Maajɨ Bɛtɔ Twamagɨɨ 8 - Dadiya NT

¹ Shawulu a jǝla nǝn jʌtǝmɔ ja maa Istifanus gǝmɨ. Nǝn kum gɔ, gʌleng gaalanɔ a gun a mʊrkalɨ nǝb bwangtǝm Kwaamaɨ nɨ gǝm a Urushalimaɨ. Nǝb bwangtǝmɔ a kwɨya nǝn kwan a Yahudiya jǝbɔ Samariya. A bǝlam ka bɛtɔ twama a Urushalima.

Gaalanɔ A Kwɨ Nǝb Bwangtǝmɔ Win Win

² Kaam nǝb bwangtǝm Kwaamaɨ ba fʌl Istifanus. Ja ji wi bwaa gǝnɔ dangǝn.

³ Shawulu a kʊwa a yɨ mʊrkalɨ nǝb bwangtǝm Kwaamaɨ gǝm. Nǝ ji gaalan nɛ nǝn bɨlǝngǝn, bwangtǝn nɛ lɔ jǝbɔ tuulɔ, taba batǝmɔ lɛ jǝbɔ nɔɔtǝmɔ, dǝg ji lɛ a lɔsomi.

Filibus A Sʊwa Fulon Kɛl Lǝmɨgɔ A Samariya

⁴ Nǝb nɨ a mwal a bǝla Urushalimagɨɨ, jǝ kɛla lɛ, jǝ sʊwa fulon kɛl lǝmɨgɔ lɛ.

⁵ Filibus a shu a kaa tuulɔ a Samariya sʊwa ji fulon kɛl lǝmɨ Kiristii lɛ.

⁶ Nǝn kwama nǝbɔ a nyʊwa Filibusi, ja kuwo kanjǝl laatǝm kang nɨ gǝ maa lɛɨ, nǝngɔ ja jǝla nǝn gǝ nǝlɔ win nǝn jʊ ga sʊwaɨ.

⁷ Nǝblaamɔ jela lɛ nǝn wi a bʊtɔ nǝbɨɨ a lada. Nǝbɔ a lada a swam swamɨ, jǝbɔ nǝbɔ bʊtɔgɔ a gɨya gɨyaɨ, ja nya gungtǝm.

⁸ Ja maa fulotǝm nǝl a lada a tuulɔ gɔ.

⁹ Kaa nǝl wo dunɔ nǝn Saminu, n nǝ dʊwatǝm mwɛ a tuulɔ gɔ. Maa nǝbɔ Samariyaɨ gǝm jǝ laatǝm kang lɛ. Nʊng dul gǝnɔ lɛ gɔ gǝ kaa gʌleng dalɨ dʊʊ.

¹⁰ Nǝbɔ gǝ dʌng gɔ, dʊʊm jǝbɔ bɛtɔ, jǝ sʊwa lɛ gɔ, “Balɨ nɨ, n kwaan Kwaamaɨ nǝnɨ, wʊnɨ jǝ jo lɛ gɔ, Gʌleng Kwaan Kwaamaɨ.”

¹¹ Jǝ nyʊwa gǝn nɛ dangǝn, jʊ a bwɨɨ a kʊta na maa jǝ laatǝm kang lɛ nǝn kanjǝl feyi gǝnɨ.

¹² Nǝn kwama ja nyʊwam fulon kɛl lǝmɨ nɨ Filibus a sʊwa ji a dul fɔlɔn lɔ Kwaamaɨ jǝbɔ dun Yesu Kiristii, nǝngɔ gwam jinɔ ja yʊ ji mwɛ sagsagɨɨ, batǝm jǝbɔ nɔɔtǝm.

¹³ Saminu nǝn kang gǝn a nǝ bɨlǝngkɛl, ja yʊ gǝn mwɛ sagsagɔ. Nǝngɔ a mʊrka dul jǝbɔ Filibusi. A kuwo Filibus maa daltɔ kanjǝl laatǝm kang lɛɨ, nǝngɔ a ta kang a nyiyoi.

¹⁴ Nǝn kwama bɛtɔ twama nɨ a Urushalimaɨ a nyʊwa nǝbɔ Samariyaɨ a yo kɛl Kwaamaɨ, nǝngɔ ja twam jim Bitrus jǝbɔ Yohanaɨ.

