a Yafa, jǝbɔ kaa balɨ wʊnɨ sʊn tɛ yʊwaltɨn nɛɨ, dunɔ nǝn Saminu.