Maajɨ Bɛtɔ Twamagɨɨ 7 - Dadiya NT

Kɛl Istifanusi

¹ Nǝngɔ dalɨ nǝkǝlagɔ a bʌ Istifanus gɔ, “Kanjǝl nɨ n bɨlǝngkɛl ka?”

² Nǝngɔ Istifanus a sʊwa ji gɔ, “Jǝ́ kɛtǝlam mǝndɨ jǝbɔ tɛtǝlam mɨɨ, jǝ́ nyʊwa ɨ. Kwaama nǝ dʊʊlǝnɔ a nʊng dul gǝnɔ a daa tʊga bǝn Ibrahim woi, nǝn kwama nɨ gɔ a tǝm Bagadazaɨ, nǝn kwama gɔ lǝga bɔ ga yɨ a Haranɨ.

³ Kwaama a sʊwa gǝn gɔ, ‘Gun a tǝm jen, ń bǝla nanǝgam mʊnɔ, sǝ ń yɔ a tǝm nɨ mǝ nʊng ń nɛɨ.’

⁴ “Nǝngɔ tʊga bǝn a gun a tǝm nǝbɔ Kaldiyaɨ ba yɨ a Haranɨ. Nǝn kwama tɛtɛ gɔ a bʊlamɨ, nǝngɔ Kwaama a bɛ nǝn gɔ a tǝm nɨ jǝ́ yǝm wo kǝngkɨɨ.

⁵ Kwaama a nǝ bɔ Ibrahim kʊla a tǝm gɔ. A nǝ gǝn bɔ fatǝm naagɔ win. Kwaama a maa gǝm swatǝm yaa gɔ, tǝm nɨ yǝlam a gɔ jǝbɔ guu nǝb nɨ bwang gǝm lɛɨ. Nǝn kwama gɔ, mɨ nǝn bwɛ.

⁶ Nǝngɔ Kwaama a sʊwa gɔ dʊʊm Ibrahimi yǝlam yǝlam faabǝm a kaa tǝm. Nǝbɔ dǝg ji dǝg ja yǝlam jwaalɛb. Ja nǝ ji gaalan nɨ la lɛ jolɔ fʊlkʊb naalɨ.

⁷ Kwaama a sʊwa gɔ, ‘Mǝ mwɛ mwɛ tǝm nɨ jǝ yǝlam jwaalɛb jin nɛɨ. A gulɔ gǝm jǝ jel jel ja maa mɨ bǝlátǝm a daa nɨ.’

⁸ Nǝngɔ Kwaama a maa Ibrahim gǝm swatǝm yaa a dul biyotǝm mwɛnɨ. N dul kɛl nɨ nǝn kwama Ibrahim a bʌm Ishakui, nǝngɔ a biyo gǝm mwɛnɔ a kumɔ a yiim naalǝbɨ. Ishaku nǝn gɔ a bʌ Yakubui. Yakubu nǝn gɔ tag a bʌ tʊgalam bǝnɔ nɨ kʊb jeli yoi.

⁹ “Tʊgalam nɨ maa nungon nɛ jǝbɔ kɨla ji Yusufu. Nǝngɔ ja miyo gǝnɨ, nǝngɔ nǝb nɨ a ten gǝnɨ, a shu nǝn gɔ a Masarɨ. Kanjǝl nɨ a bwɨ nyɔ sul, Kwaama dakini jǝbɔ gɔ.

¹⁰ Nǝngɔ a jǝg gǝn a mʊgɔ gaalan gǝnɔ gǝm pʌdi. A nǝ gǝn lǝma nǝl jǝbɔ nyǝmtǝm a kǝga Firaunaɨ, Fɔlɔ Masarɨ. Nǝngɔ Firauna a dǝg gǝn a yǝlam gwamna nǝb tǝmgɨɨ gwamɨ. Nǝngɔ a dǝg nǝb lɔ gǝnɔ a kang gǝn pʌdi.

¹¹ “Nǝngɔ kaa jʊwan bwɨla a shig a tǝm Masar jǝbɔ Kananaɨ, jǝbɔ gʌleng gaalan bwɨla. Tʊgalam bǝnɔ mɨ nǝn jǝjalǝn.

¹² Nǝn kwama Yakubu a nyʊwa gɔ jaamɔ wo a tǝm Masarɨ, nǝngɔ a twam tʊgalam bǝnɔ a yɔm tɨkǝgagɨɨ.

¹³ A yɔm jinɔ na yogɔ, Yusufu a nʊng dul gǝnɔ a daa kɛtǝlam gǝnɔ woi. Firauna ba nyǝm gɔ nǝb nɨ n kɛtǝlam Yusufui.