¹⁵ Nǝngɔ ja yɔ ya ja maa jim keli sǝ ja yo Yʊwa Kwaamaɨ.

¹⁶ Jʊ a bwɨɨ, Yʊwa Kwaamaɨ lǝga bɔ a gǝla kaa nǝl gǝm wo dɨn. Jʊ a bwɨɨ ja yʊ ji ka mwɛ sagsag a mʊgɔ dun Tɛlalɔ Yesui.

¹⁷ Nǝngɔ Bitrus jǝbɔ Yohana ja ya jim kangɨ, nǝngɔ ja yo Yʊwa Kwaamaɨ.

¹⁸ Saminu a kuwo n yatǝm kang bɛtɔ twamagɨɨ nǝbɔ a nya Yʊwa Kwaamaɨ, nǝngɔ a nǝ ji kemʌnɔ a sʊwa ji gɔ,

¹⁹ “Mǝ tǝmɨ jǝ́ nɨ ɨ fɔlɔn nɨɨ, na nʊ mǝ ya gǝm kangɨ sǝ a nya Yʊwa Kwaamaɨ.”

²⁰ Nǝngɔ Bitrus a sʊwa gǝn gɔ, “Mɔ jǝbɔ kemʌn mʊnɔ bɛ jǝ́ bʊla, na mʊ kuwo lɛ n kemʌn mʊnɔ mʊ nya nǝtǝm lǝma Kwaamaɨ lɛɨ!

²¹ Mɨ mwɛ mʊn wo a jʊ nɨ gǝm, jʊ a bwɨɨ, nǝl mʊnɔ mɨ dǝngdǝng a kǝga Kwaamaɨ.

²² Bɛ ń yǝla ń bǝla bwɨlangkɛl mʊnɔ a maajɨ bwɨla nɨ gǝm. Bɛ ń kela Tɛlalɔ sǝ a kǝlǝm mʊn jʊ mʊ fɛka lɛ a mʊgɔ nǝl mʊnɨ.

²³ N kuwo nǝl mʊnɔ a yii nǝn nungon, ń yǝlam jwaalɛ bwɨlangkɛlɨ.”

²⁴ Nǝngɔ Saminu a jǝla ji gɔ, “Jǝ́ kela mɨ Tɛlalɔ, ka kaa jǝl win a mʊgɔ kanjǝl nɨ jǝ́ sʊwaɨ, a bwɨ nǝn mǝ.”

²⁵ Nǝn kwama Bitrus jǝbɔ Yohana ja nǝ nyiyo a dul Yesui, jǝbɔ kiyotǝm fulon kɛl lǝmɨ Tɛlalɔɨ, nǝngɔ ja yǝla a Urushalimaɨ. Nǝn kwama jǝ yǝlam lɛ a Urushalimaɨ, nǝngɔ jǝ sʊwa fulon kɛl lǝmɨgɔ lɛ a bɛl tuulɔtɨn nɨ a tǝm Samariya a lada nyɨɨ.

Filibus Jǝbɔ Bwɛ Itiyofiyagɔ (Habasha)

²⁶ Nǝngɔ kaa bwɛ twama Tɛlalɔɨ a sʊwa Filibus gɔ, “Gun yɔ a gwanga tǝbangɨ. Bɛ ń bwangtǝn gola nɨ a jel a Urushalimaɨ, a shu a Gazaɨ.” A gola kuul tǝm.

²⁷ Nǝngɔ a gun a shui. Nǝngɔ a tǝga kaa bwɛ tǝm Itiyofiyaɨ wɔ, wʊnɨ ja sʊ sʊɨ. N nǝ dʊʊ a fɔlɔn Kandakatu, nɔɔfɔlɔ Itiyofiyaɨ. Nǝn gǝ nǝ tatǝm kemʌn nɔɔfɔlɔ nɨɨ. A bɛ a Urushalima sǝ ba maa bǝlátǝm Kwaamaɨ.

²⁸ Nǝn kwama a yǝla shu lɛ a lɔ a mʊgɔ kʌntʌlʌn tʊwa gǝnɨ, nǝngɔ a wum langǝn bwangǝn nǝkuwotǝmkǝga Ishayaɨ kiyo lɛɨ.

²⁹ Nǝngɔ Yʊwa Kwaamaɨ a sʊwa Filibus gɔ, “Yɔ bɨtʌgo a kʌntʌlʌn tʊwa kemʌn nɨ gǝm.”

³⁰ Nǝngɔ Filibus a mwal a yɔ a daa gǝ woi, a nyʊwa gǝn kiyo langǝn bwangǝn nǝkuwotǝmkǝga Ishayaɨ lɛɨ. Nǝngɔ Filibus a bʌ gǝn gɔ, “Ń nyǝm jʊ nɨ mʊ kiyo lɛɨ ka?”

³¹ Nǝngɔ a jǝla gǝn gɔ, “A fee jo, na kaa nǝl a nʊng ɨ bɨɨ!” Nǝngɔ a jo Filibus gɔ a gwi kʌntʌlʌn tʊwa kemʌn gǝnɔ a yɨ jǝbɔ gɨɨ.

³² Jʊ nɨ nǝn gǝ mʊlalɨ kɛl Kwaamaɨ nʊ nɨ ja sʊ sʊɨ kiyo lɛɨ gɔ, “Na kwamɨ ja yɔ nǝn gɔ a daa biyotǝmɨ, na bɛ gal yɨm shig a daa nǝ bʊtɨtǝm yitʌn gǝnɔ woi, a na nyɔ, a wum bɔ nyiyo gǝnɔ.

³³ Ja nǝ gǝn gunidul. Ja gar gǝm bɔ borang nyan. Nuwo dwal kiyo kɛl dʊʊm gǝnɔ lɛɨ? Jʊ a bwɨɨ ja dem kʊlɨ gǝnɔ a yooli nɨ.”

³⁴ Nǝngɔ nʊ nɨ ja sʊ sʊɨ a bʌ Filibus gɔ, “Nǝkuwotǝmkǝga nɨ gǝ sʊwa kɛl nɨ a dul woi? Gǝ sʊwa a dul gǝn ka? Gǝ sʊwa a dul kaa nǝlɨ ka?”

³⁵ Nǝngɔ Filibus a tǝl kiyo gǝm mʊlalɨgɔ lɛ a mʊgɔ langǝn bwangǝn Kwaamaɨ, a sʊwa gǝn fulon kɛl lǝmɨgɔ a dul Yesui.

³⁶ Ji a mʊgɔ yɔmɨ, nǝngɔ ya ja la kaa daa mwɛɨ. Nǝngɔ nʊ nɨ ja sʊ sʊɨ gɔ, “Dʌng mwɛmɔ wɔ. N wɛ a bwɨ mɨsɔ mʊ yʊ ɨ mwɛ sagsagɔ lɛɨ?” [

³⁷ Filibus a sʊwa gɔ, “Na ń nǝ bɨlǝngkɛl nǝlɔ wini, jǝ maa mʊn maa.” Nʊ nɨ ja sʊ sʊɨ a jǝla gɔ, “N nǝ bɨlǝngkɛl mǝʊ Yesu Kiristi nǝn bʊla Kwaamaɨ.”]

³⁸ Nǝngɔ a sʊwa nǝbam gǝnɔ gɔ ja tɨ nǝn tʊwatɨn nɨ gʊ kʌntʌlʌn tʊwa kemʌnɔ lɛɨ. Nǝngɔ ja gǝla ja yɔ ya ja dɔ mʊgɔ mwɛ nɨɨ. Nǝngɔ Filibus a yʊ nʊ nɨ ja sʊ sʊɨ mwɛ sagsagɨɨ.

³⁹ Nǝn kwama ja jelʌm a mʊgɔ mwɛɨ, nǝngɔ Yʊwa Tɛlalɔɨ a dem Filibusi. Nʊ nɨ ja sʊ sʊɨ a kuwo gǝn bɔ tag. Nǝngɔ nʊ nɨ a yɔ yɔm gǝnɔ a mʊgɔ fulotǝm nǝlɨ.

⁴⁰ Filibus a nya dul gǝnɔ a tuulɔ Azotus. Nǝngɔ a kɛla tuulɔtɨnɔ gwamɨ, sʊwa ji fulon kɛl lǝmɨ nɨ lɛ, ba la nǝn a tuulɔ Kaisarɨ.