¹⁴ Nǝngɔ Yusufu a twam tɨya gɔ Yakubu gǝm gɔ a bɛ jǝbɔ nǝbam gǝnɔ pʌdi. Gwam jinɔ ja la nǝbɔ fʊltǝnʌbʌl jeli nʊ.

¹⁵ Nǝngɔ Yakubu a shu a Masarɨ. A bʊla wo jǝbɔ tʊgalam bǝnɔ.

¹⁶ Nǝngɔ ja wɔɔ bʌlʌn jinɔ ja shu nǝn a tuulɔ Shekemi, ya ja fʌl ji a tuu Ibrahimi wʊnɨ a ten nǝn kemʌni a daagɔ bɛtɔ lɔ Hamori a Shekemi.

¹⁷ “Nǝn kwama swatǝm yaa nɨ Kwaama a maa Ibrahim gǝm a dwamaɨ, nǝbɔ a sɔ a lada a tǝm Masar.

¹⁸ Nǝngɔ kaa fɔlɔ a tǝm Masar wʊnɨ a nyǝm bɔ gɔ nuwo nyɨ nǝn Yusufui, maa fɔlɔn nɛɨ.

¹⁹ Fɔlɔ nɨ a wul nǝbam bǝnɔ. A nǝ tʊgalam bǝnɔ gaalan. A dǝg gɔ ja tǝlam bɛtɔ fetʌn jinɔ, kage ja bʊʊ.

²⁰ “Nǝngɔ kwama gɔ ja bʌm Musaɨ, bwɛ nɨ a bʊm dangǝn a kǝga Kwaamaɨ. Ja bwa gǝn bwaala taal a lɔ tɛtɛ gɨɨ.

²¹ Nǝn kwama ja yam gǝn a tiyoi, nǝngɔ bwɛnɔɔlɨ Firaunaɨ a do gǝn, a bwa gǝn na bʊla gɨɨ.

²² Nǝngɔ ja mɛla Musa gǝm nyǝmtǝm nǝbɔ Masarɨ. A yǝlam nǝ sʊwatǝm kɛl jǝbɔ maajɨ nǝn fɔlɔn.

²³ “Nǝn kwama a lam jolɔ fʊltǝnaalɨ, nǝngɔ a maa bʊʊlalɨ gɔ gǝ yɔ yɔ yɔm fɔla a daa kɛtǝlam gǝnɔ nǝbɔ Israilaɨ woi.

²⁴ Nǝn kwama a kuwo kaa bwɛ Masarɨ nyʊwa kaa bwɛ Israila gǝm lɛɨ, nǝngɔ a tɨka gǝnɨ. A bʊg bwɛ Masar nɨ, a jʌ.

²⁵ A bʊʊla gɔ kɛna nǝbam gǝnɔ nyǝm nyǝm gɔ Kwaama dǝg gǝn dǝg gǝ jǝg ji sul, ja nyǝm bɔ.

²⁶ Nǝn tǝmsɛlɨɨ, kaamɨ tag maa kɨlan nɛ. Nǝngɔ a saa sǝ gǝ dɔ kʊm jini. A sʊwa ji gɔ, ‘Jǝ́ lɔ kɛ. N wɛ a bwɨ jǝ́ nǝbka gaalan nɛɨ?’

²⁷ “Nǝngɔ nʊ nɨ nyʊwa kɨla gɔ gǝm lɛɨ, a tʊng Musa a kelii. A sʊwa gɔ, ‘Nuwo a dǝg ń gɔ ń yǝlam nǝ dʊʊ jǝbɔ nǝ mwatɨtǝm borang a kʊm nǝnɨ?

²⁸ Mʊ swɨ lɛ ń jʌ i kanga mʊn jʌm bwɛ Masar nɨ dʊgalǝnɨ ka?’

²⁹ Nǝn kwama Musa a nyʊwam kɛl nɨɨ, nǝngɔ a mwal a shu ya yɨ yɨm faabǝn a tǝm Madayanaɨ. N daagɔ a bʌm bɛtɔ batǝnɔ wo yoi.

³⁰ “Nǝn kwama jolɔ fʊltǝnaal a shui, kaa bwɛ twama Kwaamaɨ a nʊng dul gǝnɔ a daa Musa woi a ben kǝla wʊnɨ twɨ lɛ a kaa kʊm tɨyaɨ, a kuul Yem Sinaii.

³¹ Musa a kuwo nyɨɨ, a ta kang a nyiyo nǝn jʊ nɨ gǝ kuwoi. A bɛ nǝn dɔɔm gɔ sǝ ba gǝ dʌngi, nǝngɔ a nyʊwa diil Tɛlalɔɨ a sʊwa gɔ,

³² ‘Nǝmǝ mǝ Kwaama tʊgalam mʊnɨ, jǝbɔ Kwaama Ibrahimi, jǝbɔ a Ishakui, jǝbɔ a Yakubui.’ Nǝngɔ bʊtɔ Musaɨ sʊwa mam lɛɨ, a mwɨ bɔ a dʌng.

³³ “Nǝngɔ Tɛlalɔ a sʊwa gǝn gɔ, ‘Jǝgǝm twam mʊnɔ, daa nɨ mʊ tɨm woi, n daa sagsag.

³⁴ Bɨlǝngǝn, n kuwo gaalanɔ jǝ nǝ nǝbam mǝndɨ lɛ a tǝm Masarɨ. N nyʊwa wi jinɔ. Mǝ gǝla sǝ ba n bʊʊ nǝn ji. Kǝngkǝnɨ bɛ sǝ ba n twam ń a tǝm Masar.’

³⁵ “Musa nɨ ja kɔɨ, ja sʊwa gɔ, ‘Nuwo a dǝg ń gɔ ń yǝlam nǝ dʊʊ jǝbɔ nǝ mwatɨtǝm borangɨ?’ N nʊ Kwaama a twam sǝ a yǝlam nǝ dʊʊ jǝbɔ nǝ jǝgtǝm a gola tɨkalɨ bwɛ twama Kwaamaɨ nɨ a nʊng dul gǝnɔ a daa gǝ woi a kʊm bɛ tɨya nɨɨ.

³⁶ Nǝngɔ a jǝg ji a tǝm Masarɨ. A maa maajɨ kanjǝl tatǝm kang a nyiyo jǝbɔ kanjǝl laatǝm kang a tǝm Masar, jǝbɔ Wɨma Feli jǝbɔ kwaran, a yɔ nǝn a jolɔ fʊltǝnaalɨ.

³⁷ “N Musa nɨ a sʊwa nǝbɔ Israilaɨ gɔ, ‘Kwaama tʊng jem tʊng kaa nǝkuwotǝmkǝga na mǝ a kʊm kɛtǝlam jeni.’

³⁸ Nǝn gɔ a mʊgɔ nǝb nɨ a mʊrka a kuuli. Nǝn gɔ dakini jǝbɔ bwɛ twama Kwaamaɨ nɨ a sʊwa gǝn kɛl a dʌbʌl Yem Sinaii. Nǝn gɔ dakini jǝbɔ tʊgalam bǝnɨ. Nǝn gɔ a yo kɛl kʊlɨ nɨ a bɛ bǝm nǝnɨ.

³⁹ “Tʊgalam bǝnɔ ja kɔ bwangtǝm diil gǝnɔ. Ja yǝla gǝm gul. Jǝ swɨ lɛ ja yǝla a tǝm Masar.

⁴⁰ Nǝngɔ ja sʊwa Haruna gɔ, ‘Fɛ bǝm kwaamatɨn nɨ ja bǝm kǝga lɛɨ, jʊ a bwɨɨ Musa nɨ a jǝg bǝn a tǝm Masarɨ, bǝ nyǝm bɔ jʊ a bwɨ nǝn gɨɨ.’

⁴¹ Nǝn kwama gɔ ja fɛ shomɔ nǝn mʊn, wʊnɨ a jelka bɛ nɛɛgɔ nyɨɨ, ja twɨ gǝm yulʌn, jǝ maa bǝlátǝm lɛ nǝn maajɨ nɨ ja maa nǝn kang jini.

⁴² N kɛl dul jʊ nɨ Kwaama a yǝla jim guli, a yǝla nǝn ji a gola bwangtǝm nyanyamɨtɨnɨ. Kanga ja mʊla a mʊgɔ langǝn bwangǝn nǝbkuwotǝmkǝgagɨɨ gɔ, “ ‘Jǝ́ nǝbɔ Israilaɨ, jǝ́ biyo mɨ yʊwaltɨn, jǝ́ twɨ mɨ yulʌn, a yɔ nǝn a joltɨnɔ fʊltǝnaal a mʊgɔ kuuli ka?

⁴³ N bolatǝm jǝ́ maa jǝbɔ gushi Mɔlɛkɨ, jǝbɔ jelkatǝm nyanyamɨ shom Ramfanɨ, shomtɨn nɨ jǝ́ kʊʊ sǝ jǝ́ maa jim bǝlátǝmɨ. Mǝ tʊng jen tʊng fʌlen a gul Babila.’

⁴⁴ “Nǝn galɨgǝn tʊgalam bǝnɔ nǝn gushi wʊnɨ nʊng daa yɨm Kwaamaɨ lɛ a kuul jǝbɔ jii. N gushi wʊnɨ Kwaama a dǝg Musa gɔ a mɔɨ. A maa dǝngdǝng kanga Kwaama a sʊwa gǝn gɔ a mɔɨ.

⁴⁵ Gushi nɨ nǝn gɔ tʊgalam bǝnɔ a yo kʊla gǝnɨ, ja bɛ nǝn a tǝm nɨ nǝn kwama Joshuwa a yem dʊʊnɨ, nǝn kwama nɨ Kwaama a nǝm ji tǝm Bʌtʌbi, wʊnɨ a kaa ji a nu jini. Gushigɔ wo a ba la nǝn kwama Daudaɨ.

⁴⁶ Dauda a nya lǝma a daa Kwaama woi, a maa keli gɔ, gǝ mɔ mɔ Kwaama tʊga bǝn Yakubui gǝm kan bǝlátǝm.

⁴⁷ Nǝn Sulemanu a mɔ Kwaama gǝm lɔɨ.

⁴⁸ “Dalɨ nǝ Dʊʊ mɨ yɨ lɛ a lɔtɨn nɨ nǝfili a mɔɨ, kanga nǝkuwotǝmkǝgagɔ a sʊwaɨ gɔ,

⁴⁹ “ ‘Tɛlalɔ a sʊwa gɔ, Dʌbʌlɔ nǝn gɔ kotere fɔlɔn mǝndɨɨ. Tǝmɔ nǝn gɔ daa fatǝm naa mǝndɨɨ. N lɔ wɛ laa jǝ́ mɔ mɨ lɛ tagɨ? N daa won a yǝlam daa fǝbtǝm mǝndɨ?

⁵⁰ Ke bɔ mǝ nǝn kwaan mɨ mǝ fwal kanjǝl nɨ gwamɨ ka?’

⁵¹ “Jǝ́ nǝb kwamǝn dul, nǝb bwɨlang nǝl, nǝb bǝngɨ lɔl! Kwangkwang jǝ́ kɔ Yʊwa Kwaamaɨ lɛ. Kanga tʊgalam jenɔ a maaɨ, jen tʌjen n jʊ jǝ́ maa lɛɨ!

⁵² A mʊgɔ nǝbkuwotǝmkǝga nɨ, nuwo a kʊm jin tʊgalam jenɔ a nǝ bɔ gaalanɨ? Ja jʌ nǝb nɨ a sʊwa kɛl a bɛtǝm Nǝ Dǝngdǝng nɨ. Nǝjen tag jǝ́ lungto gǝn, jǝ́ jʌ gǝnɨ.

⁵³ Nǝjen jǝ́ yo diilɔ a daagɔ bɛtɔ twama Kwaamaɨ woi, jǝ́ bwangtǝn bɔ.”

Ja Mala Istifanus Nǝn Tɛl A Bʊla

⁵⁴ Nǝn kwama ja nyʊwa jʊ nɨɨ, ja nyʊwa nabwɨl nǝn bɨlǝngǝn. Jǝ kʊʊ nungʌn jinɔ lɛ.

⁵⁵ Yʊwa Kwaamaɨ a kwɛl a yii bʊtɔ Istifanusi, a tal nu gǝnɔ dʌng dʌbʌlɔ lɛ. Kuwo dʊʊn Kwaamaɨ lɛ, jǝbɔ Yesu tɨm a kang jajǝng Kwaamaɨ.

⁵⁶ Nǝngɔ Istifanus gɔ, “Dʌng, n kuwo dʌbʌlɔ a wumo, jǝbɔ Bʊla Nǝlɨ tɨm a kang jajǝng Kwaamaɨ.”

⁵⁷ Nǝngɔ ja tǝl matǝm bwaalɨgɨɨ, ja mǝlalam lɔl jinɔ. Gwam jinɔ ja gun tʌgo a gǝ gǝm.

⁵⁸ Ja gʊ gǝn, ja yɔ nǝn gɔ a gulen, jǝ mala gǝn nɛ nǝn tatǝn, jǝ swɨ lɛ ja jʌ gǝn. Nǝngɔ nǝb dʌngi nugɔ a ya dwangtɨn jinɔ a daa kaa bwayǝlɨ woi, dun gǝnɔ nǝn Shawulu.

⁵⁹ Kanga nɨ jǝ mala Istifanus lɛ nǝn tatǝnɨ, nǝngɔ a maa keligɨɨ gɔ, “Tɛlalɔ Yesu, yo kʊlɨ mǝndɨ.”

⁶⁰ Nǝngɔ a gǝla a jʊng a gung diil gǝnɔ nǝn kwaan gɔ, “Tɛlalɔ, bɛ ka ń ta lɛ bwɨlangkɛl nɨ a dul jin.” Sʊwatǝmɔ nyɨɨ, nǝngɔ a bʊlaɨ.